Mariko 8
8
Aba:nu 4,000 mbari:sibwa
(Mt. 15:32-39)
1Mu siku ijo, ebise wejire byafura rindi, nibaburwa ebiryo. Yesu nabirikira abe:igisibwa bae, nababwira ati, 2Nabafwira ecise ecigongo, okuba rero camarire nabo siku isatu, ke:nu batana biryo. 3Nikabaraga basube ika basara:riye, abajo:yutukira mu njira, na bandi baso:kere kura. 4Abe:igisibwa bae nibamubu:sya ati, ?Omu:nu katura kutiki okwigusya aba:nu banu emikate mwibara anu? 5Nababu:sya ati, ?Murina mikate eringa? Niba:ika ati, Eta:nu ne:biri. 6Nabwira ecise okwinyanja a:si. Nagega emikate eta:nu ne:biri, najibeganyamo, nabayana abe:igisibwa bae okugabira aba:nu. Nibajigabira ecise. 7Bariga na biswi bityari one. Nabisabirwa ribando, nababwira okubagabira. 8Nibarya nibe:guta, nibakofya ebiba:ra binu byasigaeo bitukuru bita:nu na bibiri. 9Na banu bari:ye bariga uti bisira bina. Kumara nabaraga.
Abafarisayo nibayenja ecibarikisyo
(Mt. 16:1-4)
10Aonao nasyabara mu bwato aamwi na be:igisibwa bae, nagenda mu mbara ja Dalimanuta. 11Abafarisayo nibaja nibamba okubambasyanya nage, nibamuyenjako ecibarikisyo co kuso:ka mu rwire, nibamusaka. 12Narumwa muno mu mwoyo gwae, na:ika ati, ?Aba riimbo rinu abayenja ecibarikisyo kubaki? Ni cimari enibabwira ati, Aba riimbo rinu batariyabwa ecibarikisyo. 13Nabasiga, nasyabara rindi naja ku ngego yenderya.
Yesu nagajura ebye cifwimbya
(Mt. 16:5-12)
14Mbe nibarabirwa okugega emikate. Ka batariga najo mu bwato, tari mukate gumwi era. 15Nabakomeresya na:ika ati, Mukabuke, mwikenge ecifwimbya ca Bafarisayo ne cifwimbya ca Erode. 16Nibabu:syanya abe:ne:ra kwo kuba bariga batana mikate. 17Yesu namenya ejebwe nababu:sya ati, Niki cinu omwaikana okuba mutana mikate? ?Mucari kwite:ge:resya, amwi mucari kusombo:kerwa? ?Emitima jemwe ni mikomee? 18?Muna me:so nawe mutakurora? ?Muna matwi nawe mutakungwa? ?Amwi mutakwicuka? 19?Anu nabeganyisisye aba:nu bisira bita:nu emikate eta:nu, mwakofifye bi:bo biringa bi:juye ebiba:ra binu byasigae? Nibamubwira ati, Ekumi na bibiri. 20Na runu nabeganyisisye ebisira ebina mikate eta:nu ne:biri, mwakofifye bitukuru biringa binu byejuye ebiba:ra bye mikate? Nibamubwira ati, Bita:nu na bibiri. 21Nababu:sya ati, ?Mucari kusombo:kerwa?
Omuofu wa Betesaida naosibwa
22Nibagoba Betesaida. Nibamure:tera omuofu, nibamuremberesya amukunieko. 23Namugwata okuboko omuofu uyo, namuurusya ku mwira gwo musi. Namufuburira ku me:so, namutako amaboko, namubu:sya ati, ?Ourora ci:nu? 24Ne:namusya me:so na:ika ati, Enirora aba:nu bari rwa mati, ngaribata. 25Nasuba okutako amaboko gae ku me:so gae orwa kabiri, ne:komeresya, naosibwa, narora byone kisi. 26Namuraga agende ewae, namubwira ati, Utengira mu musi gunu, amwi utabwira mu:nu wo:ne wa mu musi.
Petero na:ika ati, Yesu niwe Kristo
(Mt. 16:13-20; Lk. 9:18-21)
27Yesu ne:muka nagenda mu misi ja Kaisaria ya Filipi, aamwi na be:igisibwa bae. Nabu:sya abe:igisibwa bae mu njira ati, ?Aba:nu abanyaika anye ati nanyega? 28Niba:ika ati, Yoana Omubatija, nawe abandi ati, Eliya, abandi ati, Umwi wa ku baragi. 29Omwene nababu:sya ati, ?Nawe emwe omuntoga ati nanyega? Petero namuindura ati, Na:we Kristo. 30Nabakomeresya batabwirako mu:nu emisango jae.
Yesu naraga ejo kufwa kwae
(Mt. 16:21-23; Lk. 9:22)
31Namba okube:igisya ati, Kumwiire Omwana wo mu:nu okunya:sibwa kwafu, no kuremwa abakaruka na bagabisi abakuru na bandiki, no kwitwa, na ariba jawa siku isatu okusu:ka. 32Ariga na:ika omusango ogwo abweru. Petero namugega namba okumugonya. 33Nacu:ka narora abe:igisibwa bae, nagonya Petero, na:ika ati, Suba inyumba yani, Syetani, okuba utakwiganirisya ebya Nyamuanga, tari bya ba:nu era.
Okumuru:ba Yesu
(Mt. 16:24-28; Lk. 9:23-27)
34Nabirikira ecise aamwi na be:igisibwa bae, nababwira ati, Omu:nu akenda okundu:ba, e:ganya omwene, e:twike omusaraba gwae, andu:be. 35Okuba unu wo:ne kenda okukisya obuanga bwae aribubusya. Na unu aribusya obuanga bwae kubwani na kurwe Bigambo byo bwana, oyo niwe aribuonya. 36?Okuba omu:nu aribonamo ki, akarya ca:ro co:ne nafwirwamo Omwoyo gwae? 37?Tere amwi mu:nu arigwata ki eco kutambana no mwoyo gwae? 38Okuba unu wo:ne kanjirira anye jinswaro ne misango jani, mwiimbo rinu eryo buromesi ne rye bibi:bi, oyo Omwana wo mu:nu one arimujirira jinswaro, ariba:ja mwikusyo rya Esemwene aamwi na bamaraika abe:ru.
Currently Selected:
Mariko 8: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
