Lukà 8

Nyɔ̃nù kèwo nɔ̀ Yesù yomè awo

1Lè ekèa yomè a, Yesù zɔ̃ èmɔ to èdùwo ku kɔpewo mè le do Mawu be èfìɔɖùɖu be àŋɛ̀nyuɛ̃ a na àmèwo. *Nukplavi woèvèawo bɔ̀ ɖɔ e ŋuti. 2Nyɔ̃nù ɖewo cã kplɔ̀ wo do; wo nyà gbɔ̃gbɔ̃ vuɛ̃wo to lè woa mè, eye wo dà èdɔ̀ na wo. Nyɔ̃nùawo ye nyi: Mari, Magdalà tɔ̀a, àmè kè mè gbɔ̃gbɔ̃ vuɛ̃ adrɛ̃ to lèa, 3Joanà kè nyi Kuzà, Herod be ènujikpɔtɔa be èsrɔ̃, ku Suzanà, kudo nyɔ̃nù sùgbɔ buwo. Àmè kèawo sɔ woa ŋutɔ be ènuwo kpɔ Yesù ku yebe nukplaviwo ji.

Èlododo so ènukuwutɔa ŋuti

(Màt 13.1-9; Mrk 4.1-9)

4Eye àmèwo so èdù sia èdù mè le va e gbɔ, eye kè àmèha gã ɖe va bɔ̀ do èa, Yesù do èlo na wo be: 5“Ènukuwutɔ ɖe to yì ènuku wu gbe. Ekè e le wu ìa, èɖewo jè èmɔ to; àmèwo ɖo àfɔ̀ woa ji, eye àyamè xèviwo va cã wo mì. 6Èɖewo cã jè èkpe nyigbã ji, eye kè wo mìɔ̃ gbãnà a, wo ku, ɖo wo mu kpɔ èsì ò. 7Èbuwo jè àŋùjawo mè, eye àŋùjawo mìɔ̃, vũ cɔ̃ woa ji. 8Èbuwo ya jè ànyigbã nyuɛ̃ ji, eye wo sɛ̃ èku; ɖe sia ɖe sɛ̃ èku èkà èvè takpo.” Ekè Yesù gblɔ̃ ènyà kèawo vɔ̀a, e wu e nu be: “Àmè kè si èto sè ènu lèa, ne sè è.”

Nukɛ ŋuti ye Yesù dona èlo ɖo ò?

(Màt 13.10-17; Mrk 4.10-12)

9Eye yebe nukplaviwo biɔ ɛ̀ èlododoa be gɔ̃mè. 10E gblɔ̃ na wo be: “Mìawo ye wo na be mìa nyã Mawu be èfìɔdua be àmlìmànuwo, vɔ̀ àmè kpɔ̀tɛawo yaa, ènu sia ènu lè èlododo mè na wo, àleke be:

'Wo la kpɔ ènu, gãke wo mu la jèsi ì ò;

wo la sè ènu, gãke wo mu la sè e gɔ̃mè ò.'”

Yesù ɖe ènukuwutɔa be èlododoa gɔ̃mè

(Màt 13.18-23; Mrk 4.13-20)

11Èlododoa be gɔ̃mè ye nyi ekèa: “Nuku kè wo wua ye nyi Mawu be ènyàa, 12eye kèwo jè èmɔ toawo ye nyi àmè kèwo, ne wo sè ènyàa, Àbòsam vana, eye e ɖènà ɛ̀ jo lè woabe èjì mè, ne wo mu gbà xɔ̀ e ji sè, ne woa hlùɛ̃ wo gã ò. 13Nuku kèwo jè èkpe jiawo ye nyi àmè kèwo, ne wo sè ènyàa, wo xɔ̀nà ɛ̀ kudo jìjɔɛ. Vɔ̀a wo mu ɖo èkè ò. Wo xɔ̀nà e ji sè hùenu vi ɖe kpò, eye ne tètèkpɔ vaa, wo jona àgɔ̀. 14Nuku kèwo jè àŋùjawo mèawo ye nyi àmè kèwo sè è vɔ̀, eye lè àgbè be èmɔ̃a jia, xixe kèa mè be kãmàkãmawo, yebe àdɔ̀kùnuwo ku yebe ènulɔ̃ɛwo va jãna wo, àleke be wo mu sĩnà ne woa sɛ̃ èku ò. 15Vɔ̀ ènuku kèwo jè ànyigbã nyuɛ̃ jiawo ye nyi àmè kèwo, ne wo sè ènyàa, wo xɔ̀nà ɛ̀ ɖo èjì nyuɛ̃ kè wɔ̀nà ànùkuaa mè. E lenabè na wo, ku veve do ènu kaka wo sɛ̃na èku.”

Èlododo so kãligbɛ̃ ŋuti

(Mrk 4.21-25)

16“Àmè ɖekpe mu sũnà kãligbɛ̃ sɔ èze cɔ̃na ɛ̀, àlo dànà ɛ̀ ɖo àbàti gɔ̃mè ò; vɔ̀ wo dànà ɛ̀ ɖo kãligbɛ̃ti ji, ne bèa klɛ̃ na àmè kèwo la va àxuea mèa. 17Ènu ɖekpe mu lè wawla kè wo mu la ɖè sia ò, eye nènea ke ènu ɖekpe mu lè wìmè kè mu la ze lè gàglàgbè ò. 18Mì le èto nyuɛ̃ ɖe ɖo ènyà kèwo mì le sèawo ŋuti, ɖo àmè kè si ènu lèa, e ye wo la gbà na ènu, eye àmè kè si ènu ɖekpe mu lè òa, wo la xɔ̀ ènu vi kè be susu be e lè yè sia cã lè e si.”

Yesù be ènɔ̀ ku nɔ̀viawo

(Màt 12.46-50; Mrk 3.31-35)

19Yesù be nɔ̀ kudo nɔ̀viawo va e gbɔ, vɔ̀ wo mu teŋu gogo è ò, ɖo àmèha a ŋuti. 20Eye àmèwo yì to e na Yesù be: “Ènɔ̀ wò kudo nɔ̀vi wòwo lè xixenu lè ji be yèwoa kpɔ wò.” 21Vɔ̀a e gblɔ̃ na àmèawo be: “Ènɔ̀ nyè kudo nɔ̀vi nyèwo ye nyi àmè kèwo le sè Mawu be ènyà, eye wo le wɔ̀ ɖo e jia.”

Yesù tɔtè àyà sɛ̃sɛ̃

(Màt 8.23-27; Mrk 4.35-41)

22Gbè ɖèkaa, Yesù ɖo ètɔ̀jihũ mè kudo yebe nukplaviwo. E gblɔ̃ na wo be: “Mì na mia sò ètɔ̀a jè àgo ɖèa ji.” Nène a, wo jè èmɔ. 23Ekè wo lè ètɔ̀a jia, Yesù dɔ̃ àlɔ̀. Gà ŋua mèa, àya vùdù ɖe hũ lè ètɔ̀a ji, eye èsì le ŋɛ̃ kɔ̀ ɖo èhũa mè, eye be tɔ ɖɔɖɔ, àleke be woabe àgbè ɖo àfɔ̀ku mè. 24Nukplaviawo va Yesù gbɔ, fɔ̃ ɛ̀, gblɔ̃ be: “Àpetɔ, Àpetɔ, mi le crɔ̃.” Yesù fɔ̃, eye e wo do àya kudo àsrɔ̀keawo, eye wo jè e mè, eye èɖaɖo. 25Eye, Yesù biɔ nukplaviawo sè be: “Mìabe xɔ̀sèa ɖe?” Vɔ̀a, wo vɔ̃, kã yàa, eye wo biɔ woa nɔ̀nɔwo be: “Àmè kɛ ŋutɔ gɔ̃ ye nyi àmè kèa ò? E ɖènà ègbè na àya kudo èsì ŋutɔ cã, eye wo ɖona èto è!”

Yesù nyà gbɔ̃gbɔ̃ vuɛ̃ to lè ŋusù ɖe mè

(Màt 8.28-34; Mrk 5.1-20)

26Yesù ku nukplaviawo va ɖo Gadaratɔwo#8.26 Gadaratɔwo: Kpɔ Màt 8.28. be ànyigbã kè jè ŋùkɔ̀ Galilea ji. 27Ekè be to lè èhũa mè jè àgoa, èdùa mè be ŋusù ɖe, kè mè gbɔ̃gbɔ̃ vuɛ̃ lèa, va dogò è. E tèpe dìdì kè ŋusù kèa mu gbà do àwù kpɔ ò, eye mu nɔ̀nà àxomè cã ò. Èyɔ̀dowo dòmè kpò be nɔ̀nà. 28Kè e kpɔ Yesùa, e do àpa eye e jè èklò lè yebe ŋùkɔ̀, gblɔ̃ kudo ègbè sɛ̃sɛ̃ be: “Yesù Mawu èjihũitɔa be Èvi, ènyà kɛ ye lè ènyè kudo èwò dòmè ò? Mù le blìbɔ̀ na wò; mù gbà do àyà na mù ò.” 29E gblɔ̃ ènyà kèawo, ɖo, Yesù ɖè ègbè na gbɔ̃gbɔ̃ màkɔ̀ màkɔa be, bèa to lè ŋusùa mè. Eji-ejia, gbɔ̃gbɔ̃ màkɔ̀ màkɔa jènà e ji, eye ne wo bla ɛ̀ ku kɔ̀sɔ̀kɔsɔ, gbà do ègà àfɔ̀ na ɛ̀ cã, e sònà kɔ̀sɔ̀kɔsɔawo, ŋɛ̃na àfɔ̀gawo, eye gbɔ̃gbɔ̃ vuɛ̃ a nyànà ɛ̀ do ègbe. 30Yesù biɔ ɛ̀ be: “Nyikɔ wò ɖe?” E ɖo e ŋuti na ɛ̀ be: “Àkpe àkpewo.” E gblɔ̃ ekèa, ɖo gbɔ̃gbɔ̃ vuɛ̃ sùgbɔ ye lè e mè. 31Eye gbɔ̃gbɔ̃awo ɖè kuku na Yesù be, mu gbà nyà yèwo ɖoɖa àvlìmè ò.

32Vɔ̀a èhãwo be èha gã ɖe lè ɖù ènu lè ètoa ji. Gbɔ̃gbɔ̃ vuɛ̃awo ɖè kuku na Yesù be, ne na yèwo èmɔ ne yèwoa yì ɖo èhãwo mè. Nène a, Yesù ɖè èmɔ na wo. 33Gbɔ̃gbɔ̃ vuɛ̃awo to lè àmèa mè, yì ɖo èhãawo mè. Ehãawo pò àgblì ɖì so èkpoa ji, jè ètɔ̀a mè, eye wo ku ètɔ̀ ku. 34Kè àmè kèwo le kpɔ èhãwo jiawo kpɔ ènu kèa, wo si, eye wo yì to ènu kè jɔ̀ a lè èdùa kudo kɔpewo mè. 35Àmèwo to va be yèwoa kpɔ ènu kè jɔ̀ a. Wo va Yesù gbɔ, eye wo kpɔ àmè kè mè gbɔ̃gbɔ̃ vuɛ̃awo to lèa, nɔ̀ ànyi lè Yesù be àfɔ̀ nu. E do àwù, eye yebe àyè sɔ̀gbè. Eye vɔ̃vɔ̃ ɖo wo. 36Àmè kèwo kpɔ ènu kèawo tèpeawo gblɔ̃ leke Yesù hlùɛ̃ àmè kè mè gbɔ̃gbɔ̃ vuɛ̃wo nɔ̀a gãa na wo. 37Nène a, Gadara be ànyigbã ji tɔwo keŋu va ɖè kuku na Yesù be, ne jo lè yèwo dòmè, ɖo vɔ̃vɔ̃ ɖo wo ŋutɔ. Yesù ɖo ètɔ̀jihũa mè, trɔ jo. 38Àmè kè mè gbɔ̃gbɔ̃ vuɛ̃wo to lèa, ɖè kuku be yèa nɔ̀ e gbɔ, vɔ̀ Yesù ɖo è ɖoɖa gblɔ̃ be: 39“Gbìgbɔ̀ yì àxue wò mè, ne wòa ɖè ènu kè Mawu wɔ̀ na wòa keŋu fiɔ.” Ŋusùa jo, le ɖè èha ènu kèwo keŋu Yesù wɔ̀ na ɛ̀, lè èdùa keŋu mè.

Jayirò be èvi-nyɔ̃nù

Nyɔ̃nù kè tɔ àsi Yesù be àwùa

(Màt 9.18-26; Mrk 5.21-43)

40Kè Yesù trɔ gbɔ̀a, àmèha a xɔ̀ ɛ̀ kudo jìjɔɛ, ɖo woa keŋu nɔ̀tè le kpɔ yebe gbɔ̀gbɔ. 41Ŋusù ɖe, kè be nyikɔ nyi Jayirò, eye be nyi bɔ̀bɔ̀pea be ègaa, va jè èklò ɖo Yesù be àfɔ̀ nu. E ɖè kuku na ɛ̀ be, bèa va yebe àxomè, 42ɖo yebe èvi-nyɔ̃nù àkòŋùgò kè xɔ̀ sìgbè èpè woèvè nènea, le pò kubaɖa.

Ekè Yesù jè èmɔ le yìa, àmèha le dri ì. 43Nyɔ̃nù ɖe kè le le èhũ ŋɛ̃ŋɛ̃ be èdɔ̀, èpè woèvè sɔ̃ŋua nɔ̀ àmèawo dòmè#8.43 Mawunya be xoma xoxo ɖewo gblɔ̃ be: “E gble yebe ènunɔ̀amèsiwo keŋu ɖo àtikè ŋuti, eye àmàdàtɔ ɖekpe mu teŋu dà èdɔ̀a na ɛ̀ ò.”. 44E to Yesù be ŋùgbedòmè, tɔ àsi yebe àwùa be ètomè. Troloa, èhũ ŋɛ̃ŋɛ̃a sò na ɛ̀. 45Yesù biɔ be: “Àmè kɛ ye tɔ mù àsi ò?” Vɔ̀ kè àmèawo keŋu gbea, Petrò gblɔ̃ na ɛ̀ be: “Àpetɔ, àmèha a ye le mimi wò, le zĩ wò.” 46Yesù gblɔ̃ be: “Àmè ɖe tɔ mù àsi. Mù nya, ɖo ŋusɛ̃ ɖe to so mè nyè.” 47Ekè nyɔ̃nùa kpɔ be Yesù nya ènu kè yè wɔ̀a, e le hũhũ tìtìtì eye be dɔ̃ va. E jè èklò lè Yesù be ŋùkɔ̀, eye be gblɔ̃ ènu kè ŋuti be tɔ àsi Yesù ɖo, ku leke yebe èdɔ̀a vɔ̀ troloa, lè àmèwo keŋu be ŋùmè. 48Yesù gblɔ̃ na ɛ̀ be: “Èvi nyè, xɔ̀sè wòa hlùɛ̃ wò gã. Jo yì lè ŋuti fàfa mè.”

49Wàlɛbɛ kè Yesù kpɔ̀tɔ̀ le pò nupoa, àmè ɖe so bɔ̀bɔ̀pe be ègaa be àxomè va gblɔ̃ na Jayirò be: “Èvi wò nyɔ̃nùa ku, mu gbà hiã be wòa do nupo na Ènufiɔtɔa ò.” 50Vɔ̀ kè Yesù sè ènyà kèa, e gblɔ̃ na Jayirò be: “Mù gbà vɔ̃ ò, gbe xɔ̀sè kpò, e la gã.” 51Ekè Yesù va ɖo àxuea mèa, mu ɖè èmɔ na àmè ɖekpe be, ne ɖo èxɔ̀a mè ku yè, sɔ wu Petrò, Yòhanɛ̀s, Yakobò kudo ɖèvia be ètɔ gbàkudo ènɔa ɖèɖe kpò ò. 52Àmè kèwo keŋu lè funuawo, lè àvi ji, le làmɔɛ̃. Yesù gblɔ̃ na wo be: “Mì mu gbà fã àvi ò; nyɔ̃nùvia mu ku ò, vɔ̀a, e le dɔ̃ àlɔ̃ ye.” 53Eye wo le kò e, ɖo wo nya be nyɔ̃nùvia ku. 54Vɔ̀ Yesù le yebe àlɔ̀tinu, yɔ ɛ̀, gblɔ̃ be: “Èvi nyè, fɔ̃!” 55Troloa, tùgbɛ̀jɛvia gbɔ̀ àgbè, eye e fɔ̃, sitè. Yesù biɔ be woa na ɛ̀ ènu, bèa ɖù. 56Yebe àjìtɔawo kã yàa. Vɔ̀ Yesù do *èse na wo be, wo mu gbà gblɔ̃ ènu kè jɔ̀ a, na àmè ɖe ò.

Currently Selected:

Lukà 8: GEN

Highlight

Copy