Wa̍lta̍ Wānāa̍ Chi̍i̍sūa̍a̍ 23
23
1Mi̍ Pɔ̍ɔ̍l lo᷅ lo̍ŋ mbo̍ nūā lāŋgba̍ā kālāa̍ ki̍a̍lū ya᷅ma᷅ŋ nda̍ chi̍ŋ bɛ̍ndū. Mbo̍ dīmī āā, “Chāāŋāā nīa̍a̍, I̍ si̍nā māā īsɔ̄ɔ̍ o̍ īsɔ̄ɔ̍ wɔ̍ɔ̍ŋ ī cho̍ ya̍ o̍ kɔ̄l mī kīīsa̍ŋ a̍ ndi̍ Mɛ̄lɛ̄ka̍ o̍ hɔ̄l te̍, chɔ̍ŋ a̍ yōōmū nūu̍ kāndɔ᷄ŋndo̍ mbo̍ fūūlūū a̍ bōōnde̍i̍ he̍ī.” 2Mi̍ māsa̍ wānāā sōlīāā lāsa̍lāa̍ dīōla̍ŋ āā, Ānāna̍a̍yā, mbo̍ lō o̍ ko̍ŋ mbo̍ dīmūl wānāa̍ wa̍ īsīsi̍ a̍ Pɔ̍ɔ̍l kpɛ̍ɛ̍lūŋ nda̍ āā, “Lā lɔ̄ɔ̍ ndu̍ sōndō kōŋ.” 3Mi̍ Pɔ̍ɔ̍l di̍mūl ndu̍ āā, “Mɛ̄lɛ̄ka̍ chō nu̍m lɔ̄ɔ̄. Ā chō māchūāā māā chīyīī chīɛ̄īye̍ ī nda̍ sūu̍ pɔ̄u̍ hu̍mbōo̍ ve̍. Nu᷄m cho̍ īchāli̍ le̍ kɔ̍ɔ̍sɔ̍ɔ̍ a̍ ya̍ mɛ̄ɛ̍ sāwāa̍ dīmi̍ yɛ̍ wo̍, nu᷄m di̍mī ni̍ māā a̍ lɔ̄ɔ̍ ya̍? Sāwāa̍ le̍ nūm tɛ̍ɛ̍mbu̍u̍ ko̍ŋ te̍?”
4Mi̍ wānāa̍ wa̍ Pɔ̍ɔ̍l īkɛ̄i̍ ya̍ nyūnā Pɔ̍ɔ̍l, āā mɛ̄ɛ̍, “Mā ye̍i̍ māsa̍ wānāā sōlīāā lāsa̍lāa̍?”
5Mi̍ Pɔ̍ɔ̍l mu̍lī āā, “Chāāŋāā nīa̍a̍, I̍ si̍na̍ māā māsa̍ wānāā sōlīāā lāsa̍lāa̍ le̍ o̍ cho̍ le̍. Kāni̍ fo̍ndōle̍, sūɛ̍i̍ Mɛ̄lɛ̄kɛ̍i̍ dīmi̍ māā wānā di̍mī di̍ōmndā wɔ̄ɔ̍ŋ a̍ wānā bɛ̍ndu̍ cho̍ wānāā nūmnda̍ bōlle̍ŋ ndo̍ le̍.”
6Mɛ̄ɛ̍ Pɔ̍ɔ̍l si̍na̍ māā Sādūsi̍īya̍ a̍ Fālīsi̍īya̍ chō o̍ bɔ̄ŋa᷅ŋ kōŋ ni᷄ŋ, mbo̍ dīmī chōo̍ cho̍o̍ āā, “Chāāŋāā nīa̍a̍, o̍ ku̍ndā Fālīsi̍īya̍ chōo̍ ya̍ fu̍la̍ ni̍. Fālīsi̍īya̍ ve̍lū ya̍ ni̍. Le̍ mɛ̄ɛ̍ ya̍ cho̍ lē hɔ̄l o̍ nɛ̄ī māā wānāa̍ vi᷅ wa̍ ā chō vɛ̄lɛ̄ mīīŋgū yōōmū yɛ̍, le̍la̍ŋ, nda̍ chō kɔ̍ɔ̍sɔ̍ɔ̍ a̍ ya̍ ni̍.”
7Mɛ̄ɛ̍ o̍ di̍mi̍ dɔ̍ɔ̍ dīōmndo̍ ho̍ō, mi̍ Fālīsi̍īya̍ nda̍ Sādūsi̍īya̍ kāndū sɛ̄ɛ̄ŋgi̍āŋndo̍. Ma̍ pīɔ̄ūwa᷅ŋ tɛ̍ɛ̄ŋ. Ma̍ sīmnu᷄ŋ ku̍ndāla̍ŋ lā tīɔ̍ɔ̍ŋ. 8Kāni̍, Sādūsi̍īya̍ nda̍ dīmi̍ māā wānāa̍ wu᷅ wa̍ ā mi̍i̍ŋgū yo̍o̍mū le̍. Ma̍ dīmī vɛ̄lɛ̄ māā ki̍i̍la̍a̍ Mɛ̄lɛ̄ka̍ā cho̍ le̍. Ndu̍yɛ̍, ma̍ dīmī māā nyi̍nāā cho̍ le̍. Kɛ̍ ndu̍yɛ̍, Fālīsi̍īya̍ nda̍ lāāla̍ŋ a̍ sɔ̄ɔ̍ŋ ŋgāa̍ wo̍ŋ mu᷅ŋ kpo̍u̍. 9Mi̍ wo̍o̍lūŋ wo̍o̍lūŋ bɛ̄ndōo̍ kāndu᷄ŋ. Mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍ la̍ŋ nda̍ ā pūm, a̍ wa̍ o̍ ku̍ndā Fālīsi̍īya̍ chōo̍ wa̍ sīm ma̍ dīmī ō kālā ka̍lā āā, “Pōo̍ ho̍ō tōsa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍. Kɛ̄lɛ̄ŋgāā mbō wa̍ dɔ̍ɔ̍ Nyi̍na̍ Mɛ̄lɛ̄ka̍a̍ ɔ̄ɔ̄ ki̍i̍la̍nɔ̍ Mɛ̄lɛ̄ka̍a̍ so̍ō nāa̍ ndu̍ chu̍a̍ ni̍.”
10Mɛ̄ɛ̍ sɛ̄ɛ̄ŋgi̍āŋndo̍ chɔ̄ɔ̄lu̍ kūīī nda̍ tɛ̄ɛ̄ŋ, mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ dīmūl so̍vɛ̄i̍ya̍ māā ā to᷄l mā kɔ̍ so̍lī Pɔ̍ɔ̍l nda̍ tɛ̄ɛ̄ŋ. Kāni̍, ō wa̍ sīōōŋnde̍ yɔ̍ŋi̍ nda̍ yɔ᷄ŋ ndu̍ nyɛ̄. Mbo̍ dīmūl nda̍ māā a̍ lūe̍i̍ Pɔ̍ɔ̍l o̍ chīɛ̄ī kālā ka̍lāa̍ ni᷄ŋ.
11Nyūmmā māŋ mi̍ Māsānɔ̄ɔ̍ Mɛ̄lɛ̄ka̍ hūŋ nāa̍ Pɔ̍ɔ̍l chu̍a̍. Mbo̍ dīmūl ndu̍ āā, “Pɔ̍ɔ̍l, dīāllūŋ wu᷅ nu̍m te̍. Mɛ̄ɛ̍ ŋ̄ chɔ᷄m wāŋnda̍ a̍ ya̍ o̍kɔ̄ɔ̄ Chūlu̍sɛ̄lɛ̄m yɛ̍, le̍nde̍ ŋ̄ chō wāŋnda̍ dīmūl a̍ ya̍ o̍kɔ̄ɔ̄ Lu̍o̍m chi̍e̍e̍ ni̍.”
Chu̍ūwa̍ kɛ̄ɛ̄si̍a̍a̍ le̍ Pɔ̍ɔ̍l dīyɔ̄ɔ̍
12Mɛ̄ɛ̍ pāa̍le̍ŋ lē sɛ̄ dīi̍māndɔ̄ɔ̍, mi̍ Chu̍ūwa̍ chūūŋgi̍āŋ na̍a̍ pi᷅lɛ̍. Ma̍ kɛ̄ɛ̄sīāā le̍ Pɔ̍ɔ̍l dīyɔ̄ɔ̍. Ma̍ mēna᷄ŋ o̍ Mɛ̄lɛ̄ka̍ po̍. Ma̍ dīmī māā ā di᷅ nyɛ᷅ o̍ nyɛ̄ le̍, ndu̍yɛ̍, māā kōlɔ̄ɔ̍ bɛ̍ɛ̍ ā ko᷅l te̍, mɛ̄ɛ̍ mā dīī fɛ̍lɛ̍ŋ Pɔ̍ɔ̍l. 13Nda̍ kɛ̍ɛ̍si̍a̍a̍ sūɛ̍i̍ he̍ī ya̍ nda̍ a̍a̍ hi̍o̍ū ŋ̄wāŋ be̍le̍-hi̍ɔ̍ɔ̍lu̍. 14O̍ ko̍ŋ kɔ̍ɔ̍lī, ma̍ kūā nāa̍ wānāā bɛ̄ndūāā sōlīāā lāsa̍lāa̍, a̍ lāŋgba̍ā kālla̍ chūā. Ma̍ dīmūl nda̍ āā, “Na̍a̍ kpe̍de̍ ŋ̄ mēna̍ŋ o̍ Mɛ̄lɛ̄ka̍ po̍ māā ŋ̄ wo̍u̍nūŋ nyɛ᷅ o̍ nyɛ̄ o̍ sōndō le̍, mɛ̄ɛ̍ mī ŋ̄ dīī fɛ̍lɛ̍ŋ Pɔ̍ɔ̍l. 15Le̍la̍ŋ, nya̍ a̍ lāŋgba̍ā kālāa̍ ki̍a̍lū ya᷅ma᷅ŋ nda̍, lā yɔ᷄ŋ di̍ōmndo̍ nāa̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ chūā, mī lā nyɔ̄ɔ̄lu̍ ndu̍ mbō hīŋ a̍ Pɔ̍ɔ̍l nāa̍ nya̍ chūā. Mī lā dīmu̍l ndu̍ māā lā hɛ̄na̍ŋ mī lā chɔ̄ɔ̄lu̍ sūɛ̍i̍ he̍ī dīōmɔ̄ɔ̄, māā le̍ mī lā sīna̍ tōnya̍ cho̍ lēni᷄ŋ ndo̍. Te̍le̍ŋ pa̍ o̍ fu̍u̍lūū na̍nu᷄ŋ, ŋ̄ nɔ̄lā mī kēi̍ ndu̍ dīyɔ̄ɔ̄.”
16Kɛ̍ ndu̍yɛ̍, mi̍ Pɔ̍ɔ̍l po̍ yēma̍ ndɔ̄ɔ̍ tūɛ̄ī nyɛ̄ nda̍ kɛ̄ɛ̄si̍a̍a̍ wo̍. Mbo̍ kūā nāa̍ Pɔ̍ɔ̍l wa̍ o̍ chīɛ̄ī kālā ka̍lāa̍ ni᷄ŋ nda̍. Mbo̍ dīmūl ndu̍. 17Mi̍ Pɔ̍ɔ̍l lo᷅ lo̍ŋ mbo̍ di̍mūl wānāā bɛ̄ndūāā so̍vɛ̄i̍ya̍ ō pīlɔ̍ɔ̄ āā, “Kɔ̍ a̍ po̍ chu̍a̍ pīāāndōo̍ ho̍ō nāa̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ chūā. Ō nɔ̄ īsɔ̄ɔ̍ le̍ ndu̍ dīmūl.”
18Mi̍ so̍vɛ̄i̍nɔ̍ɔ̍ ho̍ō kūā nda̍ po̍ chu̍a̍ pīāāndōo̍ nāa̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ chūā. Mbo̍ dīmūl ndu̍ āā, “Po̍ cho̍ o̍ bīyɔ̄ɔ̍ ni᷄ŋ ndo̍, Pɔ̍ɔ̍l, ndu̍ ve̍e̍lu̍ ya̍ ni̍ mbo̍ dīmūl la̍ māā ya̍ I̍ hu̍ŋ a̍ po̍ chu̍a̍ pīāāndōo̍ ho̍ō nāa̍ nūm chu̍a̍ kāni̍, ō nɔ̄ īsɔ̄ɔ̍ le̍ nu̍m dīmūl.”
19Mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ sāā po̍ chu̍a̍ pīāāndōo̍ ho̍ō bāa̍, mbo̍ kɔ̍ si᷅m a̍ ndu̍ nda̍ ŋi̍ɔ̍ɔ̍ŋ. Mbo̍ nyūnā ndu̍ āā, “Ō yɛ̄ɛ̍nɛ̍ ŋ̄ nɔ̄ yɛ̄ le̍ ya̍ dīmūllo̍?”
20Mbo̍ dīmī āā, “Chu̍ūwa̍ kɛ̄ɛ̄si̍a̍a̍ le̍ nu̍m dīmūllo̍ si̍ɔ̍dīi̍ le̍ mā kūɛ̄ a̍ Pɔ̍ɔ̍l o̍ lāŋgba̍ā kālāa̍ ki̍a̍lū ya᷅ma̍ŋ nda̍ lo̍. Ā chō dīmī māā ā hɛ̄na̍ŋ mā chɔ̄ɔ̄lu̍ sūɛ̍i̍ he̍ī dīōmɔ̄ɔ̄ mā sīna̍ tōnya̍ cho̍ lēni᷄ŋ ndo̍. 21Kɛ̍, ya᷅ŋ nda̍ lānī le̍, kāni̍ wāŋnda̍ hīōū be̍le̍-hi̍ɔ̍ɔ̍lu̍, a̍ bɛ̍ɛ̍ndi̍a̍ŋ le̍ ndu̍ vīōŋnɔ᷄ŋndo̍ lāchī wa̍. Ā mēna̍ŋ o̍ Mɛ̄lɛ̄ka̍ po̍ māā ā di᷅ nyɛ᷅ o̍ nyɛ̄ le̍ ndu̍yɛ̍, māā kōlɔ̄ɔ̍ bɛ̍ɛ̍ ā ko᷅l te̍, mɛ̄ɛ̍ mā dīī ndu̍ fɛ̍lɛ̍ŋ. Ā chō ni᷅ŋ ā bɛ̄ɛ̄ndīa̍ŋ. Ndu̍yɛ̍, Chūmndo̍ ko̍ni̍ nda̍ chō ni̍ le̍ mɛ̄ɛ̍ ŋ̄ mūlūl nda̍ ni̍ŋ yɛ̍.”
22Mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ dīmūl ndu̍ āā, “Di̍mūl wānā o̍ wānā māā a̍ di̍mu̍l la̍ a̍ ndi̍ o̍kɔ̄ɔ̄ le̍.”
Ā kūɛ̄ a̍ Pɔ̍ɔ̍l Sīsāli̍a̍ā chi̍e̍e̍
23O̍ ko̍ŋ kɔ̍ɔ̍lī, mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ vēēlū wānāā bɛ̄ndūa̍a̍ cho̍ ndu̍ o̍ bā bɛ̄ŋgu̍ wa̍ ā ŋīɔ̍ɔ̍ŋ. Mbo̍ dīmūl nda̍ āā, “Lā bɛ̄ɛ̄ndi̍a̍a̍ so̍vɛ̄i̍ya̍ kɛ̄mɔ̄ɔ̍ lē dīi̍ŋ, a̍ wānāa̍ ku̍ā o̍ su̍a̍a̍ chōo̍ wa̍ be̍le̍-ŋɔ̍mmɛ̍ū, a̍ wānāa̍ chu̍ā a̍ ba̍lta̍ŋ nda̍ kɛ̄mɔ̄ɔ̍ lē dīi̍ŋ, le̍ kɔ̄la̍ŋ Sīsāli̍a̍ā. Lā wa̍ a̍ bɛ̍ɛ̍ndīa̍ŋ le̍ mālɔ̄ɔ̍ a̍ te̍le̍ŋ nyɛ̄m dīāŋ īchɔ̄llo̍ŋ ŋ̄ chūū di̍o̍ wo̍. 24Ndu̍yɛ̍, mī lā bɛ̄ɛ̄ndi̍a̍a̍ su̍a̍a̍ ā ti᷄ŋ le̍ mī Pɔ̍ɔ̍l ku̍ɛ̄ lēchōo̍. Ndu̍yɛ̍, mī lā kūɛ̄ a̍ ndu̍ o̍ Māsāa̍ Fi̍lɛ̍sī lo̍ o̍ cho̍ māsa̍ ībūŋgāa̍ le̍ lɛ̄ŋndē Chūdi̍a̍āle̍ŋ ndo̍. Ndu̍yɛ̍, nyɛ̄ o̍ nyɛ̄ yɔ̄nu᷄ŋ ndu̍ le̍.” 25O̍ ko̍ŋ kɔ̍ɔ̍lī, mi̍ wānā bɛ̍ndū cho̍ so̍vɛ̄i̍ya̍ bōlle̍ŋ ndo̍ po̍o̍nyīāā yāu̍wo̍ nāa̍ Māsāa̍ Fi̍lɛ̍sī chu̍a̍. Nyɛ̄ o̍ po̍o̍nyi̍a̍a̍ wo̍ cho̍ ho̍ō ni̍ āā,
26“Ya̍, Kīla̍dīɔ̄ɔ̄ Li̍i̍sīāā cho̍ yāu̍wo̍ ho̍ō pōōnyīa̍a̍ nāa̍ nūm Māsa̍ ībūŋgāa̍ Fi̍lɛ̍sī chu̍a̍ ni̍, nūm cho̍ lɛ̄ŋndē chūdi̍a̍āle̍ŋ bōlle̍ŋ ndo̍. I̍ yi̍l nu̍m, I̍ yi̍l nu̍m lāpi̍. 27Pōo̍ ho̍ō Chu̍ūwa̍ de᷄l chōo̍ ni̍. Nda̍ a̍a̍ hɛ̍na̍ŋ mī nda̍ a̍a̍ di̍ī ndu̍. Kɛ̍ mɛ̄ɛ̍ ya̍ sa̍a̍lu̍ŋ māā Lu̍o̍ma᷅ŋnɔ̄ɔ̍ o̍ cho̍ ni̍, mi̍ ku̍ā a̍ so̍vɛ̄i̍ya̍a̍ nīa̍a̍ mi̍ so̍lī ndu̍ nda̍ o̍ bā. 28Ya̍ i̍i̍ hɛ̍na̍ŋ mī nda̍ a̍a̍ chɔ̍m ya̍ nyɛ̄ o̍ to̍sa̍ wo̍. Le̍ he̍ī, mi̍ ku̍ā a̍ ndu̍ o̍ lāŋgba̍ā ndāā ka̍lāa̍ ki̍a̍lū ya᷅ma᷅ŋ nda̍ lo̍. 29Kɛ̍, mi̍ sa̍a̍lu᷄ŋ māā ō tōsa̍ i̍sɔ̍ɔ̍ o̍ īsɔ̄ɔ̍ to̍sā mbō sɔ̍la̍ pīɔ̄m, kɛ̄lɛ̄ŋgāā mī wānā dɔ̍ū ndu̍ bɛ̍ɛ̍ chīɛ̄ī ni̍ŋ le̍ ndi̍ le̍. Nyɛ̄ nda̍ chō ndu̍ kɔ̄ɔ̄lī le̍ ndu̍ wo̍ chɛ᷄ŋ tu̍m o̍ sāwā nda̍ māChu̍ūwo̍ chōo̍. 30O̍ ko̍ŋ kɔ̍ɔ̍lī, mi̍ wānā di̍mūl la̍ māā Chu̍ūwa̍ ā pūm ā kɛ̄ɛ̄si̍a̍a̍ le̍ ndu̍ dīyɔ̄ɔ̍. Le̍la̍ŋ ya̍ I̍ kɛ̍ɛ̍si̍a̍a̍ le̍ ndu̍ yɔ̄ŋndo̍ nāa̍ nūm chu̍a̍ ni̍. I̍ di̍mu̍l wānāa̍ cho̍ ndu̍ kɔ̄ɔ̄lī a̍ sūɛ̍i̍ ya̍ māā ā hu᷄ŋ nāa̍ nūm chu̍a̍, mā tōmbo̍la̍ īsɔ̄ɔ̍ o̍ īsɔ̄ɔ̍ cho̍ nda̍ o̍ kɔ̄l a̍ ndu̍ o̍kɔ̄ɔ̄.”
31Mi̍ so̍vɛ̄i̍ya̍ tōsā mɛ̄ɛ̍ nda̍ dīmu̍l nda̍ yɛ̍. Ma̍ chūā Pɔ̍ɔ̍l nyūmmā māŋ, ma̍ kūā a̍ ndu̍ līīlāa̍ ma̍ fūūlūū Āŋti̍i̍pa̍tīī chi̍e̍e̍ di̍. 32O̍ ko̍ŋ kɔ̍ɔ̍lī, mi̍ so̍vɛ̄i̍ya̍ a̍ wa̍ kɔ̄la̍ŋ a̍ ŋ̄pēlū wa̍ mīīŋgū dīi̍māndɔ̄ɔ̍ o̍ chīɛ̄ī kālā ka̍lāa̍. Mi̍ wānāa̍ wa̍ o̍ su̍a̍a̍ chōo̍ wa̍ hīāū lāchī a̍ kɔ̄la̍ŋ a̍ ndu̍. 33Ma̍ fūūlūū a̍ ndu̍ Sīsāli̍a̍ā. Mɛ̄ɛ̍ nda̍ fūūlu̍u̍, ma̍ yɔ̄ŋgū māsa̍ ībūŋgāa̍ le̍ lɛ̄ŋndē Chūdi̍a̍āle̍ŋ yāu̍wo̍ ho̍ō. Ma̍ chūā Pɔ̍ɔ̍l chɔ̍, ma̍ yɔ̄ŋgū ndu̍. 34Mi̍ Māsāa̍ Fi̍lɛ̍sī tōfā o̍ yāu̍wo̍ ni᷄ŋ. Mbo̍ lō lo̍ŋ mbo̍ nyūnā Pɔ̍ɔ̍l le̍ būŋgɛ̄ī o̍ fu̍la̍ ni᷄ŋ nde̍. Mɛ̄ɛ̍ Pɔ̍ɔ̍l di̍mu̍l ndu̍ māā o̍ būŋgɛ̄ī Sīli̍i̍sīāāve̍ ni᷄ŋ o̍ fu̍la̍ ni̍, 35mi̍ Fi̍lɛ̍sī di̍mī āā, “Mɛ̄ɛ̍, tē wānāa̍ cho̍ nu̍m kɔ̄ɔ̄lī a̍ sūɛ̍i̍ ya̍ ā hīŋ pɛ̍, I̍ bɔ̍ŋa̍ sūɛ̍i̍ nyɛ̍i̍.” Mbo̍ dīmūl so̍vɛ̄i̍ya̍ māā ā kɔ̍ a̍ Pɔ̍ɔ̍l o̍ chīɛ̄ī Hɛ̍lɔ̄ɔ̄ ta̍ŋgu̍l lo̍ mā wa̍ ndu̍ lēhɔ̄l lo̍ŋ.
Currently Selected:
Wa̍lta̍ Wānāa̍ Chi̍i̍sūa̍a̍ 23: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
