Kuyamba 39
39
Jozefi nankazi wa Potifa
1Tsapano Jozefi adayendesewa ku Ijipiti, Potifa nduna ya Farawo, nkulu waakhalilizi, wachi Ijipiti adamugula kuchoka kwaa Ishimayeli awo adamuyendesa kumweko. 2#Mab 7:9Chawuta akhatsogolela Jozefi, nakutenepo Jozefi adasumukila paakhali munyumba mwambuya wake Potifa. 3Mbuye wake adawona kuti Chawuta akhamutsogolela, pomwe kuti ndiye akhachitisa kuti iye asumukile pabzinthu bzake bzentse bzaakhachita. 4Nakutenepo Jozefi adakomelewa ntima na Potifa kuti akhale mulanda wake, adazampasa basa lakumbayanganila munyumba mwake nabzinthu bzake bzentse bzaakhanabzo. 5Kuchoka panthawe yaadamuchita nkulu wakunyanganila munyumba mwake nabzentse bzaakhanabzo, Chawuta adadalisa Potifa wachi Ijipiti nabzentse bzaakhanabzo kuphatanizila munda wake nathangwe la Jozefi. 6Nakutenepo adayikha bzinthu bzake bzentse bzaakhanabzo m'manja mwa Jozefi; kukhala naye kwaadachita akhalibe basa nabzinango bzentse kunja kwachakudya basi.
Tsapano Jozefi akhali wakukoma nkhope kwene-kwene, akhana chimilo chabwino. 7Padapita kanthawe, nkazi wambuya wake adayamba kusilila Jozefi, nkuti kwayiye, “Gona nayine.” 8Koma iye adalamba, adati kwankazi wambuya wake, “Nyanganani, anayine tenepa, mbuya wangu palibe chaaningopela, pakuti adayikha bzinthu bzentse m'manja mwangu; 9panyumba pano palibe munango ana mphamvu kuposa ine; mambo wangu adandipasa mphamvu pabzinthu bzentse, kusiya kwayimwe basi, pakuti ndimwe nkazi wake; ningachitilenyi chinthu chakuyipa tenepo, ndichitazila Mulungu?” 10Ne nkazi wa Potifa paadalewa-lewa na Jozefi ntsiku nantsiku, koma Jozefi alibe kubvuma kugona naye panango kukhala naye pafupi.
11Ntsiku inango, paadapita munyumba kaphata basa lake, alanda anango wentse pakhalibe. 12Nkazi wa Potifa adaphata chakubvala chake adati kwayiye, “Gona nayine.” Pamwepo Jozefi adapsukunyuka achisiya chakubvala chake m'manja mwankaziyo, iye nkubula panja. 13Nkaziyo paadawona kuti Jozefi wathawa wasiya chakubvala chake, 14iye adakuwilila kwaalanda akhaphata basa munyumba mwake, iye adati, “Wonani, mu Hebheru waadatibwelesela akufuna kutitazila, wapita munyumba mwangu achifuna kugona nayine, koma ine ndazakuwilila. 15Pandakuwa ndipo pawathawa achibula panja, wasiya bzakubvala bzake.”
16Pamwepo nkaziyo adayikha bzakubvala bza Jozefi kufikila mbuya wake wabwela. 17Tsapano iye adalongosolela mwamuna wake nkhani ibodzi-bodziyo, adati, “Mulanda wachi Hebheru wamudatibwelesela pano akhafuna kundiphata. 18Koma panthawe yandakuwa, wasiya bzakubvala bzake nkuthawa munyumba.”
19Mbuye wake paadabva mafala yankazi wake yakuti, “Ibzi ndibzo bzandachitiliwa namulanda wanu” iye adakalipa nabzo kwene-kwene. 20Nakutenepo mbuya wa Jozefi adamuyikha mujeli, mukhayikhiwa akayidi wamambo, iyembo akhali mujeli. 21#Mab 7:9Koma Chawuta adatsogolela Jozefi achimudalisa, adachita kuti wakunyangana mujeri amubvele chifundo. 22Nkulu wamujeli adayikha Jozefi kuti anyanganile akayidi wentse akhali njelimo, nabzentse bzikhachitika mujelimo ndiye akhanyanganila. 23Nkuluyo alibe pomwe kumbazanyangana nabzamujelimo pakuti bzentse bzikhadayikhiwa m'manja mwa Jozefi, pakuti nthawe zentse Chawuta akhamutsogolela, achimusumusa pabzentse bzaakhachita.
Currently Selected:
Kuyamba 39: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
