Mariko 4

Ecijekekanyo co mubibi

(Mt. 13:1-23; Lk. 8:4-15)

1Namba rindi okwiigisya ku mbarama ya inyanja. Ecise cinene muno nicimwikofyanisyako, ndijei nasyabara mu bwato, nenyanjamo ku nyanja. Ecise co:ne niciba ku ca:ro ku njekekera ya inyanja. 2Nabe:igisya byafu mu bijekekanyo, nababwira mu kwiigisya kwae ati, 3Nimungwe, omubibi aurukire okubiba. 4Mbe anu ariga acabiba, ejindi nijigwa ku njira, jinyonyi nji:ja njijirya. 5Ejindi nijigwa ku rutare anu maaru gatariga ma:fu. Aonao njimera okuba amaaru gariga gatariko ma:fu. 6Risu:ba ryejire ryaka, nijiotoka kwo kuba jitariga na misi, niju:ma. 7Ejindi nijigwa mu mawa. Amawa nigakura nigajisoritya nijirema okutwasya amatwasyo. 8Ejindi nijigwa mu maaru go bwana, nijitwasya amatwasyo, nijikura niji:ongesya, nijitwasya amatwasyo, eindi nitwasya makumi gasatu, eindi makumi gata:nu na rimwi, eindi egana. 9Na:ika ati, Unu ari na matwi go kungwa, nongwe. 10Mbe anu ariga:ri enyere, banu bariga bamusingiye na bariya ekumi na babiri nibamubu:sya ecijekekanyo. 11Nababwira ati, Emwe mwayabirwe okumenya obumbise bwo bukama bwa Nyamuanga. Nawe ku bariya abe mwira byone ebyaikwa mu bijekekanyo, 12korereki bakarora barore, bareme okwite:ge:resya. Bakongwa bongwe, bareme okusombo:kerwa, bate:fura nibainduka, nibe:swaririrwa. 13Nababu:sya ati, ?Mutakumenya ecijekekanyo eco? ?Mbe ka murisombo:kerwa atiki ebijekekanyo byone? 14Omubibi kabiba omusango. 15Aba ku njira anu omusango gwabibwa nibo banu. Wora bongwa omusango, aonao Syetani na:ja naso:syamo omusango gunu gwabibirwe mu myoyo jebwe. 16Nikwo kutyo na banu babibirwe ku rutare, banu wora bongwa omusango, nibe:kirisya aonao no kukonderwa. 17Batana misi nawe ababao mwanya muto:to. Inya:ko amwi kunya:sibwa kukabao kurwo musango, aonao nibe:ku:jura. 18Mbe banu babibirwe mu mawa nibo banu. Abo abongwa omusango, 19mbe, emifurubendo je ca:ro, no kubebeywa obuni:bi, no kurigira kwe bi:nu ebindi nibingira nibisoritya omusango, nigurema okutwasya. 20Mbe banu babibirwe mu maaru go bwana nibo banu abongwa omusango nibagwemera, nibatwasya amatwasyo, oundi natwasya makumi gasatu, oundi makumi gata:nu na rimwi, oundi egana.

Ecijekekanyo ca itara

(Mt. 5:15-16; Lk. 8:16-18; 11:33-36)

21Nababu:sya ati, ?Itara eire:twa korereki ifundikirwe ecitukuru, amwi abaitu:ra mwifu:fu ryo buriri, tari inguru ku cikango? 22Okuba citario ci:nu cinu cibisire cinu citarimenywa. Amwi citario eco bumbise cinu citariswerurwa. 23Omu:nu wo:ne akaba na matwi go kungwa, nongwe. 24Nababwira ati, Mukabukire jinu omungwa. Mu ndengo inu omurengeramo, nimwo emwe one murirengerwa, na ka muryongesibwako. 25Okuba omu:nu unu ari ne ci:nu, ariyabwa. Na unu atana ci:nu, aritesibwa na cinu ari naco.

26Na:ika ati, Obukama bwa Nyamuanga buri rwo mu:nu unu kabiba imbibo ku:si. 27Nama:maga mu ngeta, ne:mukaga mu mwisi, omwene atakumenya kutyo imbibo eimera ni:kura. 28Okuba i:si eitwasya eyene:ra. Okwamba omutenga, kumara ecangara, okumara eryeke ekome:e ku cangara. 29Wora ryoma, aonao nibatako orugera, okuba rugeso rweire.

Inje ya karadari

(Mt. 13:31-32; Lk. 13:18-19)

30Nababu:sya ati, ?Mbe obukama bwa Nyamuanga cibususanye na ki? ?Tere amwi cibujekekanye na ki? 31Obususana rwa inje ya karadari, inu ikeere kukira mbibo jo:ne jinu jiri mu ca:ro, anu eibibwa, 32Nawe wora yakura, ni:ba nene kukira emikubi jo:ne, nigatya amatabi manene, ndijei jinyonyi ja mu rutumba nijitura okusumbira mu mbeo yayo. 33Nabasimurira omusango mu bijekekanyo byafu byejabo ebyo, rwa kutyo baturaga okungwa. 34Ata:ikaga nabo tari mu bijekekanyo, nawe nabe:resya abe:igisibwa bae byone bwitebe.

Yesu narembesya makonjo no muyaga

(Mt. 8:23-27; Lk. 8:22-25)

35Ku rusiku urwo, wejire kwaba kegoro, nababwira abe:igisibwa bae ati, Ciunguke cije ku ngego yenderya. 36Nibasiga ecise, nibamugegera mu bwato kutyo ariga:ri. Na ma:to agandi gariga aamwi nage. 37Omuyaga mwafu gwe ciure nigugonoka, amatuma nigabuma obwato nibwamba okwijura amanji. 38Yesu ariga aongee ku seji ku ci:saguro. Nibamurafya nibamubu:sya ati, Mwiigisya, ?awe utakuciku:kwa eswe cikafwa? 39Narafya nagonya omuyaga, nabwira inyanja ati, Core:ra ute:kane. Omuyaga nigufwa, ndiba etore. 40Nababu:sya ati, ?Niki cinu omu:baya? ?Mutari na kwikirisya kutiki? 41Nibo:baya bu:ba bwafu, nibabu:syanya ati, ?Ka unu niga, ka omuyaga ogumungwa na inyanja one?

Currently Selected:

Mariko 4: KIJ1960

Highlight

Copy