Genèse 49

Jaakɔb sòon̄ ki bīiǹ u-jipɔmbi saalaa nì bilee pu

1Jaakɔb yíiń u-jipɔmbi ní ki bí-bi yii:

«Ní kpāfìmaan m-cee ḿ tùkù-ni

tin làá fu bàń-ni fool boonee.

2Jaakɔb jipɔmbi, ní dāá kpāfìmaan kí pīlifì!

Ní dāá pīlifì man ni-baa Isirayeel.

3Sii Rubeen, m-jipɔŋkpiliu,

sii di dàkā m-ninjati,

sii ní m péé ki màl̄

m-fatikuu nín dáá tùm̀ee.

A cáá tinyool nì mpɔn

ki jítiǹ a-naalib kɔkɔ.

4A pɔ̄ɔ̄ kii nnyinjilee,

aa làá nīn gíti cáá ujipɔŋkpil nyooti.

Di sá yii a dōoǹ nì man a-baa nimpuu

ki kɔ́ǹ m-dooŋu tijɔkɔndi#49.4 kpèè 35.22..

5«Simeeyɔn nì Leefii sá kuyuu nì ku-bukul ní,

bi kpáfì kinyɔkɔ ki ŋá tipɔmbɔti.

6Maa kútì bi-nyɔɔpeeŋu poon,

bi-kpāfitam kaa fáatì-mi.

Di sá yii bi gíí diŋuul ki pɔ̄fì binib#49.6 kpèè 34.25.,

bi ŋá inimbinaakulim ki gāatì ki kūū inajaa.

7M ŋá bi-ŋuul fám,

kun puee bi dū-dì ki ŋá tipɔmbɔti.

M ŋá bi-búm fám,

kun puee bi dū-mì ki ŋá inimbinaakulim.

M làá yàkatī-bi kí tɔ̄ Jaakɔb niboolii kansikin.

M làá yàntī bí yàl̄ kí kɔ́ Isirayeel tiŋki kɔkɔn.

8«Juuda, a-nabiyaamu làá dāá nyɔ̄ŋkì-si,

a làá dāá pɔ̄ɔkiǹ a-nannanliibi sɔ́kɔ sɔkɔ.

A-nabiyaamu làá dāá gbàan̄ a-nimbiin.

9M-jipɔɔn Juuda, a sá digbikintipɔmbil

din nyáń njim ki fātìi gítìńee ní.

Gbikinti yaa gítìń ki dōoǹee,

ŋma di ŋūǹ kí ŋá-u mpɔn ú yīkì#49.9 Juuda gbikintiu : kpèè Dikà 24.9, Dilee 5.5..

10Sii Juuda ŋaan ní dibeel làá nīn pée bí,

a-dicaŋkun ní mpɔn làá nīn bí,

kí nīn cí un baasii yì dibeelee ń bàń.

Úǹ ní atimbun kɔkɔ làá dāá nīn tɔ́.

11U dāa dù u-maŋki kí gbìn̄ fiinyi subu,

fiinyi supanjal pu ní u dāa dù u-mambiki kí kúĺ.

Ndamam poon ní u dāa fíntí u-bɔkutil,

fiinyi damam poon ní u dāa fíntí u-bɔkutikpaandi.

12U-nimbiliŋ dāa máǹ kii ndamamee,

ní u-nyiŋŋi dāa pīiǹ kii nnaabiimee.

13«Sabulɔn dāa kóò tiŋku gbandi ní.

Niin ní meelab dāa yūlifí.

U-tiŋki dāa wāā kí tin sāā Siidɔn.

14«Isakaar sá kimaŋ kin yáàyee ní,

kì dɔ̄ awaŋgul ali kansikin#49.14 Bi gíti ŋūǹ kí nàatī yii: ki dɔ̄ tinaabakal tili kansikin..

15U ká yii laakin u dɔ̄ ki ŋùŋfēe ŋān̄,

ní kitiŋ mun kítì.

U dū u-ba ki tīī kí túń awaŋgul,

ki sīntiǹ u-ba kí tɔ̄ uyumbu tundi.

16«Daani làá dāá jī dibeel u-samaau pu

kii Isirayeel naakɔti kɔkɔ poon an nín bí puee.

17Daani sá ukoobu un dɔ̄ didandi puee,

kii ukoowaati un dɔ̄ nsannee.

Ukoobu júntí utaamu tagbíŋŋi,

ní utanjakal ń lítí tiwantampin.

18«M-Dindaan, a-fiil pu ní m máká.

19«Gaadi nannanliibi làá dāá cíliń u-pu,

ama úǹ di làá dāá lábití kí jà-bi.

20Aseer tiŋki làá dāá lòoǹ tijimmɔntiil,

tijin tin kítì bibɔtiibi ń jēe.

21«Neefitalii sá upeeman un tɔ́ u-bee,

u màal̀ mbinyanyaammu.

22«Jooseefi sá busubu bun lòoǹ tikpilee ní,

bu yú nnyimbul caŋin,

ní bu-pandi fɔ̄kɔǹ ki lībitì digundi.

23U-nannanliibi táká-u.

Bi kā u-pu kàti kati ki tòó-u ipiin,

24ama ní u ŋúb́ u-tɔbu an píkí,

u-ŋal tèen̄ ki yáb̀.

Jaakɔb Nimbɔtiu un sá Mpɔŋkɔdaan

ki kpàá Isirayeel,

ki sá u-taŋkpanaakookuee di tútúǹ-u.

25Man a-baa Nimbɔtiu un tútúǹ-see puee,

Unimbɔti Mpɔŋkɔdaan un bīī a-boonee puee,

á fōō tiŋan tin sá utaa ki nyēeń yilpuee,

kí fōō tiŋan tin sá nnyim ki bí taapuee,

kí fōō tiŋan tin sá binib nì tiwaŋkuti maabutiŋuee.

26Dibiindi din m fōō m-baabi ceeyee,

dibiindee jítiǹ din nyēeń

ajoon ŋin pée bí jaanjaanee pu,

ki jítiǹ cannaaku gbantammu pu.

Sii Jooseefi ń fōō dibiindi gbanti,

dí nīn bí sii un Unimbɔti lēē a-nabiyaamu kansikinee pu.

27Beenjameen sá sinsiŋku un tɔ̀ntī tinanee ní.

Kutaafaauee u cútí upeel ní kí ŋmɔ́

ní kujoouee ú dū tinan tin kíǹee kí yàkatī.

28«Bíǹ gbanti kɔkɔ di kpáfì ki sá Isirayeel naakɔti saalaa nì tilee. Tibɔjoolkaal tin bi-baa nìn sòon̄ nì bi ŋyunti ŋun u nìn bīiǹ bi-puee dee. U nìn tīī báà ŋma nì u-biindi nín sá puee.»

Jaakɔb kúm

29Jaakɔb kpáafì u-jipɔmbi yii: «Kɔŋkɔnnee, m làá kpì kí cùú ŋàl̄ m-baabi. M yaa búntèe, ní síb́-mi m-baabi kaakul din sá ntaŋkpalɔkɔ ki bí ueetija Eefrɔn saakunee. 30Ntaŋkpalɔkɔ gbanti bí Makipeela ki pìlīǹ Mamiree timbiliiki kin bí Kanaan tiŋkinee. M-naanja Abraam di nìn dá kusaau gbanti Eefrɔn cee án nīn sá-u kuceeu#49.30 Kpèè 23.3-18.. 31Niin ní bi síb́ u nì u-nimpuu Saara, ní ki síb́ m-baa Isaaki nì u-nimpuu Reebeeka. Niin ní ma mun síb́ m-nimpuu Leeya. 32Eeti yab cee ní u nìn dá kusaauee nì ntaŋkpalɔkɔ gbanti.» 33Jaakɔb nín kpáafì u-jipɔmbi míǹ ki dóòyee ní ki fātìi dōoǹ, ki dáaĺ u-ba ki sīntì ki nín cá u-naanjab cee ditaŋkpiilin#49.33 Kpèè Atuun 7.15..

Currently Selected:

Genèse 49: BASSARDC

Highlight

Copy

Compare