Genèse 9

Unimbɔti pōoǹ Noowa dipoondi

1Unimbɔti bīiǹ Noowa nì u-jipɔmbi boon ní ki bí-bi yii: «Ní màal̀ kí bùtī kí gbí kitiŋ. 2Kitiŋ pu waŋkuti kɔkɔ, nì kitiŋ pu peelii kɔkɔ, nì inoon kɔkɔ, nì tin kɔkɔ fù kitiŋ puee nì ijɔm kɔkɔ làá nīn fàŋkí-ni ní yɔ́kɔ́ yɔkɔ. Tiwan gbanti kɔkɔee, m dūu ŋá ni-ŋaan. 3M tīī-ni tin kɔkɔ pée bí ki cáá kufoouee án nīn sá-ni tijin, kii m nín nìn tīī-ni timool tin kɔkɔ lòoǹ ibee puee. M dū kɔkɔ ki tīī-ni án nīn sá ni-jinti. 4Ama ní taa ŋmɔ́ kuwaŋkuluu kun baa lāntì fatiku nyáńee nanti, kun puee kuwaŋkuluu fatikuu di yì ku-maŋfal#9.4 Kpèè Akoo 7.26-27, 17.10-14, Ditee 12.16,23, 15.23.. 5Ní nīn nyí yii m làá dāá bàlifì ni-fatikuu un sá ni-maŋfalee pu. Upeel un kamaa yaa cúú unilee, m làá dāá bàlifì-u unil gbanti fatikuu pu. Míǹ ní unil un kamaa yaa kūū u-jutee, m làá dāá bàlifì-u u-juti gbanti maŋfal pu.

6Unimbɔti náań unil ki nántiǹ u-ba ní,

míǹ puee un di yaa kūū unilee,

u-nijuti di làá kpɔ̀ u mun#9.6 un yaa kūū unilee: dūú ŋmàntī nì Disa 20.13. - ki nántiǹ u-ba: dūú ŋmàntī nì 1.26-27, 5.1..

7Ama nimbee, ní màal̀ kí bùtī kí gbí kitiŋ pu.»

8Ní Unimbɔti gíti bí Noowa nì u-jipɔmbi yii: 9«Mamee, man pōoǹ-ni dipoondi, nimbi nì ni-naantiibi 10nì tin kɔkɔ bí ni-cee ki cáá kufoouee, an dàkà yii inoon nì tiwaŋkuti nì ipeel nì tin kɔkɔ pée nyáń meelan ki cáá kufoou ki bí kitiŋ puee. 11Dipoondi din m pōoǹ-nee sɔ̀. Maa làá ti yàntī nnyiŋgbeen ń dāá kúntí tiwan tin kɔkɔ cáá kufoouee tiba kitiŋ pu.» 12Ní Unimbɔti gíti kútì ki lī yii: «Kudaaŋŋu kun dàkà báà ŋma dipoondi din dɔ̄ man nì nimbi nì tin kɔkɔ cáá kufoou ki bí ni-ceeyee, nì inifunaan in dāa bí ki dòońee kansikinee sèé: 13«M dū m-kuntinyindi ki làl̄ atagban pu án nīn sá kudaaŋŋu yii dipoondi dɔ̄ man nì kitiŋ kansikin. 14M yaa láa pée yāntì utaa yíiń ní dikuntinyindi nyáń ki làl̄ atagban puee, 15m làá dāá téetí dipoondi din dɔ̄ man nì ni nì tin kɔkɔ cáá kufoouee kansikinee pu. Di sá yii nnyiŋgbeen kaa ti bí kí dāá kúntí tin kɔkɔ cáá kufoouee. 16Dikuntinyindee yaa nyáń ki làl̄ atagban pu m wál̀-dèe, ní ḿ téetí dipoondi din dɔ̄ kí nīn cá jaanjaan, man Unimbɔti nì tin kɔkɔ cáá kufoou ki bí kitiŋ puee kansikinee pu.» 17Ní Unimbɔti bí Noowa yii: «Dikuntinyindi di sá dipoondi din dɔ̄ man nì tin kɔkɔ cáá kufoou ki bí kitiŋ puee kansikinee daaŋku.»

Noowa nì u-jipɔmbi bɔti

18Noowa jipɔmbi bin nìn nyáń meela poonee di sá Seem nì Kaam nì Jaafeeti. Kaam di màl̄ Kanaan. 19Noowa jipɔmbi bitee di màl̄ ki gbéeǹ kitiŋ.

20Noowa kíĺ tikpaal dikpɔ̀l ní ki cóoǹ fiinyi. 21Dalbee ní u nyùn̄ fiinyi subiliŋ daam ki gbí ní ki dɔ̄ u-tantiu poon dicancaŋgbeel. 22Kaam un sá Kanaan baayee ká u-baa nín dɔ̄ dicancaŋgbeel puee, ní u nyáń ki tùkū Seem nì Jaafeeti. 23Niinee ní Seem nì Jaafeeti kpàlīń tɔb bili, ki dū dibɔkutikpaandi ki páaǹ bi-gbigbipati pu ki túlifìń bi-boon ki cáań ki bīiǹ bi-baa pu. Baa fātì bi-nimbiin kí kpèè bi-baa, ní kaa nín wál̀ u-cooi. 24Ndaam dāa cēetì Noowa pu u fīntèe ní ki béè u-bijoolkaaki nín ŋá-u miŋyee. 25Niinee ní u bí yii:

«Mbusu ń kɔ́ Kanaan.

Iyumbu yumbuu

ní u làá nīn sá ki tīī u-mambi!»

26Ní ki gíti bí yii:

«Tí nyɔ̄ŋkì ti-Dindaan un sá Seem Nimbɔtiuee!

Kanaan úǹ ń nīn sá Seem yumbuu!

27Unimbɔti ń yàntī Jaafeeti

ń bùtī kí nīn kóò Seem tantibin,

Kanaan úǹ ń nīn sá bi-yumbuu!»

28Nnyiŋgbeen boonee, Noowa gíti ŋá abin alaataa ata nì imuŋku ili nì abin saalaa ní. 29Noowa biŋŋi kɔkɔ nìn kpáfì abin alaataa awa nì imuŋku ili nì abin saalaa, ní u nín kpíì.

Currently Selected:

Genèse 9: BASSARDC

Highlight

Copy