Mariko 11
11
Yesu nengira Yerusalemi
(Mt. 21:1-11; Lk. 19:29-38; rora Jakaria 9:9)
1Wejire bafugera Yerusalemi, nibakinga Betifage na Betania, ku ci:ma ce Mijeituni, natuma abe:igisibwa bae babiri. 2Nababwira ati, Mugende mu musi gunu musomekene. Mukendo:kwingira omwo, aonao omujo:bona omwana wa isikiri asibikire, inu munu acariga kurinyako na katyari. Muisibure munde:tere. 3Omu:nu akababu:sya ati, Omukora ki ico? Mwaike ati, Ratabugenyi niwe aikenere, kaisubya anu rindi bwangu. 4Nibagenda nibasanga omwana wa isikiri asibikire kwirango ku mwira mu rukondo, nibacisibura. 5Abandi banu bariga bemereguyu ao nibababu:sya ati, ?Omukora ki okusibura mwana wa isikiri? 6Nibababwira rwa kutyo Yesu ababwiriye, nibabasiga. 7Nibare:ta mwana wa isikiri ku Yesu, nibanjako emyenda jebwe, narinyako. 8Ba:fu nibanja emyenda jebwe mu njira. Abandi nibanja amatabi ga mati, ganu batemere mu masambu. 9Banu bariga batangatire na banu bamuru:bire niba:ikirira inguru ati, Osana, ana ribando unu ka:ja mwisi:na rya Ratabugenyi. 10Buri na ribando obukama bwa saja Daudi. Osana inguru muno.
Omutini gunu gutatwasisye
(Mt. 21:18-22)
11Yesu nengira mu Yerusalemi, nengira mu yekaru. Wejire amara okumagamaga okurora bi:nu byone, nikuba kegoro, nauruka nagenda Betania aamwi na rikumi na babiri. 12Mwejo nibaso:ka Betania. Narumwa omweko. 13Wejire arora kura omutini guriko amasya, nagukingako, efurwe aboneko ci:nu. Wejire agukingako atabweneko ci:nu, tari masya:ra, okuba jitariga siku ja mitini. 14Naindura nagubwira ati, Omu:nu atarirya ku matwasyo gao kuso:ka rero kukinga kajanende. Abe:igisibwa bae nibongwa.
Yesu nairisya baka:ni mu yekaru
(Mt. 21:12-13; Lk. 19:45-46)
15Nibakinga Yerusalemi. Yesu nengira mu yekaru, namba okuirisya banu baka:naga na banu baguriraga mu yekaru, nafumbika jimeja ja banu baingyaga jimpirya ne bitebe bya banu baka:naga ebiguti. 16Ate:kirisisye mu:nu wo:ne kuiisiŋanya nyungu mu yekaru. 17Nabe:igisya na:ika ati, ?Jitandikirwe ati, Inyumba yani iratogwaga nyumba yo kusabirwamo maanga go:ne? Kemwe mwaikorere nsenga ya be:fi. 18Abagabisi na bandiki wejire bongwa, nibayenja amenge go kumwita, okuba bamu:bayaga, okuba aba:nu bo:ne bataŋaŋae okwiigisya kwae. 19Risu:ba wejire ryarengesa naso:ka mu musi. 20Wejire bwaca katondo, anu bariga nibaitiŋana, mbarora omutini gwomire kuso:kerera ku cisina. 21Petero ne:cuka namubwira ati, Rabbi, rora omutini gunu wa:ma:fumirisya gwomire.
Okusabwa kwo kwikirisya
(Rora Yak. 5:15)
22Yesu naindura nababwira ati, Mubega no kwikirisya ku Nyamuanga. 23Ni cimari enibabwira ati, unu wo:ne aribwira eci:ma cinu ati, Iika, weswe mu nyanja, akaba atakwitima:ta mu mutima gwae, nawe ne:kirisya at cinu ka:ika ecikorwa, aricibona. 24Kwenikora nimbabwira ati, Emisango jo:ne jo:ne jinu omusabwa no kuremberesya, mwikirisyega ati omuyabwa, na ka muribona. 25Mbe anu mure:mereguruga mu kusabwa, mukaba muri no musango ku mu:nu wo:ne, mumwiswaririre, korereki Esomwana wa mu rwire abe:swaririrega ebikayo byemwe. 26Nawe mukarema okwiswaririra, na Esomwana wa mu rwire atari: swaririra ebikayo byemwe.
Abagabisi mbasaka Yesu
(Mt. 21:23-27; Lk. 20:1-8)
27Nibakinga Yerusalemi rindi. Mbe anu ariga naribata mu yekaru, nibamutako abagabisi abakuru na bandiki na bakaruka. 28Nibamubu:sya ati, ?Ni managa ki ganu agakukosya binu? ?Amwi niga unu akuyae amanaga ganu okukora binu? 29Yesu naindura nababwira ati, Anye one siga nibabu:sye emwe musango gumwi munyindure, mbe niwo nje nibabwire amanaga kutyo gari ganu agankosya binu. 30?Mbe okubatija kwa Yoana kwaso:kere mu rwire tere mu ba:nu? Munyindure. 31Niba:ika abene:ra niba:ika ati, Araba cika:ika ati, Kwaso:kere mu rwire, kajo:kwaika ati, ?Mbe ka niki cinu cabaingiriye okumwikirisya? 32Nawe araba cika:ika ati, Kwaso:kere mu ba:nu, bo:baire aba:nu, okuba aba:nu babaraga Yoana ati ni muragi katakata. 33Nibaindura Yesu ati, Eswe citakumenya. Yesu nababwira ati, Anye one ntakubabwira ni managa ki ganu agankosya binu.
Currently Selected:
Mariko 11: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
