Genèse 17

Unimbɔti líì Abram u-poondi

1Ŋyunti ŋun Abram nìn cáá abin diba kpá dilaataalee, ti-Dindaan nìn nyántì u-ba ki dàkā-u ní ki bí-u yii: «Man di sá Unimbɔti Mpɔŋkɔdaan. Á nīn ŋáań min fáatì-mee kí nīn bí deedee. 2M làá lafun ŋá tin m pōoǹ yii m làá ŋá kí tīī-see, kí bùtī a-maaliŋu tikpil tikpil.» 3Ní Abram tātìi dōoǹ dicincibil, ní Unimbɔti bí-u yii: 4«Kpèè, dipoondi din man pōoǹ-see sɔ̀. A làá dāá kpántí anibul kupaau baa ní. 5Baa làá nīn gíti yíì-si Abram#17.5 Abram taapu sá yii ubaati un nyáń diyindee ní Abraam taapu sá yii atimbun kupaau baa, kpèè Room 4.17.. A-yindi di làá nīn kíǹ ki sá Abraam, kun puee m dū-si ki kpántì atimbun kupaau baa. 6M làá bùtī a-maaliŋu tikpil tikpil. A-maaliŋu gbanti poon ní m làá yàntī atimbun nì bibɔtiibi ń nyā. 7Dipoondi din m pōoǹ-si nee, dì sá ki tīī sii nì a-maaliŋu kɔkɔ ní kí nīn cáa cá jaanjaan, dì kpá kí gbíntí. Di-pu ní m làá nīn sá a-Nimbɔtiu nì a-naantitɔntɔkɔŋ Nimbɔtiu#17.7 Kpèè Luuki 1.55.. 8M làá dū Kanaan tiŋki kin poon a bí kunicaŋu nee kɔkɔ kí tīī sii nì a-naantiibi bin làá páanní a-boonee, kí nīn cá jaanjaan. Ní man di làá nīn pée sá bi-Nimbɔtiu#17.8 Kpèè Atuun 7.5..»

9Ní Unimbɔti nìkī ki bí Abraam yii: «Siiyee, á nīn ŋúb́ m-poondi, kí nīn ŋáań min m lèe, sii nì a-naantiibi bin dáá bíń boon ki dòońee kɔkɔ. 10Ni nín máaǹ kí nīn ŋúb́ dipoondi din m pōoǹ sii nì a-naantiibi bin dáá bíń boon ki dòońee puee di sá bin kɔkɔ pée sá bininjab ni-kansikinee ń gíí dikpancandi#17.10 Kpèè Atuun 7.8, Room 4.11.. 11Digiil gbanti di sá dipoondi din m pōoǹ-nee daaŋku man nì ni kansikin. 12A-maaliŋu poon kí nīn pée cáa cá a-naantiibee, bi yaa màl̄ kibininjabikee, bí gíí-kì dikpancandi iwiin inii dal. Ki kpáaǹ iyumbu nín màl̄ bin ni-ciŋŋinee, nì bin ni dáal̀ binicambi ceeyee, báà udaan yaa pée nyánní laakin kaa sá a-maaliŋunee, á gíí-u. 13Uyumbu nín màl̄ un a-cindinee, nì un a dū a-nimbiliŋ ki dée, bi máaǹ kí gíí-bi, m-poondi daaŋku gbanti ń nīn bí ni-wunti pu míǹ kí nīn cá jaanjaan. 14Uninja un kaa gíí dikpancandee, ní nyāntí-u ni-nibul kansikin, kun puee udaan kpītì m-poondi.»

15Ní Unimbɔti gíti bí Abraam yii: «Á taa ti yíiń a-nimpuu yii Saarayi, á nīn kíǹ ki yíì-u yii Saara#17.15 Saara taapu sá yii ubɔtiisal.. 16M làá bìin̄ u-boon kí yàntī ú màal̀-si kibininjabiki, kí bìin̄ u-boon ú kpántí anibul kupaau na. U-maaliŋu poon ní atimbun tikpil bɔtiibi làá nyā.» 17Niinee ní Abraam tātìi dōoǹ dicincibil ki bíi lāā ní ki lī u-neen yii: «Unil un cáá abin dilaataalee gíti ŋūǹ kí màal̀ kibikaaa? Àá Saarayi un ŋá abin imuŋku inaa nì saalaayee di gíti ŋūǹ kí màal̀ kibiki ní?» 18Ní Abraam bí Unimbɔti yii: «Too, á pɔ̄ Isimaayeel mmaŋfafɔkɔn!» 19Ní Unimbɔti bí-u yii: «M gbìl̄, ama an kaa sá Isimaayeel bɔti ní m bíi sòoǹ, an sá a-nimpuu Saara di làá màal̀-si kibininjabiki. Á dāá pɔ̄-kì diyindi yii Isaaki#17.19 Isaaki taapu sá yii u láń.. Úǹ nì u-naantiibi bin làá páanní boonee di làá fōō dipoondi din m pōoǹ dí nīn bí kí nīn cá jaanjaanee. 20A nín mēē-mi Isimaayeel pu miŋyee, m gbìl̄. M làá bìin̄ u-boon kí yàntī ú màal̀ ki bùtī tikpil tikpil. U làá dāá màal̀ bibɔtiibi saalaa nì bili, ní u-maaliŋu ń dāá nīn sá ditimbuŋkpaandi. 21Ama an yaa kíǹ m-poondee, dì sá ki tīī Isaaki un Saara làá dāá màal̀ jiil naŋkɔnampuee ní.»

22Unimbɔti sòon̄ nì Abraam ki dóòyee, ní ki yíkì u-cee ki nín jɔ́ḿ. 23Daliŋkin Unimbɔti sòon̄ nì Abraamee, yaadal gbanti ní u yíiń u-jipɔɔn Isimaayeel nì iyumbu nín màl̄ bininjab bin u-cindinee nì bin u dáal̀ee, nì bin pée sá bininjab ki bí u-cindinee kɔkɔ, ní ki gífì-bi akpancan kii Unimbɔti nín bí yii u ŋá puee. 24Abraam nìn cáá dibindi diba kpá dilaataal ní ki gíí dikpancandi. 25U-jipɔɔn Isimaayeel nìn cáá abin saalaa nì ata ní ki gíí dikpancandi. 26Ŋwimbaanti ní Abraam nì u-jipɔɔn Isimaayeel kpáfì ki gíí dikpancandi. 27Ŋwimbaanti gbanti ní u gíí ki kpáaǹ bin kɔkɔ pée sá bininjab ki bí u-cindinee, iyumbu nín màl̄ biŋyee nì bin u dáal̀ binicambi ceeyee.

Currently Selected:

Genèse 17: BASSARDC

Highlight

Copy