Mariko 9
9
Okuinduka kwa Yesu
(Mt. 17:1-13; Lk. 9:28-36)
1Nababwira ati, Ni cimari enibabwira ati, Ku banu bemereguyu anu, bario abandi banu batariraba rufu na katyari, kukinga runu barirora obukama bwa Nyamuanga nibu:ja na managa. 2Mbe wejire jaturao siku ita:nu na rumwi, Yesu nagega Petero na Yakobo na Yoana, nagenda nabo ku ci:ma ecire:ra benyere:ra bwitebe. Nainduka orususo rwae imbere yebwe. 3Ebifwaro byae nibyeŋengeta nibiba byeru kobo kobo, atario mumoti mu ca:ro unu katura okubyesya kutyo. 4Eliya na Musa nibabasoromokera, niba:ikana na Yesu. 5Petero naindura nabwira Yesu ati, Rabbi, ni kwa bwana eswe okuba anu. Mbe cikumbe mau:na gasatu, erimwi ryao, ne rindi rya Musa, ne rindi rya Eliya. 6Okuba ariga atakumenya cinu ka:ika, okuba bariga bo:baire muno. 7Mbe eri:re niri:ja niribasirigisya. Oburaka nibuso:ka mu ri:re ati, Unu niwe Omwana wani omwendwa, mumungwe. 8Aonao wejire bamagamaga batasubire kurora mu:nu, tari Yesu era aamwi nabo. 9Wejire be:ka ku ci:ma, nabakomeresya basige kubwirako mu:nu binu barora, tari Omwana wo mu:nu ariba amara okusu:ka mu bafu:ye. 10Nibagugwata omusango ogwo, nibabu:syanya abene:ra ati, ?Okusu:ka mu bafu:ye kuri na bugajuro ki? 11Nibamubu:sya niba:ika ati, ?Abandiki aba:ika atiki, kwiire Eliya atangate oku:ja. 12Nababwira ati, Eliya cimari kamba oku:ja no kucuma byone, nawe Omwana wo mu:nu andikiywe kutiki ati, arinya:sibwa kwafu no kugaywa? 13Nawe enibabwira ati, Eliya are:jire, nibamukorera rwa kutyo bendaga byone, rwa kutyo andikiywe.
Yesu nairisya omusambwa
(Mt. 17:14-21; Lk. 9:37-43)
14Wejire bakinga ku be:igisibwa bae, mbarora ecise cinene cibasingiye, na bandiki niba:ika nabo. 15Aonao ecise co:ne nicimurora, nicitaŋaŋara muno, nibamuke:sya. 16Nabu:sya abandiki ati, Omwaika nabo misango ki? 17Umwi wa mu cise namuindura ati, Mwiigisya, nakure:tee Omwana wani. Ano musambwa gunu gutakwaika. 18Enu wo:ne ogumugwata, ogumugaragasya, nafukumba efiro, naruma ame:no, ondeeko Nimbwira abe:igisibwa bao ati baguirisye, nibatamibwa 19Naindura na:ika ati, Emwe aba riimbo rinu ritakwikirisya, ?ni:kare nemwe kukingari. ?Ni:gumirisys nemwe kukingari? Mumunde:tere. 20Nibamumure:tera. Omusambwa wejire gwamurora, nigumugaragasya muno. Nagwa a:si ne:siringisya, nafukumba rifiro.
21Nabu:sya esemwene ati, ?Bwamwambireri oburwae bunu? Na:ika ati, Ni bwa mu buto:to. 22Ogumwesa mu muriro na mu manji kwiya ka:fu korereki gumwite, nawe araba outura okukora omusango gwone, ucifwire ecigongo, ucisakire. 23Yesu namubwira ati, Ukatura okwikirisya, byone ebiturwa ku unu ke:kirisya. 24Aonao esemwene mwana nakungira inguru, na:ika ati, Eni:kirisya. Nsakira obute:kirisya bwani. 25Mbe Yesu ejire arora ecise nicikofyanyisya mbiro, nagonya omusambwa omujabi, nagubwira ati, Awe omusambwa omujabi gunyata:ika, no mwigare wa matwi, anye enikuragirira ati, numuso:kemo, utarija kumwingiramo rindi. 26Nigurira, nigumugaragasya muno, nigumuso:kamo. Naba uti afu:ye, ndijei abandi niba:ika ati, Afwa. 27Nawe namugwata okuboko, namwimusya, ne:mereguru. 28Wejire engira mu nyumba, abe:igisibwa bae nibamubu:sya bwitebe ati, ?Kubaki eswe citamatura okuguirisya? 29Nababwira ati, Ogwejabo ogwo gutakutura kuso:kamo era, tari kurwo kusabwa.
Yesu naraga ejo kufwa kwae
(Mt. 17:22-23; Lk. 9:44-45)
30Nibaso:kayo nibatura mu Galilaya. Ariga atakwenda mu:nu wo:ne kumenya. 31Okuba ariga ne:igisya abe:igisibwa bae, nababwira ati, Omwana wo mu:nu aritu:rwa mu maboko ga ba:nu, nibamwita. Mbe ariba amara okwitwa, jiriturao siku isatu nasu:ka. 32Nawe batasombo:eywe omusango ogwo, nibo:baya okumu-bu:sya.
Obukuru kutyo buri
(Mt. 18:1-6; Lk. 9:46-48)
33Nibakinga Kaperinaumu. Mbe anu ariga:ri mu nyumba nababu:sya ati, ?Mwari mubambasyanyisya ki mu njira? 34Nibajibira, okuba babambasyanyaga abene:ra mu njira ati, ?Omukuru niga? 35Nenyanja nabirikira ekumi na babiri, nababwira ati, Omu:nu akenda okuba owo kwamba, niwe arabaga wa ku bute:ro kukira bo:ne no mufurubendi wa bo:ne. 36Nagega Omwana omuto:to namutu:ra agati yebwe, namuyeka nababwira ati, 37Unu wo:ne karamira oumwi ku ba:na abato:to be:ja:bo unu mwisi:na ryani, oyo kandamira anye. No mu:nu wo:ne unu kandamira anye, atakundamira anye, tari Unu antumire.
38Yoana namubwira ati, Mwiigisya, ca:ma:rora omu:nu unu atakuciru:ba eswe nairisya emisambwa mwisi:na ryao, nicimuganya, okuba atakuciru:ba eswe. 39Yesu na:ika ati, Musige kumuganya, okuba atario mu:nu unu arakoraga ecirugu:ro mwisi:na ryani unu katura kunfuma bwangu. 40Okuba unu atari muremo weswe, kaba:ri kwiswe. 41Okuba unu wo:ne arabanywesyaga emwe ecikombe ca manji mwisi:ma ryani, okuba muri ba:nu ba Kristo, ni cimari enibabwira ati, atariburwa muye:ro gwae na katyari.
Intambara ya banu abe:ku:jusya
(Mt. 8:7-10)
42No mu:nu wo:ne unu arayabyaga oumwi kwabo abato:to banu abanyikirisya, akiri aboywe orubui rwo kuse:ra mu cimiro cae, e:swe mu nyanja. 43Okuboko kwao kukakuyabya, kutemeko. Ni kwa bwana okwingira mu buanga uremae, okukira kuba na maboko gabiri, no kuja mu nyanja yo muriro, mu muriro gunyatasima, 44omwo inyorosi yebwe itakufwa no muriro gutarisima. 45No kuguru kwao kukakuyabya, kutemeko. Ni kwa bwana okwingira mu buanga una kuguru kumwi kukira okweswa mu nyanja yo muriro una maguru gabiri go:ne. 46Nimwo inyorosi yebwe itakufwa, no muriro gutarisima. 47Eri:so ryao rikakuyabya, ri:yemo. Ni kwa bwana okwingira mu bukama bwa Nyamuanga uri na nsongo, okukira kuba na me:so go:ne gabiri no kweswa mu nyanja yo muriro, 48omwo inyorosi yebwe itakufwa no muriro gutarisima. 49Okuba buri mu:nu arirungwa no muriro. 50Omunyu ni gwa bwana, nawe omunyu gukarema okukora, ?omusubyamo ki korereki gukore? Mube no munyu mwimwe, mwikare no murembe abene na bene.
Currently Selected:
Mariko 9: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
