Genèse 50

Jaakɔb síbitam nì u-kpool

1Jooseefi baa Jaakɔb dáaĺ u-ba ki sīntèe ní Jooseefi ŋàan̄ ki cìb̄-u ní ki súń ki yáliŋkì. 2Boonee ní u tùkū u-tɔntɔnliibi bin sá dɔkɔtabee yii bí bɔ́ntí u-baa ú taa sūū. Dɔkɔtabee nìn bɔ́ntì Jaakɔb wunti. 3Bi nìn dū iwiin imuŋku ili ní ki bɔ́ntì Jaakɔb ki ŋmītì u-wunti ikpafi ú taa sūū. Iwiin in nyɔkɔm bi nìn dù kí bɔ́ntí utaŋkpiil ú taa sūūyee dee. Eejipiti yab nìn dū iwiin imuŋku ita nì saalaa ki súń Jaakɔb kpool.

4Bi súń Jaakɔb kpool an jítèe ní Jooseefi bí bikpilib bin bí ki pìlīǹ Faarooyee yii: «M gbāam̀-ni, ní dàkà-mi tiniti kí tùkù Faaroo yii: 5<Kí wàatī m-baa ń kpúee, u nìn yāntì m pūtì ki pōoǹ-u yii u yaa kpíìyee, ḿ cáá-u kí síb́ Kanaan tiŋkin, dikaakul din u bɔ́ntì ki yóoǹ u-bee poon. An puee, pɔ̄-mi nsan ḿ cùú síb́ m-baa kí fàtīí gítiń#50.5 Dūú ŋmàntī nì 47.29-31..>» 6Faaroo gbìl̄ mimmee ní ki bí Jooseefi yii: «Nín̄ cá kí síb́ a-baa kii u nín yāntì a pūtì ki pōoǹ-u puee.» 7Niinee ní Jooseefi búntì kí cùú síb́ u-baa. Faaroo tɔntɔŋkpilib kɔkɔ nì u-kpambaliŋ nì Eejipiti tindaŋkpilib kɔkɔ nìn céeǹ-u. 8Jooseefi dicaŋkun yab kɔkɔ nì u-nabiyaamu nì u-baa dicaŋkun yab kɔkɔ nìn cūtì. Bi-biyaamu nì bi-waŋkuti baba di nìn pée kíǹ Gooseen tiŋkin. 9Binib biba mun nìn kā tɔrɔkub ní biba mun kā itaamu ki céeǹ Jooseefi, ní bin nìn céeǹ-uee dūu ŋá dinikitikpaŋkpaandi.

10Bi bàn̄ Ataadi naapaal din bí Jɔɔdan buŋgbandi lapu puee, ní ki kāl̀ niin ki súń Jaakɔb kpool tiŋan pu, ki gāā dituweel. Iwiin iluli ní Jooseefi dūu kāl̀ u-baa kpool niin. 11Kanaan yab bin nìn kóò niinee nín ká bi súń Jaakɔb kpool Ataadi naapaal pu miŋyee, ní bi bí yii: «Dikpool nee sá dikpɔkpaandi ní Eejipiti yab cee.» An pu ní bi pú dinaapaal din bí Jɔɔdan buŋgbandi lapu puee yii Abeel Miisirayiim, taapu di sá yii: <Eejipiti yab kpool>.

12Jaakɔb jipɔmbi nìn ŋá kii bi-baa nín nìn kpáafì-bi puee. 13Bi yōoǹ-u ki cūnnì Kanaan tiŋkin ki síb́ dikaakul din sá ntaŋkpalɔkɔ ki bí Makipeela saakunee. Abraam di nìn dá kusaau gbanti Eefrɔn, ueetija cee Mamiree timbiliiki caŋin ki dūu ŋá kuceeu#50.13 Dūú ŋmàntī nì Atuun 7.16.. 14Jooseefi síb́ u-baa ki dóòyee ní ki fātìi nín gítí Eejipiti, u nì u-nabiyaamu nì bin kɔkɔ céeǹ-u u cūtìi síb́ u-baayee.

Jooseefi dū u-nabiyaamu kpitii ki pú-bi

15Jooseefi nabiyaamu nín ká yii bi-baa kpíìyee ní bi bíi lì tɔb cee yii: «Mimmee Jooseefi yaa dū-ti ki ŋá u-poon ní ki làá téeǹ-ti ikpiti in kɔkɔ ti nìn ŋá-uee fáà!» 16Ní bi tú bí tùkù Jooseefi yii: «Kí wàatī a-baa ń kpúee, dinyɔɔbunjoolkaal din u nìn lēe sèé: 17<Ní tùkù Jooseefi yii m gbāam̀-u, ú dū u-nabiyaamu nín yīntiǹ-u puee nì bi nín ŋá-u ikpiti in kɔkɔee kí pɔ̄-bi.> Míǹ puee dū timbi bin nóó Unimbɔti un a-baa nìn nóóyee kpitii kí pɔ̄-ti.» Bi nín tùkū Jooseefi an bɔtee ní u bíi sūǹ. 18Niinee ní u-nabiyaamu mu-ba dɔ́miń ki lítì u-taaŋi taapu ní ki bí-u yii: «Ti sɔ̀, dū-ti kí kpántí a-yumbui.» 19Ní Jooseefi bí-bi yii: «Taa fàŋkìmaan! M ŋūǹ kí fōō Unimbɔti paaŋŋuɔɔ? 20Ni bàà nìn dākafì kí ŋá-mi tikpitil ní, ama ní Unimbɔti dūu kpántì tiŋan kí ŋmā kí fīī dinibukpaandi kii an nín bíi jītí pu díǹ ni wāĺ nee ní. 21An puee taa fàŋkìmaan. M làá nīn kpèé ni nì ni-dicaŋŋi tiŋan.» Míǹ ní u nìn sòon̄ nì bi dinyɔɔbummɔɔndi ki sɔ̄ŋkì bi-pɔbil.

Jooseefi kúm

22Jooseefi nì u-baa dicaŋkun yab nìn gbíntì ki kóò Eejipiti tiŋkin. Jooseefi nìn ŋá abin dilaataal nì saalaa ní ki nín kpíì. 23Jooseefi ká u-jipɔɔn Eefiraayiim biyaamu áli anaantitɔntɔkɔ ata, ní ki ká u-naantiiu Makiir, Manasee jipɔɔn biyaamu mun. 24Bi bí míǹ dalbee ní Jooseefi tùkū u-nabiyaamu yii: «Man làá kpú ní nee, ama Unimbɔti làá dāá pée tūtuǹ-ni. U làá dāá nyāntí-ni kitiŋ nee poon kí cáá-ni kí cùnnì kitiŋ kin u nìn pūtì ki pōoǹ yii u làá tīī Abraam nì Isaaki nì Jaakɔbee.» 25Ní Jooseefi yāntì Isirayeel yab pūtì ki pōoǹ-u, ní u lī-bi yii: «Unimbɔti làá dāá pée tūtuǹ-ni ní. Ní dāá kpáaǹ m-kpabiŋ kí nyā kitiŋ nee poon#50.25 Dūú ŋmàntī nì Disa 13.19, Joos 24.32, Eebru 11.22..» 26Jooseefi ŋá abin dilaataal nì saalaa ní ki nín kpíì. Bi nìn bɔ́ntì-u ki ŋmītì u-wunti ikpafi ú taa sūū, ní ki dū-u ki ŋá dakaa poon ki síiǹ Eejipiti tiŋkin niin.

Currently Selected:

Genèse 50: BASSARDC

Highlight

Copy

Compare