Exode 6

1Ti-Dindaan bí Mooyiisi yii: «Kɔŋkɔnnee a làá ká m nín làá ŋá Faaroo puee. M-pɔŋkpaaŋŋu ŋun m làá dàkà-uee pu ní u làá yàntī m-nibul ń nyā. Mpɔŋkpaan gbanti di làá yàntī ú jà-ni kí nyāntí u-tiŋkin!»

Unimbɔti pōoǹ Mooyiisi kí fīī Isirayeel yab

2Unimbɔti gíti bí Mooyiisi yii: «Man di sá NI-DINDAAN. 3M nìn nyántì m-ba ki dàkā Abraam nì Isaaki nì Jaakɔb yii man di sá UNIMBƆTI MPƆŊKƆDAAN. Ama maa nìn lēē ki dàkā-bi yii bi yíì-mi <NI-DINDAAN#6.3 B. 2-3. kpèè 3.13-15.>. 4M nìn pōoǹ-bi dipoondi yii m làá dū Kanaan tiŋki kin bi nìn kóò ki sá binicambee kí tīī-bi. 5M gbìl̄ Eejipiti yab nín tīī Isirayeel yab atuun ŋin pɔ̄ɔ̄ bi bí ki tūǹ ki yáliŋkée pu, ní maa súntì dipoondi din m nìn pōoǹ-bee pu. 6An puee, tùkù Isirayeel yab yii: <Man di sá ni-Dindaan. M làá nyāntí-ni Eejipiti yab tuuŋŋi ŋin pɔ̄ɔ̄yee poon ní kí fīī-ni kí nyāntí ni-yuŋkun. M làá dū m-pɔŋkpaaŋŋu nì m-tuŋkpaaŋŋi kí fīī-ni kí líí. 7M làá dū-ni ki ŋá m-nibul ní kí nīn sá ni-Nimbɔtiu ní ní béé yii man ni-Dindaan ni-Nimbɔtiu di nyántì-ni Eejipiti yab tuuŋŋi ŋin pɔ̄ɔ̄yee poon. 8M làá cáá-ni kí cùnnì kitiŋ kin poon m nìn pūtì yii m làá tīī Abraam nì Isaaki nì Jaakɔbee. Nimbi ní m làá dū kitiŋ gbanti kí tīī ní nīn kíǹ ki yì. Man ni-Dindaan di lī míǹ.>» 9Mooyiisi cáań an bɔtee ki lī Isirayeel yab cee, ama kuyuŋu gìŋ́ŋi ŋin poon bi bée kaa yāntì bi pílifiǹ-u.

10Ní ti-Dindaan fātìi gíti sòon̄ nì Mooyiisi yii: 11«Cù kí tùkù Faaroo, Eejipiti bɔtiu yii ú yàntī Isirayeel yab ń nyā u-tiŋkin.» 12Ní Mooyiisi kíí-u yii: «Isirayeel yab gba kaa pílifiǹ-mi, Faaroo di dāa nín pílifíǹ man un kaa ŋūǹ kí sòoǹ mmɔntiimin naaa?» 13Niinee ní ti-Dindaan tùkū Mooyiisi nì Aarɔn bi nín làá sòoǹ Isirayeel yab nì Faaroo, Eejipiti yab bɔtiu pu ní Isirayeel yab ń nyā Eejipiti tiŋkinee.

Mooyiisi nì Aarɔn naanjab yiŋŋi

14Isirayeel yab naakɔti kpilib yiŋŋi sèé.

Jaakɔb jipɔŋkpiliu Rubeen jipɔmbi di sá Anɔki nì Palu nì Eetisirɔn nì Kaarmii. Rubeen naakookun yab naanjab yiŋŋi dee.

15Simeeyɔn jipɔmbi di sá Jeemuyeel nì Jamiini nì Oodi nì Jaakin nì Sookaar nì Saayuul, ukanaannimpu jipɔɔn. Simeeyɔn naakookun yab naanjab yiŋŋi dee.

16Leefii jipɔmbi ki nóó nì bi-naantitɔntɔkɔŋ yiŋŋi di sá Geersɔn nì Keeyaati nì Meerarii.

Leefii ŋá abin dilaataal nì mmuŋku nì saalaa nì aluli ní ki nín kpíì. 17Geersɔn jipɔmbi di sá Liibinii nì Simeeyii. Báà ŋma sá u-maaliŋun yab naanja. 18Keeyaati jipɔmbi di sá Amiiraam nì Yitiseeyaar nì Eebrɔn nì Usiyeel. Keeyaati ŋá abin dilaataal nì mmuŋku nì saalaa nì ata ní ki nín kpíì. 19Meerarii jipɔmbi di sá Maalii nì Musii. Leefii dicaŋŋi yab nì bi-naantitɔntɔkɔŋ yiŋŋi dee.

20Amiiraam cáá u-baa niisal Jookeebeedi ní u màl̄-u Aarɔn nì Mooyiisi. Amiiraam ŋá abin dilaataal nì mmuŋku nì saalaa nì aluli ní ki nín kpíì.

21Yitiseeyaar jipɔmbi yiŋŋi di sá Kooree nì Neefeegi nì Sikirii. 22Usiyeel jipɔmbi yiŋŋi di sá Miisayeel nì Eeliisafan nì Sitirii.

23Aarɔn cáá Eelseeba, Amiinadaab bisal, Naasɔn niisal. U nìn màl̄-u Nadaab nì Abiyuu nì Eeleeyasaar nì Itamaar.

24Kooree jipɔmbi yiŋŋi di sá Asiir nì Eelkana nì Abiyasafi. Kɔree dicaŋku yab naanjab yiŋŋi dee.

25Aarɔn jipɔɔn Eeleeyasaar cáá Putiyeel bisalib ubɔ, ní u màl̄-u Fineeyaasi. Leefii naakookun yab kpilib yiŋŋi dee.

26Mooyiisi nì Aarɔn gbanti ní ti-Dindaan bí yii: «Ní nyāntímaan Isirayeel yab Eejipiti tiŋkin, bí nīn nóó tɔb akiti akiti kii bijanjaliibee.» 27Mooyiisi nì Aarɔn di nìn tí cūtìi sòon̄ nì Faaroo Eejipiti yab bɔtiu yii ú yàntī Isirayeel yab ń nyā u-tiŋkin.

Unimbɔti fātìi būsì Mooyiisi u-poondi

28Ti-Dindaan nín nìn sòon̄ nì Mooyiisi Eejipiti tiŋkinee, 29u nìn bí-u yii: «Man di sá ni-Dindaan. Á tùkù Faaroo Eejipiti yab bɔtiu tin kɔkɔ m sòon̄ nì see.» 30Ní Mooyiisi kíí-u yii: «Man kaa ŋūǹ kí sòoǹ mmɔntiim, mana ní Faaroo làá ŋmā kí pīlifiǹ-mi?»

Currently Selected:

Exode 6: BASSARDC

Highlight

Copy

Compare