Kuyamba 41
41
Jozefi anilapanula maloto yamambo
1Pakudapita magole mawili, Farawo adalota adayima mphepete mwakamadzi ka Nayilo. 2Pamwepo adawona ng'ombe zinomwe zikazi zabwino zakunenepa, zichibula m'madzi zichidya mumitete. 3Adazawona pomwe ng'ombe zikazi zinomwe zakuyipa zakuwonda zichibula mu Nayilo zichikayima pakhana ng'ombe zile zikazi zakunenepa, mphepete mwakamadzi. 4Ng'ombe zakuyipa, zakuwonda zile zidadya zabwino, zakunenepa zinomwe. Pamwepo Farawo adalamuka. 5Adagona pomwe nkulota kachiwili; adalota ngala zinomwe zatiligu zakukhuma, zabwino zikhali patsinde ibodzi. 6Adazawona pomwe ngala zinomwe zikhalibe kukhuma, zidawumisiwa namphepo yakumabveladzuwa. 7Ngala zikhalibe kukhuma zidameza ngala zakukhuma, pamwepo Farawo nkulamuka, adazadziwa kuti kukhali kulota. 8#Dha 2:2Mangwana yache, Farawo paadalamuka adashupika kwene-kwene. Nakutenepo adazatuma wanthu kachemela anyamatsenga wentse wamu Ijipiti nawakuchenjela, nkuwalongosolela maloto yake, koma palibe adakwanisa kuyalapanula. 9Tsapano nkulu waanyakupeleka vinyu adati kwa Farawo, “Lelo ndazawona kutaza kwangu. 10Imwe mambo pamudambatikalipila, inepo nankulu waanyakuphika zingwa muchitiyikha mujeli kunyumba yankulu waakhalilizi, 11tidalota maloto usiku umwewo. Maloto yake nayangu yakhana bzayakhalewa. 12Tikhana mu Hebheru waching'ono kumweko, mulanda wankulu wakunyanganila mujelimo; patidamuwuza maloto yathu iye adalapanula maloto yamuthu yekha-yekha kuteyeza kulota kwatidachita. 13Kulapanula kwaadachita malotoyo kwayise ndibzo chayibzo bzidazachitika, ine ndidazabwezelewa pabasa langu, wakunyanganila wakuphika adazaphewa.”
14Nthawe imweyo Farawo adatuma munthu kachemela Jozefi. Adamuchosa mujeli, achimugela ndebvu. Adampasa bzakubvala bzabwino, achimuyendesa kwa Farawo. 15Farao adati kwa Jozefi, “Ndalota, koma palibe wakwanisa kulapanula malotoyo. Tsapano ndawuziwa kuti iwe unkwanisa kulapanula maloto.”
16Jozefi adati kwa Farawo, “Ine ndekha ningakwanise lini, Mulungu ndiye ankwanisa kulapanula maloto yanu.”
17Pamwepo Farawo adati kwa Jozefi, “Ndidalota ndidayima mphepete mwakamadzi ka Nayilo, 18ndidawona m'madzi muchibula ng'ombe zikazi zinomwe zabwino zakunenepa, zichidya mumitete. 19Kudazabula pomwe zinango ng'ombe zinomwe zikazi zakuyipa, zakuwonda, zikhadandosala mabondo basi, ndinati ndawona ng'ombe zakutenepo muno mu Ijipiti. 20Ng'ombe zakuyipa, zakuwonda zidadya ng'ombe zinomwe zakunenepa. 21Koma zakuwonda pazidadya zakunenepa, palibe akhakwanisa kudziwa kuti zadya zakunenepa, pakuti zidandowa zakuwondoloka ninga bzazikhali pakuyamba, pamwepo ndidazalamuka. 22Mumaloto yangu ndidazalota, ngala zinomwe zambewu zakukhuma, zabwino zikhali patsinde ibodzi. 23Padazabulambo pomwe ngala zinomwe zikhana mbewu zitete zakufota zikhalibe kukhuma, zikhadawumisiwa namphepo yakumabveladzuwa. 24Ngala zinomwe zitete zakufota zidameza ngala zinomwe zakukhuma. Ndidalongosolela anyamatsenga maloto yangu, koma palibe ne m'bodzi wawo adakwanisa kulapanula malotoyo.”
25Pamwepo Jozefi adati kwa Farawo, “Mambo, maloto yanu yentse yali mawili yanilewa chinthu chibodzi. Mulungu wakuwonesani imwe bzaanfuna kuchita. 26Ng'ombe zinomwe zikazi zakunenepa bzinilewa magole manomwe, ngala zinomwe zakukhuma bzinilewa magole manomwe. Maloto yamweyo yanilewa chinthu chibodzi. 27Ng'ombe zinomwe zikazi zakuyipa zakuwonda zidamalizila kubula nangala zinomwe zikhalibe kukhuma, zidawumisiwa namphepo yakumabveladzuwa, bzinilewa magole manomwe yanjala in'zachitika kutsogolo. 28Ibzi bzin'zachitika ninga kukuwuzani kwandachita imwe mbuya wangu pakuyamba, Mulungu wakuwonesani bzin'zachitika kutsogolo. 29Kumbwela magole manomwe yampfumba mudziko lentse la Ijipiti, 30pambuyo pampfumba, kun'zabwela magole manomwe yanjala, pamwepo an'zayebwa mfumba yentse mudziko la Ijipiti, pakuti njala in'zameza dziko. 31Mpfumba in'zakumbukiwa lini mudziko, nathangwe lakuti njala in'zachitika in'zakhala ikulu kwene-kwene. 32Maloto yanu yabwezelewa kawili, pakuti Mulungu ndibzo bzawakumbuka kuchita. Mulungu an'zachita kuti bzichitike tsapanopa.
33“Tsapano imwe sankhulani munthu ankumbuka pomwe wakuchenjela, mumuyikhe anyanganile dziko la Ijipiti. 34Farawo ngaapitilize kusankhula wakunyanganila mudziko, atole chachishanu, pambewu zaanilima mudziko la Ijipiti, pamagole manomwe yampfumba. 35Ngaakhonkobze chakudya chentse pamagole yampfumba yakubwela, Farawo aapase mvumo yakuyikha chakudya m'maguta yaniyikhiwa chakudya, achichengete. 36Chakudya chimwecho ngachiyikhiwe pambali mudziko, kuchitila magole manomwe yanjala in'zagwela Ijipiti, kuchitila kuti dziko lizaleke kuchenekeka nanjala.”
Jozefi an'chitiwa ntongi mu Ijipiti
37Farawo nanduna zake zentse adakondwa nanzelu zidapelekewa na Jozefi. 38Pamwepo Farawo adati kwaalanda wake, “Ko tingamuwone kuponi munthu adalingana nawuyu, ana n'zimu wa Mulungu?” 39Nakutenepo Farawo adati kwa Jozefi, “Pakuti Mulungu wawonesa kale bzentse ibzi kwayiwe, palibe munango ankumbuka pomwe wakuchenjela ninga iwe, 40#Mab 7:10iwe un'khala ntongi nkulu wapan'zinda wangu. Wanthu wangu wentse achachita bzawun'zalewa. Koma pankhani zawumambo ndine nkulu kuposa iwe.” 41Farawo adati kwa Jozefi, “Ndakuchita ntongi padziko lentse la Ijipiti.” 42#Dha 5:29Nakutenepo Farawo adachosa lingi yachidhindo kujanja lake achibvadzika Jozefi, adam'bvadzika bzakubvala bzabwino bzalineni, achim'bvadzika cheni yagolidhe n'khosi. 43Mambo adachita kuti Jozefi akwile mungolo yachiwili yawumambo, kutsogolo kwake kukhana wanthu akhakuwilila kuti, “Mugodamileni!” Ndiko kuyikhiwa kudachitiwa Jozefi kuwa ntongi wamu Ijipiti yentse. 44Farawo adati kwa Jozefi, “Ndine Farawo, palibe munthu an'chita chinthu chawunsaya kudziwa iwe mudziko lentse la Ijipiti.” 45Farawo adapasa Jozefi dzina lachi Ijipiti lakuti Zafenatipaniya,#41:45 Zaenatianiya bzinilewa kuti, “Mulungu anilewa-lewa.” adampasa nkazi akhachitiwa Asenati, mwana wa Potifera nyantsembe wamu Oni. Nakutenepo Jozefi adafamba mudziko lentse la Ijipiti.
46Jozefi akhana magole makumi matatu, paadapasiwa basa namambo Farawo waku Ijipiti, Jozefi adachoka kukhana Farawo achikafambila dziko lentse la Ijipiti. 47Pamagole manomwe yampfumba, dziko lapantsi mudachita chakudya chizinji kwene-kwene. 48Jozefi adagwezeka chakudya mudziko la Ijipiti m'magole manomwe yampfumba. Adagwezeka chakudya mumaguta; adagwezeka chakudya mumaguta yentse, chikhachoka m'minda ikhadazungunuka maguta. 49Nakutenepo Jozefi adagwezeka chakudya chizinji kwene-kwene, ninga n'chenga wamunyanja, kufikila adazaleka kuchipima, pakuti chikhapimika lini.
50Magole yanjala yanati yafika, Jozefi akhadatobala wana awili wachimuna na Asenati mwana wa Potifera, nyantsembe wa Oni. 51Jozefi adapasa mwana wake wakuyamba dzina lakuti, Manase adati, “Mulungu wachita kuti ndiyebwe kushupika kwangu, nawanyumba yaapayi wangu.” 52Mwana wake wachiwili adampasa dzina lakuti, Efulemu, bzichilewa kuti, “Mulungu wandipasa wana ndili mudziko lakushupika kwangu.” 53Magole manomwe yampfumba yakhali mudziko la Ijipiti yadafika pakumala; 54#Mab 7:11magole manomwe yanjala yadayamba, kuteyeza kulewa kwadachita Jozefi. Madziko yanango yentse yakhana njala, koma mudziko la Ijipiti ndimo mukhana chakudya. 55#Yoh 2:5Mudziko la Ijipiti pamukhana njala, wanthu adalila kwa Farawo achifuna chakudya. Koma Farawo adati kwaa Ijipiti wentse, “Yendani kwa Jozefi mukachite bzaankakuwuzani.” 56Nakutenepo njala payidakula mu Ijipiti, Jozefi adafungula magwangwa, nkuyamba kugulisila chakudya wanthu wamu Ijipiti, pakuti njala ikhadakula mudziko la Ijipiti. 57Pomwe madziko yentse yapantsi yadayenda ku Ijipiti kukhana Jozefi kuzagula chakudya, pakuti njala ikhadakula padziko lentse lapantsi.
Currently Selected:
Kuyamba 41: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
