Luka 1
1
1Okuba ba:nu ba:fu bateeo okuboko okutonda no kusombo:ra emisango jinu ce:kirisisye, 2Rwa kutyo bacisimuriye banu bariga mbarora na bakosi bo musango kuso:kerera ku bwambiro, 3anye one narora ati ni kwa bwana okukwandikira jitondere kisi, awe Teofilo omurende, okuba anye nimenyere emisango je cimari eja byone kuso:ka ku bwambiro. 4Korereki umenye okumosya kwe misango jinu we:igisibwe.
Okuraga kwo kwiburwa kwa Yoana Omubatija
5Mbe mu siku ja Erode, omukama wa Buyaudi, ariga:rio mugabisi umwi, risi:na ryae Jakaria, wa mu bubaranwa bwa Abia. Oyo ariga no mugasi wae mu bayasya ba Aroni, risi:na ryae Elijabeti. 6Abo ku bubiri bariga barenge:resi imbere ya Nyamuanga, nibaribatira mu biragiro byone na mu misango ja Ratabugenyi batariko esoro. 7Nawe batariga na mwana, okuba Elijabeti ariga:ri mugumba, ku bubiri bwebwe bariga bakokoe. 8Mbe anu ariga aca:kora omurimu gwo bugabisi imbere ya Nyamuanga mu kusijanya kwo kubaranwa kwae, 9mbe obwitosi nibumugwira okwingira mu yekaru ya Ratabugenyi okwotera emigaju, rwa jintungwa jo bugabisi kutyo jariga. 10Mbe ecise co:ne eca ba:nu cariga nicisabirwa aanja mu mwanya gwo kwotereramo. 11Mbe maraika wa Ratabugenyi namusoromokera e:mereguyu ku rubara rwe buryo orwe cigabiro co kwotererako. 12Jakaria wejire amurora nafwa cigutuko, no:baya. 13Nawe maraika namubwira ati, Uto:baya, Jakaria, okuba okusabwa kwao kwongwibwe. Omugasi wao Elijabeti arikwiburira Omwana we cirume, numutoga risi:na ryae Yoana.
14Urimukondererwa no kusandaba,
Na ba:nu ba:fu barikondererwa okwiburwa kwae.
15Okuba ariba mukuru imbere ya Ratabugenyi.
Atarinywa manji ga mijabibu, amwi cinu ecikora.
Arikusibwa Omwoyo Mweru kuso:ka munda ya nyiramwene.
16Na ba:fu mu ba:na ba Israeli aribasubya ku Ratabugenyi Nyamuanga webwe.
17Aritangata imbere yae mu mwoyo na mu managa ga Eliya,
Korereki asubye emitima ja basaja wabo ku ba:na,
Na banyantongwa abasubye okuribatira mu bwenge bwa barenge:resi,
E:ra:bire Ratabugenyi aba:nu banu bacumacumirwe.
18Jakaria nabu:sya maraika ati, ?Gunu enigumenya atiki? Okuba anye nakokoe, no mugasi wani one akwekuye mu myaka jae. 19Maraika namuindura namubwira ati, Nanye Gaburieli, unu nimereguyu imbere ya Nyamuanga. Anye natumirwe okwaika na:we, no kukweresya ebigambo binu ebyo bwana. 20Mbe rora, ouba mujibi, utaca:tura kwaika, kukinga ku rusiku runu ariba ejo je:ya, okuba ute:kirisya misango jani jinu jiriku:misibwa mu siku jajo. 21Mbe aba:nu bariga nibarindirira Jakaria, nibarugu:ra okuba ako:rere mu yekaru. 22Mbe ejire auruka, ataturire kwaika nabo. Nibamenya ati, arora ciroro mu yekaru. Omwene nabaungisya no kuboko, naguma ari mujibi. 23Mbe jisiku jo kukora kwae wejire jawa, nasuba ika ewae.
24Jisiku ejo wejire jaturao, omugasi wae Elijabeti najira inda, ne:ibisa me:si gata:nu, na:ika ati, 25Nikwo kutyo Ratabugenyi amankorera mu siku jinu amando-reramo okunso:syako amaswaro gani mu ba:nu.
Okuraga kwo kwiburwa kwa Yesu
26Mu kwesi kwa kata:nu na kumwi Nyamuanga namutuma maraika Gaburieli mu musi gwa Galilaya risi:na ryagwo Najareti, 27Namutuma ku muyarajuma unu asandwaga omurume risi:na ryae Yusufu, wa mu nyumba ya Daudi. Na risi:na ryo muyara ariga:ri Maryamu. 28Maraika namu:jako na:ika ati, Murembe, awe unu wayabirwe ribando. Ratabugenyi ari aamwi na:we. 29Nawe omwene nawa Omwoyo kurwo musango ogwo, neganirisya ati, ?ni buke:sya ki bunu? 30Mbe maraika namubwira ati, Uto:baya, Maryamu, okuba wabwene ribando ku Nyamuanga. 31Rora, urijira inda, uri:bura Omwana we cirume, numutoga risi:na ryae Yesu.
32Omwene ariba mukuru. Aritogwa Mwana wa Unu ari inguru muno
Na Ratabugenyi Nyamuanga arimuyana ecitebe co bukama eca saja wabo Daudi.
33Aritunga inyumba ya Yakobo kajanende,
No bukama bwae butariwao.
34Maryamu nabu:sya maraika ati, ?Omusango gunu guriba kutiki, okuba nitana murume? 35Maraika naindura namubwira ati, Mwoyo Mweru arikwijira, na managa ga Unu ari inguru muno garikusirigisya rwa rirengesi, na unu ari:burwa aritogwa Mweru, no Mwana wa Nyamuanga. 36Rora, Elijabeti omuiri wanyu one ana inda yo mwana we cirume, mu bukwekuru bwae. Kunu nikwo okwesi kwae okwa kata:nu no kumwi, unu atogwaga omugumba. 37Okuba omusango gwone gunu oguso:ka ku Nyamuanga gutakuburwa managa. 38Maryamu na:ika ati, Rora, anye ndi mugayagasi wa Ratabugenyi. Jibe kwanye rwa kutyo wa:ikire. Mbe maraika namuso:kako.
Maryamu nake:sya Elijabeti
39Mbe mu siku ijo, Maryamu nagenda bwangu mu ca:ro ce bi:ma, mu musi gwa mu Buyaudi. 40Nengira mu nyumba ya Jakaria, nake:sya Elijabeti. 41Elijabeti wejire ongwa obuke:sya bwa Maryamu, Omwana nagoma munda yae. Elijabeti ne:jura Omwoyo Mweru. 42Na:ikirira inguru na buraka bunene na:ika ati, Awe una ribando mu bagasi no rwiburo rwa munda yao ruri na ribando. 43?Gwaso:ka a:ki omusango gunu gwambona, ati, nyiramwene Ratabugenyi anyijira anye? 44Okuba oburaka bwo buke:sya bwao wejire bwakinga mu matwi gani, Omwana nagoma munda yani kurwo kukonderwa. 45Ana ribando unu ke:kirisya, okuba jiriku:misibwa ejo Ratabugenyi amubwiriye.
Okusi:ma kwa Maryamu
46Maryamu na:ika ati,
Omutima gwani ogumukusya Ratabugenyi
47No mwoyo gwani ogumusandabira Nyamuanga Omukisya wani.
48Okuba ama:rora obwororo bwo mugayagasi wae,
Okuba kuso:kerera rero amaimbo go:ne garintoga owa ribando.
49Okuba Owa managa a:mankorera emikuru
Na risi:na ryae ni ryeru.
50Ne cigongo cae ecikinga ku maimbo na maimbo ga banu abamu:baya.
51E:resisye amanaga no kuboko kwae,
Anyarambuye abe cigundu mu kwiganirisya kwe myoyo jebwe.
52Aso:sisye abakuru ku bitebe byebwe bya iŋoma,
Nawe akusisye abo:roro.
53Abo mweko abe:gusisye ebyo bwana,
Na bani:bi abairisisye hatari na ci:nu.
54Asaki:ye omukosi wae Israeli, ne:cuka ecigongo cae.
55Rwa kutyo ababwiriye basaja,
Niwe Iburaimu no rwiburo rwae kajanende ko:ne.
56Maryamu namarayo uti me:si gesatu, nasuba ike:wabo.
Yoana Omubatija ne:burwa
57Mbe jisiku ja Elijabeti ejo kwibura jejire je:ya, ne:bura omwana we cirume. 58Abe:kasyanya bae na bo ruganda rwabo nibongwa ati, Ratabugenyi amwongesisye ecigongo cae. Nibakonderwa aamwi nage. 59Mbe ku rusiku rwa kata:nu na kasatu, nibaja okutenda omwana. Bariga nibenda okumutoga risi:na rya Jakaria esemwene. 60Nyiramwene naindura ati, Uri, nawe katogwa Yoana. 61Nibamubwira ati, Atario wa mu ruganda rwanyu unu katogwa risi:na eryo. 62Nibamujekekanyisya esemwene na maboko okumubu:sya ati, ?Owenda kumutoga esi:na ki? 63Nasabwa orubao rwo kwandikako, nandika ati, Risi:na ryae Yoana. Nibarugu:ra bo:ne. 64Aonao omunwa gwae nigwiguka, no rurimi rwae nirusurumuka, na:ika nasi:ma Nyamuanga. 65Bo:ne banu be:kasyanyisye yei nibo:baya. Ne misango ejo jo:ne nijiswira mu ca:ro co:ne ece bi:mabi:ma bya Buyaudi. 66Na bo:ne banu bajunguywe nibajitu:ra mu mitima jebwe, niba:ika ati, ?Omwana oyo ariba atiki? Okuba okuboko kwa Ratabugenyi kwariga kuri aamwi nage.
67Jakaria esemwene ne:jura Omwoyo Mweru, naraga na:ika ati,
68Akusibwe Ratabugenyi Nyamuanga wa Israeli,
Okuba abe:jiye aba:nu bae no kubacungura.
69Aci:namusisye riyembe ryo mweruro mu nyumba yo mukosi wae Daudi,
70Rwa kutyo a:ikiriye mu kanwa ka baragi bae abe:ru kuso:kerera ku bwambiro, ati,
71Kacionya mu baremo beswe na mu maboko ga bo:ne banu bacisokere.
72Kaku:misya ecigongo cinu abaragire basaja,
Ne:cuka indagano yae inyeru.
73Nico ecirairo cinu e:raisisisye saja Iburaimu ati, 74Kaciyana eswe okuonyibwa mu maboko ga baremo beswe,
Korereki cimukorere citana bu:ba,
75Mu bweru na mu burengeresi imbere yae siku jeswe jo:ne.
76Na:we, Omwana, uritogwa muragi wa Unu ar inguru muno,
Okuba uritangatira Ratabugenyi okucuma jinjira jae. 77No kubamenyesya aba:nu bae omweruro Mu kube:swaririra ebibi:bi byebwe.
78Kurwe cigongo ca Nyamuanga weswe,
Ariba oruguru rwacitemera eswe kuso:ka inguru,
79Korereki rwakirega banu be:kae mu cisu:te na mwirengesi ryo rufu,
Okurongo:ra ebigere byeswe mu njira yo murembe.
80Omwana nakura, nongesibwa amanaga mu mwoyo. Naba mwibara kukinga ku rusiku runu abu:risibwe ku Baisraeli.
Currently Selected:
Luka 1: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
