Wa̍lta̍ Wānāa̍ Chi̍i̍sūa̍a̍ 11
11
Ko̍na̍ Pītɛ̍ dɔ̍u̍nu᷄ŋ o̍ ku̍ndā wānāā lāāla᷄ŋnda̍ lo̍ Chūlu̍sɛ̄lɛ̄m ndo̍
1Mi̍ wānāā Chi̍i̍sū ve᷅m hɔ̄ltē ndɔ̄ wa̍, a̍ wānāā lāāla᷄ŋnda̍ lɛ̄ŋndē Chūdi̍a̍āle̍ŋ kpe̍de̍, a̍ tu̍ɛ̍ī māā wānāa̍ cho̍ a̍ Chu̍ū le̍ wa̍ bɛ̍ɛ̍ ā chɛ᷄l dīo̍m Mɛ̄lɛ̄ka̍a̍. 2Mɛ̄ɛ̍ Pītɛ̍ ku̍ɛ̄ Chūlu̍sɛ̄lɛ̄m, mi̍ wānāā lāāla᷄ŋnda̍ a̍ ki̍ndi̍la̍ hīvīo̍o̍ o̍ chīɛ̄ī kɔ̄ɔ̄lī wa̍ pɛ̄ɛ̄sā ndu̍. Ma̍ dīmūl ndu̍ āā, 3“Ā kūɛ̄ o̍ chīɛ̄ī wānāa̍ cho̍ a̍ Chu̍ū le̍ wa̍, a̍ cho̍ a̍ hi̍vīāā le̍ wa̍, mi̍ lā dīā bɛ̍ɛ̍ nyɛ̍ dīa̍a̍ lātūlu̍ nya̍ nda̍ā.” 4Le̍la̍ŋ, mi̍ Pītɛ̍ chɔ᷅m nda̍ nyɛ̄ o̍ nyɛ̍ yɔ̍nu̍ŋ, chɔ̍ŋ o̍ kāndɔ᷄ŋndo̍. Mbo̍ dīmī āā,
5“I̍ wa̍ Mɛ̄lɛ̄ka̍ pīɛ̄īyo̍ Cho̍pā chi̍e̍e̍, mi̍ cha᷅ yi̍lāŋndo̍. O̍ yi̍lāŋndo̍ ho̍ō ni᷄ŋ, mi̍ cha᷅ nyɔ̄ɔ̍ māā kōlā bɛ̍ndū chɔ̄nɔ᷄ŋndo̍ o̍ ha̍la̍a̍ ni᷄ŋ. Mbo̍ wā tōlɔ̄ɔ̍ mɛ̄ɛ̍ wāŋndo̍ sāā nu̍a̍ā nyɔ̍ɔ̍ o̍ kpēŋgūŋ hi̍ɔ̍ɔ̍lo̍ŋ mbo̍ wa̍ tūsīo̍o̍ yɛ̍. Mbo̍ sīm ya̍ īkɛ̄i̍. 6Mi̍ nu̍ā lēni᷄ŋ chi̍kɛ̍ŋ. Mi̍ cha᷅ vīsīāā chi̍e̍e̍ ni̍ŋ nda̍, a̍ vīsīāā yōndūa̍a̍, a̍ vīsīa̍a̍ nɔ̍ kɛ̄kɛ̍u̍la̍ŋ nda̍, a̍ yōūwa̍. 7Mi̍ tu̍ɛ̍ī mi̍ dīōmndo̍ dīmūl la̍ āā, ‘Chɔ̍ŋ, Pītɛ̍, mā dīī vīsīa̍a̍ ha̍ā mā dē.’ 8Kɛ̍, mi̍ di̍mī āā, ‘Ɛ̄ ɛ̍ Māsānɔ̄ɔ̍, lē pīlɛ̍ bɛ̍ɛ̍ i̍ di̍ wɔ̍ nyɛ᷅ sāwā na̍a̍ māChu̍ūwo̍ dīmi̍ māā ō chō ō nɔ̄ɔ̄lɛ̍i̍, kɛ̄lɛ̄ŋgāā māā ŋ̄ di̍ā le̍ wo̍ le̍.’ 9Mi̍ dīōmndo̍ fūlā vɛ̍lɛ̄ o̍ ha̍la̍a̍ ni᷄ŋ, mbo̍ dīmī āā, ‘Nyɛ̄ o̍ nyɛ̄ Mɛ̄lɛ̄ka̍ dīmi̍ pɛ̍ māā ō na᷄ŋ le̍ dīo̍o̍, nūm di̍mī māā ō ni᷄ŋ le̍ di̍o̍ le̍ le̍.’ 10Sūɛ̍i̍ he̍ī ī yɔ̄nu̍ŋ le̍ ya̍a̍. O̍ mɛ̄ɛ̄lu̍la̍ŋ, mi̍ nyɛ̄ kōŋ mi̍i̍ŋgu᷄ŋ o̍ ha̍la̍a̍ ni᷄ŋ. 11A̍ te̍le̍ŋ ko̍ŋ, mi̍ pūa̍a̍ ā yāa̍ cha̍ŋ Sīsāli̍a̍ā chi̍e̍e̍. Ma̍ fūūlūū nāa̍ ya̍ wa̍ o̍ yīya̍a̍ wa̍. Nda̍ a̍a̍ ve᷅m nda̍ nāa̍ ya̍ chu̍a̍. 12Mi̍ Nyi̍na̍ Mɛ̄lɛ̄ka̍a̍ dīmūl la̍ māā I̍ kɔ̍ na̍a̍ nda̍ā, ndu̍yɛ̍, māā I̍ ki̍i̍sa᷄ŋ te̍. Mi̍ wānāā lāāla᷄ŋa̍a̍ ŋɔ̍mpu᷅m nda̍ ha̍ā ā tūāl la̍ kɔ̄ɔ̄lī. Mi̍ ŋ̄ kūā lātūlu̍ Sīsāli̍a̍ā na̍a̍ nda̍ā. Mi̍ ŋ̄ lūɛ̄ī kpe̍de̍ na̍a̍ nda̍ā o̍ Kɔ̄ni̍i̍līɔ̄ɔ̄ lo̍ chi̍ɛ̍ī ni̍ŋ. 13O̍ ko̍ŋ kɔ̍ɔ̍lī, mbo̍ chɔ̄m na̍a̍ a̍ mɛ̄ɛ̍ o̍ che᷅ ki̍i̍la̍nɔ̍ Mɛ̄lɛ̄ka̍a̍ īsīsi̍ o̍ ndu̍ lo̍ chi̍ɛ̍ī ni̍ŋ yɛ̍ a̍ nyɛ̄ o̍ di̍mu̍l ndu̍ wo̍. Mi̍ ki̍i̍la̍nɔ̍ Mɛ̄lɛ̄ka̍a̍ dīmūl ndu̍ āā, ‘Vi̍o̍m wa̍nā Cho̍pā chi̍e̍e̍ nāa̍ po̍ pi᷅lɛ̍ chūā dīōla̍ŋ āā, Sa̍i̍mɔ̄ŋ, ō nda̍ ve̍e̍lū vɛ̍lɛ̄ āā, Pītɛ̍ wo̍. 14Ō nɔ̄ lēdīōm le̍ nu̍m dīmūl. O̍ dīōm kōŋ ni᷄ŋ, nūm ni̍, a̍ yu̍ŋgu̍ nu̍mndo̍, nya̍ chō pīōŋɔ̄ɔ̍ sɔ̄lā ni̍.’ 15Mɛ̄ɛ̍ ya̍ ka̍ndu̍ sūɛ̍i̍, mi̍ Nyi̍na̍ Kāsīo̍o̍ tūāl nda̍ kɔ̄ɔ̄lī mɛ̄ɛ̍ o̍ to᷅l na̍a̍ kɔ̄ɔ̄lī o̍ kāndɔ᷄ŋndo̍ yɛ̍. 16O̍ ko̍ŋ, mi̍ lo̍o̍nu᷄ŋ nyɛ᷅ Māsānɔ̄ɔ̍ Mɛ̄lɛ̄ka̍ dīmi̍ wo̍. Mbo̍ dīmī āā, ‘Chɔ᷄ŋ yīŋ a̍ mɛ̄ŋnda̍ŋ, kɛ̍ Mɛ̄lɛ̄ka̍ ndu̍ chō nya̍ yīŋɔ̄ɔ̄ a̍ Nyi̍nā ndɔ̍ Kāsīo̍o̍.’ 17Le̍la̍ŋ, mi̍ si̍nā māā nyɛ̄ Mɛ̄lɛ̄ka̍ ke̍ na̍a̍ lɔ̍ɔ̍ na̍a̍ ŋ̄ lāāla̍ŋ a̍ Ma̍sānɔ̄ɔ̍ Chi̍i̍sū Ki̍li̍tī wo̍, māā ndu̍ ko̍ni̍ o̍ ke̍ wānāa̍ cho̍ a̍ Chu̍ū le̍ wa̍ ni̍. I̍ nɔ̍ kpāāyā mī ku̍u̍na̍ Mɛ̄lɛ̄ka̍ nyɛ̄ o̍ hɛ̍na̍ŋ ndo̍ tōsāa̍?”
18Mɛ̄ɛ̍ nda̍ tūēī nyɛ̄ o̍ dīmī wo̍, ma̍ pɛ̄ŋgī ndu̍ pɛ̄ɛ̄sāa̍. Ma̍ kāndū Mɛ̄lɛ̄ka̍ ba̍li̍ka̍a̍ mēllo̍. Ma̍ dīmī āā, “Mɛ̄ɛ̍ wānāa̍ cho̍ a̍ Chu̍ū le̍ wa̍ bɛ̍ɛ̍, Mɛ̄lɛ̄ka̍ ke̍ nda̍ fo̍ndāa̍ le̍ mā ma᷄l yɔ̄ŋndā ndāla̍ wɔ̍ɔ̍ŋnda̍ŋ le̍ mā sɔ̄la̍ yōōmōo̍.”
Ku̍ndā wānāā lāāla᷄ŋnda̍ A̍ŋti̍ɔ̍ɔ̄
19A̍ bōōndi̍i̍ nda̍ dīī Sti̍i̍vīŋ nde̍, mi̍ wāŋnda̍ kāndū wānāā lāāla᷄ŋnda̍ nyɛ̄ pālāa̍ tūsīo̍o̍ chōo̍. Le̍ he̍ī, mi̍ wānāā lāāla᷄ŋnda̍ sāŋnu᷄ŋ. Mi̍ ā ti᷄ŋ ā nyāānu᷄ŋ ma̍ kūā o̍ lɛ̄ŋndē Fōni̍i̍sīāāle̍ŋ ni᷄ŋ a̍ lɛ̄ŋndē Sa̍i̍pūlɔ̄ɔ̄le̍ŋ, a̍ A̍ŋti̍ɔ̍ɔ̄ chi̍e̍e̍. Ma̍ kūā a̍ yōōŋgōo̍ dīmīo̍o̍ a̍ Chi̍i̍sū o̍kɔ̄ɔ̄ nāa̍ Chu̍ūwa̍ chūā su̍e̍e̍. 20Kɛ̍, mi̍ wānāā lāāla᷄ŋnda̍ ā ti᷄ŋ, a̍ chɛ᷄ŋ o̍ lɛ̄ŋndē Sa̍i̍pūlɔ̄ɔ̄le̍ŋ ni᷄ŋ, a̍ Sāīlu̍i̍nī chi̍e̍e̍ ya̍ ā kūā A̍ŋti̍ɔ̍ɔ̄, ma̍ kāndū wānāa̍ cho̍ a̍ Chu̍u̍ le̍ wa̍ bɛ̍ɛ̍ yo̍o̍ŋgū kɛ̄ndɔ̄ɔ̍ dīmūllo̍ a̍ Māsānɔ̄ɔ̍ Chi̍i̍sū o̍kɔ̄ɔ̄. 21Mi̍ Mɛ̄lɛ̄ka̍ mālā nda̍ ta̍u̍. Ndu̍yɛ̍, mi̍ wāŋnda̍ ta̍u̍ a̍ la̍a̍la᷄ŋ. Ma̍ mūlī kɔ̄lta̍ŋ o̍ Ma̍sānɔ̄ɔ̍ Chi̍i̍sū lo̍.
22Mɛ̄ɛ̍ ku̍ndā wānāā lāāla᷄ŋnda̍ Chūlu̍sɛ̄lɛ̄m chi̍e̍e̍ a̍ tu̍e̍ī a̍ ndi̍ o̍kɔ̄ɔ̄, ma̍ vīām Ba̍a̍na̍bāā A̍ŋti̍ɔ̍ɔ̄. 23Mɛ̄ɛ̍ o̍ fu̍u̍lu̍u̍, mbo̍ chā mɛ̄ɛ̍ Mɛ̄lɛ̄ka̍ wa̍ nda̍ mālāa̍ yɛ̍, mbo̍ nāŋ kɔ̄l ta̍u̍. Mbo̍ sīlā nda̍ māā, nda̍ fa̍ū ā hīo̍u̍ la̍chi̍ a̍ hɛ̄na᷄ŋ Māsānɔ̄ɔ̍ Mɛ̄lɛ̄ka̍a̍ tōsāa̍ a̍ kɔ̄ltā nda̍la̍ŋ kpo̍u̍. 24Ba̍a̍na̍bāā wa̍ wānā kɛ̍ndɛ̄. Ndu̍yɛ̍, Nyi̍nā Kāsīo̍o̍ wa̍ ndu̍ kɔ̄ɔ̄lī ta̍u̍. Ma̍ tōsā mi̍ wāŋnda̍ ta̍u̍ a̍ mu̍lī kɔ̄lta̍ŋ o̍ Māsānɔ̄ɔ̍ lo̍.
25Mi̍ Ba̍a̍na̍bāā ku̍ā Ta̍a̍sɔ̄ɔ̄ chi̍e̍e̍ le̍ Sɔ̍ɔ̄ nūūvīa̍a̍. 26Mɛ̄ɛ̍ o̍ sa̍a̍lu̍ŋ ndu̍, ma̍ hūŋ nda̍ ndu̍ A̍ŋti̍ɔ̍ɔ̄. Le̍ wɔ̄sīo̍o̍ kpu̍lu̍ku̍u̍ nda̍ ŋi̍ɔ̍ɔ̍ŋ ā chō ku̍ndā wānāā lāāla᷄ŋnda̍ o̍ bɛ̄ŋgu̍ cho̍o̍ lo̍ŋ. Ma̍ pɛ̄ɛ̄kū wānāā fāŋgā fa̍ŋgā. A̍ŋti̍ɔ̍ɔ̄ lo̍ŋ nda̍ kāndu̍ wānāā lāāla᷄ŋnda̍ vēēlōo̍ ni̍ āā Ki̍li̍sīɔ̄ŋnda̍. Ko̍ŋ cho̍ ni̍, wānāa̍ to᷅l Ki̍li̍tī kɔ̄ɔ̄lī wa̍.
27A̍ bōōndi̍i̍ ke̍ŋ, mi̍ wānāa̍ su̍a̍ā le̍ Mɛ̄lɛ̄ka̍ wa̍ ā pūm ā cha᷄ŋ Chūlu̍sɛ̄lɛ̄m chi̍e̍e̍. Ma̍ kūā A̍ŋti̍ɔ̍ɔ̄. 28Ō pīlɛ̍ wa̍ nda̍ tɛ̄ɛ̄ŋ, dīōla̍ŋ āā, A̍ka̍bɔ̄ɔ̄. Mbo̍ sīm mbo̍ dīmī nyɛ̄ Nyi̍na̍ Mɛ̄lɛ̄ka̍a̍ dīmu̍l ndu̍ māā ō chō hūnɔ̄ɔ̄ yɔ̄nɔ᷄ŋ ndo̍. Mbo̍ dīmī māā yīmā bɛ̄ndūa̍ŋ mā chō dēlɔ̄ɔ̄ su̍ŋ o̍ chi̍e̍ēŋndo̍ chōo̍ kpo̍u̍. Bōōndi̍i̍ Kīla̍dīɔ̄ɔ̄ wa̍ māsā bɛ̍ndōo̍ kpe̍de̍ o̍ lɛ̄ŋīī Lu̍o̍ma᷅ŋnde̍ ni᷄ŋ nde̍, bōōndi̍i̍ ke̍ŋ yīmā māŋ mā de᷄l ni̍. 29Mi̍ wānāā lāāla᷄ŋnda̍ kɛ̄ɛ̄sīāā māā mī wānā o̍ wānā la̍a̍la᷄ŋ yɔ̍ŋgu̍ nyɛ̄ o̍ nyɛ̄ nda̍ sɔ̄la̍ le̍ yɔ̄ŋndo̍ nāa̍ wānāā lāāla᷄ŋnda̍ chūā o̍ lɛ̄ŋndē Chūdi̍a̍āle̍ŋ ni᷄ŋ le̍ nda̍ mālāa̍. 30Ma̍ chūūŋgīāā nyɛ̄ sɔ̄lāa̍ ma̍ kē Sɔ̍ɔ̄ nda̍ Ba̍a̍na̍bāā, le̍ mā kūɛ̄ a̍ ndu̍ nāa̍ lāŋgba̍ā kālāa̍ chūā, a̍ wa̍ ku̍ndā wānāā lāāla᷄ŋnda̍ Chūdi̍a̍ā bōlle̍ŋ nda̍.
Currently Selected:
Wa̍lta̍ Wānāa̍ Chi̍i̍sūa̍a̍ 11: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
