Exode 7

1Ní ti-Dindaan bí Mooyiisi yii: «Pīlifì, m làá dū-si kí kpántí kii Unimbɔtee ní Faaroo cee, ní a-maan Aarɔn ń nīn sá a-bɔnaatiliu. 2Sii di làá tùkù Aarɔn tin kɔkɔ m sòon̄ nì see ní úǹ ń dūú nàatī Faaroo, án nín làá ŋá pu ú yàntī Isirayeel yab ń nyā u-tiŋkinee. 3Ŋyunti gbantee ní man ḿ yàntī Faaroo pɔbil ń pɔ̄ɔkì ní ḿ bùtī m-daanti nì m-maamaacib Eejipiti tiŋkin#7.3 Kpèè Atuun 7.36.. 4Ama Faaroo kaa làá pīlifiǹ-ni. M làá dàkà Eejipiti yab m-pɔŋŋu, kí dáaĺ bi-tafal ŋkpitim pu, ní kí nyāntí m-nibul Isirayeel yab Eejipiti tiŋkin bí nīn nóó tɔb akiti akiti kii bijanjaliibee. 5M yaa láa dàkā-bi m-pɔŋŋu míǹ ki nyántì Isirayeel yab bi-kansikinee, niin ní bi dāa béetí yii man di sá ni-Dindaan.»

6Ní Mooyiisi nì Aarɔn ŋá kii ti-Dindaan nín tīī-bi mara bí ŋá puee deedee. 7Ŋyunti ŋun bi nìn cūtìi sòon̄ nì Faarooyee, Mooyiisi nìn cáá abin imuŋku inaa, ní Aarɔn cáá abin imuŋku inaa nì abin ata.

Faaroo yíì kaa pílifiǹ Mooyiisi nì Aarɔn

8Ti-Dindaan bí Mooyiisi nì Aarɔn yii: 9«Faaroo yaa bālifì-ni yii ní ŋá maamaaci ubɔee, á tùkù Aarɔn yii ú yòon̄ u-kpandɔŋu kí lúkú kitiŋ Faaroo nimbiin, ŋu làá kpántí ukoobu.»

10Niinee Mooyiisi nì Aarɔn nín cá Faaroo cee, ní ki ŋá kii ti-Dindaan nín bí yii bí ŋá puee. Aarɔn dū u-kpandɔŋu ki lúkú kitiŋ Faaroo nì u-kpambaliŋ nimbiin, ní ŋu kpántì ukoobu. 11Ní Faaroo yíiń bibɔɔbi nì bikpaŋkpantiibi bin bí Eejipitee, ní bi mun dū bi-kpaŋkpantiiku ki ŋá míǹ mbaantiim. 12Báà ŋma dū u-kpandɔŋu ki lúkú ní ŋu kpántì ukoobu. Ama ní Aarɔn kpandɔŋu dū bíǹ kpandɔi ki nátì. 13Nì míǹ kɔkɔee, Faaroo pɔbil gbíntìi pɔ̄ɔ̄ waa gbìl̄ ki tīiǹ Mooyiisi nì Aarɔn kii ti-Dindaan nín pée lī puee.

Nnaabupeepeekaa: nnyim kpántì fatiku

14Ní ti-Dindaan bí Mooyiisi yii: «Faaroo pɔbil pɔ̄ɔ̄, waa là kí yàntī Isirayeel yab ń búntí. 15Fool kutaafaauee, á fu kíntí Faaroo ŋyunti ŋun ní u cá dimɔɔgbandee. Ní cīití-u Niil mɔɔl caŋin. Á fu nín̄ ŋúb́ ŋkpandɔ ŋun a dūu kpántì ukoobuee a-ŋaan. 16Á fu tùkū-u yii: <Ti-Dindaan Eebru yab Nimbɔtiu di túnní-mi ḿ dāá tùkù-si yii á yàntī u-nibul ń cù kuteeun kí jāam̀-u, ama ní ki dāa sāā díǹ nee, aa pílifiǹ-u. 17M làá dū m-kpandɔŋu nee kí fáá Niil nyim ní mí kpántí fatiku. Ti-Dindaan bí yii ḿ ŋá míǹ ní á béé yii úǹ di sá ti-Dindaan#7.17 Kpèè Dilee 16.4.. 18Ijɔm in kɔkɔ bí Niil mɔɔlinee làá kpú, ní nnyim ń bīil̀ ní Eejipiti yab kaa làá ti ŋmā kí nyɔ̀ nnyim gbanti.>» 19Ti-Dindaan gíti bí Mooyiisi yii: «Tùkù Aarɔn yii ú yòon̄ u-kpandɔŋu kí tàntī Eejipiti yab nyiŋfii nì bi-buŋyi nì bi-nyimbɔbiliŋ kɔkɔ pu, án nín làá ŋá pu Eejipiti nyiŋfii kɔkɔ ń kpántí fatiku ki kpáaǹ bi-booŋŋi nì bi-lɔnti poonee.»

20Mooyiisi nì Aarɔn ŋá kii ti-Dindaan nín bí yii bí ŋá puee. Aarɔn yōoǹ u-kpandɔŋu ki fáá nnyim min dɔ̄ Niil mɔɔlinee Faaroo nì u-kpambaliŋ nimbiin, ní ibun kɔkɔ nyim kpántì fatiku. 21Ní ijɔm in kɔkɔ bí dimɔɔlinee kpíì, ní dimɔɔl nyim núukì. Ní Eejipiti yab kaa ti ŋūǹ kí nyɔ̀-mì. Niinee Eejipiti tiŋki kɔkɔ dūu kpántì fatiku.

22Ama Eejipiti yab kpaŋkpantiibi mun dū bi-kpaŋkpantiiku ki ŋá míǹ mbaantiim. Faaroo pɔbil pɔ́ɔkì waa pílifì Mooyiisi nì Aarɔn, kii ti-Dindaan nín pée lī puee. 23Faaroo fātìi nín gítí u-dumpu kaa fātìi tɔ́ tin jítèe poon tiba. 24Ní Eejipiti yab kíĺ ki bíi gbì anyimbɔbil Niil mɔɔl caŋin ki nyàab̀ nnyim kí nyɔ̀, kun puee baa nìn gíti ŋūǹ kí nyɔ̀ dimɔɔl nyim.

25Ti-Dindaan nìn yāntì Niil mɔɔl kpántì fatiku míǹ ki tin sāā iwiin iluli.

Nnaabuliliiti: kpaabi

26Míǹ boonee#7.26 Tigbɔn tiba poonee 26-29 sá 8.1-4. ní ti-Dindaan bí Mooyiisi yii: «Cùú tùkù Faaroo yii: <Man ni-Dindaan bí yii á yàntī m-nibul ń nyā kí cùú jāam̀-mi. 27A yaa yíì yii bí taa cùee, m làá yàntī kpaabi ń dāá kpátí kí gbí a-tiŋki kɔkɔ poon. 28Kpaabi làá gbí Niil mɔɔl poon, ní kí nyānní kí dāan̄ kí kɔ́ a-dumpu nì a-diikun nì a-dooŋu pu, kí kɔ́ a-kpambaliŋ dumpui nì a-tiŋki kɔkɔ nib dumpui, ní kí kɔ́ bi-faŋyi nì bi-sambiliŋ poon. 29Kpaabee làá jɔ̄m̀ kí tɔ́kɔń sii nì a-tiŋki kɔkɔ nib nì a-kpambaliŋ kɔkɔ pu.>»

Currently Selected:

Exode 7: BASSARDC

Highlight

Copy

Compare