Exode 5

Mooyiisi nì Aarɔn cūtìi ká Faaroo

1Míǹ boonee ní Mooyiisi nì Aarɔn cūtì Faaroo cee, ní ki bí-u yii: «Ti-Dindaan Isirayeel yab Nimbɔtiu bí yii: <Yàntī m-nibul ń cù kuteeu pu kí jī jiŋaal kí tīī-mi tinyool.>» 2Ní Faaroo kíí-bi yii: «Ŋma di sá ni-Dindaan ní ḿ pīlifì tin u sòoǹee kí yàntī Isirayeel yab ń nīn cá ní? Maa nyí-u kaa làá yàntī Isirayeel yab ń nyā.» 3Ní Mooyiisi nì Aarɔn bí yii: «Eebru yab Nimbɔtiu lēē u-ba ki dàkā-ti. Míǹ puee pɔ̄-ti nsan tí còom̀ iwiin ita kuteeu pu kí cùú ŋá saraabi kí tīī ti-Dindaan ti-Nimbɔtiu. An yaa kaa ŋá míǹ, u ŋūǹ kí yàntī bìlbil kúm ń dāá kpɔ̀-ti, àá tí kpú kujaaun». 4Ní Eejipiti yab bɔtiu bí-bi yii: «Mooyiisi nì Aarɔn, ba pu ní ni bí ki sàal̄ ni-yab bí taa ti tɔ̄ ditundi ní? Cùú nīn tūm̀maan ni-tundi.» 5Ní Faaroo nìkī ki lī yii: «Kɔŋkɔnnee binibee būtì kitiŋ nee puee ní naa ti là bí tɔ̄ bi-tuuŋŋaa!»

Faaroo gíti gbéeǹ Isirayeel yab atuun

6Yaadal wiiŋŋu ní Faaroo tīī Eejipiti kàliŋkpilib nì Isirayeel yab tɔntɔŋkpilib mara nee yii: 7«Ní taa ti tīī Isirayeel yab timool bí ŋmàlim̀ titan kí mā brikisib kii ni nín kpààa ŋáań puee. Bí nīn kíǹ ki cá bi-ba ki nyàabìń timool. 8Ama ní yàntī bí nīn māā brikisib bin nyɔkɔm bi pée kpààa māāyee, ní taa bàtī. Bi sá biwutijoodambi ní, an pu ní bi bí ki lì yii: <Ti là kí cùú ŋá saraabi kí tīī ti-Nimbɔtiu.> 9Bi yaa dū atuun ki lúuń-bee, baa ti kāntí mpaan kí dàkafì bi-nyimɔmbɔti pu.»

10Bikàliŋkpilibee nì bitɔntɔŋkpilibee nyáń Faaroo ceeyee ní ki cūtì ki bí Isirayeel yab yii: «Faaroo bí yii bí taa ti tīī-ni timool. 11Nimbi ni-ba ń cù laakin ni làá kánní-tèe kí nyàabìń, ama taa làá bàtī brikisib bin ni kpààa māāyee nyɔkɔm pu.»

12Niinee ní Isirayeel yab yàl̄ ki kɔ́ Eejipiti tiŋki kɔkɔn ki kùl̀ timool tin bi làá dūú ŋmàlim̀ kí mā brikisibee. 13Ní Eejipiti yab tɔntɔŋkpilibee kā bi-pu ki lì yii: «Ní pée mā bi nín nìn cāabìń-ni timool ni māā brikisib bin nyɔkɔmee deedee, ubɔ ń taa fɔ́tí!» 14Faaroo kàliŋkpilib nìn gbáà ki kpáaǹ Isirayeel yab tɔntɔŋkpilib bin bi lēē bí nīn kpèé bi-nabiyaamuee ki lì yii: «Ba pu ní naa ŋúń ki máń fool nì díǹ brikisib bàn̄ kii dooooyee ni nín kpààa māā puee?»

15Ní Isirayeel yab tɔntɔŋkpilib bin Eejipiti yab lēē bí nīn kpèé bi-nabiyaamuee dɔ́miń ki bíi yáliŋkí Faaroo cee ki lì yii: «Ti-baa, ba pu ní a bí ki sàantí timbi a-tɔntɔnliibi mimmee? 16Baa ti tìì-ti timool, ama ní ki là yii tí nīn gbíntìi māā brikisib bin nyɔkɔm ti nìn kpààa māāyee, ní ki gbáà-ti. A-yab bíi ŋáań tin kaa kítèe!» 17Ní Faaroo kíí-bi yii: «Biwutijoodambi, ni sá biwutijoodambi ní! An pu ní ni lì yii: <Ti làá cùú ŋá saraabi kí tīī ti-Dindaan.> 18Kɔŋkɔnnee, cùú nīn tūm̀maan ditundi. Baa làá ti tīī-ni timool, ama ni làá nīn gbíntìi māā brikisib bin nyɔkɔm ni nìn kpààa pée māāyee ní.»

19Isirayeel yab tɔntɔŋkpilib bin bi nìn lēē bí nīn kpèé bi-nabiyaamuee ká yii laakin bi bí nee an pɔ́ɔkiǹ-bi, kun puee bi nìn bí-bi yii: «Ní taa bàtī brikisib bin ni kpààa māā ŋwiin kamaayee nyɔkɔm pu.» 20Bi nyáń Faaroo ceeyee ní ki cūtìi ká Mooyiisi nì Aarɔn, bíǹ yú ki cí-bi. 21Bi nìn nyáń Mooyiisi nì Aarɔn pu ki bí-bi yii: «Ti-Dindaan di wāĺ tin ni ŋá nee kí sòoǹ ni-bɔti! Ni yāntì Faaroo nì u-yab kaa ti là bi-nimbiliŋ ń wāl̀-ti. Ni ŋman dū kitàataajiki ní ki ŋá bi-ŋaan bí fōō kí kpɔ̀-ti.»

22Niinee ní Mooyiisi fātì ti-Dindaan pú ki bí-u yii: «M-Dindaan, ba pu ní a ŋá samaa nee tikpitil míǹ? Ba pu ní a nín túnní man dee? 23Doooo m nín cūtì Faaroo cee ki sòon̄ a-yil puee, úǹ bí ki sàantí Isirayeel yab ní, ní sii kaa pée ŋá tiba kí fīī a-nibul.»

Currently Selected:

Exode 5: BASSARDC

Highlight

Copy

Compare