Wa̍lta̍ Wānāa̍ Chi̍i̍sūa̍a̍ 10
10
Pītɛ̍ ku̍ɛ̄ o̍ Kɔ̄ni̍i̍līɔ̄ɔ̄ lo̍
1Po̍ pi᷅lɛ̍ wa̍ Sīsāli̍a̍ā chi̍e̍e̍ dīōlā ndɔ̄la̍ŋ āā, Kɔ̄ni̍i̍līɔ̄ɔ̄. Bōllē so̍vɛ̄i̍ya̍a̍ ku̍ndāa̍ o̍ wa̍ ni̍, mā vēēlū ku̍ndā ndɔ̄ ko̍ŋ āā, ku̍nda̍ fu̍la̍ lɛ̄ŋndē I̍ta̍līle̍ŋ ndo̍. 2Ndu̍ o̍o̍ nɔ̍ bɛ̄ɛ̄le̍ŋ le̍ Mɛ̄lɛ̄ka̍. Ndu̍yɛ̍, ndu̍ nda̍ yu̍ŋgu̍ ndɔ̄ɔ̍ kpo̍u̍ nda̍ a̍a̍ pi̍ɛ̍ī Mɛ̍lɛ̄ka̍. Ō wa̍ wāna̍ īkɛ̄ndɛ̄ nāa̍ wānāā tāmbɛ̍i̍ya̍ chūā. Ndu̍yɛ̍, ndu̍ o̍o̍ pi̍ɛ̍ī Mɛ̍lɛ̄ka̍ lɔ̍ɔ̍ lɔ̍ɔ̍. 3Pāa̍le̍ pi᷅lɛ̍, a̍ pāa̍le̍ cha̍lāāle̍ŋ, mbo̍ chā yi̍lāŋndo̍. O̍ yi̍lāŋndo̍ ho̍ō ni᷄ŋ, mbo̍ chā ki̍i̍la̍nɔ̍ Mɛ̄lɛ̄ka̍a̍ kpe̍nde̍ke̍le̍. Mi̍ Ki̍i̍la̍nɔ̍ Mɛ̄lɛ̄ka̍a̍ vēēlū ndu̍ āā, “Kɔ̄ni̍i̍līɔ̄ɔ̄.”
4Mi̍ Kɔ̄ni̍i̍līɔ̄ɔ̄ to̍fā ki̍i̍la̍nɔ̍ Mɛ̄lɛ̄ka̍a̍ a̍ sīōōŋnde̍. Mbo̍ chɛ̄l āā, “E̍ī, Fāllo̍.”
Mi̍ ki̍i̍la̍nɔ̍ Mɛ̄lɛ̄ka̍a̍ dīmī āā, “Mɛ̄lɛ̄ka̍ tūēī pīɛ̄īlē nūmnde̍ŋ. Ō na᷄ŋ kɔ̄l a̍ kɛ̄ndɛ̄i̍ ŋ̄ tōsāl wānāā tāmbɛ̍i̍ya̍ ve̍. Ndu̍yɛ̍, ō pu̍ɛ̍ɛ̍ŋ a̍ nūm te̍. 5Vi̍o̍m ŋ̍wa᷅ŋ Cho̍pā chi̍e̍e̍ nāa̍ po̍ pi᷅lɛ̍ chūā dīōla̍ŋ āā, Sa̍i̍mɔ̄ŋ, ō nda̍ vēēlū vɛ̍lɛ̄ āā, Pītɛ̍ wo̍, mā kɔ̍ hu᷅ŋ nda̍ nda̍ā. 6Ō chō po̍ pi᷅lɛ̍ o̍ bɛ̄ŋgu̍ cho̍o̍, dīōla̍ŋ āā, Sa̍i̍mɔ̄ŋ. Yāu̍la̍ vīsīāā nda̍ tōōsīāā nyɔ̍ɔ̍ŋ nda̍ŋ o̍ bɛ̍ɛ̍ndīāā ni̍. Chīɛ̄ī ndɔ̄ɔ̍ chō o̍ pēē mɛ̄ŋmā īhɛ᷄llo̍ īkɛ̄i̍.” 7Mɛ̄ɛ̍ ki̍i̍la̍nɔ̍ Mɛ̄lɛ̄ka̍ so̍ō nāa̍ ndu̍ chu̍a̍ wo̍ kūɛ̄nu᷄ŋ, mi̍ Kɔ̄ni̍i̍līɔ̄ɔ̄ ve̍e̍lū bu̍ɛ̍i̍yāa̍ cho̍ ndu̍ o̍ bā chīɛ̄ī ni̍ŋ nda̍ ā ŋīɔ̍ɔ̍ŋ a̍ so̍vɛ̄i̍nɔ̍ wa̍ ndu̍ o̍ bā bɛ̄ŋgu̍ wo̍. So̍vɛ̄i̍nɔ̍ɔ̍ ho̍ō bɛ̍ɛ̍ ndu̍ o̍o̍ nɔ̍ bɛ̄ɛ̄le̍ŋ le̍ Mɛ̄lɛ̄ka̍. 8Mbo̍ chɔ̄m nda̍ nyɛ̄ o̍ nyɛ̍ yɔ̍nu̍ŋ. Mbo̍ vīām nda̍ Cho̍pā.
9Dīi̍māndɔ̄ɔ̍, nda̍ a̍a̍ wa̍ ni᷅ŋ Cho̍pā i̍kɛ̍i̍, mi̍ Pītɛ̍ he᷅l o̍ chīɛ̄īyo̍ chōo̍ a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍ le̍ Mɛ̄lɛ̄ka̍ pīɛ̄īyo̍. 10Yīa̍a̍ŋ mā wa̍ ndu̍ ni᷅ŋ nɛ̄īyo̍. Ndu̍ o̍o̍ ye̍e̍ma̍ ni᷅ŋ le̍ nyɛ̄ dīa̍a̍ dīo̍o̍. Ā lo̍ nyɛ̄ dīa̍a̍ yāūwo̍ mbo̍ chā yi̍lāŋndo̍. 11Mbo̍ chā mi̍ ha̍la̍a̍ kūmbi᷄ŋ. Mbo̍ chā nyɔ̄ɔ̍ tōlɔ̄ɔ̍ lɛ̄ŋ māā kōlā bɛ̍ndū. Ō wā tōlɔ̄ɔ̍ mɛ̄ɛ̍ wāŋndo̍ sāā nu̍a̍ā nyɔ̍ɔ̍ o̍ kpēŋgūŋ hi̍ɔ̍ɔ̍lo̍ŋ mbō wa̍ tūsīo̍o̍ yɛ̍. 12Vīsīa̍a̍ su̍u̍ o̍ su̍u̍ wa̍ o̍ nyɔ̄ɔ̍ ho̍ō ni᷄ŋ, a̍ nɔ̍ kɛ̄kɛ̍u̍la̍ŋ nda̍ bɛ̍ɛ̍, a̍ yōūwa̍ ā wa̍ lēni᷄ŋ. 13Mi̍ dīōmndo̍ dīmūl ndu̍ āā, “Pītɛ̍, chɔ̍ŋ mā dīī vīsīa̍a̍ ha̍ā mā dē.”
14Kɛ̍ mi̍ Pītɛ̍ di̍mī āā, “Ɛ̄ ɛ̍, I̍ kɛ̍ɛ̍, Māsānɔ̄ɔ̍. Lē pīlɛ̍ bɛ̍ɛ̍ I̍ di̍ wɔ̍ nyɛ᷅ o̍ nyɛ̄ ō sāwā na̍a̍ māChu̍ūwo̍ dīmi̍ māā ō chō ō nɔ̄ɔ̄lɛ̍i̍, kɛ̄lɛ̄ŋgāā māā ŋ̄ di̍ā le̍ wo̍ le̍.”
15Mi̍ dīōmndo̍ sūāā vɛ̄lɛ̄ nāa̍ ndu̍ chu̍a̍ āā, “Nyɛ̄ o̍ nyɛ̄ Mɛ̄lɛ̄ka̍ dīmi̍ pɛ̍ māā ō na᷄ŋ le̍ dīo̍o̍, nūm di̍mī māā ō ni᷄ŋ le̍ dīo̍ le̍ le̍.” 16Mɛ̄ɛ̍ sūɛ̍i̍ he̍ī ī chɔ̄ɔ̄lu̍ yɔ̄nɔ᷄ŋ le̍ya̍a̍, mi̍ kōlā bɛ̍ndū kōŋ mīīŋgu᷄ŋ cho̍o̍ cho̍o̍ o̍ ha̍la̍a̍ ni᷄ŋ.
17Pītɛ̍ lo̍ kɔ̄llo̍ kēēlāa̍ le̍ nyɛ̄ Mɛ̄lɛ̄ka̍ ndu̍ o̍o̍ hɛ̍na̍ŋ le̍ ndu̍ dīmūllo̍ o̍ yi̍lāŋndo̍ ho̍ō ni᷄ŋ ndo̍, mi̍ pūa̍a̍ Kɔ̄ni̍i̍līɔ̄ɔ̄ ve᷅m nda̍ sāālu᷄ŋ chi̍ɛ̍i̍ Sa̍i̍mɔ̄ŋndo̍. Ma̍ sīm o̍ kpāki̍ wa̍ ō bālāā bɛ̍ɛ̄ ndɔ̄ɔ̍ wo̍ sōndōo̍. 18Ma̍ vēēlū. Ma̍ nyūnā āā, “Mīāl o̍ mīāl chō na̍nu᷄ŋ dīōla̍ŋ āā, Sa̍i̍mɔ̄ŋ, mā vēēlū ndu̍ vɛ̄lɛ̄ āā, Pītɛ̍?”
19Pītɛ̍ lo̍ kɔ̄llo̍ kēēlāa̍ le̍ īsɔ̄ɔ̍ si̍nā a̍ yi̍lāŋndo̍ ho̍ō o̍kɔ̄ɔ̄, mi̍ Nyi̍na̍ Mɛ̄lɛ̄ka̍a̍ dīmūl ndu̍ āā, “Sa̍i̍mɔ̄ŋ, pūa̍a̍ ā yāa̍ ā chō nu̍m nūūvīa̍a̍. 20Le̍la̍ŋ, chɔ̍ŋ mā tōl. Ndu̍yɛ̍, ki̍i̍sa᷄ŋ le̍ kɔ̄la̍ŋ nya̍ nda̍ā le̍. Kāni̍ fo̍ndōle̍, ya̍ ve᷅m nda̍ ni̍.” 21Mi̍ Pītɛ̍ tu̍āl. Mbo̍ dīmūl pūa̍a̍ ka̍ŋ āā, “Ya̍ nya̍ chō nūūvīa̍a̍ ni̍. Lā vɛ᷅ hūnɔ̄ɔ̍?”
22Ma̍ mūlī āā, “Wānā bɛ̍ndū so̍vɛ̄i̍ya̍a̍ kɛ̍mīa̍a̍ dīōla̍ŋ āā, Kɔ̄ni̍i̍līɔ̄ɔ̄, ndu̍ ve᷅m na̍a̍ ni̍. Ō chō wāna̍ tōnya̍. Ndu̍yɛ̍, ō chō wānā pi̍ɛ̍i̍yāā Mɛ̄lɛ̄ka̍. Chu̍ūwa̍ kpo̍u̍ ā nɔ̄ bɛ̄ɛ̄le̍ŋ ta̍u̍ le̍ ndu̍. Mi̍ ki̍i̍la̍nɔ̍ Mɛ̄lɛ̄ka̍a̍ dīmūl ndu̍ māā ō vēēlu̍ nu̍m o̍ chīɛ̄ī ndɔ̄ɔ̍ le̍ mā kɔ̍ di̍mu̍l ndu̍ nyɛ̄ o̍ nyɛ̄ ŋ̄ nɔ̄ o̍ sōndō.” 23Mi̍ Pītɛ̍ yi̍yā nda̍ ma̍ lɔ̄l lo̍ŋ pi̍i̍.
Mɛ̄ɛ̍ pāa̍le̍ŋ lē sɛ̄, mi̍ Pītɛ̍ bɛ̍ɛ̍ndīa̍ŋ. Mbo̍ kūā nda̍ nda̍ā. Mi̍ wānāā lāāla᷄ŋnda̍ ā ti᷄ŋ Cho̍pā chi̍e̍e̍ tu̍āl nda̍ kɔ̄ɔ̄lī. 24Dīi̍māndɔ̄ɔ̍, ma̍ fūūlūū Sīsāli̍a̍ā chi̍e̍e̍. Kɔ̄ni̍i̍līɔ̄ɔ̄ wa̍ ni᷅ŋ nda̍ chūmndo̍. Ndu̍ o̍o̍ ve̍e̍lu̍ ni᷅ŋ wānāya᷅ŋ ndɔ᷄ŋ a̍ ndi̍a̍a̍mɔ̍ɔ̍wa̍a̍ ndūa̍a̍ o̍ la̍a̍la̍ŋ nda̍. 25Mɛ̄ɛ̍ Pītɛ̍ ka̍ndu̍ lūɛ̄īyɔ̄ɔ̍ chīɛ̄ī ni̍ŋ, mi̍ Kɔ̄ni̍i̍līɔ̄ɔ̄ ku̍ā mbo̍ dēmūl ndu̍. Mbo̍ bāŋ wūla̍ŋ ndu̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. 26Kɛ̍, mi̍ Pītɛ̍ di̍mūl ndu̍ āā, “Chɔ̍ŋ.” Mbo̍ tōsā mi̍ Kɔ̄ni̍i̍līɔ̄ɔ̄ si᷅m. Mi̍ Pītɛ̍ di̍mūl ndu̍ āā, “Ya̍ bɛ̍ɛ̍ wāna̍ chi̍o̍o̍ ko̍ni̍ ya̍ cho̍ ni̍.” 27Pītɛ̍ lo̍ sūɛ̍i̍ nāa̍ ndu̍ chu̍a̍ ma̍ lūɛ̄ī chīɛ̄ī ni̍ŋ. Mi̍ Pītɛ̍ ko̍māl wāŋnda̍ ta̍u̍. 28Mbo̍ dīmūl nda̍ āā, “Nya̍ pi̍la̍ lā sīnā kpe̍nde̍ke̍le̍ māā sāwā na̍a̍ māChu̍ūwo̍ dīmi̍ māā Chu̍ūnɔ̄ o̍ Chu̍ūnɔ̄ ku̍ē o̍ chīɛ̄ī wāna̍ cho̍ Chu̍ūnɔ̄ le̍ wo̍ le̍, kɛ̄lɛ̄ŋgāā mī nāŋa᷅ŋ wa̍ nda̍ tɛ̄ɛ̄ŋ. Kɛ̍ ndu̍yɛ̍, Mɛ̄lɛ̄ka̍ chɔ᷄m ya̍ māā I̍ chu̍ā wānā o̍ wānā māā ō bɛ̄nda̍ le̍ sɔ̄ɔ̄ŋgūū īkɛ̄i̍ le̍ le̍. 29Le̍la̍ŋ, mɛ̄ɛ̍ ŋ̄ vēm wāŋnda̍ nāa̍ ya̍ chu̍a̍, I̍ ki̍i̍sa᷄ŋ te̍. Mi̍ hu᷅ŋ. Le̍la̍ŋ, chɔ̍m ya̍ ni̍ko̍ le̍ sa̍bū ŋ̄ vēēlu̍ ya̍ wo̍.”
30Mi̍ Kɔ̄ni̍i̍līɔ̄ɔ̄ mu̍lī āā, “Pālɛ̍i̍ ī yāa̍ i̍ hi̍o̍ū ni᷅ŋ ni̍. I̍ wa̍ Mɛ̄lɛ̄ka̍ pīɛ̄īyo̍ o̍ ya̍ lo̍ chi̍ɛ̍ī ni̍ŋ, pɛ̄ŋgu̍ wa̍ā nu̍a̍ā, a̍ pāa̍le̍ cha̍lāāle̍ŋ. O̍ lē pīlɛ̍ ni᷄ŋ kpe̍ mi̍ cha᷅ wānā pɔ̍nɔ̍ɔ̍ īsīsi̍ ya̍ lāchī. Nyɛ̄lā ndɔ̄la̍ŋ lā wa̍ dīōndɔ̄ɔ̍ kpe̍e̍kpe̍i̍. 31Mbo̍ vēēlū āā, ‘Kɔ̄ni̍i̍līɔ̄ɔ̄’ āā, ‘Mɛ̄lɛ̄ka̍ tūēī pīɛ̄īlē nūmnde̍ŋ. Ndu̍yɛ̍, ō lōōnu̍ŋ a̍ nyɛ̄m ŋ̄ kē wa̍nāā tāmbɛ̍i̍ya̍ wo̍ŋ. 32Le̍la̍ŋ, vi̍o̍m wa̍nā Cho̍pā mbō kɔ̍ vēēlu̍ po̍ pi᷅lɛ̍ dīōla̍ŋ āā, Sa̍i̍mɔ̄ŋ, ō nda̍ vēēlū vɛ̍lɛ̄ āā, Pītɛ̍ wo̍. Ō chō Sa̍i̍mɔ̄ŋ o̍ bɛ̄ŋgu̍ cho̍o̍, o̍ bɛ̍ɛ̍ndīāā yāu̍la̍ vīsīa̍a̍ lā nda̍ tōōsīāā nyɔ̍ɔ̍ŋ nda̍ŋ. Chīɛ̄ī ndɔ̄ɔ̍ chō o̍ pēē mɛ̄ŋmā īhɛ᷄llo̍ īkɛ̄i̍.’ 33Le̍la̍ŋ, mi̍ I̍ vi̍ām ŋ̄wāŋ lē pīlɛ̍ kpe̍ nāa̍ nūm chu̍a̍. Ndu̍yɛ̍, nūm bɛ̍ɛ̍ ma̍ tōsā tōnya̍ ma̍ hūŋ. Na̍a̍ fa̍ū ŋ̄ chō ni᷅ŋ na̍nū te̍le̍ŋndo̍ ho̍ō. Ndu̍yɛ̍, Mɛ̄lɛ̄ka̍ chō na̍a̍ tɛ̄ɛ̄ŋ. Ŋ̄ hɛ̄na̍ŋ mī ŋ̄ tūēī nyɛ̄ o̍ nyɛ̄ Māsānɔ̄ɔ̍ chɔ᷄m nu̍m le̍ na̍a̍ dīmūl.”
Pītɛ̍ di̍mu̍l Kɔ̄ni̍i̍līɔ̄ɔ̄ a̍ yu̍ŋgu̍ ndɔ̄ɔ̍ Yōōŋgū Kɛ̄ndɛ̍ Mɛ̄lɛ̄ka̍a̍
34Mi̍ Pītɛ̍ ka̍ndū sūɛ̍i̍. Mbo̍ dīmī āā, “Ī si̍na̍ ni᷅ŋ māā ī chō tōnya̍ māā Mɛ̄lɛ̄ka̍ hɛ̍lī ŋ̄wāŋndā chīe̍e̍ le̍. 35Wānā o̍ wāna̍ pi̍ɛ̍i̍ ndu̍ pɛ̍, mbō wa̍ sa̍kpō o̍ kēlālā ndɔ̄la̍ŋ ni᷄ŋ pɛ̍, ā yɔ᷄ŋ bɛ̍ɛ̍ āā lɛ̄ŋndē chēle̍ŋ o̍ fu̍la̍ ni̍, ndu̍ Mɛ̄lɛ̄ka̍ chūā ni̍ māā wāna̍ ndɔ̄. 36Lā sīnā māā Mɛ̄lɛ̄ka̍ yɔ᷄ŋ dīōm ndɔ̄ɔ̍ nāa̍ wāŋnda̍ I̍sɔ̄lūɛ̄ī chu̍a̍. Ndu̍yɛ̍, mbo̍ chɔ̄m wāŋnda̍ yōōŋgū kɛ̄ndɔ̄ɔ̍ māā Chi̍i̍sū Ki̍li̍tī o̍ cho̍ Māsānɔ̄ɔ̍ Mɛ̄lɛ̄ka̍ wāŋnda̍ kpo̍u̍ cho̍o̍ wo̍ tōsa̍ mi̍ kɔ̄l nyūlōo̍ mīīŋgū na̍a̍ tɛ̄ɛ̄ŋ na̍a̍ Mɛ̄lɛ̄ka̍ wa̍ā. 37Lā sīnā a̍ sūɛ̍i̍ bɛ̍ndu̍i̍ yɔ̍nu̍ŋ o̍ lɛ̄ŋndē Chūdi̍a̍āle̍ŋ ni᷄ŋ kpo̍u̍ ve̍. O̍ būŋgɛ̄ī Kāli̍līve̍ ni᷄ŋ i̍ ka̍ndu̍ŋ ni̍. Mɛ̄ɛ̍ bōōndi̍i̍ Chɔ᷄ŋ wa̍ sūɛ̍i̍ Mɛ̄lɛ̄kɛ̍i̍ chɔ̄mndo̍ a̍ wāŋnda̍ pūlɔ̄ɔ̍ Mɛ̄lɛ̄ka̍a̍ ve̍ ī hīōū, o̍ ko̍ŋ sūɛ̍i̍ he̍ī ī kāndu̍ŋ ni̍. 38Lā sīnā a̍ Chi̍i̍sū o̍ fu̍la̍ ho̍ō Na̍a̍sa̍lūɛ̄ī chi̍e̍e̍ wo̍ o̍kɔ̄ɔ̄, a̍ mɛ̄ɛ̍ Mɛ̄lɛ̄ka̍ hɛ̄li̍ ndu̍ mbo̍ tōsā mi̍ Nyi̍nā Kāsīo̍o̍ tūāl ndu̍ kɔ̄ɔ̄lī yɛ̍. Ndu̍yɛ̍, mbo̍ kē ndu̍ kpāāyāa̍. Mi̍ Chi̍i̍sū ku̍ā bā o̍ bā a̍ tōnya̍a̍ tōsāa̍ nāa̍ wāŋnda̍ chūā. Mbo̍ sīŋgī wānāa̍ wa̍ o̍ kpāāya̍ nyi̍nā wɔ̄ɔ̍ŋndo̍ bɛ̄ŋgu̍ wa̍ kpe̍de̍. Kāni̍ fo̍ndōle̍, Mɛ̄lɛ̄ka̍ wa̍ ndu̍ kɔ̄ɔ̄lī. 39Na̍a̍ ŋ̄ chē nyɛ̄ o̍ nyɛ̄ o̍ to̍sa̍ Chūlu̍sɛ̄lɛ̄m a̍ bā o̍ bā chēle̍ŋ o̍ lɛ̄ŋnde̍ Chu̍ūwa̍ ni᷄ŋ. Ma̍ bāŋ ndu̍ o̍ yɔ̄m sīŋgāfīlāa̍ chōo̍ ma̍ dīī ndu̍. 40Kɛ̍ o̍ pālɛ̍i̍ yāa̍ ndɔ̄ɔ̍, mi̍ Mɛ̄lɛ̄ka̍ mīŋgī ndu̍ yōōmū. Mi̍ Mɛ̄lɛ̄ka̍ tōsā mi̍ ŋ̄ chā ndu̍. 41Wānā che᷅le̍ŋ chi̍ ndu̍ le̍, mɛ̄ɛ̍ na̍a̍ se̍i̍yāā Mɛ̄lɛ̄ka̍ hɛ̄li̍ wa̍. Mɛ̄ɛ̍ o̍ mi̍i̍ŋgu̍ yōōmū, mi̍ ŋ̄ dīā nyɛ̄ dīa̍a̍ na̍a̍ nda̍ā. 42Mbo̍ dīmūl na̍a̍ ō kālā ka̍lā māā ŋ̄ chɔ᷄m wa᷅ŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ māā ndu̍ Mɛ̄lɛ̄ka̍ yūlū le̍ wāa̍ wāna̍ kɔ̍ɔ̍sā a̍ wāŋnda̍ kpo̍u̍ wo̍ ni̍, wānāa̍ cho̍ yōōmū wa̍, a̍ wānāa̍ vi᷅ ni᷅ŋ nda̍. 43Mi̍ wānāa̍ su̍a̍ā le̍ Mɛ̄lɛ̄ka̍ wa̍ kpe̍de̍ a̍ di̍mī a̍ ndu̍ o̍kɔ̄ɔ̄ māā, wānā o̍ wāna̍ la̍a̍la̍ŋ a̍ ndu̍ pɛ̍, ō sɔ̄la̍ mālɔ̄ɔ̍ le̍ yɔ̄ŋndā ndɔ̄la̍ wɔ̍ɔ̍ŋnda̍ŋ o̍ sa̍bū ndɔ̄ɔ̍ ni᷄ŋ.”
Nyi̍nā Kāsi̍ Mɛ̄lɛ̄ka̍a̍ tōl wānāa̍ cho̍ a̍ Chu̍ū le̍ wa̍ kɔ̄ɔ̄lī
44Pītɛ̍ lo̍ sūɛ̍i̍ mi̍ Nyi̍nā Kāsi̍ Mɛ̄lɛ̄ka̍a̍ tūāl wāŋnda̍ kpe̍de̍ kɔ̍ɔ̍lī, a̍ wa̍ nīla̍ŋ yāŋɔ̄ɔ̍ o̍ yōōŋgōo̍ ho̍ō wa̍. 45Mi̍ kɔ̄ndɔ̄fi̍llo̍ bīī Chu̍ūwāā lāāla᷄ŋnda̍, a̍ hi᷅ŋ nda̍ Pītɛ̍ wa̍ā wa̍ le̍ mɛ̄ɛ̍ Mɛ̄lɛ̄ka̍ yɔ᷄ŋ wānāa̍ cho̍ a̍ Chu̍ū le̍ wa̍ kīo̍o̍ ho̍ō yɛ̍, ndu̍ yɔ̍nūŋ māā Nyi̍nā Kāsi̍ Mɛ̄lɛ̄ka̍a̍ ni̍. 46Kāni̍ fo̍ndōle̍, ā tūēī nda̍ sūɛ̍i̍ o̍ sɔ̄ɔ̍ŋ che᷅le̍ŋ ni᷄ŋ. Ma̍ tūɛ̄ī nda̍ sūɛ̍i̍ a̍ wa̍lta̍ kɔ̄ndɔ̄fi̍ltā Mɛ̄lɛ̄ka̍ tōsa̍ la̍ŋ o̍kɔ̄ɔ̄. Mi̍ Pītɛ̍ ka̍ndū sūɛ̍i̍. Mbo̍ dīmī āā, 47“Wāŋnda̍ ha̍ā sɔ̄la̍ Nyi̍nā Kāsīo̍o̍ mɛ̄ɛ̍ nāā ŋ̄ sɔ̄la̍ yɛ̍. Wānā o̍ wānā ā nɔ̍lā lɛ̍ mā ku̍u̍na̍ nda̍ pūlɔ̄ɔ̍ Mɛ̄lɛ̄ka̍a̍ sɔ̄lāa̍ a̍ mɛ̄ŋnda̍ŋ?” 48Le̍la̍ŋ, mbo̍ dīmī māā ā pīɔ̍l di̍ōla̍ Chi̍i̍sū Ki̍li̍tīla̍ŋ mā pūlū nda̍. O̍ ko̍ŋ kɔ̍ɔ̍lī, ma̍ dīmūl ndu̍ māā ā wa̍ lo̍ŋ nda̍ nda̍ā le̍ pālɛ̍i̍ ī ti᷄ŋ.
Currently Selected:
Wa̍lta̍ Wānāa̍ Chi̍i̍sūa̍a̍ 10: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
