Kuyamba 40
40
Jozefi anilapanula maloto yaakayidi
1Pakudapita nthawe, nyakupeleka vinyu wamambo wa Ijipiti nanyakuphika zingwa adatazila mbuya wawo mambo wa Ijipiti. 2Farawo adakalipila manduna yake mawili. Nkulu waanyakupeleka vinyu nankulu waanyakuphika zingwa. 3Adaayikha mujeli, munyumba yankulu waakhalilizi, mujeli mukhana Jozefi. 4Nkulu waakhalilizi adayikha wanthuwo m'manja mwa Jozefi, adakhala kwakanthawe mujeli. 5Usiku unango alanda wamambo wa Ijipiti awili wale, wakupeleka vinyu, nanyakuphika zingwa wamambo wa Ijipiti akhali mujeli adalota. Munango namunango maloto yake, loto lokha likhalewa bzakusiyana. 6Jozefi paadafika kwayiwo mangwana yache machibese-bese, adawona kuti iwo niwakudodoma. 7Nakutenepo iye adaabvunza manduna ya Farao waakhanawo mujeli yamunyumba mwabuya wake kuti, “Thangwe lanyi lelo nkhope zanu n'zakudodoma?”
8Iwo adati kwa Jozefi, “Talota maloto, koma pasaya anilapanula.” Jozefi adati kwayiwo, “Ko kulapanula tulo sikun'choka kwa Mulungu? Ndaphata minyendo ndiwuzeni maloto yanu ndibve.”
9Pamwepo nkulu waanyakupeleka vinyu adalongosolela Jozefi maloto yake, iye adati, “Ndawona muvayini patsogolo pangu, 10ukhana mithayi mitatu. Masamba payadayamba kuphukila udayambambo kuchita maluwa, nkubala magilepisi yakutokota. 11Pamwepo komeshi ya Farawo ikhali m'manja mwangu. Ndidapsinyila nsuzu wamagilepisi mukomeshi ya Farawo, ndichipeleka komeshiyo m'manja mwa Farao.”
12Jozefi adati kwayiye, “Ibzi ndibzo bzabzinilewa, mithayi mitatu nintsiku zitatu. 13Kumala kwantsiku zitatu, Farawo an'zakutsudzula achikubwezela pabasa lako lawukhachita pakuyamba lakupeleka vinyu kwamambo. 14Koma undikumbukembo, bzikakufambila bwino, ndaphata minyendo, undichitilembo chifundo, ukandiyimililembo kwa Farawo kuti andibulisembo muno, 15pakuti ine ndidachita bzakubewa kudziko laa Hebheru. Ine palilibe chandidachita kuti angandiyikhe mujeli.”
16Tsapano nkulu waanyakuphika zingwa paadabva kulapanula kwa Jozefi kukhali kwabwino, iye adati, “Nayinembo pomwe ndalota maloto, ndidasenza mpsanda zitatu, zikhana zingwa. 17Mumpsanda yapadzulu mukhana chakudya cha Farawo chakusiyana-siyana, koma chakudyacho chikhadyewa nambalami chili mumpsanda ikhali pansolo wangu.” 18Jozefi adati, “Ibzi ndibzo bzinilewa maloto yako, mpsanda zitatu bzinilewa ntsiku zitatu. 19Nkati mwa ntsiku zitatu, Farawo achakugwata nsolo, achikumangilila pamuti, mbalami zichizadya thupi lako.”
20Ntsiku yachitatu, mambo adachitila alanda wake feshita yakupembelela ntsiku yakubaliwa kwake. Paakhali padale adachemelesa nkulu waanyakupeleka vinyu nankulu waanyakuphika zingwa. 21Adabwezela nkulu waanyakupeleka vinyu pabasa lake, achipeleka khomeshi m'manja mwa Farawo, 22koma nkulu waanyakuphika zingwa adamangililiwa pamuti, kuyendelana nabzidalewedwa na Jozefi. 23Koma nkulu waanyakupeleka vinyu alibe kuzakumbuka Jozefi, adamuyebwelatu.
Currently Selected:
Kuyamba 40: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
