Lukà 14
14
Yesù dà èdɔ na ŋusù ɖe lè jɛ̃gbɔ̃zã gbè
1E va e mè be, Yesù yì ènu ɖù gbe lè Farizìwo be èga ɖe be àxomè, lè jɛ̃gbɔ̃zã ɖe gbè. Àmèwo lè funua, le ɖia Yesù. 2Ŋusù ɖe, kè tɛ̃a lè ŋùkɔ̀ na ɛ̀. 3Yesù biɔ èsefiɔtɔwo ku Farizìwo be: “Èmɔ ɖèɖe lè be, woa teŋu dà èdɔ̀ na àmè lè jɛ̃gbɔ̃zã gbè, àlo mu lè ò?” 4Vɔ̀a, wo bɔ̀nu. Yesù ɖo àlɔ̀ èdɔ̀nɔ̀a ji, dà èdɔ̀ na ɛ̀, eye be ɖo è ɖoɖa àxomè. 5E yomè a, Yesù biɔ wo be: “Àmè kɛ ye lè mìa dòmè kè ye ne èvia, àlo yebe ènyì jè vudo mè, lè jɛ̃gbɔ̃zã gbèa, mu la ɖè è to ò?” 6Vɔ̀a, wo mu teŋu ɖo ènyà kèa ŋuti na ɛ̀ ò.
Đokoe bɔ̀bɔ̀
7Yesù do èlo na àmè kpekpeawo, wàlɛbɛ kè be kpɔ àlekè wo le ji la nɔ̀ tèpe cucugbã tɔ̀awo ɖoa. E gblɔ̃ na wo be: 8“Ne àmè ɖe yɔ wò be wòa va ɖù ènu lè nyɔ̃nùkpepea, mù gbà yì nɔ̀ ànyi lè àzìkpe kèwo lè ŋùkɔ̀a ji ò, ɖo èta mu nyɔ òa, wo teŋu yɔ àmè kè wu gã wòa cã. 9Ne e jɔ̀a, àmè kè yɔ wò, eye be yɔ e cã a, teŋu va gblɔ̃ na wò be: 'Sitè ne wòa na tèpe àmè kèa.' Gà ŋua mèa, wò la yì nɔ̀ tèpe bu, lè ŋùgbedòmè ku ŋùkpɛ̃. 10Vɔ̀a, ne wo kpe wò yì ènuɖùpea, yì nɔ̀ ànyi lè tèpe mlɛ̃a bòhũ; eye ne àmè kè kpe wòa va kpɔ wò lè funua, e la to na wò be: 'Èxlɔ̃ nyè, va nɔ̀ ŋùkɔ̀.' Ènu kèa la nyi bùbu na wò lè àmè kèwo wo kpe kudo wòawo be ŋùmè. 11Đo àmè sia àmè kè kɔ ye ɖokoe yì jia, wo la bɔ̀bɔ̀ ɛ̀ ɖo ànyi; eye àmè kè bɔ̀bɔ̀ ye ɖokoea, wo la kɔ ɛ̀ yìji.”
12Eye Yesù va gblɔ̃ na àmè kè kpe èa be: “Ne wò ji la yɔ àmèwo ne woa va ɖù dɔ̃ŋùkusu ènu ɖùɖu àlo fìɛ̃si ènu ɖùɖu lè gbɔ wòa, mù gbà yɔ èxlɔ̃ wòwo, àlo nɔ̀vi wòwo, àlo àpo hɛ̃numewo, àlo àdɔ̀kùnɔ̀ kèwo lè àpo àxue kɔ̀awo ò, ɖo woawo cã a, wo teŋu va kpe wò, la ɖo e tèpe na wò. 13Vɔ̀a, ne wò le ɖù àzãa, yɔ wɔ̀amènɔ̀wo ku ènuwɔ̀donɔ̀wo, kudo kpòtɛ̃wo gbàkudo ŋùvìnɔ̀wo. 14Wò la kpɔ *sìtu, ɖo woawo yaa, wo mu teŋu yɔ wò ɖo e tèpe ò, vɔ̀a, Mawu la ɖo e tèpe na wò, gbè kè gbè wo la fɔ̃ àmè jɔ̀jɔɛwo so èkua.”
Lododo so àmèkpekpe màjèwo ŋuti
(Màt 22.1-10)
15Àmè kèwo le ɖù ènu ku Yesùa dòmètɔ ɖèka sè ènyà kèawo eye, e gblɔ̃ na ɛ̀ be: “Sìtu ɖèɖe ye e nyi na àmè kè la ɖù ènu lè Mawu be fìɔdua mèa.” 16Eye e do èlo na wo be: “Ŋusù ɖe le ɖù àzã gã ɖe, eye be kpe àmè sùgbɔ fuu be woa va ɖù ènu. 17Kè ènu ɖùɖu be gàmè sùa, e dɔ̃ yebe sumɔ̃vi be ne yì gblɔ̃ na àmèkpekpeawo be woa va, ɖo ènu sia ènu sɔ̀gbè vɔ̀. 18Vɔ̀a, woa kpata wo tɔ tàflacɛ dodo. Àmè cucugbã gblɔ̃ na sumɔ̃via be: 'Mù plè àgblè ɖe, mù ɖo la yì kpɔ ɛ̀. Mù ɖè kuku, mù gbà bijì ò.' 19Àmè bu to na ɛ̀ be: 'Mù plè ènyì èwo, eye mù be ma yì kpɔ be wo teŋu wɔ̀ èdɔ nyuɛ̃ ɖe màa. Mù ɖè kuku, mù gbà bijì ò.' 20Àmè bu ya be: 'Mù kplɔ̀ nyɔ̃nù, mu dìdì ò, ye ŋutia, nyè mu la teŋu va ò.' 21Dèvi a trɔva ɖo ègbè na yebe àpetɔa. Àpetɔa bijì, gblɔ̃ na yebe sumɔ̃via be: 'Đè bla yì èdùa be àgbowo nu, ku èmɔwo ji, ne wòa kplɔ̀ wɔ̀amènɔ̀wo, ku ènuwɔ̀donɔ̀wo kudo kpòtɛ̃wo, gbàkudo ŋùvìnɔ̀wo va fikèa.' 22Gàpopo ɖewo yomè a, sumɔ̃via gbɔ̀ va to na yebe àpetɔa be: 'Mù wɔ̀ èdɔ kè wò dɔ̃ mùa, gãke tèpe gbà lè.' 23Eye àpetɔa to na ɛ̀ be: 'Yì àxuewo dòmè. Yì to èmɔwo ji. Zĩ àmèwo ji be woa va, ne àxue nyèa ne ɖɔ. 24Mù le to na mì be àmè kèwo mù yɔ, eye wo gbe vàvaa, ɖekpe mu la ɖɔ ènu ɖùɖu nyèa kpɔ ò.'”
Àleke wo la teŋu kplɔ̀ Yesù do ɖo ò?
25Àmè sùgbɔ kpàsà Yesù do, gbè ɖèka, eye e trɔ kpãŋùkɔ̀ wo gblɔ̃ na wo be: 26“Ne àmè ɖe jè yo nyè mè, eye mu lɔ̃ mù wu ètɔa, àlo ènɔa, àlo èsrɔ̃a, àlo èviawo, àlo nɔ̀via ŋusùwo, àlo nɔ̀via nyɔ̃nùwo àlo ye ŋutɔ àmètia cã òa, mu la teŋu nyi àpe *nukplavi ò. 27Àmè kè mu la sɔ yebe àtisòga, la jè yo nyè mè òa, mu la teŋu nyi àpe *nukplavi ò. 28Ne mìa dòmètɔ ɖe jro be yèa tù àsãŋua, ànyi ye be la nɔ̀ cucugbã, la bù nenè kè be la èzã, ne bèa teŋu kpɔ be yè ɖo ègà kè la teŋu sù ne yèa wu èdɔa nu màa. 29Ne mu nyi nène òa, ne e li dodoewo, vɔ̀ mu teŋu wu àsãŋua nu òa, àmè kèwo keŋu la kpɔ ɛ̀awo, la tɔ ɛ̀ kòko, 30wo la gblɔ̃ be: 'Kpɔɖa ŋusù kèa tɔ èxɔ̀ tùtu, vɔ̀a mu teŋu wu e nu ò.' 31Nène a ke ye, ne èfìɔ ɖe le ji la wɔ̀ àhùa kudo èfìɔ bua, e nɔ̀nà ànyi cucugbã, bùnà èta mè kpɔ be yè teŋu sɔ àmè hotu àtɔ̃ kpe àhùa kudo yèbe èkɛ̃tɔ kè sɔ àmè hotu èwo gbãnà àhùa wɔ̀ gbe kudo yèa màa. 32Ne mu nyi nène òa, wàlɛbɛ kè àmè ɖetɔa lè àzɔ̀ge boo ɖoɖaa, e la ɖo *àmèdɔ̃dɔ̃wo be woa yì kpe è, ne woa biɔ ŋuti fàfa.” 33Yesù gbà yì e ji gblɔ̃ be: “Mìa dòmètɔ ɖe mu teŋu nyi àpe nukplavi ne mu gble ènu kèwo keŋu lè e sia ɖɛ ò.”
Èjè kè bu yebe vevea
(Màt 5.13; Mrk 9.50)
34“Ɛ̃ɛ, èjèa, ènu nyuɛ̃ ɖe ye be nyi. Vɔ̀a ne èjè bu yebe vevea, nukɛ ye wo la sɔ do è veve ò? 35Mu gbà nyɔ na ànyigbã àlo na kɔkɔli cã ò, ɖe kpò ye wo la lɔ ɛ̀ kɔ̀ŋùgbe. Àmè kè si èto sènu lèa, ne sè.”
Currently Selected:
Lukà 14: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
