Lukà 7
7
Yesù dà èdɔ̀ na Romà be àhùaga ɖe be sumɔ̃vi
(Màt 8.5-13)
1Ekè Yesù gblɔ̃ ènyà kèawo keŋu na àmèwo vɔ̀a, e yì Kapɛrnaum. 2Àhùaga ɖe nɔ̀ èdùa mè. Yebe sumɔ̃vi kè nyi àmè veve na ɛ̀a jè èdɔ̀, ɖo èku donu. 3Ekè àhùagaa sè Yesù be nyikɔa, e dɔ̃ Yudàviwo be èdùmèmègãwo ɖoɖa e gbɔ, be woa biɔ ɛ̀ ne bèa va dà èdɔ̀ na yèbe sumɔ̃via. 4Ekè àmèawo va Yesù gbɔa, wo ɖè kuku na ɛ̀ veve ɖe be: “E jè be wòa wɔ̀ ènu kè àhùagaa le biɔa na ɛ̀, 5ɖo e lɔ̃ miabe dùkɔ̃a. E ya ye tù miabe bɔ̀bɔ̀pea na mi.” 6Eye Yesù jè èmɔ ku wo. Ekè wo gogo àxuea gbɔa, àhùagaa dɔ̃ èxlɔ̃awo yì dogò Yesù, gblɔ̃ na ɛ̀ be: “Tɔhonɔ̀ mù gbà do nupo na ɖokoe wò ò, ɖo nyè mu jè ne wòa ɖo àxue nyè mè ò, 7ye ŋutia nyè mu kpɔ ɖokoe nyè cã be mù jè ne ma va gbɔ wò ò. Gbe gblɔ̃ ènyà ɖèka kpò, eye sumɔ̃vi nyèa la gã. 8Đo nyè ŋutɔ a, ŋùkɔ̀nɔ̀tɔ nyèwo kpàcɛ̀ na mù, eye, nyè cã mù kpàcɛ̀ na gbãdãgbã ɖewo. Ne mù gblɔ̃ na àmè kè a be: ‘Yì’ a, e yìnà, eye ne mù gblɔ̃ na àmè ŋua be, ‘Va’ a, e vana, eye ne mù gblɔ̃ na sumɔ̃vi nyè be: ‘Wɔ̀ ekè'a, e wɔ̀nà ɛ̀.” 9Ekè Yesù sè ekèa, e jè ŋùmè na ɛ̀, eye e trɔ ɖoɖa àmè kèwo kplɔ̀ ɛ̀ doawo gbɔ, gblɔ̃ be: “Mù le to na mì be, nyè mu kpɔ xɔ̀sè kèa hati lè Izràɛlvi jìji ɖekpe mè ŋutɔ cã kpɔ ò.” 10Ekè *àmèdɔ̃dɔ̃awo trɔyì àxuea mèa, wo kpɔ sumɔ̃via gã.
Yesù fɔ̃ àhòsì ɖe be èvi ɖo àgbè
11Lè eŋuã yomè a, Yesù yì èdù ɖe kè wo yɔna be Nayinà mè, eye yebe nukplaviwo ku àmèha gã ɖe kpàsà ɛ̀ do. 12Ekè wo gogo èdùa be àgbonua, àmèwo dro àmèkuku ɖe yì ɖìɖi gbe. E nyi èvi àkòŋùgò na ènɔa kè nyi àhòsìa. Àmèha gã ɖe so èdùa mè nɔ̀ àhòsìa ŋuti. 13Yesù kpɔ àhòsìa, eye yebe ènu wɔ̀ ŋuzĩzĩ na ɛ̀. Troloa, e gblɔ̃ na ɛ̀ be: “Mù gbà fã àvi ò.” 14Yesù dɔ̃ gogo àmèkukusɔnua, eye e tɔ àsi àɖakà a. Àmè kèwo dro èa, wo nɔ̀tè, eye Yesù gblɔ̃ be: “Đèkajɛ, mù le ɖè ègbè na wò, fɔ̃!” 15Troloa, àmèkukua fɔ̃, nɔ̀ ànyi, tɔ nupòpo, eye Yesù sɔ ɛ̀ do àsi na ènɔa#7.15 Mawunya xoma xoxo ɖewo gblɔ̃ be: ekè èŋù kèa. . 16Vɔ̃vɔ̃ jè àmèawo keŋu ji, eye wo kafu Mawu, gblɔ̃ be: “Mawu be gblɔ̃ɖɛtɔ gã ɖe va mia dòmè! Mawu ku ŋuzĩzĩ na yebe dùkɔ̃a!” 17Yesù be ènyà kèa ɖì gbãkpe Yudeà ku àgo ŋuawo keŋu ji kpedo.
Yòhanɛ̀s Mawusilènamètɔa dɔ̃ àmèwo ɖoɖa Yesù gbɔ
(Màt 11.2-19)
18Yòhanɛ̀s be nukplaviwo va ɖè ènyà kèawo keŋu na Yòhanɛ̀s. E yɔ woa dòmètɔ èvè 19eye e dɔ̃ wo ɖoɖa Tɔhonɔ̀a gbɔ ne woa biɔ ɛ̀ be: “Èwò ye nyi àmè kè wo gblɔ̃ be e la vaa, àlo mia kpɔ èmɔ na àmè bu?” 20Ekè wo va Yesù gbɔa, wo gblɔ̃ na ɛ̀ be: “Yòhanɛ̀s Mawusilènamètɔa ye dɔ̃ mi ɖoɖa gbɔ wò be mia biɔ wò sè be: 'Èwò ye nyi àmè kè wo be e la vaa, àlo mia kpɔ èmɔ na àmè bu?'” 21Gà ŋua mè kea, Yesù dà èdɔ̀ na èdɔ̀nɔ̀ sùgbɔ kèwo ŋuti èdɔ̀-lele vòvòwo lèa, e nyà gbɔ̃gbɔ̃ vuɛ̃wo, eye e hũ ŋùkuvi na ŋùvìnɔ̀ sùgbɔ. 22Yesù ɖo e ŋuti na Yòhanɛ̀s be nukplaviawo be: “Mì yì, ne mìa to ènu kèwo mì kpɔ ku ènu kèwo mì sèawo na Yòhanɛ̀s. Ŋùvìnɔ̀wo le kpɔ ènu, kpòtɛ̃wo le zɔ̃, èkpònɔ̀wo be ŋuti le kɔ̀, ètokunɔ̀wo le sè ènu, wo le fɔ̃ àmè kukuwo eye wo le do àŋɛ̀nyuɛ̃ a na wɔ̀amènɔ̀wo. 23Sìtu ɖèɖe ye e la nyi na àmè kè nyè mu nyi àfɔ̀klɛ̃nu na òa!”
24Ekè Yòhanɛ̀s be *àmèdɔ̃dɔ̃awo joa, Yesù pò nupo so Yòhanɛ̀s ŋuti na àmèha a, le biɔ wo sè be: “Nukɛ mì yì zògbè ji, yì kpɔ ò? Àpla kè àya le do èwè na a? 25Nukɛ ŋutɔ mì yì kpɔ ò? Àmè ɖe kè do àwù biɖi-biɖia ye à? Oò kpɔɖa, àmè kèwo dona àwù xɔ̀asì, dàzò ŋàŋlà, ekèwo le ɖù àgbè a, èfìɔsawo mè ye wo nɔ̀nà. 26Nukɛ ŋutɔ gɔ̃ ye mì yì kpɔ koŋu ò? Mawu be gblɔ̃ɖɛtɔ ye à? Ɛ̃ɛ, mù le to na mì be, àmè kè mì kpɔa, wu Mawu be gblɔ̃ɖɛtɔ ŋutɔ cã. 27Đo Yòhanɛ̀s ŋuti ye wo ŋlɔ̀ ɖɛ be:
'Kpɔɖa, mù le dɔ̃ sumɔ̃vi nyèa jè ŋùkɔ̀ na wò,
àmè kè la jrà èmɔ wòa ji ɖoa.'”
28Yesù yì e ji gblɔ̃ be: “Mù le to na mì be àmè kèwo jɔ̀ lè nyɔ̃nù be àdɔ̀mèawo ɖekpe mu wu Yòhanɛ̀s ò. Gãkea, àmè kè hùe wu lè Mawu be fìɔdua mèa, wu gã ɛ̀. 29Àmèha kè dòmè, dùgajɔ̀tɔwo lèa, do jèsi ènu kè Mawu le biɔ woa, eye wo na Yòhanɛ̀s lè mawusi na wo. 30Vɔ̀ Farizìwo ku èsefiɔtɔwo gbe Mawu be ɖoɖo kè be wɔ̀ na woa, eye Yòhanɛ̀s mu lè mawusi na wo ò.”
31Yesù yì e ji gblɔ̃ be: “Àmè kɛ ŋutɔ ye mù la sɔ jìjimè kèa sɔ̀ ku ò? Àmè kɛ ye wo ɖì ò? 32Wo ɖì ɖèvi kèwo nɔ̀ ànyi lè àblɔ mè, le gblɔ̃ na woa nɔ̀nɔwo be: 'Mi ku jìjɔɛ be èzè na mì, vɔ̀ mì mu ɖu èwè ò. Mi do àvi ha ɖoɖa, vɔ̀ mì mu fã àvi ò.' 33Yòhanɛ̀s Mawusilènamètɔa va, mu ɖùnà ènu ò, mu nùnà àhà ò, eye mì gblɔ̃ be: 'Gbɔ̃gbɔ̃ vuɛ̃ le ɖè èfũ na ɛ̀!' 34*Àgbètɔ be Èvia va, e ɖùnà ènu, nùnà, eye mì gblɔ̃ be: 'Mì kpɔ ènusuɖùtɔ, àhànùgugui kèa ɖa! E nyi dùgajɔ̀tɔwo ku èvuɛ̃wɔ̀tɔwo be èxlɔ̃.' 35Sĩ vɔ̀, Mawu be èviwo ɖènà Mawu be ènunyaa be jɔ̀jɔɛ fiɔ.”
Yesù lè Simɔ̀n, Farizìa be àxomè
36Farizì ɖe kpe Yesù be bèa va ɖù ènu ku yè. Ekè Yesù yì àxuea mèa, e nɔ̀ ànyi le ɖù ènu ku ì. 37Nyɔ̃nù àgbè bàɖà nɔ̀tɔ ɖe lè èdùa mè. Ekè e sè be Yesù le ɖù ènu lè Farizìa be àxomèa, e hɛ̃ àmì huɛ̃ titi ɖe kè lè àlùbatrò be ègòvi mèa va. 38E nɔ̀ Yesù be ŋùgbedòmè, lè yebe àfɔ̀ gbɔ, le fã àvi. E fã àɖàsì ɖo Yesù be àfɔ̀wo ji, eye e sɔ yebe èɖà kè lè èta na ɛ̀a, le tutu àfɔ̀awo ŋuti. E gbigbɔ̃ àfɔ̀awo ŋuti eye e kɔ̀ àmì huɛ̃ titia ɖo woa ji. 39Ekè Farizì kè kpe Yesùa kpɔ ekèa, e gblɔ̃ lè ye ɖokoe mè be: “Ne Mawu be gblɔ̃ɖɛtɔ ye nyi àmè kèa, e la nya be nyɔ̃nù kè ŋùmè ye le tɔ yè àsia nyi èvuɛ̃wɔ̀tɔ.” 40Yesù to na ɛ̀ be: “Simɔ̀n, mù ɖo ènyà ɖe la gblɔ̃ na wò.” Simɔ̀n biɔ Yesù be: “Ènufiɔtɔ ènyà kɛ ye ò?” 41Yesù gblɔ̃ na ɛ̀ be: “Àmè èvè ɖù èfɛ̃ do àmè ɖe. Àmè ɖèka ɖù klòsalò-ga àlɔ̀ àtɔ̃, eye àmè èvègɔ̃a ɖù èkà ci èwo. 42Ekè ènu ɖe mu lè woa si ne woa sɔ tu èfɛ̃a òa, èfɛ̃tɔa sɔ wo àmè èvèa kpata be èfɛ̃awo kè wo. Àmè èvè kèawo dòmètɔ kɛ ye wò bù be e la lɔ̃ èfɛ̃tɔa wu ò?” 43Simɔ̀n ɖo e ŋuti na Yesù be: “Mù bù be àmè kè wo sɔ ègà sùgbɔ kèa ye.” Yesù gblɔ̃ na Simɔ̀n be: “Wò bù ì, be sɔ̀gbè pɛpɛ.”
44Fifìa Yesù trɔ ɖoɖa nyɔ̃nùa gbɔ, gblɔ̃ na Simɔ̀n be: “Wò kpɔ ènu kè nyɔ̃nù kèa wɔ̀a? Ekè mù va àpo àxomèa, wò mu kù èsì na mù be ma sɔ klɔ àfɔ̀ ò, vɔ̀ nyɔ̃nù kèa fã àɖàsì ɖo àfɔ̀ nyèwo ji, eye e sɔ yebe èɖà tutu woa ŋuti. 45Wò mu gbĩgbɔ̃ ènu na mù, sɔ do wòezɔ̃ na mù ò, vɔ̀ so gà kè mè mù vaa, mu tɔtè àfɔ̀ gbĩgbɔ̃ na mù ò. 46Wò mu kɔ̀ àmì ɖo èta na mù ò, vɔ̀ nyɔ̃nù kèa kɔ̀ àmì ɖo àfɔ̀ nyèwo ji. 47Ye ŋutia mù le to na wò be yebe lɔ̃lɔ̃ gã kè be ɖè fiɔawo nyi jèsì be, wo sɔ yebe èvuɛ̃ kèwo sùgbɔa sɔ kè è. Vɔ̀ àmè kè wo sɔ èvuɛ̃ vi ɖe kpò kè èa, be lɔ̃lɔ̃ cã hùe nà.” 48Eye, Yesù gblɔ̃ na nyɔ̃nùa be: “Wo sɔ èvuɛ̃ wòwo kè wò.” 49Àmè kèwo lè ɖù ènu ku Yesùa, wo gblɔ̃ lè woa nɔ̀nɔwo dòmè be: “Àmè kɛ koŋu ye nyi àmè kèa, kè le sɔ èvuɛ̃ cã kè àmè ò?” 50Vɔ̀ Yesù gblɔ̃ na nyɔ̃nùa be: “Xɔ̀sè wòa hlùɛ̃ wò gã, jo yì lè fàfa mè.”
Currently Selected:
Lukà 7: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
