Exode 1

UNIMBƆTI NYÁNTÌ ISIRAYEEL YAB EEJIPITI TIŊKIN (1.1–15.21)

Isirayeel yab kpántì iyumbu Eejipiti tiŋkin

1Isirayeel#1.1 Isirayeel nìn gíti sá Jaakɔb yindi diba mun ní (kpèè Diny 32.29). Diyindi gbanti di dāa kpántì Jaakɔb naantiibi nibul yindi, Isirayeel nibul àá Isirayeel yab. - Dūú ŋmàntī nì Diny 46.8-27. jipɔmbi bin nìn nóoń-u ki dɔ́miń Eejipiti nì bi-dicaŋŋee yiŋŋi sèé: 2Rubeen nì Simeeyɔn nì Leefii nì Juuda 3nì Isakaar nì Sabulɔn nì Beenjameen 4nì Daani nì Neefitalii nì Gaadi nì Aseer. 5Jaakɔb nib kɔkɔ nìn kpáfì binib imuŋku ita nì saalaa ní. U-jipɔɔn Jooseefi úǹ nìn pée bí Eejipiti. 6Boonee ní Jooseefi nì u-nabiyaamu nì u-yuntiŋu nib kɔkɔ dāa kpíì. 7Míǹ boonee Isirayeel yab màl̄ ki būtì tikpil ki gbí kitiŋee ní ki ká mpɔn tiŋan pu#1.7 Kpèè Atuun 7.17..

8Ubɔtipɔɔn ubɔ nìn kāl̀ dibeel Eejipiti tiŋki pu, kaa pée nyí Jooseefi pu tiba. 9Ubɔtee nìn bí u-samaau yii: «Kpèèmaan, Isirayeel yab kpántì dinibul dikpaandi ki cáá mpɔn tiŋan pu ki jítiǹ-ti. 10Tí nyàab̀maan nsan kí bàtī bi-wíiŋŋu pu, án nín làá ŋá pu ní kujaau yaa láa nyánnée, bí taa cùú kūtì ti-nannanliibi pu bí jáǹ-ti ní kí sāǹ kí nyā ti-tiŋkinee.» 11Niinee ní bi lēē bikàliŋkpilib ki tɔ́ bi-pu bí tīī-bi atuun ŋin pɔ̄ɔ̄yee bí nīn tūǹ. Bi nìn yāntì bi máń Piitoom nì Ramseesi timmu mun poon bi làá nīn kpáafí Faaroo#1.11 Faaroo taapu di sá Eejipiti yab bɔtiu yindi. jintee. 12Ama bi yaa bíi sàantí Isirayeel yabee, ŋyunti gbanti ní bíǹ mɔ̀tīi bùtī ki jīǹ mpaan. An pu ní Eejipiti yab nìn kíǹ ki fàŋkí-bi. 13Niinee Eejipiti yab mɔ̄tìi bíi sàantí Isirayeel yab tikpil kii iyumbuee. 14Bi nìn yāntì Isirayeel yab wunti túŋkì nì atuun ŋin pɔ̄ɔ̄yee tɔ̄tam, an dàkà yii bi nìn búù titan ki māā brikisib ki tūǹ asaatuun. Eejipiti yab nìn cáá atuun ŋin kɔkɔ pɔ̄ɔ̄yee ki cáa nyìitī-bi mpɔn.

Faaroo wɔ́b́ Isirayeel yab

15Eebru yab nìn cáá bimatimmaanliibi bili bi nìn yíì ubɔ yii Siifira nì ki yíì un kíǹee Puya. Eejipiti bɔtiu nìn bí bi-kansikin ubɔ yii: 16«Ni yaa bíi màantí Eebru yab nimpoobi ubɔ ní ki yaa ká yii an sá kibininjabiki ní u bíi màal̀ee, ní fáá-kì kí kpɔ̀, ama an yaa sá kibinimpubikee, ní yàntī-kì.» 17Ama bimatimmaanliibee nìn fàŋkí Unimbɔti. An puee baa nìn pílifiǹ Eejipiti yab bɔtiu ní ki nìn yàntī bi màal̀ mbininjabiyaamu kaa kù-mu. 18Ní ubɔti yíiń bimatimmaanliibee ní ki bí-bi yii: «Ba pu ní ni ŋá míǹ, ki yàntī Eebru nimpoobi màal̀ naa fátí ki kù mbininjabiyaamu ní?» 19Bimatimmaanliibee nìn kíí Faaroo yii: «Eebru nimpoobi kaa sá kii Eejipiti nimpoobee. Bíǹ màal̀ bi-biyaamu sɔkɔmii kí dóó kí wàatī ní umatimmaanli ń nín bà.»

20Unimbɔti nìn bīiǹ bimatimmaanliibi boon, ní Isirayeel yab mɔ̀tīi bùtī ki cáá mpɔn tikpil.

21Kii bimatimmaanliibee nín nìn fāŋkì Unimbɔti puee, u nìn bīiǹ bi-boon bi-dicaŋŋi būtì. 22Niinee Faaroo yóoǹ u-yab kɔkɔ mara yii: «Ni yaa ká Eebru nimpoobi ubɔ màl̄ kibininjabikee, ní fōō-kì kí cáá tɔ̄ Niil mɔɔlin. An yaa sá kibinimpubikee, ní taa kpɔ̀-kì#1.22 Kpèè Atuun 7.19..»

Currently Selected:

Exode 1: BASSARDC

Highlight

Copy

Compare