Luka 2

Yesu ne:burwa

(Mt. 1:18-25)

1Mu siku ijo eciragiro niciso:ka ku Kaisari Augusito ati, gandikwe amasi:na ga be ca:ro bo:ne. 2Okwo nikwo okwandikwa kwo kwamba anu Kurenio ariga:ri musi:ba wa Syamu. 3Aba:nu bo:ne nibagenda okwandikwa, buri nu:nu mu musi gwabo. 4Yusufu one naso:ka Galilaya mu musi gwa Najareti, nagenda Buyaudi mu musi gwa Daudi, gunu ogutogwa Beteleemu, okuba ariga wa mu nyumba na wa mu ruganda rwa Daudi, 5korereki andikwe aamwi na Maryamu unu asandaga, unu ari na inda. 6Mbe anu bariga bari:yo, jisiku jae ejo kwibura niji:ya. 7Ne:bura Omwana wo bubere, namuswikira mu myenda je ca:na, namuma:mya mwituba rya jiŋa, okuba batabwene mwanya mu buma:mo bwa bagenyi.

Bamaraika na bare:fi

8Bariga bario abare:fi mu:si iyo bariga be:kae mu ndiri nibarinda riijo ryebwe mu ngeta. 9Mbe maraika wa Ratabugenyi nabe:mereguruko, na rikusyo rya Ratabugenyi niribasingira niryeŋengeta, nibo:baya muno, 10Maraika nababwira ati, Musige ku:baya, okuba rora, enibare:tera ebigambo byo bwana ebyo kukonderwa kwafu, kunu kuriba ku ba:nu bo:ne. 11Okuba rero mweburirwa Omukisya mu musi gwa Daudi, niwe Kristo Ratabugenyi. 12Cinu nico ecibarikisyo kwimwe. Omujo:rora omwana omwiburano aswikiye emyenda je ca:na ama:mibwe mwituba rya jiŋa. 13Aonao nibabao ba:fu aba mu cise ca mu rwire aamwi na maraika, nibakuya Nyamuanga, niba:ika ati,

14Rikusyo ribe ku Nyamuanga unu ari inguru muno,

Na mu:si omurembe gube mu ba:nu banu abamukondisya.

15Mbe bamaraika wejire babaso:kako okugenda mu rwire, abare:fi niba:ikana ati, Mbe cigende Beteleemu, cirore omusango gunu gwabayo, gunu Ratabugenyi ace:resya. 16Nibaja bwangu, nibasanga Maryamu na Yusufu no mwana mwiburano ama:mire mwituba rya jiŋa. 17Wejire barora, nibe:resya emisango jinu babwiriywe ku mwana oyo. 18Bo:ne banu bonguywe nibarugu:ra jinu abare:fi bababwiriye. 19Nawe Maryamu naja:ma emisango ejo jo:ne, naji:ganirisya mu mutima gwae. 20Mbe abare:fi nibasubayo, nibakusya Nyamuanga no kumukuya kurwe misango jo:ne jinu bonguywe na jinu barorere, rwa kutyo babwiriywe.

Okutendwa kwa Yesu

21Mbe jisiku eta:nu ne:satu ejo kutenderako wejire je:ya, natogwa risi:na ryae Yesu, rinu atogerwe na maraika acari kuba na munda. 22Mbe wejire je:ya jisiku jo kusomoka kwebwe rwe biragiro bya Musa kutyo byaragiriye, nibamugega nibamusira Yerusalemi korereki bamuyane Ratabugenyi. 23Rwa kutyo jandi kirwe mu biragiro bya Ratabugenyi ati, Ecirume co:ne cinu eca:ta inda ciratogwaga ce:ru ku Ratabugenyi. 24Nibaja okuso:sya eco:go rwa kutyo ca:ikirwe mu biragiro bya Ratabugenyi ati, Njiba ebiri amwi ba:na be bigu:ti babiri.

Okusi:ma kwa Simeoni

25Ariga:rio mu:nu mu Yerusalemi risi:na ryae Simeoni. Omu:nu uyo ariga murengeresi, no:baya Nyamuanga, narindirira okusi:ri:sibwa kwa Israeli. No Mwoyo Mweru ariga amuriko. 26Oyo asweruriywe no Mwoyo Mweru ati ataribona kufwa acari kurora Kristo wa Ratabugenyi. 27Natangasibwa no Mwoyo, nengira mu yekaru. Mbe abe:busi bae wejire bamure:ta Omwana Yesu korereki bamukorere rwa jintungwa je biragiro kutyo jiri, 28mbe, omwene namuyeka mu maboko gae, nasi:ma Nyamuanga na:ika ati,

29Ratabugenyi, woryanu waraga omugaya wao no murembe, rwa kutyo wa:ikire,

30Okuba ame:so gani garora omweruro gwao,

31Gunu we:ra:bire imbere ya ba:nu bo:ne.

32Gube bweru bwo kumurikira abamaanga, Na rikusyo rya ba:nu bao Abaisraeli.

33Yusufu na nyiramwene nibarugu:ra emisango ejo amwaikireko. 34Simeoni nabasabirwa ribando, nabwira Maryamu nyiramwene ati,

Rora, Omwana unu ateyweo bagwe no kwimereguru ba:fu mu Israeli.

Abe cibarikisyo co kufumwa.

35Nawe ecinyambutu cirikusoma mu mwoyo gwao one,

Korereki ame:ganirisyo ge mitima ja ba:fu gasweruke.

36Mbe ariga:rio Ana omuragi, muyasya wa Fanueli, wa mu ruganda rwa Aseri. Oyo ariga:ri mukwekuru, amarire no murume wae myaka eta:nu ne:biri kuso:ka mu buto:to bwae. 37Ariga amarire myaka makumi gata:nu na gasatu ne:na ari mutumba. Oyo ataso:kaga mu yekaru, naramya no kusara:rira no kusabwa mu mwisi na mu ngeta. 38Na:ja mu mwanya ogwo ogwo, nasi:ma Nyamuanga, na:ika emisango jae ku bo:ne banu barindiriraga okucungurwa kwa Yerusalemi. 39Wejire bamara okuku:misya jo:ne jinu jiri mu biragiro bya Ratabugenyi, nibasuba Galilaya mu musi gwabo gwa Najareti. 40Omwana nakura nongesibwako amanaga, ne:jura obwenge. Ecigongo ca Nyamuanga nicibaga aamwi nage.

Omumura Yesu aagati mu be:igisya

41Mbe abe:busi ba Yesu bagendaga Yerusalemi ku myaka ku marya ga Ipasaka. 42Wejire amara myaka ekumi ne:biri, nibarinya Yerusalemi rwa kutyo jintungwa jariga jiri. 43Jisiku ja marya jejire jawa, anu bariga nibainduka, Omwana oyo Yesu nasigara mu Yerusalemi. Abe:busi bae bariga batamenyere. 44Nawe be:ganirisyaga ati, ari mu murobo gweswe, nibaribata rugendo rwa rusiku rumwi, nibamuyenja mu bairi babo na mu basa:ni bebwe. 45Wejire ababura, nibasuba Yerusalemi nibamuyenja. 46Wejire jaturao siku isatu, nibamusanga mu yekaru, enyanjire aagati mu be:igisya, nabategeresya nababu:sya. 47Bo:ne banu bamungwaga nibajuma kurwo bwenge bwae no kuindura kwae. 48Mbe wejire bamurora nibataŋaŋara. Nyiramwene namubu:sya ati, ?Mwana wani, okucikora kutya niki? Esomwana nanye cariga nicikuyenja asurumbae. 49Nababu:sya ati, ?Mwariga nimunyenjera ki? ?Mutamenyere ati, kunyiire okuba mu mirimu ja Rata? 50Batasombo:keywe omusango gunu ababwiriye. 51Natebera nabo naja Najareti, nabo:roberaga. Nawe nyiramwene naja:ma emisango ejo jo:ne mu mutima gwae. 52Yesu neyongesyako obwenge no kukura no kukondisya Nyamuanga na ba:nu.

Currently Selected:

Luka 2: KIJ1960

Highlight

Copy