Markò 16
16
Yesù fɔ̃ so èku
(Màt 28.1-8; Luk 24.1-12; Yòh 20.1-10)
1Kè Yudàviwo be jɛ̃gbɔ̃zã va yìa, Mari Magdalà tɔ̀a ku Mari kè nyi Yakobò be ènɔ̀ kudo Salome, plè àmì hɔ̃hɔ̃ɛwo la yì sì na Yesù be àmètia. 2Wo yì Yesù be èyɔ̀doa to lè kuasiɖa be ŋùkèkè cucugbãa ji, ŋùdekɛ̃nyɛ fùtùu, wàlɛbɛ kè èwè le zɛ̃ a. 3Wo le biɔ woa nɔ̀nɔwo sè be: “Àmè kɛ la mlì èkpe kè lè èyɔ̀doa nu na mi ò?” 4Vɔ̀a, ekè wo kɔ ŋùmè yì èjia, wo kpɔ be wo mlì èkpe gãa ŋua jo lè èyɔ̀doa nu xoxo vɔ̀. 5Nyɔ̃nùawo ɖo èyɔ̀doa mè eye wo kpɔ ɖèkajɛ ɖe lè funu do àwù ɣe lè ànyi nɔ̀nɔ lè ɖùsi mè eye àdìka sò wo. 6Vɔ̀a, ɖèkajɛ a gblɔ̃ na wo be: “Mì mu gbà vɔ̃ ò. Mù nya be Yesù Nazarɛttɔ̀ kè wo ka ɖo àtisòga ŋutia ye mì le ji. E fɔ̃ so èku, mu gbà lè fikèa ò. Mì va kpɔ àfi kè wo ɖì ì ɖoa ɖa. 7Mì yì fifì ne mìa yì to na yebe nukplaviwo kudo Petrò cã be: 'E jè ŋùkɔ̀ na mì, yì Galilea, funu ye mì la kpɔ ɛ̀ lè, sìgbè àlekè be gblɔ̃ na mìa nène.'” 8Nyɔ̃nùawo pu dù to, eye wo si jo lè èyɔ̀doa gbɔ, ɖoa wo le hũhũ tìtìtì. Woabe àyè gbãdo eye wo mu gblɔ̃ ènyà ɖe na àmè ɖe ò, ɖo wo le vɔ̃.
Yesù ɖè ye ɖokoe fiɔ
[ 9Lè kuasiɖa gbè, ŋùdekɛ̃nyɛ fùtùua, wàlɛbɛ kè Yesù fɔ̃ so èku vɔ̀a, e ɖè ye ɖokoe fiɔ Mari Magdalà tɔ̀a cucugbã. Mari Magdalàtɔ̀ kèa be lãmè ye be nya gbɔ̃gbɔ̃ vuɛ̃ adrɛ̃ to lè. 10Àmè kèa yì to è na àmè kèwo nɔ̀ èdu ku Yesù, eye wo ɖɔ kudo àkpɔ̃ gã ɖe, le fã àviawo. 11Togbɔ be wo sè be Yesù lè àgbè, eye Mari be yè kpɔ ɛ̀a, wo mu xɔ̀ ɛ̀ sè ò.
Yesù ɖè ye ɖokoe fiɔ nukplavi èvè
(Luk 24.13-35)
12E yomè a, Yesù sɔ nɔ̀nɔmè bu ɖè ye ɖokoe fiɔ *nukplavi èvè ɖewo kèwo zɔ̃ èmɔ le yì kɔpe ɖe mèa. 13*Nukplavi èvèawo trɔva yì to è na nukplavi kpɔ̀tɛawo, vɔ̀a, wo mu xɔ̀ woawo cã ji sè ò.
Yesù ɖè ye ɖokoe fiɔ nukplavi woeɖèkaawo
(Màt 28.16-20; Luk 24.36-49; Yòh 20.19-23; Dɔw 1.6-8)
14Ekèawo yomè a, Yesù va ɖè ye ɖokoe fiɔ nukplavi woeɖèkaawo wàlɛbɛ kè wo le ɖù ènua. E kã ŋùmè na wo so woabe mà xɔ̀sè ku èjì tìtri ŋuti, ɖo wo mu xɔ̀ àmè kèwo kpɔ ɛ̀, va gblɔ̃ na woa be ènyà ji sè ò. 15E yomè a, e gblɔ̃ na wo be: “Mì yì xixea kpata mè ne mìa do àŋɛ̀nyuɛ̃ a na àgbètɔwo kpata. 16Àmè kè la xɔ̀sè eye wo la lè mawusi na ɛ̀a, la gã, vɔ̀a, àmè kè mu la xɔ̀sè òa, wo la gblehùɛ do è. 17Jèsìdo kèawo ye la kplɔ̀ àmè kèwo xɔ̀sèawo do: wo la nyà gbɔ̃gbɔ̃ vuɛ̃wo to lè àpe nyikɔ mè, wo la pò nupo ku ègbè ye yèwo. 18Wo la le èdãwo ku àlɔ̀, eye ne wo nù àɖia, mu la wɔ̀ èvuɛ̃ ɖe ku wo ò. Wo la ɖo àlɔ̀ èdɔ̀nɔ̀wo ji, eye wo la gã.”
Yesù trɔ yì jiŋùkusi
(Luk 24.50-53; Dɔw 1.9-11)
19Ekè Tɔhonɔ̀ Yesù gblɔ̃ ènyà kèawo na wo vɔ̀a, wo kɔkɔ ɛ̀ yì jiŋùkusi eye e yì nɔ̀ ànyi lè Mawu be ɖùsi mè. 20Nukplaviawo yaa, wo so jè èmɔ, eye wo do àŋɛ̀a lè àfi sia àfi. Tɔhonɔ̀ le wɔ̀ èdɔ ku wo, le do ŋusɛ̃ ènyàa to jèsì kèwo bɔ̀ ɖo e ŋutiawo mè.]
Currently Selected:
Markò 16: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
