Markò 15

Wo kplɔ̀ Yesù yì Pilatò gbɔ

(Màt 27.1-2, 11-14; Luk 23.1-5; Yòh 18.28-38)

1Eye ekè èŋù kèa, * mawunɔ gãwo ku èdùmèmègãwo kudo ènuŋlɔ̀tɔwo gbàkudo kòjoɖotɔwo bɔ̀ ŋùdekɛ̃nyɛ fùtù; wo bù ètamè so ènu kè wo la wɔ̀a ŋuti. Wo bla Yesù, kplɔ̀ ɛ̀ yì do àsi na Pilatò. 2Pilatò biɔ ɛ̀ ènyà sè be: “Èwò ye nyi Yudàviwo be èfìɔa?” Eye Yesù ɖo e ŋuti na ɛ̀ be: “Èwò ye gblɔ̃ ɛ̀.” 3Mawunɔ gãwo dohùɛ sùgbɔ do Yesù, 4ye ŋutia, Pilatò gbà gblɔ̃ na Yesù be: “Wò sè ènyà gbogbo kè wo gblɔ̃ so ŋuti wòa? Wò mu ɖo ènyà ɖekpe la sɔ ɖo e ŋuti na woa?” 5Yesù mu gbà ɖo ènyà ɖekpe ŋuti na ɛ̀ ò, eye e kpaca Pilatò.

Wo sò èku kòjo na Yesù

(Màt 27.15-26; Luk 23.13-25; Yòh 18.39—19.16)

6Lè *Toŋutivayì be àzã ɖùɖu ɖe sia ɖe be gàmèa, Pilatò ɖènà ègà gàmènɔ̀tɔ ɖèka na Yudàviwo. Gàmènɔ̀tɔ kè woa ŋutɔwo biɔa. 7Vɔ̀a, ŋusù kè wo yɔna be Barabas-a lè ègàkpa mè ku àglajèɖodùtatɔ ɖewo. Wo le wo, ɖo wo wù àmè lè èzĩ tɔ̀tɔ ɖe be hùenu. 8Àmèha a yì Pilatò gbɔ, biɔ ɛ̀ be ne ɖè ègàmènɔ̀tɔ ɖèka to na yèwo, sìgbè àlekè be wɔ̀nà ɛ̀ sãa lè èpè sia èpè hùenua nène. 9Pilatò biɔ wo sè be: “Mì jro be ma ɖè Yudàviwo be èfìɔa to na mìa?” 10E biɔ wo ènyà kèa sè, ɖo e kpɔ be * mawunɔ gãwo be ŋuhuã ŋuti ye wo kplɔ̀ Yesù va na yè ɖo. 11Mawunɔ gãwo do èzò lãmè na àmèha a ne bèa biɔ be Pilatò ne ɖè ègà Barabas bòhũ. 12Kè be gbà xɔ̀ ènyàa, Pilatò to na wo be: “Nukɛ ye mì le ji be ma wɔ̀ na àmè kè mì yɔna be Yudàviwo be èfìɔa ò?” 13Wo do àpa, ɖo e ŋuti na ɛ̀ be: “Ka ɛ̀ ɖo àtisòga ŋuti.” 14Pilatò biɔ wo sè be: “Èvuɛ̃ kɛ ŋutɔ ye be wɔ̀ ò?” Vɔ̀a, àmèha a gbà do àpa sɛ̃sɛ̃ ɖe gblɔ̃ be: “Ka ɛ̀ ɖo àtisòga ŋuti.” 15Vɔ̀a, kè Pilatò le ji be yèa nyɔ lè àmèha a gbɔa, e ɖè Barabas to lè ègà mè na wo. E yomè a, e na wo pò Yesù ku àtãŋù eye e sɔ ɛ̀ do àsi na wo be woa yì ka ɛ̀ ɖo àtisòga ŋuti.

Wo wɔ̀ àŋùja be jègbà na Yesù

(Màt 27.27-31; Yòh 19.2-3)

16Gbãdãgbãwo kplɔ̀ Yesù yì Pilatò be èfìɔsaa be àwamè, eye wo yɔ gbãdãgbãha bliboa bɔ̀ lè funu. 17Wo do àwù dìdi jɛ̃ɛ ɖe na Yesù eye wo sɔ àŋùja lɔ̃ fìɔkuku ɖe sɔ cɔ̃ èta na ɛ̀. 18Wo tɔ ègbè dodo na ɛ̀ le gblɔ̃ be: “Mi le do ègbè na wò Yudàviwo be èfìɔ.” 19Wo sɔ àpla pò èta na ɛ̀, gbà tu ètã kɔ̀ ɖo e ŋuti. Wo jè èklò lè ŋùkɔ̀ na ɛ̀ sɔ le jè *èɖɛ̀ na ɛ̀. 20Ekè wo ɖè àlɔmè lè e ŋuti eye be sù woa, wo va ɖè àwù jɛ̃a lè èkɔ̀ na ɛ̀, sɔ ye ŋutɔ be àwùwo do na ɛ̀. E yomè a, wo kplɔ̀ ɛ̀ to lè àxuea mè ne woa yì ka ɛ̀ ɖo àtisòga ŋuti.

Wo ka Yesù ɖo àtisòga ŋuti

(Màt 27.32-44; Luk 23.26-43; Yòh 19.17-27)

21Ŋusù Kirenètɔ ɖe tɔ̀ Simɔ̀n. E ye jì Àlɛ̀ksãdrò ku Rufò. Ŋusù kèa so àgblè mè va le yì àxomè eye, gbãdãgbãwo sò è, zĩ e ji be bèa dro Yesù be àtisògaa. 22Wo kplɔ̀ Yesù yì àfi kè wo yɔna be Golgatàa, kè gɔ̃mè ye nyi “Àmèta tèpea”. 23Wo caka vɛ̃ ku àbɛyɛ ɖodu be bèa nù, vɔ̀a, Yesù mu nù ì ò. 24Ekè wo ka ɛ̀ ɖo àtisòga ŋuti vɔ̀a, wo dà àkɔ̀ sɔ ma yebe àwùwo; ne woa sɔ nya ekè àmè sia àmè la xɔ̀a. 25Ŋùdekɛ̃nyɛ, gà àsiɖèkɛ mè ye wo ka ɛ̀ ɖo àtisòga ŋuti. 26Eye wo ŋlɔ̀ àgɔ̀ kè be jè a ɖo yebe ètagbe be: “Yudàviwo be èfìɔ.” 27Wo ka fìãfìtɔ èvè cã bɔ̀ ɖo e ŋuti. Wo ka ɖèka ɖo yebe ɖùsi mè, eye wo ka èvègɔ̃a ɖo yebe èmìɔ̃ mè. [ 28Nène a ye ŋɔ̀ŋlɔ̃ a be ènyàa zɔ̃ sù be: “Wo hlɛ̃ ɛ̀ ɖo èvuɛ̃wɔ̀tɔwo dòmè.”]

29Àmè kèwo to funu va le yìawo hũhũna èta, zũnà ɛ̀, gblɔ̃nà na ɛ̀ be: “Hoo na wò. Èwò kè be yè la gbã mawuxɔa, la gbìgbɔ̀ tù èbu lè ŋùkèkè ètɔ̃ mèa ye ŋuaa? 30Hlùɛ̃ ɖokoe wò gã. Đì so àtisogaa ŋuti.” 31Mawunɔ gãwo ku ènu ŋlɔ̀tɔwo cã le ɖè àlɔmè lè Yesù ŋuti. Wo le gblɔ̃ lè woa nɔ̀nɔwo dòmè be: “E hlùɛ̃ àmè buwo gã, vɔ̀ mu teŋu hlùɛ̃ ye ɖokoe gã ò. 32Kristò, Izràɛl be èfìɔa ne ɖì so àtisògaa ŋuti fifì ne mia kpɔ. Ne e ɖì so àtisògaa ŋutia, eŋuã, mi la xɔ̀ e ji sè.” Àmè kèwo wo ka ɖo àtisògaa ŋuti lè yebe àxàda mèawo cã le zũ ì.

Yesù ku

(Màt 27.45-56; Luk 23.44-49; Yòh 19.28-30)

33Kè gà woèvè pòa, vìvìti do ɖo èdùa kpata ji kaka va na wètrɔ gà ètɔ̃ mè. 34Kè gà ètɔ̃ pòa, Yesù do àpa sɛ̃sɛ̃ ɖe gblɔ̃ be: “Eli! Eli! Lama sàbatanì?” — E gɔ̃mè ye nyi be: “Mawu nyè! Mawu nyè! Nukɛ ŋuti ye wò gble mù ɖɛ ɖo ò?” — 35Àmè kèwo lè funuawo dòmètɔ ɖewo sè ènu kè Yesù gblɔ̃a, eye wo be: “Mì le sè a? E le yɔ Èli.” 36Woa dòmètɔ ɖèka pu dù, nyrɔ̃ àpùmèkùsa ɖèka ɖo vɛ̃ vesì-vesì mè, e sɔ àpùmèkùsaa ɖo àpla ɖe ŋuti, drɛ̃ ɖo ènu gbɔ na Yesù be bèa nù, le gblɔ̃ be: “Mì tɔtè ne mìa kpɔ be Èli la va ɖè è lè àtisògaa ŋuti màa.” 37Vɔ̀a, Yesù do àpa sɛ̃sɛ̃ ɖe, eye be miɔ ènu.

38Àvɔ gãa kè wo sɔ sò mawuxɔa mèa, zɛ̃ ɖo èvè, so èji kaka va gɔ̃mè. 39Romàtɔwo be àhùaga kè jè ŋùkɔ̀ Yesùa, kpɔ àlekè ènuwo yì ɖoa, eye e gblɔ̃ be: “Mawu be Èvi ye ŋusù kèa nyi nyàwo.” 40Nyɔ̃nù ɖewo cã lè funu, le kpɔ ènu kè le jɔ̀ a ɖoɖa lè àzɔ̀ge. Lè nyɔ̃nù kèawo dòmèa, mi la kpɔ Mari kè so Magdalàa, ku Mari kè jì Yakobò-vi kudo Joze, gbàkudo Salomea. 41Nyɔ̃nù ŋuawo ye kpàsà Yesù do, kpe ɖo e ŋuti lè yebe èhiãwo mè wàlɛbɛ kè be nɔ̀ Galileaa. Nyɔ̃nù sùgbɔ buwo cã lè funu ekèwo kpàsà Yesù do va Yèruzàlɛm-a.

Wo ɖì Yesù

(Màt 27.57-61; Luk 23.50-56; Yòh 19.38-42)

42Kè fìɛ̃si ɖoa, ekè gbè ŋua gbè nyi jàjràɖo zã kè jè ŋùkɔ̀ na jɛ̃gbɔ̃zã ŋutia, 43Yozɛ̀f AriMàt ètɔ̀, àsàfɔ̀cɛ̀ ɖìnyi ɖe, àmè kè ŋutɔ cã le ɖo ŋùkuvi Mawu be èfìɔɖùɖua va, eye e do èjì yì Pilatò gbɔ, eye e biɔ Yesù be àmètia. 44Vɔ̀a, kè Pilatò sè be Yesù ku vɔ̀a, e kpaca ɛ̀, eye e yɔ àhùagaa biɔ ɛ̀ sè be e dìdì kè Yesù ku màa? 45Ekè àhùagaa ɖo e ŋuti na ɛ̀ be nyàwo ye à, e na ègbè Yozɛ̀f be bèa yì sɔ Yesù be àmètia. 46Yozɛ̀f plè kploba eye, ekè be ɖè Yesù be àmètia lè àtisògaa ŋutia, e bla ɛ̀ ɖo kplobaa mè, sɔ ɛ̀ yì mlɔ̃ èyɔ̀do kè wo kù ɖo àkpã ɖe mèa mè. E yomè a, e mlì èkpe gã ɖe sɔ tu èyɔ̀doa nu. 47Mari kè so Magdalàa, ku Mari kè nyi Joze be ènɔa kpɔ àfi kè wo ɖì Yesù ɖoa.

Currently Selected:

Markò 15: GEN

Highlight

Copy