Kuyamba 48
48
Jakobho an'dalisa Efulemu na Manase
1Pambuyo payibzi, Jozefi adazawuziwa kuti, “Wona, apayi wako aduwala.” Pamwepo iye adatola wana wake awili Manase na Efulemu. 2Jakobho adawuziwa kuti, “Mwana wako Jozefi wabwela.” Pamwepo Izraeli adabzilimbisa nkukhala pachalimba pake. 3#Kuya 28:13,14Jakobho adati kwa Jozefi, “Mulungu Nyamphamvu zentse adabziwonesa kwayine pa Luzi mudziko la Kenani achindidalisa, 4adati kwayine, ‘Wona, nin'zachita kuti mubalane, muchizawanda, nin'zakuchita chipani chawanthu, nin'zapeleka dziko lino kum'badwe wako kuti ikhale nthaka yawo kufika lini nalini.’ ”
5“Tsapano wana wako awili wawudabalila mudziko la Ijipiti ine ndinati ndabwela kuno ku Ijipiti niwangu, Efulemu na Manase niwangu ninga Rubheni na Simiyoni.” 6“Koma wana wawun'zabala pambuyo paawa niwako; an'zachemelewa nadzina laabale wawo munthaka yawo. 7#Kuya 35:16–19Pakuti pandikhachoka ku Phadhani, Rakelo adafela munjila mudziko la Kenani patikhali pafupi kufika mu Efurata; ndidamuyikha kumweko kunjila yakuyenda ku Efurata iyo in'chemelewa pomwe kuti Bhetelehemu.”
8Izraeli paadawona wana wa Jozefi, adati, “Ko awa mbani?”
9Jozefi adati kwaapayi wake, “Awa niwana wangu wandidapasiwa na Mulungu kuno.”
Izraeli adati, “Bwela nawo kwayine, ndaphata minyendo kuti ndiwadalise.” 10Tsapano maso ya Izraeli yakhawonesesa lini pakuti akhadakalamba. Nakutenepo Jozefi adaafikisa pafupi naapayi wake. Adaamphsomphsoda achiwakumbatila. 11Izraeli adati kwa Jozefi, “Ndikhakumbuka lini kuti ningawone nkhope yako pomwe; wona, Mulungu wachita kuti ndiwonembo wana wako.” 12Pamwepo Jozefi adaachosa paminyendo yake, iye nkukotama pantsi.
13Jozefi adatola wentse awili, Efulemu najanja ladidi kumbali yajanja lanzele la Izraeli, Manase najanja lanzele kumbali yajanja ladidi la Izraeli. Adaayendesa pafupi nayiye. 14Koma Izraeli adapesanisa manja yake, janja lake ladidi adaliyikha pansolo wa Efuremu, uyo akhali mung'ono, janja lanzele adaliyikha pansolo wa Manase, pakuti Manase akhali wakuyamba. 15Pamwepo iye adadalisa Jozefi adati,
“Mulungu adafamba naapayi wangu Abhurahamu na Isaki,
Mulungu adatsogolela umoyo wangu kufika lelo!
16Ngilozi idandilombola pabzakuyipa bzentse, dalisani wana!
Mwayiwo dzina langu ngalikhale, nadzina laazipayi wangu, Abhurahamu na Isaki;
ngaawande nkati mwadziko.”
17Jozefi paadawona kuti apayi wake ayikha janja ladidi pansolo wa Efulemu, alibe kukondwa nabzo. Adaphata janja laapayi wake kuti alichose pansolo wa Efulemu kuliyikha pansolo wa Manase. 18Jozefi adati kwaapayi wake, “Ntenepa lini apayi, pakuti uyu ndiye wakuyamba, ikhani janja lanu ladidi pansolo wake.”
19Koma apayi wake adalamba, iwo adati, “Nin'dziwa mwanangu, nin'dziwa; umweyu pomwe an'zakhala nkulu, koma mung'ono wake an'zawa nkulu kuposa iye. M'badwe wake un'zawa nshowo uzinji kwene-kwene.” 20#Ahe 11:21Nakutenepo Izraeli adaadalisa ntsiku imweyo, adati,
“Nayiwe, Izraeli in'zalewa madaliso ichiti,
‘Mulungu ngaakuchite ninga Efulemu na Manase.’ ”
Nakutenepo adayikha Efulemu patsogolo pa Manase.
21Pamwepo Izraeli adati kwa Jozefi, “Wona, ine ndawa pafupi kufa, koma Mulungu an'zakhala nayiwe, an'zakubwezani pomwe kudziko laazipayi wanu. 22Pomwe ndapeleka Shekemu kwayiwe pana kuti ndipase abale wako, iyo yandidatola m'manja mwa Amori nabhemba langu nawutati wangu.”
Currently Selected:
Kuyamba 48: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
