Genèse 23

Abraam dá kitiŋ ki síb́ u-nimpuu Saara

1Saara ŋá abin dilaataal nì mmuŋku nì abin aluli ní ki nín kpíì. 2U kpíì Kiiriyati-Ariba, an dàkà yii Eebrɔn, Kanaan yab tiŋkin. Ní Abraam dɔ́miń ki yáliŋkì ki súń u-nimpuu Saara kpool. 3Abraam súń ki dóòyee ní ki yíkì u-nimpuu utaŋkpiil cee ki cūtì ki ká Eeti yab ki bí-bi yii: 4«M sá unicaan ní ki kóò ni-kansikin doo. Ní pɔ̄maan-mi kuceeu ḿ síb́ m-nimpuu#23.4 unicaan : kpèè Eebru 11.9, 13. - Kí dā dikaakul: kpèè Atuun 7.16..» 5Ní Eeti yab kíí-u yii: 6«Pīlifiǹ-ti, ukpil! A sá Unimbɔti niliu ubɔ ní ki kóò ti-kansikin. Lēē ti-taŋkpiifalii poon ŋun pée ŋān̄ a-ceeyee kí síb́ a-nimpuu. Báà ubɔ ti-kansikin kaa làá yíí yii á taa síb́ a-niliu u-taŋkpiifaliŋu poon.»

7Ní Abraam yíkì ki gbāaǹ Eeti tiŋki yab nimbiin, 8ní ki bí-bi yii: «Ni yaa lafun kíí tiŋman yii ḿ síb́ m-nimpuuee, ní gbàam̀ Soowaar jipɔɔn Eefrɔn, 9ú tīī-mi u-taŋkpalɔkɔŋu#23.9 Dooooyee, Isirayeel yab nìn síb̀ bi-nib itaŋkpalɔkɔn ní. ŋun bí Makipeelee. U-taŋkpalɔkɔŋu gbanti bí u-kpaabukuŋu. Ú dū-ŋu kí nyāfiǹ-mi ni-kɔkɔ nimbiin án kpántí mpaan ŋun m làá nīn síb̀ m-nib ni-kansikinee. M làá pà-u ŋu-nyampooku nín sá puee deedee.» 10Eefrɔn gbanti nìn kā u-nabiyaamu Eeti yab kansikin, ní ki nìn kíí Abraam, Eeti yab bin kɔkɔ nìn dɔ́miń ki kā bi-tiŋki punyɔkɔpuee nimbiin yii: 11«Aayee, ukpil! Pīlifiǹ-mi, maa làá nyāfiǹ-si kusaau nì ntaŋkpalɔkɔ ŋun bí ku-poonee. M làá dūú pɔ̄-si ní m-nabiyaamu kɔkɔ nimbiin, á cù kí síb́ a-nimpuu.»

12Ní Abraam fātìi tí gbāaǹ binib gbanti nimbiin 13ní ki bí Eefrɔn, samaa kɔkɔ nimbiin yii: «M gbāam̀-si, gbìl̄ kí tīiǹ-mi. Yàntī ḿ dā kusaau gbanti kí pà-si ku-daaku nín sá puee, á fōō ḿ ŋmā kí síb́ m-nimpuu niin.» 14Ní Eefrɔn kíí Abraam yii: 15«Ukpil, kusaau gbanti nimbiŋmiiku jitɔmbi alaataa anaa kaa ŋūǹ kí nīn sá tiba man nì si kansikin, cáá a-nimpuu kí síb́.»

16Niinee ní Abraam gbìl̄ ki tīī nì Eefrɔn ní ki ŋmāntì kusaauee daaku nimbiliŋ jitɔmbi alaataa anaa, kii bi nín nìn pée kpántí puee ki tīī-u, ki nóó nì u nín nìn lī pu Eeti yab kɔkɔ nimbiinee. 17An nín dī pu ní Eefrɔn saaku kun bí Makipeela, Mamiree nyɔkɔpuee nì ntaŋkpalɔkɔ ŋun nìn bí kusaau gbanti poonee nì isufi in kɔkɔ nìn yú ku-poonee 18dūu kpántì Abraam wantee dee. Eeti yab nì bin kɔkɔ nìn kpáfì kitiŋ gbanti punyɔkɔpuee nimbiin ní tíǹ gbanti kɔkɔ nìn jítì.

19Míǹ boonee ní Abraam cáá u-nimpuu Saara ki síb́ ntaŋkpalɔkɔ gbanti poon, Makipeela saakun Mamiree caŋin, an dàkà yii Eebrɔn, Kanaan yab tiŋkin. 20Ki yōoǹ yaadal wiiŋŋu ní Eeti yab dū kusaauee nì ntaŋkpalɔkɔ ŋun bí ku-poonee ki nyáfiǹ Abraam ní an kpántì u-wanti, u dūu ŋá kuceeu ki síb̀ u-yab.

Currently Selected:

Genèse 23: BASSARDC

Highlight

Copy