Mariko 3
3
Omu:nu wo kuboko kufu:ye naosibwa ku sabato
1Nengira rindi mu rikofyanyisyo. Mbe ariga:rimo omu:nu unu ariga:ri no kuboko kufu:ye. 2Nibamurore:rera kutyo aramuosisya ku rusiku rwa isabato, korereki bamubu:re. 3Nabwira unu ariga no kukobo kufu:ye ati, Imereguru agati ao. 4Mbe nababu:sya ati, ?Kwikirisibwe okukora ebyo bwana ku sabato, tere amwi kukora kubi:bi? ?Kwikirisibwe okuonya obuanga tere amwi kwita? nibajibira. 5Nabarore:rera ei nei abiiywe, asurumbae kurwo bukomee bwe mitima jebwe, namubwira omu:nu ati, Gorora okuboko kwao. Nakugorora okuboko kwae, nikuora. 6Aonao Abafarisayo nibaso:kamo nibarwaja aamwi na Baerodiani kutyo baramusimagisya.
Barwae ba:fu mbaosibwa
(Mt. 12:15-21; Lk. 6:17-19)
7Mbe Yesu naso:ka aamwi na be:igisibwa bae nibaja ku mwaro. Ebise binene nibimuru:ba nibiso:ka Galilaya, na Buyaudi, 8na Yerusalemi, na Idumiya, na ku ngego yenderya ya Yorodani, na ku ca:ro ca Turo na Sidoni. Niciba cise cinene, nibamu:jako okuba bonguywe binu akorere. 9Nababwira abe:igisibwa bae ati, obwato bubeo okumurinda, korereki ecise cisige kumwiganya. 10Okuba ariga aonyisye ba:fu, na ba:fu banu bariga na jinya:ko, nibamugwako korereki bamukunieko. 11Emisambwa emijabi wejire jamurora, nijigwa imbere yae nijikunga nija:ika ati, Awe nawe Omwana wa Nyamuanga. 12Najikomeresya muno jisige kumura:sya.
Yesu nasora abe:igisibwa
(Mt. 10:1-4; Lk. 6:12-16)
13Narinya ku ci:ma, nabirikira banu endaga, Nibamugendako. 14Nasora ekumi na babiri korereki babega aamwi nage, abatumega kusimura, 15babega na managa go kuirisya emisambwa. 16Nibaba banu, Simoni unu atogaga Petero, 17Na Yakobo wa Jebedayo na Yoana omumura wabo Yakobo. Abo nabatoga Boanerige, kwo kwaika ati, Ba:na ba ribaruka. 18Na Anderea, na Filipo, na Batolomayo, na Matayo, na Tomaso, na Yakobo Omwana wa Alifayo, na Tadayo, na Simoni Omukananayo, 19Na Yuda Isikariote unu amuso:kere mu ciwi.
Ebyo kufuma Mwoyo Mweru
(Mt. 12:22-32; Lk. 11:14-23)
20Nibengira mu nyumba. Ebise nibisuba okwikofyanya, ndijei nibatamibwa okurya ebiryo. 21Aba:bo wejire bongwa ejo, nibaja okumugwata, okuba ba:ikire ati, asarire. 22Mbe abandiki banu batebee okuso:ka Yerusalemi niba:ika ati, Oyo ari na Belijebuli. Kairisya emisambwa ku managa go mukuru we misambwa. 23Nababirikira nababwira mu bijekekanyo ati, ?Syetani katura okuirisya Syetani kutiki? 24Obukama bukatasyanya obwene era, butakutura kwimereguru. 25Na inyumba ika:ukana eyene:ra, inyumba eyo itakutura kwimereguru. 26Ka mbe Syetani ake:rwana omwene:ra, na:ukanamo, atakutura kwimereguru, nawe kawao. 27Nawe atario mu:nu unu katura okwingira mu nyumba yo mu:nu wa managa asa:kure ebi:nu byae, tari atangatire okuboya owa managa niwe asa:kure inyumba yae. 28Ni cimari enibabwira ati, Aba:na ba ba:nu bari:swaririrwa ebibi:bi byone, no bufumi bwebwe bwone bunu abafuma. 29Nawe unu wo:ne arafumaga Omwoyo Mweru atari:swaririrwa kajanende, nawe ana iŋanga ye cibi:bi ca kajanende. 30Na:ika kutyo okuba ba:ikire ati, Ari no musambwa mujabi.
Nyiramwene na ba:na ba:bo nibayenja Yesu
(Mt. 12:46-50; Lk. 8:19-21)
31Mbe nyiramwene na ba:na ba:bo niba:ja. Nibe:mereguru anja, nibatuma omu:nu okumubirikira. 32Ecise cariga cinyanjire cimusingiye, nibamubwira ati, Rora, nyokomwana na ba:na ba:nyu bari anja abakuyenja. 33Nabaindura na:ika ati, ?Mai na ba:na ba:su ni baga? 34Narore:rera banu bariga benyanjire bamusingiye mbara jo:ne, na:ika ati, Rora, mai na ba:na ba:su nibo banu. 35Okuba mu:nu wo:ne unu arakoraga jinu Nyamuanga kenda, oyo niwe omumura wa:su no muyara wa:su na mai.
Currently Selected:
Mariko 3: KIJ1960
Highlight
Share
Copy
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
