Wa̍lta̍ Wānāa̍ Chi̍i̍sūa̍a̍ 13
13
Nyi̍nā Kāsi̍ Mɛ̄lɛ̄ka̍a̍ hɛ̄li̍ Sɔ̍ɔ̄ nda̍ Ba̍a̍na̍bāā
1Wānāa̍ su̍a̍ā le̍ Mɛ̄lɛ̄ka̍ wa̍, a̍ wānāa̍ pɛ̍ɛ̍ku̍ wa᷅ŋnda̍ sūɛ̍i̍ Mɛ̄lɛ̄kɛ̍i̍ ya̍ ā pūm, ā wa̍ ku̍ndā wānāā lāāla᷄ŋnda̍ tɛ̄ɛ̄ŋ A̍ŋti̍ɔ̍ɔ̄. Nda̍ cho̍ ha̍ā ni̍, Ba̍a̍na̍bāā, a̍ Si̍mīɔ̄ŋ ō nda̍ a̍a̍ ve̍e̍lū āā, wānā ti̍ŋīo̍o̍ wo̍, a̍ Lu̍sīɔ̄ɔ̄, o̍ fu̍la̍ o̍ lɛ̄ŋndē Sāīlu̍i̍nīle̍ŋ ni᷄ŋ ndo̍, a̍ Ma̍na̍yēŋ, ō nda̍ mānda̍ lātūlu̍ nda̍ wānā bɛ̍ndu̍ Hɛ̍lɔ̄ɔ̄ wa̍ā wo̍, a̍ Sɔ̍ɔ̄. 2Mɛ̄ɛ̍ wānāā lāāla᷄ŋnda̍ ā wa̍ Māsānɔ̄ɔ̍ Mɛ̄lɛ̄ka̍ pīɛ̄īyo̍ a̍ su᷅mndo̍ bīyɔ̄ɔ̍, mi̍ Nyi̍na̍ Kāsi̍ Mɛ̄lɛ̄ka̍a̍ dīmūl nda̍ āā, “Lā chu̍a̍ Ba̍a̍na̍bāā nda̍ Sɔ̍ɔ̄ le̍ wa̍li̍ ya̍ I̍ hɛ̍li̍ nda̍ wo̍.”
3O̍ ko̍ŋ kɔ̍ɔ̍lī, mɛ̄ɛ̍ nda̍ bīī su᷅mndo̍, ma̍ pīɛ̄ī Mɛ̄lɛ̄ka̍. Ma̍ hāndū Ba̍a̍na̍bāā nda̍ Sɔ̍ɔ̄ bāla̍ŋ chōo̍. Ma̍ dūāū nda̍ sa̍lā. Ma̍ vīām nda̍.
Ba̍a̍na̍bāā nda̍ Sɔ̍ɔ̄ ā kūɛ̄ Sa̍i̍pūlɔ̄ɔ̄
4Mi̍ Ba̍a̍na̍bāā nda̍ Sɔ̍ɔ̄ a̍ ka̍ndū kɔ̄la̍ŋ o̍ vīōmɔ̄ɔ̄ Nyi̍nā Kāsīo̍o̍ vēm nda̍ wo̍. Ma̍ kūā Sɛ̄lu̍u̍sīāā chi̍e̍e̍. Mɛ̄ɛ̍ nda̍ chɛ᷄ŋ lo̍ŋ, ma̍ lūɛ̄ī o̍ dɛ̄ndɛ̄ bɛ̍ndōo̍ ni᷄ŋ. Ma̍ kūā o̍ lɛ̄ŋndē Sa̍i̍pūlɔ̄ɔ̄le̍ŋ. 5Mɛ̄ɛ̍ nda̍ fūūlu̍u̍ Sāla̍mi̍sī chi̍e̍e̍, ma̍ kɔ̍ chɔ᷅m wāŋnda̍ sūɛ̍i̍ Mɛ̄lɛ̄kɛ̍i̍ o̍ chīɛ̄īlā Chu̍ūwa̍ pīɛ̄ī Mɛ̍lɛ̄ka̍la̍ŋ ni᷄ŋ. Chɔ̄ŋ Ma̍kī wa̍ hɔ̄lāā tūlu̍ a̍ nda̍ le̍ nda̍ mālāa̍ a̍ wa̍llo̍.
6Ma̍ cha᷄ŋ o̍ lɛ̄ŋnde̍ Sa̍i̍pūlɔ̄ɔ̄le̍ŋ kūmbōo̍ pīlɔ̍ɔ̄ ma̍ fūūlūū o̍ mɛ̄ɛ̄lu̍la̍ kūmbōo̍ pīlɔ̍ɔ̄. Ma̍ fūūlūū Pa̍a̍fɔ̄ɔ̄ chi̍e̍e̍. Ma̍ kōmāl mānde̍nɔ̄ pīlɛ̍ lo̍ŋ dīōla̍ŋ āā, Ba̍a̍ Chi̍i̍sū. Chu̍ūnɔ̄ɔ̍ o̍ wa̍ ni̍. Ndu̍yɛ̍, mi̍ lāŋu̍nɔ̄ mānde̍nɔ̄ɔ̍ ho̍ō dīmī māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍. Kɛ̍, ō ve̍ wa̍nā wa̍ā le̍nde̍ le̍. 7Ndu̍yɛ̍, wānā bɛ̍ndu̍ wa̍ lɛ̄ŋndē Sa̍i̍pūlɔ̄ɔ̄le̍ŋ bōlle̍ŋ ndo̍, dīōla̍ŋ āā, Sɛ̄kīɔ̄ɔ̄ Pa̍u̍lɔ̄ɔ̄, ndi̍a̍a̍mɔ̍ɔ̍ ndɔ̄ɔ̍ mānde̍nɔ̄ɔ̍ ho̍ō wa̍ ni̍. Wānā bɛ̍ndōo̍ ho̍ō ō wa̍ wāna̍ kɔ̄l kālu̍. Mbo̍ ve̍e̍lū Ba̍a̍na̍bāā nda̍ Sɔ̍ɔ̄ le̍ mī ndu̍ o̍o̍ tu̍e̍ī dīo̍m Mɛ̄lɛ̄ka̍a̍. 8Kɛ̍, mi̍ mānde̍nɔ̄ɔ̍ ho̍ō ō sīmūl nda̍. Ndu̍ yɔ̍nūŋ māā Ɛ̍li̍māā ni̍. Bāa̍ Chi̍i̍sūla̍ŋ la̍ cho̍ yɛ̄ la̍ŋ o̍ Kīli̍kīi̍ye̍ ni᷄ŋ ni̍. Mbo̍ kīndī le̍ wānā bɛ̍ndōo̍ ho̍ō kɔ̄llo̍ mūlīo̍o̍ yɔ̍ŋi̍ o̍ la̍a̍la̍ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍ mɛ̄ɛ̍ wānāā lāāla᷄ŋnda̍ o̍ Chi̍i̍sū ni̍ŋ a̍ la̍a̍la̍ŋ yɛ̍. 9Kɛ̍ Sɔ̍ɔ̄ ō nda̍ a̍a̍ ve̍e̍lū vɛ̍lɛ̄ āā, Pɔ̍ɔ̍l wo̍, Nyi̍nā Kāsīo̍o̍ wa̍ ndu̍ kɔ̄ɔ̄lī ta̍u̍. Mbo̍ tōfā mānde̍nɔ̄ɔ̍ ho̍ō chi̍kɛ̍ŋ bɛ̍ndu̍. 10Mbo̍ dīmūl ndu̍ āā, “Ā chō māchūāā mɛ̄ɛ̍ Māsa̍ Nyi̍nāā Wɔ̄ɔ̍ŋnda̍ chō yɛ̍. Nyɛ̄ o̍ nyɛ̍ cho̍ nyɛ̄ kɛ̄ndɛ̄, ndu̍ ŋ̄ tu᷄l lēyɛ̄ ni̍. Wāna̍ lēyālāa̍ ŋ̄ chō ō fūūlāā mɛ̍ɛ̄ ni̍. Ndu̍yɛ̍, ā chō wāna̍ kɔ̄l vēsɛ̍i̍ bɛ̍ndū. Tōnya̍ cho̍ a̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄ wo̍, ndu̍ ŋ̄ chō sīīŋgu̍u̍wo̍ sūɛ̍i̍ lā chōōwā lɔ̍ɔ̍ lɔ̍ɔ̍ ni̍. 11Māsānɔ̄ɔ̍ Mɛ̄lɛ̄ka̍ chō nu̍m lɔ̄ɔ̄ su̍ŋ su̍ŋ. Ā chō sūmā. Le̍ te̍le̍ŋnda̍ŋ lā ti᷄ŋ, a̍ nɔ̍lā ni̍ŋ mā chē pu̍e̍e̍ŋ bɛ̍ɛ̍ le̍.”
O̍ lē pīlɛ̍ ni᷄ŋ kpe̍, mi̍ nyūmnda̍ŋ mā tūāl mānde̍nɔ̄ɔ̍ ho̍ō o̍ hɔ̄l. Mbo̍ kāndū bālɔ̄ɔ̍ a̍ bāla̍ŋ kēēlīa̍a̍ le̍ wāna̍ sa̍ā ndu̍ bāa̍ mbo̍ si᷄m ndu̍ lāchī wo̍. 12Mɛ̄ɛ̍ wānā bɛ̍ndōo̍ chē nyɛ̍ yɔ̍nu̍ŋ ndo̍, mbo̍ lāāla᷄ŋ. Kāni̍ fo̍ndōle̍, kɔ̄ndɔ̄fi̍llo̍ wa̍ ndu̍ a̍ nyɛ̄ nda̍ pɛ̄ɛ̄kū ndu̍ a̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄ wo̍.
Ba̍a̍na̍bāā nda̍ Pɔ̍ɔ̍l ā dīmi̍ yōōŋgū kɛ̄ndɛ̍ Mɛ̄lɛ̄ka̍a̍ A̍ŋti̍ɔ̍ɔ̄ chi̍e̍e̍
13Mi̍ Pɔ̍ɔ̍l nda̍ chāāŋāā ndūa̍a̍, cha᷄ŋ Pa̍a̍fɔ̄ɔ̄ chi̍e̍e̍ o̍ dɛ̄ndɛ̄ bɛ̍ndōo̍ ni᷄ŋ. Ma̍ fūūlūū o̍ kɔ̄ŋgɔ̍ būŋgɛ̄ī Pa̍a̍fɔ̄ɔ̄līāāve̍. Ma̍ kūā Pa̍kā chi̍e̍e̍. Mi̍ Chɔ᷄ŋ Ma̍kī mɛ̍ī nda̍ lo̍ŋ. Mbo̍ mīīŋgū Chūlu̍sɛ̄lɛ̄m. 14Ma̍ cha᷄ŋ Pa̍kā. Ma̍ hūŋ A̍ŋti̍ɔ̍ɔ̄ o̍ būŋgɛ̄ī Pīsi̍dīāāve̍ ni᷄ŋ. Ma̍ lūɛ̄ī o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ, o̍ pāa̍le̍ pɛ̍ŋgīāālē Chu̍ūwa̍ chōo̍ ma̍ chāl. 15Mi̍ wānā pi᷅lɛ̍ tōmbōlā sāwāla̍ Mɛ̄lɛ̄ka̍ ke̍ Mūu̍sē le̍ Chu̍ūwa̍ la̍ŋ o̍ yāu̍wo̍ ni᷄ŋ a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ wo̍. Mɛ̄ɛ̍ o̍ chi̍i̍, mi̍ wānāā bɛ̄ndūa̍a̍ wa̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ bōlle̍ŋ nda̍, vīām wānā nāa̍ Pɔ̍ɔ̍l nda̍ Ba̍a̍na̍bāā chu̍a̍ a̍ yōōŋgōo̍. Ma̍ dīmī āā, “Chāāŋāā nāā Chu̍ūwa̍, tē lā nɔ̄ dīōmndā sīlāā le̍ wāŋnda̍ ha̍ā kpāāyāa̍ kīo̍o̍ pɛ̍, mɛ̄ɛ̍ lā chāā nda̍ dīmūl.” 16Mi̍ Pɔ̍ɔ̍l si᷅m. Mbo̍ hēēlū bāa̍ le̍ mī wāŋnda̍ ya᷄ŋ nīla̍ŋ. Mbo̍ kāndū sūɛ̍i̍. Mbo̍ dīmī āā,
“Chāa̍ŋāā nīāā I̍sɔ̄lūɛ̍i̍ya̍ a̍ nya̍ wānāa̍ cho̍ a̍ Chu̍ū le̍ wa̍, nya̍ pi̍ɛ̍ī Mɛ̄lɛ̄ka̍ wa̍, lā ya᷄ŋ ya̍ nīla̍ŋ. 17Mi̍ Mɛ̄lɛ̄ka̍ wāŋnda̍ I̍sɔ̄lūɛ̄ī nda̍ a̍a̍ pi̍ɛ̍ī yo̍, hɛ̄li̍ na̍a̍ Chu̍ūwa̍ fi̍nyāā nāā ma̍māa̍. Mbo̍ tōsā ma̍ kūīī ta̍u̍, te̍le̍ŋ nda̍ wa̍ mīālla̍ o̍ lɛ̄ŋndē I̍chi̍pīle̍ŋ ni᷄ŋ ndo̍. Mi̍ Mɛ̄lɛ̄ka̍ sōlī nda̍ o̍ lɛ̄ŋndē I̍chi̍pīle̍ŋ ni᷄ŋ a̍ kpāāya̍ ndɔ̄ bɛ̍ndōo̍. 18O̍ ko̍ŋ kɔ̍ɔ̍lī, mbo̍ hīāū lāchī a̍ nda̍ bīūnɔ᷄ŋndo̍ le̍ wɔ̄sīla̍ŋ be̍le̍-hi̍ɔ̍ɔ̍lu̍ o̍ po̍llo̍ ni᷄ŋ. 19Mbo̍ tɛ̄ɛ̄mbūū wāŋnda̍ kāa̍la̍ŋ lā ŋɔ᷄mmɛ̍ū o̍ lɛ̄ŋndē Ke̍nāŋnde̍ŋ ni᷄ŋ. Tɛ̄ɛ̄mbūūwo̍ kāa̍la̍ ŋɔ̍mmɛ̍ūlā lāŋ, mbo̍ kē wānāā ndūa̍a̍ lɛ̄ŋndē wāŋnda̍ ha̍ā nyɛ̄ ndā. 20Ō chu̍a̍ wɔ̄sīla̍ŋ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ŋu̍ɛ̍ɛ̍nu̍ le̍ he̍ī kpe̍de̍ yɔ̍nɔ᷄ŋndo̍.
“Mɛ̄ɛ̍ bōōnde̍i̍ he̍ī hīōū, mbo̍ hāndū māsāa̍ ma̍ wā nda̍ bōlle̍ŋ. Mbo̍ lō o̍ ko̍ŋ ha̍a̍a̍, mbo̍ fūūlūū a̍ te̍le̍ŋ wāna̍ su̍a̍ā le̍ Mɛ̄lɛ̄ka̍ wo̍ Sa̍a̍mi̍ɛ̍ɛ̄ o̍ kāndu̍ nda̍ wāa̍ bōlle̍ŋ ndo̍. 21O̍ ko̍ŋ, ma̍ dīmūl Sa̍a̍mi̍ɛ̍ɛ̄ māā ō chūe̍l nda̍ wānā le̍ mbō wa̍ nda̍ chōo̍ ma̍sā. Mi̍ Mɛ̄lɛ̄ka̍ hɛ̄lūl nda̍ Sɔ̍ɔ̄, po̍ Ki̍sī wo̍. O̍ pūlāle̍ Bɛ̍ŋnja̍mīŋnde̍ŋ chōo̍ ndu̍ o̍o̍ fu̍la̍ ni̍. O̍ ko̍ŋ kɔ̍ɔ̍lī, mi̍ Sɔ̍ɔ̄ wa᷅ nda̍ chōo̍ ma̍sā lē wɔ̄sīla̍ŋ be̍le̍-hi̍ɔ̍ɔ̍lu̍. 22Mɛ̄ɛ̍ Mɛ̄lɛ̄ka̍ fāŋa̍ Sɔ̍ɔ̄, mbo̍ hɛ̄lī Dēēve̍ le̍ wāa̍ māsā bɛ̍ndōo̍ nda̍ chōo̍. Mi̍ Mɛ̄lɛ̄ka̍ dīmī a̍ Dēēve̍ o̍kɔ̄ɔ̄ āā, ‘I̍ sa̍a̍lu̍ŋ māā Chɛ̄ɛ̍se̍, po̍ ndɔ̄ɔ̍ Dēēve̍, ndu̍ cho̍ wāna̍ ya̍ hi̍ni̍ kɔ̄l lo̍ ni̍. Ndu̍ cho̍ wāna̍ to̍sā ni̍ŋ nyɛ᷅ o̍ nyɛ̄ ya̍ I̍ hɛ̍na̍ŋ mbō tōsa̍ wo̍ ni̍.’ 23O̍ pūlāle̍ pōo̍ ho̍ō chōo̍ Mɛ̄lɛ̄ka̍ yɔ̄ŋgu̍ wānā pi̍ŋīa̍a̍ Chi̍i̍sū ni̍ le̍ wāŋnda̍ I̍sɔ̄lūɛ̄ī. Kāni̍, le̍nde̍ Mɛ̄lɛ̄ka̍ chu̍a̍ sīndɛ̄ būŋgɛ̄i̍ ni̍. 24Ndu̍yɛ̍, lɔ̍ɔ̍pa̍ Chi̍i̍sū ka̍ndū wa̍li̍ ndɔ̄ɔ̍, mi̍ Chɔ᷄ŋ Wānā Yi̍ŋāa̍ chɔ̄m wāŋnda̍ sūɛ̍i̍ Mɛ̄lɛ̄kɛ̍i̍ le̍ mī wāŋnda̍ I̍sɔ̄lūɛ̄ī kpe̍de̍ a̍ tu̍e̍ī. Mbo̍ dīmī māā ā ma᷄l yɔ᷅ŋndā ndāla̍ wɔ̍ɔ̍ŋnda̍ŋ mā yīŋ nda̍. 25Mɛ̄ɛ̍ Chɔ᷄ŋ wa̍ ni᷅ŋ le̍ wa̍li̍ o̍ hi᷅ŋ tōsā wo̍ chīīyo̍, mbo̍ dīmūl wāŋnda̍ āā, ‘Ō cho̍ ya̍ le̍ cho̍ wāna̍ nya̍ chō kɔ̄l lo̍ le̍. Wānā ko̍ŋ chō kɔ̄ɔ̄lī. I̍ cho̍ bɛ̍ɛ̍ o̍ sɔ᷅vɛ̍ le̍ mī na̍ŋgu̍ŋ mī ti̍mbi̍ yūēī ndūɛ̍i̍ lā kɔ̄ɔ̄vɛ̄i̍ye̍ le̍.’ ”
26Mi̍ Pɔ̍ɔ̍l hi̍a̍ū lāchī a̍ sūɛ̍i̍ āā, “Chāa̍ŋāā nīa̍a̍, nya̍ fu̍la̍ o̍ pūlāle̍ E̍bīlāha᷅mnde̍ŋ chōo̍ wa̍, a̍ nya̍ wānāa̍ cho̍ a̍ Chu̍ū le̍ wa̍, nya̍ cho̍ na̍nu᷄ŋ mī la̍ pīɛ̄ī Mɛ̄lɛ̄ka̍ wa̍, o̍ na̍a̍ nya̍ā lo̍ Mɛ̄lɛ̄ka̍ yɔ᷄ŋ yōōŋgōo̍ ho̍ō ni̍, yōōŋgōo̍ a̍ mɛ̄ɛ̍ Mɛ̄lɛ̄ka̍ ō pīŋī na̍a̍ yɛ̍. 27Wāŋnda̍ Chūlu̍sɛ̄lɛ̄m a̍ wānāā ndāā bɛ̍ndūa̍a̍ ā sīna̍ māā Chi̍i̍sū le̍ cho̍ wānā pi̍ŋīa̍a̍ le̍. Ndu̍yɛ̍, ā sīna̍ di̍ōmndā wānāa̍ su̍a̍ā le̍ Mɛ̄lɛ̄ka̍ wa̍ ā pōōnyi̍a̍a̍ la̍ŋ pɛ̄ŋgu̍ le̍. O̍ pāa̍le̍ o̍ pāa̍le̍ pɛ̍ŋgīāālē Chu̍ūwa̍ chōo̍ ā chō la̍ŋ tūēīyɔ̄ɔ̍, kɛ̍ ā sīna̍ la̍ŋ pɛ̄ŋgu̍ le̍. Ma̍ tōsā mi̍ wāŋnda̍ dīī Chi̍i̍sū. O̍ he̍ī ni᷄ŋ, ma̍ tōsā dīōmndā wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ la̍ŋ lā de᷄l lɛ᷅ŋ te̍. 28Ā sēēlu̍ŋ sa̍bū o̍ sa̍bū le̍ ndu̍ dīyɔ̄ɔ̄ le̍. Kɛ̍ o̍ he̍ī ni᷄ŋ kpo̍u̍, ma̍ dīmūl Māsāa̍ Pa̍i̍lē māā ā dīi̍ ndu̍. 29Mɛ̄ɛ̍ nda̍ chīi̍ nyɛ̄ o̍ nyɛ̄ tōsā a̍ ndu̍ mɛ̄ɛ̍ Yāu̍ Mɛ̄lɛ̄ka̍a̍ dīmi̍ a̍ ndu̍ o̍kɔ̄ɔ̄ yɛ̍, ma̍ tūsī ndu̍ o̍ yɔ̄m Sīŋgāfīlāa̍ chōo̍. Ma̍ wōū ndu̍ o̍ sɛ̄īyo̍ ni᷄ŋ. 30Kɛ̍ ndu̍yɛ̍, mi̍ Mɛ̄lɛ̄ka̍ mīŋgī ndu̍ yōōmū. 31Ndu̍yɛ̍ o̍ ko̍ŋ kɔ̍ɔ̍lī, mi̍ Chi̍i̍sū chɔ̄mnu᷄ŋ wa̍nāā nda̍ chɛ᷄ŋ nda̍ nda̍ā Kāli̍lī ma̍ kūā Chūlu̍sɛ̄lɛ̄m nda̍ le̍ pālɛ̍i̍ fa̍ŋgā. Wāŋnda̍ ha̍ā chō hāū wa᷅ŋnda̍ I̍sɔ̄lūɛ̄ī īsɔ̄ɔ̍ di̍mūl a̍ mɛ̄ɛ̍ nda̍ sīnā a̍ ndu̍ o̍kɔ̄ɔ̄ yɛ̍. 32-33Yōōŋgū kɛ̄ndɛ̄ kōŋ na̍a̍ ŋ̄ chūu̍ nya̍ ni̍. Yōōŋgū ko᷄ŋ cho̍ ho̍ō ni̍ māā nyɛ̄ Mɛ̄lɛ̄ka̍ chūe̍l fi̍nyāā nāā ma̍māa̍ būŋgɛ̄i̍ le̍ tōsāa̍ wo̍, ndu̍ o̍ to̍sa̍l ho̍ō na̍a̍ ŋ̍ cho̍ chūāūwāā ndāā ma̍māa̍ wa̍ ni̍. Mbo̍ pēēlū būŋgɛ̄ī he̍ī a̍ mīŋgī o̍ mi̍ŋgi̍ Chi̍i̍su̍ yōōmū wo̍. Le̍nde̍ i̍ cho̍ ī pōōnyīāā o̍ yāu̍ Sa᷅m ndo̍ ni᷄ŋ o̍ bōlīī ŋīi̍ŋnde̍ ni̍ māā,
nu᷄m cho̍ po̍ nūu̍ ni̍.
I̍ si̍mnu᷄ŋ ha̍ū fi̍nyā nūm.
34Ndu̍yɛ̍, nyɛ̄ Mɛ̄lɛ̄ka̍ dīmi̍ a̍ ndu̍ o̍kɔ̄ɔ̄ le̍ ndu̍ mīŋgīo̍o̍ yōōmū, ndu̍yɛ̍ ō vi᷅ lɛ̍ fɛ̍ɛ̍ŋ a̍ fɛ̍ɛ̍ŋ te̍ wo̍ ndu̍ cho̍ ho̍ō ni̍ māā,
I̍ cho̍ nu̍m sa̍lā dɔ̄wɔ̄ɔ̄ kpe̍e̍kpe̍i̍ o̍ nɛ̄i̍ ka̍a̍ma̍ā ni᷄ŋ
mɛ̄ɛ̍ ya̍ I̍ chu̍e̍l Dēēve̍ būŋgɛ̄i̍ yɛ̍.
35Mɛ̄ɛ̍ wānā po̍o̍nyīāā Ŋ̄chōndo̍o̍ dīmi̍ yɛ̍ māā,
a̍ me᷅l bu̍ɛ̍i̍ cho̍ le̍ nūm ndo̍ mbō vī mbō sɛ̄ le̍.
36Dēēve̍ ndu̍, mbo̍ to̍sā wa̍llo̍ mɛ̄ɛ̍ Mɛ̄lɛ̄ka̍ kɛ̄ɛ̄si̍a̍a̍ le̍ mbō tōsa̍ o̍ bōōndi̍i̍ o̍ wa̍ yōōmū ve̍ ni᷄ŋ yɛ̍. Mɛ̄ɛ̍ Dēēve̍ chi̍i̍, mbo̍ wū. Mā chɔ̄ ndu̍ mɛ̄ɛ̍ nda̍ chɔ̍ fi̍nyāā ndūāā ma̍māa̍ yɛ̍. Mi̍ dīāllūŋ ndɔ᷄ŋ ŋ̄ sīā. 37Kɛ̍, wāna̍ Mɛ̄lɛ̄ka̍ mīŋgi̍ ko̍ŋ yōōmū wo̍ ndu̍, ō vi̍ lɛ̍ le̍. Ndu̍yɛ̍, dīāllūŋ ndɔ᷄ŋ ŋ̄ se̍ le̍. 38-39Le̍la̍ŋ, chāāŋāā nīa̍a̍, I̍ hɛ̍na̍ŋ mī lā sīna̍ pɛ̄ŋgu̍ māā nyɛ̄ Chi̍i̍sū to̍sa̍ wo̍, ndu̍ to̍sa̍ ni̍ mi̍ ŋ̄ wā nya̍ yōōŋgōo̍ ho̍ō chɔ̄mndo̍ māā Mɛ̄lɛ̄ka̍ ma᷄l nya̍ le̍ yɔ̄ŋndā nyāla̍ wɔ̍ɔ̍ŋnda̍ŋ. Lā sīna̍ pɛ̍ŋgu̍ māā wānā o̍ wāna̍ la̍a̍la̍ŋ a̍ ndu̍ pɛ̍, ō bāŋa̍ ndu̍ o̍ yɔ̄ŋndā ndɔ̄la̍ wɔ̍ɔ̍ŋnda̍ŋ ni᷄ŋ kpo̍u̍. Kɛ̍, sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ lā nɔ̍lā mī lā bāŋa̍ wānā le̍. 40Le̍la̍ŋ, lā mānda̍ŋ yɔ̍ŋi̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ pōōnyi̍a̍a̍ wo̍ yɔ̄nu̍ŋ nya̍. Ma̍ pōōnyīāā māā,
41lā ya᷄ŋ ni᷅la̍ŋ, lā dɔ̄ɔ̄nu̍ŋ kɔ̄ndɔ̄fi̍li̍, mī lā vī, nya̍ ma᷅m nyɛ᷅ Mɛ̄lɛ̄ka̍ dīmi̍ wo̍ wa̍.
Kāni̍ fo̍ndōle̍, ya̍ Mɛ̍lɛ̄ka̍ I̍ cho̍ īsɔ̄ɔ̍ to̍sā o̍ pālɛ̍i̍ nyɛ̍i̍ ni᷄ŋ,
ā yɔ᷄ŋ bɛ̍ɛ̍ āā mā tɛ̍ɛ̍si̍a̍l nya̍ ndi̍
lā la̍a̍lāŋ ni̍ŋ ndi̍ le̍.”
42Mɛ̄ɛ̍ Pɔ̍ɔ̍l nda̍ Ba̍a̍na̍bāā a̍ wa̍ fūlāa̍ o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ, mī wāŋnda̍ dīmūl nda̍ māā ā hu᷄ŋ vɛ̍lɛ̄ o̍ pāa̍le̍ pɛ̍ŋgīāālē Chu̍ūwa̍ chōo̍, le̍ cho̍ kɔ̄ɔ̄lī le̍ŋ, mā chɔ̄ɔ̄lu̍ nda̍ chɔ̄m a̍ sɔ̄ɔ̍ŋ nda̍ wa̍ mu᷅ŋ dīmīo̍o̍ wo̍ŋ o̍kɔ̄ɔ̄. 43Mɛ̄ɛ̍ wāŋnda̍ fūla̍ o̍ bɔ̄ŋa᷅ŋndo̍ ni᷄ŋ, Chu̍ūwa̍ ā ka̍ ka̍, a̍ wānāa̍ cho̍ a̍ Chu̍ū le̍ wa̍ a̍ pi̍ɛ̍ī Mɛ̄lɛ̄ka̍ mɛ̄ɛ̍ Chu̍ūwa̍ ā pīɛ̄ī yɛ̍ wa̍, ma̍ tūāl nda̍ kɔ̄ɔ̄lī. Mɛ̄ɛ̍ nda̍ tōl nda̍ kɔ̄ɔ̄lī, mi̍ Pɔ̍ɔ̍l nda̍ Ba̍a̍na̍bāā a̍ su̍a̍ā nāa̍ nda̍ chūā. Ma̍ sīlā nda̍ māā ā hīo̍u̍ la̍chi̍ a̍ kɛ̄ndɛ̄i̍ Mɛ̄lɛ̄kɛ̍i̍ tīīnda᷄ŋndo̍.
44Mɛ̄ɛ̍ pāa̍le̍ pɛ̍ŋgīāālē Chu̍ūwa̍ lē pīlɛ̍ le̍ŋ lē fūūlu̍u̍, mi̍ wānāā fāŋgā fa̍ŋgā A̍ŋti̍ɔ̍ɔ̄ chi̍e̍e̍ lo̍ŋ a̍ hu᷅ŋ le̍ īsɔ̄ɔ̍ tu̍e̍i̍yɔ̄ɔ̍ a̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄. 45Mɛ̄ɛ̍ Chu̍ūwa̍ chē fāŋgā bɛ̍ndōo̍, ma̍ pīā a̍ yɛ̄lē tūlāāle̍ŋ le̍ Pɔ̍ɔ̍l nda̍ Ba̍a̍na̍bāā. Ma̍ dīmī māā chōōla̍ŋ Pɔ̍ɔ̍l cho̍ dīmīo̍o̍ ni̍. Ma̍ yīōū ndu̍. 46Kɛ̍ o̍ ko̍ŋ kɔ̍ɔ̍lī, mi̍ Pɔ̍ɔ̍l nda̍ Ba̍a̍na̍bāā a̍ chɔ̍ɔ̍lū hīōūwɔ̄ɔ̄ lāchī a̍ sūɛ̍i̍ kpe̍nde̍ke̍le̍. Ma̍ dīmī āā, “Na̍a̍ ŋ̍ nɔ̍ le̍ nya̍ dīo̍m Mɛ̄lɛ̄ka̍a̍ dīmūllo̍ fɛ̍lɛ̍ŋ mālāŋ na̍a̍ ŋ̍ di̍mūl wa̍nā o̍ wānā che᷅le̍ŋ. Kɛ̍, mi̍ lā kɛ̄ɛ̄. Ō he̍ī ni᷄ŋ, lā chɔ᷄m māā ō bɛ̄nda̍ mī lā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ le̍. Le̍la̍ŋ, ŋ̄ chō nya̍ mālɔ̄ɔ̄ mi̍ ŋ̄ kūɛ̄ o̍ wānāa̍ cho̍ a̍ Chu̍ū le̍ wa̍ lo̍. 47Kāni̍, nyɛ̄ Māsānɔ̄ɔ̍ Mɛ̄lɛ̄ka̍ vēm na̍a̍ le̍ tōsāa̍ wo̍, ndu̍ cho̍ ho̍ō ni̍. Mi̍ Māsānɔ̄ɔ̍ dīmī māā,
mɛ̄ɛ̍ nyɛ̄ wa̍wo̍ŋndo̍ dīāndū nu̍a̍ā o̍ nyūmnda̍ŋ ni᷄ŋ yɛ̍, le̍nde̍ ya̍ I̍ si̍i̍ŋgu̍u̍ nya̍ nyɛ̄ wa̍wo̍ŋndo̍ le̍ wānāa̍ cho̍ a̍ Chu̍ū le̍ wa̍ ni̍,
le̍ mī lā hīŋ a̍ pīōŋɔ̄ɔ̍ le̍ chi̍e̍ēŋndo̍ kpo̍u̍.”
48Mɛ̄ɛ̍ wānāa̍ cho̍ a̍ Chu̍ū le̍ wa̍ tūēī he̍ī, ma̍ nāŋ kɔ̄l. Ma̍ dīmī āā, “Yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ chō yōōŋgū kɔ̄ndɔ̄fi̍li̍.” Mi̍ wānāā Mɛ̄lɛ̄ka̍ hɛ̄li̍ le̍ mā sɔ̄la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍ wa̍ ā sīmnu᷄ŋ wa̍nāā lāāla᷄ŋ.
49Mi̍ dīo̍m Māsānɔ̄ɔ̍ Mɛ̄lɛ̄ka̍a̍ pɛ̄ŋgɛ̄la᷄ŋ. Mbo̍ tīū bā o̍ bā fe̍e̍ o̍ būŋgɛ̄ī kēŋ ni᷄ŋ. 50Kɛ̍ o̍ ko̍ŋ kɔ̍ɔ̍lī, mi̍ Chu̍ūwa̍ sūāā wānāā bɛ̄ndūa̍a̍ wa̍ lo̍ŋ nda̍, a̍ wāŋ lāāndūāā tɔ̍ɔ̍ wa̍ a̍ pi̍ɛ̍ī Mɛ̍lɛ̄ka̍ wa̍ o̍ lānī. O̍ ko̍ŋ, ma̍ kāndū Pɔ̍ɔ̍l nda̍ Ba̍a̍na̍bāā nyɛ̄ pālāa̍ tūsīo̍o̍ chōo̍. Ma̍ sōlī nda̍ o̍ būŋgɛ̄ī ndɛ̄i̍ ni᷄ŋ. 51Mi̍ Pɔ̍ɔ̍l nda̍ Ba̍a̍na̍bāā a̍ ku̍āŋ chu̍ndo̍o̍ nda̍ o̍ ŋ̄pēlū, le̍ chɔ̄mndo̍ māā wāŋnda̍ ha̍ā ā tōsa̍ su̍ɛ̍i̍ kɛ̍ndɛ̄ le̍. O̍ ko̍ŋ kɔ̍ɔ̍lī, ma̍ kūā Āko̍o̍nɔ̄m chi̍e̍e̍. 52Mi̍ ku̍ndā wānāā lāāla᷄ŋnda̍ pīā a̍ kɔ̄l kɛ̄ndɔ̄ɔ̍. Ndu̍yɛ̍, Nyi̍nā Kāsīo̍o̍ wa̍ nda̍ kɔ̄ɔ̄lī.
Currently Selected:
Wa̍lta̍ Wānāa̍ Chi̍i̍sūa̍a̍ 13: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
