Genèse 24

Isaaki nimpucáatam

1Abraam nìn púĺ tikpil, ní ti-Dindaan mun nìn bīiǹ u-boon ajan kɔkɔ pu. 2Dalbee, Abraam yíiń u-tɔntɔnliu un yúntì u-cee ki sá ukpil ki kpèé u-wanti kɔkɔee ní ki bí-u yii: «Dū a-ŋal kí tíkiń m-tapandi taapu#24.2 Eebru yab ceeyee, á dū a-ŋal kí tíkiń unil tapandi taapuee sá kii ti-cee tibɔti yaa páb́, unil nín lì u-juti yii ú fáá u-ŋaan kí pùtī puee ní.. 3M là á pùtī ti-Dindaan yilpu nì taapu Nimbɔtiu yii aa làá cáá Kanaan yab bin kansikin m kóò nee sapɔmbi ubɔ kí tīī m-jipɔɔn. 4Ama a làá cù m-dicaŋku poon ní kí cáá unimpu kí tīī m-jipɔɔn Isaaki.» 5Ní u-tɔntɔnliuee kíí-u yii: «An yaa yíì, unimpu kaa làá dāá kíí kí nóoń-mi kí dāan̄ kitiŋ kin poon ti bí nee. Mimmee ḿ dāá gíiǹ a-jipɔɔn a-tiŋki kin poon a yíkìńeeee?» 6Ní Abraam bí-u yii: «Aayee, á taa pée màkan̄ ŋwindal yii a làá gíiǹ m-jipɔɔn m-tiŋkin. 7Ti-Dindaan yilpu Nimbɔtiu un yōoǹní-mi m-tiŋkin nì m-baa cindinee di sòon̄ ki pūtì ki tùkū-mi yii: <M làá dāá dū kitiŋ kin poon a bí nee ní kí tīī a-naantiibi.> Unimbɔti gbanti di làá tɔ̄ń u-tuuŋŋu ní ŋú céeǹ-si niin ní á ká unimpu kí tīī m-jipɔɔn. 8Ama unimpu yaa yíì yii waa làá nóó-si kí dāan̄ dooyee, mimmee a nyáń dipùtil din m yāntì a pūtèe bɔtin. Nì míǹ kɔkɔee, á taa gíiǹ m-jipɔɔn m-tiŋkin.» 9Bi sòon̄ míǹ ki dóòyee ní utɔntɔnlee dū u-ŋal ki tíkiǹ u-kpiliu Abraam tapandi taapu ní ki pūtì yii u làá ŋá míǹ. 10Boonee ní utɔntɔnlee yōoǹ u-kpiliu gutaamui saalaa ní ki lēē u-kpiliu gaajawanti poon tiwammɔntiil tikpil, ní ki búntì Aram-Naarayiim#24.10 Aram-Naarayiim taapu sá yii <Aram ibun ili.> An di gíti sá Padan-Aram ní ki bí Meesoopootamii tiŋkin., Naakɔɔr tiŋkin watil pú.

11U bàn̄ee ní ki cáá igutaamu ki gbāaǹ dinyimbɔbil din bí ki pìlīǹ kitiŋinee caŋin. An nìn sá kujoou ŋyunti ŋun binimpoobi dòoń ki lúù nnyimee ní. 12Ní u mēē yii: «Ti-Dindaan, m-kpiliu Abraam Nimbɔtiu, m gbāam̀-si, dàkà m-kpiliu Abraam a-ŋanti kí yàntī ḿ ká kun m nyàab̀ee díǹ. 13Kpèè, m yú dinyimbɔbil caŋin ní nee ní bisapɔmbi nyēeń kitiŋin ki dòoń ki lúù nnyim. 14Usapɔɔn un m yaa bí yii: <M gbāam̀-si, kpòon̄ a-baŋki ḿ nyɔ̀,> ní u yaa bí-mi yii: <Nyɔ̀m̄ ḿ lúń kí tīī a-gutaamui mun ń nyɔ̀ee,> usapɔɔn gbanti ń nīn sá un a lēē kí tīī a-tɔntɔnliu Isaakee. A yaa ŋá mimmee ní m làá béé yii a ŋá m-kpiliu tiŋan.» 15U dáá bíi sòoǹ kaa láá ŋmíl̀ ní usapɔɔn un bi yíì Reebeekee túń u-baŋki u-gbigbil pu#24.15 Eebru yab bíǹ kaa nìn tūntí tiwan bi-yiliŋ pu, bi nìn tūntí bi-gbigbil pu ní. ki bāań. Reebeeka baa di nìn sá Beetuweel, ní u-naanja sá Abraam naal Naakɔɔr, ní u-naan sá Miilka. 16U nìn ŋān̄ kunyaaŋŋu tikpil ní kaa nìn nyí uninja. U bàn̄ee ní ki kɔ́ ki lúń nnyim ki gbéeǹ u-baŋki ki fātìi nyáń kí nīn kùǹ.

17Ní utɔntɔnlee sáǹ ki kíntì-u ní ki bí-u yii: «M gbāam̀-si, pɔ̄-mi a-nyim fiii ḿ nyɔ̀.» 18Ní usapɔɔnee kíí-u yii: «Ukpil, m làá tīī-si á nyɔ̀.» Niinee ní u túutì u-baŋki malaa ní ki tīī-u nnyim u nyùn̄. 19Usapɔɔnee tīī-u u nyùn̄ ki dóòyee ní ki bí-u yii: «M làá lúń kí cáań a-gutaamui kɔkɔ ń nyɔ̀ kí báĺ.» 20U lī mimmee ní ki kpáatì nnyim min kā kibaŋŋinee ki sītì laakin tiwaŋkuti nyùee ní ki tóotì ki cūtì ki gíti lúnní. U nìn gítí ki lúùń míǹ ní igutaamu kɔkɔ dāa nyùn̄ ki bál̀. 21Ní utɔntɔnlee kíǹ ki yú ki kpèé usapɔɔnee soooo ki dàkafī u-neen yii ti-Dindaan kalin bīiǹ u-saŋŋuee pu níii!

22Igutaamu nyùn̄ ki dóòyee ní utɔntɔnlee lēē sindaariya bɔmbiki kin bi cáa tūuntí dimaŋfalee, kì nyìm̀ kii graambi biluu, ní ki lēē sindaariya bɔmbiliŋ ŋin bi cáa fūuntí iŋalee ali, ŋíǹ kpáfì ki nyìm̀ kii graambi kulaafaau ní ki dūu tīī usapɔɔnee. 23Ní ki bí-u yii: «Ŋma bisal di sá-si ní? Ti ŋūǹ kí ká a-baa dumpu mpaan kí dòon̄aaa?» 24Ní usapɔɔnee kíí-u yii: «M-baa di sá Beetuweel, Naakɔɔr nì u-nimpuu Miilka jipɔɔn.» 25Ní ki gíti bí-u yii: «Timool nì tifaal bí ti-dumpu tikpil á tīī a-gutaamui, mpaan mun bí ní dòon̄.»

26Niinee ní utɔntɔnlee gbāaǹ ki jáam̀ ti-Dindaan, 27ní ki bí yii: «M nyɔ́ŋkí ti-Dindaan, m-kpiliu Abraam Nimbɔtiu un ŋáań-u tiŋan múlmul kaa gbèentée! Úǹ di tí kpōotì-mi ki cáań ki kɔ́ǹ m-kpiliu nabiyaamu cindin táb.»

28Niinee ní Reebeeka sáǹ ki nín kùǹ ki cūtìi máafì tin jítèe kɔkɔ. 29U nìn cáá niija bi yíì-u yii Laaban. Ní Laaban sáǹ ki nín cá utɔntɔnlee cee dinyimbɔbil caŋin. 30Ŋyunti ŋun Laaban ká kibɔmbiki kin bi cáa tūuntí dimaŋfalee, nì abɔmbil ŋin u-niisal fúuńee nì u nín tí gbìl̄ u-niisal nín máafì tin utɔntɔnlee sòon̄ nì uee, ní u nín cá utɔntɔnlee cee ki tin ká-u dinyimbɔbil caŋin, u yú ki kɔ́ĺ u-gutaamui. 31U bàn̄ee ní ki bí-u yii: «Dāan̄, sii un boon ti-Dindaan bīiǹee. Man bɔ́ntì a-diiku nì a-gutaamui dooŋu laŋki. Ba ŋá ní a gíti yú mmɔŋki?»

32Ní utɔntɔnlee cūtì ki kɔ́ bi-dumpu, ní Laaban gútì igutaamu waŋguliŋ ní ki tīī-i timool nì tifaal, ní ki cáań nnyim ki tīī utɔntɔnlee nì bin nóoń-uee bí fíntí bi-taaŋi. 33U dóòyee ní ki cáań tijin ki yóoǹ-bi, ama ní utɔntɔnlee bí yii: «See ḿ sòoǹ tin m cááyee kí wàatī ní kí nín jī tijin.» Ní Laaban bí yii: «Too, án yaa sée, sòoǹ.» 34Ní utɔntɔnlee bí yii: «Man sá Abraam tɔntɔnliu ní. 35Ti-Dindaan bīiǹ m-kpiliu boon tiŋan ki yāntì u kpántì unikpaan. U tīī-u ipii nì iŋoobu nì inaa nì animbil nì sindaariya, ki tīī-u bitɔntɔnliibi bininjab nì binimpoobi, nì igutaamu nì mmamu. 36M-kpiliu nimpuu Saara màl̄-u kibininjabiki u-nimpunaatiiti poon, ní u dū u-gaajawanti tin u cááyee kɔkɔ ki tīī kibikee. 37Ní m-kpiliu yāntì m pūtì ki pōoǹ-u. U nìn lī yii: <Taa cáá Kanaan yab bin kansikin m kóò nee sapɔmbi ubɔ kí tīī m-jipɔɔn. 38Ama, cù m-dumpu, m-cindi poon táb kí cáá usapɔɔn kí tīī m-jipɔɔn.> 39Ní m bālifì-u yii: <Kin unimpu yaa kaa là kí nóoń-mi fáà!> 40Ní u kíí-mi yii: <Ti-Dindaan un m nóóyee làá tɔ̄ń u-tuuŋŋu ŋú céeǹ-si a-saŋŋu ń còom̀ tiŋan, á ŋmā kí ká unimpu m-dumpu, m-cindi poon táb kí tīī m-jipɔɔn.> 41U gíti bí-mi yii: <A yaa cūtì m-dumpu, m-cindi poon ní baa kíí kí tīiń-si usapɔɔnee, a nyáń dipùtil din m yāntì a pūtèe bɔtin.> 42Di sá m yíkìń ki dūu bāań díǹ nee dinyimbɔbil taapu ní ki bí yii: <Ti-Dindaan, m-kpiliu Abraam Nimbɔtiu, nsan ŋun m bí ki còom̄ nee, á tūtuǹ-mi! 43Kpèè, m bāań ki yú dinyimbɔbil nee caŋin. Usapɔɔn un yaa bāań kí lúń nnyim ní m bí-u yii: "M gbāam̀-si, pɔ̄-mi a-baŋki poon nnyim ḿ nyɔ̀ɔ," 44ní u yaa kíí-mi yii: "M làá tīī-si á nyɔ̀ kí lúń kí tīī a-gutaamui mun ń nyɔ̀ee," yàntī an sapɔɔŋwuee ń nīn sá unimpu un sii ti-Dindaan lēē kí tīī m-kpiliu jipɔɔnee.> 45Maa láá dākafì míǹ m-pɔbilin ki dóò, ní Reebeeka páaǹní ki túń u-baŋki u-gbigbil pu ki dɔ́miń ki sīntì dinyimbɔbilin ki lúń nnyim, ní m mēē-u yii: <M gbāam̀-si, pɔ̄-mi nnyim ḿ nyɔ̀.> 46Ní u túutì u-baŋki u-gbigbil pu malaa ki bí yii: <Nyɔ̀, a yaa nyùn̄ee ḿ lúń kí cáań a-gutaamui mun ń nyɔ̀.> U tīī-mi m nyùn̄ee ní ki lúń ki cáań m-gutaamui mun nyùn̄. 47Ní m bālifì-u yii: <Ŋma bisal di sá-si ní?> Ní u bí yii: <M-baa di sá Beetuweel, Naakɔɔr nì u-nimpuu Miilka jipɔɔn.> Niinee ní m dū kibɔmbiki ki túuń u-maŋfal, ní ki dū abɔmbil ki fúuń u-ŋalii. 48Ní ki gbāaǹ ki jáam̀ ti-Dindaan ní ki nyɔ́ŋkì úǹ m-kpiliu Abraam Nimbɔtiu, u nín kpōotì-mi ki tɔ́kɔǹ nsammɔnti pu m dāa bāań ki ká m-kpiliu maaliŋu poon usapɔɔn kí tīī u-jipɔɔnee. 49Kɔŋkɔnnee ni yaa là kí ŋá m-kpiliu tiŋan nì ibaamɔnee, ní kíí <iiin> àá <aayee>, ní án yaa sá ḿ túĺ ŋgiil puɔɔɔ, ŋgan puɔɔɔ, ḿ bée.»

50Ní Laaban nì Beetuweel bí-u yii: «Tibɔti nee poonee, timbi kaa ti pée cáá tiba kí lì, kun puee ti-Dindaan di yāntì an ŋá míǹ. 51Kpèè Reebeeka di sí a-nimbiin nee. Yòon̄-u kí cùnnì kí tīī a-kpiliu jipɔɔn ú cáá-u kii ti-Dindaan nín lī puee.» 52Abraam tɔntɔnliu nín gbìl̄ an bɔtee ní u gbāaǹ ki jáam̀ ti-Dindaan. 53U jáam̀ ti-Dindaan ki dóòyee ní ki nyántìń animbil kúti wanti, nì sindaariya wanti nì tiwampeeŋkaal ki tīī Reebeeka, ní ki tīī u-niija nì u-na mun tigaajawan tikpil. 54U ŋá míǹ kɔkɔ ki dóòyee ní u nì u-yab bin céeǹní-uee nín jíń ki nyùn̄ ní ki kɔ́ ki dōoǹ.

Bi fīntì kutaafaauee ní u bí-bi yii: «M làá mèè-ni nsan kí nīn gítí m-kpiliu cee.» 55Ní usapɔɔn niija nì u-na bí-u yii: «Yàntī usapɔɔn ń gíti kàl̄ ti-cee iwiŋkaaŋkaa kii iwiin saalaa pu. Míǹ boonee ní á nín kpáaǹ-u kí búntí.» 56Ní u kíí-bi yii: «Ti-Dindaan ŋáŋkì m-saŋŋu ki tīī-mi, ba ŋá ní ni gíti tàantí-mi? Pɔ̄maan-mi nsan ḿ nīn gítí m-kpiliu cee.» 57Ní bi bí yii: «An yaa sée, tí yíiń usapɔɔn u-ba kí bàlifì-u kí kpèè!»

58Ní bi lafun yíiń-u ki bālifì-u yii: «A làá nóó uninja neeee?» Ni u kíí-bi yii: «Iiin m làá nóó-u.» 59Ní bi yāntì Laaban niisal Reebeeka nì unimpu un nìn lōō-uee yíkì ki nóó Abraam tɔntɔnliu nì bin céeǹní-uee ki búntì.

60Bi làá yīkèe ní Reebeeka yab mēē ki bīiǹ u-pu yii:

«Sii ti-niisal, á kpántí nnibiim na.

A-naantiibi ń dāá nīn pɔ̄ɔǹ bi-nannanliibi!»

61Bi dóòyee, ní Reebeeka yōoǹ nsapɔmbiyaamu mun bi tīī-uee, ní bi kāl̀ igutaamu pu ki páaǹ uninjee boon. Míǹ ní Abraam tɔntɔnliu yōoǹ Reebeeka bi kíĺ nsan ki nín kùǹ.

62Ŋyunti gbantee, Isaaki nìn nyánní laakin bi yíì Lakayi Rooyi lɔkɔuee#24.62 Lakayi rooyi lɔkɔee, kpèè 16.13-14. ki gítiń, di sá u nìn kóò Neegeeb tiŋkin ní. 63Kujoou kubɔee, Isaaki nìn nyáń ki bí tisatin ki còom̄ ki dàkafī. U dāa yáatì ki kpēēyee, igutaamu di dòońee. 64Reebeeka mun nín yáatì ki ká-uee ní ki yùkū ugutaamu pu ki tīiǹ kitiŋ, 65ní ki bālifì utɔntɔnlee yii: «Ŋma di sá uninja un nyánní tisatin ki túŋkiń-ti nan ní?» Ní utɔntɔnlee kíí-u yii: «M-kpiliu dee.» Niinee ní u dū ŋŋaabiiŋkaa ki bīiǹ. 66Ní utɔntɔnlee máafì Isaaki tin kɔkɔ u ŋée. 67Ní Isaaki yōoǹ Reebeeka ki cáa kɔ́ǹ u-na Saara tantiun, ní ki dū-u ki kpántì u-nimpuu ní ki néeń-u. An di ŋméeǹ Isaaki u-na kúm.

Currently Selected:

Genèse 24: BASSARDC

Highlight

Copy