Mariko 10
10
Okuta:na mu butwasi
(Mt. 5:27-32; 19:3-12; Lk. 16:18; 1 Bakor. 7:10-15)
1Ne:muka naso:kayo, na:ja mu mbibi ja Buyaudi na ku ngego yenderya ya Yorodani. Ebise nibisuba okumwikofyanyisyako. Nabe:igisya rindi rwa kutyo ariga anarire. 2Mbe Abafarisayo nibamutako nibamubu:sya ati, ?Omu:nu e:kirisibwe okuirisya omugasi wae? Nibamusaka. 3Omwene naindura naba-bu:sya ati, ?Musa abaragiriye kutiki? 4Niba:ika ati, Musa e:kirisisye okwandikaga inyaruba yo buta:ni, amuirisye. 5Yesu nababwira ati, Abandikiye eciragiro eco kurwo bukome:e bwe mitima jemwe. 6Nawe kuso:ka ku bwambiro bwo kubumba, Nyamuanga ababumbire omurume no mugasi.
7Omu:nu kwarakoraga nasiga esemwene na nyiramwene,
Nibabumbatana no mugasi wae.
8Abo bo:ne barabaga mubiri gumwi
Mbe batacari babiri rindi, nawe bari mubiri gumwi.
9Mbe cinu Nyamuanga abumbatanyisye, omu:nu atari:ja kucita:nya. 10Mbe anu bariga mu nyumba rindi, abe:igisibwa bae nibamubu:sya omusango ogwo. 11Nababwira ati, Mu:nu wo:ne unu arairisyaga omugasi wae, natwara oundi, kaba muromesi, kamunyamura. 12No mugasi one akarema omurume wae, natwarwa oundi, kaba muromerwa.
Yesu nayana aba:na bato:to ribando
(Mt. 19:13-15; Lk. 18:15-17)
13Nibamure:tera aba:na abato:to korereki abakunieko. Abe:igisibwa bae nibagonya banu babare:tere. 14Nawe Yesu ejire arora, nabiirwa, nababwira ati, Musige aba:na bato:to ba:je kwanye, musige kubaingirira, okuba abe:ja:bo banu, obukama bwa Nyamuanga ni bwebwe. 15Ni cimari enibabwira ati, Unu wo:ne akarema okwikirisya obukama bwa Nyamuanga rwo mwana omuto:to, oyo ataribwingira na katyari. 16Nabayeka nabatako maboko gae, nabayana ribando.
Okutamibwa kwo mumura omuni:bi
(Mt. 19:16-26; Lk. 18:18-30)
17Wejire e:muka, nakinga ku njira, omu:nu umwi nabirima namu:jako, namwifukamira namubu:sya ati, Omwiigisya wo bwana, ?nje nikore kutiki, korereki nirye omwandu gwo buanga bwa kajanende? 18Yesu namubwira ati, ?Ountogera ki wa bwana? Atario wa bwana, tari umwi niwe Nyamuanga. 19Umenyere ebiragiro ati, Ute:taga, Utaromeraga, Ute:baga, Utabeeresyaga, Utaryaga eca bandi, Ubarega esomwana na nyokomwana. 20Namubwira ati, Omwiigisya, ebyo byone ndabigwatire kuso:ka buto:to bwani. 21Yesu namurora, namwenda. Namubwira ati, Ugerukireko musango gumwi. Genda, uka:ne byone binu uri nabyo, ugabire abataka, nikwo uriba no buni:bi mu rwire. Niwo u:je, ugege omusaraba gwao, undu:be. 22Nawe omwene natekemara kurwo musango ogwo, nagenda asurumbae, okuba ariga:ri na bi:nu byafu.
23Yesu namagamaga, nababwira abe:igisibwa bae ati, Ni kukome:e muno abani:bi okwingira mu bukama bwa Nyamuanga! 24Abe:igisibwa nibarugu:ra emisango jae. Nawe naindura rindi nababwira ati, Emwe ba:na, kukome:e muno banu abe:ikanya ebi:nu okwingira mu bukama bwa Nyamuanga! 25Ni kwangu ingamira okuitiŋana mu kaundu ka isinga, okukira omuni:bi okwingira mu bukama bwa Nyamuanga. 26Nibataŋaŋara muno, nibamubu:sya ati, ?Mbe ka niga unu katura okukisibwa? 27Yesu nabarora na:ika ati, Mbe aba:nu batakutura eco, nawe bitari kutyo ku Nyamuanga, okuba Nyamuanga katura byone. 28Petero namba okumubwira ati, Rora, eswe casigire byone nicikuru:ba. 29Yesu na:ika ati, Ni cimari enibabwira ati, Atario unu asigire inyumba, amwi bamura ba:bo, amwi bayara ba:bo, amwi nyiramwene, amwi esemwene, amwi mugasi wae, amwi ba:na, amwi busi, kubwani na kurwe Bigambo byo bwana, 30nawe aribona kwiya egana mu magoro ganu aga woryanu, jinyumba na bamura ba:bo, na bayara ba:bo, na banyiramwene, na ba:na, no busi, aamwi no kunya:sibwa. Na mu siku jinu jiri:ja aribona obuanga bwa kajanende. 31Nawe ba:fu abo kwamba nibo bariba aba inyuba, na ba inyuma bariba abo kwamba.
Yesu nasuba okuraga ejo kufwa kwae
(Mt. 20:17-19; Lk. 18:31-34)
32Anu bariga mu njira nibagenda Yerusalemi, na Yesu ariga abatangatiye. Nibarugu:ra, na banu bamuru:baga nibo:baya. Nasuba okugega bariya ekumi na babiri, namba okubabwira emisango jinu jirimubako. 33Na:ika ati, Rora ecigenda Yerusalemi. Omwana wo mu:nu aritu:rwa mu maboko ga bagabisi abakuru na bandiki. Barimutemera eci:na co kumwita, nibamutu:ra ku bamaanga. 34Barimujimya, nibamufuburira amafwefu, nibamubuma jisanyu, nibamwita. Ariba jaturao siku isatu, arisu:ka.
Yakobo na Yoana nibayenja obukuru
(Mt. 20:20-28)
35Niwo Yakobo na Yoana, aba:na ba Jebedayo, nibafugera anu ariga:ri, nibamubwira ati, Omwiigisya, ecenda ucikorere co:ne co:ne cinu cirakusabwa. 36Nababu:sya ati, ?Omwenda mbakorere ki? 37Nibamubwira ati, Ciyane cinyanje mwikusyo ryao, oumwi ku kuboko kwao okwe buryo, no undi ku kuboko kwao okwe bumosi. 38Nawe Yesu nababwira ati, Mutakumenya cinu omusabwa. ?Omutura okunywa ku cikombe cinu anye eninywako? ?Amwi omutura okubatijibwa okubatija kunu anye enibatijibwa? 39Nibamubwira ati, Ecitura. Yesu nababwira ati, Ni cimari murinywako ku cikombe cinu anye eninywako, na ka muribatijibwa okubatijibwa kunu anye enibatijibwa, 40Nawe okwinyanja ku kuboko kwani okwe buryo amwi ku kwe bumosi, okugaba kutari kwani, nawe ni kwa ba:nu be:ra:biywe.
41Abandi rikumi wejire bongwa, nibamba okubiirirwa Yakobo na Yoana. 42Yesu nababirikira nababwira ati, Abo ababarwa okutunga abamaanga, ababatungira managa, na bakuru bebwe ababayatika. 43Nawe bitabega kutyo mwimwe. Nawe unu arendaga okuba mukuru wemwe, niwe abega mufurubendi wemwe. 44Na unu arendaga okuba owo kwamba mwimwe, abega mugaya wa bo:ne. 45Okuba Omwana wo mu:nu one ate:jire kufurubenderwa, nawe e:jire okufurubendaga, no kuso:sya obuanga bwae bube cicunguriro ca ba:nu ba:fu.
Yesu naosya Batimayo
(Mt. 20:29-34; Lk. 18:35-43)
46Nibakinga Yeriko. Ejire aso:ka mu Yeriko aamwi na be:igisibwa bae ne cise cinene, mbe ariga:rio omuofu Batimayo, Omwana wa Timayo, enyanjire ku mbari ya injira, ne:sabirisya. 47Mbe ejire ongwa ati, ni Yesu Munajareti, namba okwanikirisisya inguru, na:ika ati, Yesu Omwana wa Daudi, unfwire cigongo. 48Ba:fu nibamugonya ati, Jibira. Omwene naturura:ra okwanikirisya inguru ati, Omwana wa Daudi, unfwire cigongo. 49Yesu ne:mereguru na:ika ati, Mumubirikire. Nibamubirikira omuofu, nibamubwira ati, Simbi:ra, imuka, kakubirikira. 50Omwene ne:sa ecifwaro cae, ne:muka na:ja ku Yesu. 51Yesu naindura namubu:sya ati, ?Owenda nkukorere ki? Omuofu namubwira ati, Rabbi enenda nirore. 52Mbe Yesu namubwira ati, Genda ewao. Okwikirisya kwao kwakuosya. Aonao narora, naru:ba Yesu mu njira.
Currently Selected:
Mariko 10: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
