Lukà 15
15
Àlɛ̃ bubu kè wo gbìgbɔ̀ kpɔa
(Màt 18.12-14)
1Dùgajɔ̀tɔwo kudo ènuvuɛ̃wɔ̀tɔ buwo va Yesù gbɔ ne woa ɖo èto è. 2Farizìwo ku èsefiɔtɔwo le lì lihũi gblɔ̃ be: “Ŋusù kèa xɔ̀nà èvuɛ̃wɔ̀tɔwo nyuɛ̃ ɖe, eye be ɖùnà ènu kudo wo.” 3Vɔ̀a, Yesù do èlo kèa na wo be: 4“Àmè kɛ ye lè mìa dòmè, la ɖo àlɛ̃ èkà èvè takpo, eye ɖèka la bu lè woa dòmè, eye mu la gble àlɛ̃ èkà èvè ci woeàsiɖèkɛawo ɖɛ ɖo ègbegbà ji, la yì ji ɖèka kè bua kaka la kpɔ ɛ̀ ò? 5Ne e kpɔ ɛ̀a, e la sɔ ɛ̀ ɖo kɔ̀lìgba mè ku jìjɔɛ, 6va àxomè, eye be la yɔ èxlɔ̃awo kudo yebe àxuekɔ̀tɔwo bɔ̀, la gblɔ̃ na wo be: 'Mì kpɔ jìjɔ̀ɛ kudo mù, ɖo mù kpɔ àlɛ̃ kè bua.' 7Mù le to na mì be nènea ke wo la kpɔ jìjɔɛ so ènuvuɛ̃wɔ̀tɔ ɖèka pɛ kè ɖɔ̀lì èdɛ̃a ŋuti lè jiŋùkusi, wu àmè jɔ̀jɔɛ èkà èvè ci woeàsiɖèkɛ kèwo mu hiã èdɛ̃ ɖɔ̀lì òa ŋuti.”
Klòsalòga kè wo gbìgbɔ̀ kpɔa
8“Àlo ne klòsalò-ga èwo lè nyɔ̃nù ɖe si, eye be bu ɖèkaa, mu la sũ kãligbɛ̃ la kplɔ̀ yebe àxomè, la ji ì veve ɖe, kaka va sɛ̃ gà kè mè be kpɔ ɛ̀ òa? 9Eye ne e kpɔ ɛ̀a, e la yɔ èxlɔ̃awo kudo yebe àxuekɔ̀tɔwo bɔ̀, la gblɔ̃ na wo be: 'Mì jɔ̀jì kudo mù, ɖo mù kpɔ klòsalò-ga nyè kè bua.' 10Mù le to na mì be, nènea ke ye Mawu be àtikplɔtɔwo jɔ̀nàjì ɖo ènuvuɛ̃wɔ̀tɔ ɖèka kè ɖɔ̀lì èdɛ̃a ŋuti.”
Èvi bubu kè trɔ gbɔ̀a
11Yesù gbà yì e ji gblɔ̃ be: “Ŋusù ɖe ɖo èvi-ŋusù èvè. 12Vɔ̀a, vifɛ̃tɔa va gblɔ̃ na ètɔa, gbè ɖèka be: 'Ètɔ nyè, sɔ àpo ènu wòwo be màma kè la va nyi àpe ècrɔ̃nua, na mù.' Eye woa tɔ ma ènu kèwo lè e sia na wo. 13Ŋùkèkè ɖewo yomè a, vifɛ̃tɔa cã yebe ènuwo keŋu bɔ̀, eye be yì èdù màsɔɛ ɖe mè. E zã yebe ènuwo yàkà yàkà#15.13 Yàkà yàkà: àkɔ̃ŋùta mà nɔ̀ e ŋuti, àlo àlekè e jro ɖoa.. 14Kè be zã yebe ènuwo kpata vɔ̀a, àdɔ̀ gã ɖe va to lè èdù kè mè be lèa mè, eye e jè èhiã#15.14 Èhiã: ènu ɖekpe mu gbà le àmè si ò; vevetɔ kè àmèa ɖo la ɖoa. mè. 15E yì sɔ ye ɖokoe pu#15.15 Yì sɔ ye ɖokoe pu: yì sɔ ye ɖokoe do àwòba ne àmè; yì sɔ ye ɖokoe kè àmè. èdùa mè tɔ ɖè ji, eye ŋusùa ɖo e ɖoɖa yebe àgblè mè, ne bèa yì kpɔ èhãwo ji. 16Ènu kè èhãwo ɖùnàa jrona ɛ̀, vɔ̀a, àmè ɖe mu na ɛ̀ kpɔ ò. 17E va yì ye ɖokoe mè kpɔ, gblɔ̃ be: 'Sumɔvi sùgbɔ lè ètɔ nyè be àxomè, eye ènu ɖùɖu sùnà wo kaka kpɔ̀tɔ̀nà. Ènyè ye lè ku àdɔ̀-ku lè fikèa yà. 18Mù la so, eye mù la yì ètɔ nyè gbɔ, la to na ɛ̀ be: Ètɔ nyè, mù jè àgɔ̀ do Mawu, gbà je è do wò cã. 19Nyè mu gbà jè be wòa yɔ mù be èvi wò kè ò. Xɔ̀ mù sìgbè sumɔ̃vi wòwo dòmètɔ ɖèka nène.' 20Eye, e so nyàwo, yì ètɔa gbɔ.
“Wàlɛbɛ kè be kpɔ̀tɔ̀ lè èmɔ ji gbãnà a, ètɔa kpɔ ɛ̀ ɖoɖa. Yebe ènu wɔ̀ ŋuzĩzĩ na ɛ̀ eye, e pu dù yì kpla àsi èkɔ̀ na ɛ̀, eye be kisì#15.20 E kisì na ɛ̀: gbigbɔ̃ ènu na ɛ̀, lɔ̃lɔ̃ be jèsì. na ɛ̀. 21Ɖèvia gblɔ̃ na ètɔa be: 'Ètɔ nyè, mù jè àgɔ̀ do Mawu, gbà jè è do wò cã; nyè mu gbà jè be wòa gbà yɔ mù be èvi wò kè ò…' 22Vɔ̀a, ètɔa gblɔ̃ na yebe sumɔ̃viwo be: 'Mì ɖèbla yì sɔ àwùgã kè nyɔ wua va na ɛ̀. Mì do àlɔ̀gàvi àlɔ̀ na ɛ̀; mì do àfɔ̀kpa àfɔ̀ na ɛ̀. 23Mì yì le ènyìvi kè do àmìa va ne mìa wù ì, ne mia ɖà ènu ne mia ɖù, ne mia kpɔ jìjɔɛ, 24ɖo èvi nyè kèa ku, vɔ̀a, e gbà gbɔ̀ àgbè. E bu, vɔ̀, mù gbà kpɔ ɛ̀.' Kè be gblɔ̃ ènyà kèawo yomè a, wo tɔ àzã ɖùɖu, eye wo tɔ jìjɔɛ kpɔkpɔ.”
25“Vɔ̀a, èvia àmègãxotɔa ya lè àgblè mè, gà ŋua mè. Wàlɛbɛ kè be gbɔ̀ gbãnà, le gogo àxuea gbɔa, e sè wo le pò èhũ, le ɖu èwè. 26E yɔ ètɔa be sumɔ̃vi ɖèka, biɔ ènu kè le jɔ̀ a gɔ̃mè sè. 27Eye sumɔ̃via ɖo e ŋuti na ɛ̀ be: 'Nɔ̀vi wò ye gbɔ̀, eye ètɔ wò na wo wù ènyìvi kè do àmìa, ɖo e kpɔ ɛ̀ lè lãmèsɛ̃ mè, gbɔ̀ va.' 28Vɔ̀a, èvi àmègãxotɔa bijì, gbe be yè mu la ɖo àxuea mè ò. Ètɔa to va, ɖè kuku na ɛ̀. 29Vɔ̀a, e ɖo e ŋuti na ètɔa be: 'Èpè nenè ye nyi ekèa mù le sumɔ wò ò? Nyè mu dà lè *èse wò ɖe ji kpɔ gbèɖe ò, vɔ̀a, wò mu na mù gbɔgbɔɛvi ɖèka tètè be ma sɔ kpɔ jìjɔɛ kudo èxlɔ̃ nyèwo kpɔ ò. 30Vɔ̀a, kè èvi wò kèa, kè zã ènu wòwo yàkà yàkà ku *àhasìwɔ̀tɔwo, gbɔ̀ kpòa, wò wù ènyìvi kè do àmìa na ɛ̀.' 31Eye, ètɔa gblɔ̃ na ɛ̀ be: 'Èvi nyè, èwò yaa, wò lè gbɔ nyè, wè sia wè, eye ènu kèwo lè àsi nyèwoa, tɔ̀ wò ye wo nyi. 32Vɔ̀a, e jè be mia ɖù àzã, la kpɔ jìjɔɛ, ɖo nɔ̀vi wò kèa, e ku, eye be gbà gbɔ̀ àgbè; e bu sãa, vɔ̀a, mù gbà kpɔ ɛ̀.'”
Currently Selected:
Lukà 15: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
