Genèse 25

Keetura biyaamu

1Abraam nìn gíti cáá unimpu ubɔ bi yíì-u yii Keetura. 2U nìn màl̄-u Siimran nì Yɔkisan nì Meedan nì Madiyan nì Yiisbaaki nì Suuwa. 3Ní Yɔkisan màl̄ Seeba nì Deedan. Deedan naantitɔntɔkɔŋ di sá Asuur yab nì Leetusi yab nì Leewum yab. 4Maadiyan jipɔmbi di sá Eeyifa nì Eefeer nì Anɔki nì Abidaa nì Eeldaa. Keetura jipɔmbi di sá bíǹ kɔkɔ.

5Abraam nìn dū u-gaajawanti kɔkɔ ki tīī Isaaki, 6ní ki pú u-nimpoobi bin u nìn gíti cáá boonee biyaamu mun tiwan tiba. Ŋyunti ŋun Abraam bí kaa láá kpíìyee ní u yāntì u-nimpoobee biyaamu yíkì ki búntì ndan, ŋwìiń nyalaŋki pú, kí nīn dátiǹ u-jipɔɔn Isaaki.

Abraam kúm

7Abraam biŋŋi ŋin u ŋá ki nín kpíìyee nìn nyáń abin dilaataal nì abin aŋmoo kpá imuŋku inaa. 8Abraam nìn kpíì titikpitin nì dipɔɔsɔŋkilin. U nìn púĺ ki kāl̀ ki bál̀ ní ki nín kpíì ki cūtìi ŋàl̄ u-naanjab. 9Ní u-jipɔmbi Isaaki nì Isimaayeel síb́-u Makipeela taŋkpalɔkɔŋu ŋun bí ki pìlīǹ Mamiree tiŋkinee poon. Soowaar jipɔɔn Eefrɔn un nìn sá Eeti yab ubɔee cee 10ní Abraam nìn dá kusaau kun poon ntaŋkpalɔkɔ gbanti nìn bée. Niin ní bi nìn síb́ Abraam nì u-nimpuu Saara. 11Abraam kúm boonee, Unimbɔti nìn bīiǹ u-jipɔɔn Isaaki boon. U nìn kóò ki pìlīǹ Lakayi Rooyi lɔkɔu ní.

12Abraam jipɔɔn Isimaayeel biyaamu yiŋŋi sèé. Isimaayeel di sá Agaar jipɔɔn un u màl̄ ki tīī Abraamee. Agaar gbanti nìn sá Saara yumbuu ní ki sá Eejipiti tiŋkin. 13Isimaayeel nín màl̄ u-biyaamu mu dī tɔb pu ki dāa kpántì tinaakɔtee sèé. Isimaayeel jipɔŋkpiliu di sá Neebayɔti. Bin páaǹee di sá Keedaar nì Adibeel nì Miibsam nì 14Miisima nì Duma nì Masa 15nì Adaadi nì Teema nì Yeetuur nì Nafiisi nì Keedima. 16Isimaayeel jipɔmbi saalaa nì bilee yiŋŋi dee. Bíǹ di kpántì Isimaayeel naakɔti saalaa nì tili kpilib, ní kunaakoou kamaa dū ku-kpiliu yindi ki pú ntimbilimu mun poon ku-yab kóòyee nì ipaan in pu bi nìn gāā bi-tantibee. 17Isimaayeel ŋá abin dilaataal nì abin ata kpá imuŋku ili ní ki kpíì ki cūtìi ŋàl̄ u-naanjab. 18Isimaayeel naantiibi nìn kóò kí yòon̄ Afiila tiŋki kí tin cáá sāā Suur tiŋki ní. Suur nìn bí ki pìlīǹ Eejipiti tiŋki, ní ki cá Asuur tiŋki watil pú. Niin ní bi nìn kóò. Bi nì bi-nabiyaamu Abraam maaliŋun yab bin kíǹee kaa nìn kpí.

JAAKƆB (25.19–36.43)

Eesayuu nì Jaakɔb màaltam bɔti

19Abraam jipɔɔn Isaaki biyaamu mun u màl̄ee bɔti sèé.

Abraam màl̄ Isaaki. 20Isaaki wíiǹ ki bàn̄ abin imuŋku ilee ní ki cáá Reebeeka. Reebeeka nìn sá Beetuweel, uaranja un nìn kóò Padan-Aram tiŋkinee bisal ní u-niija sá Laaban. 21Reebeeka nìn sá uŋmaŋŋmanti ní Isaaki mēē ti-Dindaan u-pu, ní ti-Dindaan súń u-saai, ní u-nimpuu dāa cáá jaasib pool. 22Mbiyaamuee bí mu-na poonee ní ki kpéetí tɔb, ní mu-na bí yii: «An yaa làá nīn bí mimmee, án làá kúntíǹ-mi mana dee?» Niinee ní u cūtì ki bālifì ti-Dindaan kun di yì-tì ní an ŋáań mimmee. 23Ní ti-Dindaan bí-u yii:

«Atimbun ali di bí a-poon,

anibul ali làá dāá nyānní a-poon.

Diba làá dāá nīn pɔ̄ɔǹ di-juti,

ukpil di làá dāá nīn bí kiwaai#25.23 Kpèè Room 9.12. taapu.»

24Ŋwiin ŋun u làá màal̀ee dūu bāańee ní u màl̄ jaasib#25.24 Jaasib: Isirayeel yab ceeyee, un péé péé ki nyánnée di sá ukpil.. 25Un u péé péé ki màl̄ee máǹ ní u-wunti cáá tikuti sùuu kii mpigbanee, ní u pú-u diyindi yii Eesayuu. 26Ní Eesayuu naal mun dāa nyánní ki ŋúbiń u-tagbindi ní bi pú-u diyindi yii Jaakɔb. Isaaki nìn cáá abin imuŋku ita ní ki màl̄-bi.

27Ní bi dāa dūu wíiǹ ki ŋá binaacimpɔmbi. Eesayuu nìn dūu kpántì ukpan ki yáb̀, ki bí kumooun ki yìiǹ ki kpáŋkí, ní Jaakɔb úǹ nìn sá un bí sooooyee ki bí mmɔŋki. 28Isaaki nìn là Eesayuu bɔti kun puee un nìn néeń tipeenan tin Eesayuu nìn cāabìńee. Ní Reebeeka úǹ là Jaakɔb bɔti.

29Dalba Jaakɔb bíi ŋà tikunee, Eesayuu nyánní kusaau ki bāań, ki gīī púb. 30Ní u bí Jaakɔb yii: «An bàn̄-mi tikpil. M gbāam̀-si, pée jōō tikun tin a ŋāaǹ tì máǹ wèeee nee kí pɔ̄-mi ḿ wùfì, kun puee an bàn̄-mi tikpil.» An pu ní bi yíì-u yii Eedoom, an taapu sá yii <uman.> 31Ní Jaakɔb kíí-u yii: «Dū a-kpiti kí nyāfiǹ-mi díǹ». 32Ní Eesayuu kíí yii: «Ŋkùm làá kpɔ̀-mi dee. Mì yaa kūū-mee, m làá gíti dū m-kpiti kí ŋá ba?» 33Ní Jaakɔb bí-u yii: «Pùtī laakin ti bí nee díǹ kí wàatī.» Ní Eesayuu pūtì ní ki dū tikpiti ki nyáfiǹ Jaakɔb. 34Niinee ní Jaakɔb tīī Eesayuu kpɔnɔ nì atùmman kunti, ní u ŋmɔ́ ki wūfì tikun, ní ki yíkìi búntì. Eesayuu nín ŋá min ki kpēē ki sīŋkiǹ u-kpitee dee#25.34 Kpèè Eebru 12.16..

Currently Selected:

Genèse 25: BASSARDC

Highlight

Copy