Wa̍lta̍ Wānāa̍ Chi̍i̍sūa̍a̍ 24
24
Sɔ̄ɔ̍ŋ Chu̍ūwa̍ chɔ᷄m a̍ Pɔ̍ɔ̍l o̍kɔ̄ɔ̄ wo̍ŋ
1Mɛ̄ɛ̍ pālɛ̍i̍ hīōū ī ŋūɛ̍ɛ̍nu̍, mi̍ māsa̍ wānāā sōlīāā lāsa̍lāa̍ dīōla̍ŋ āā, Ānāna̍a̍yā, mbo̍ kūā Sīsāli̍a̍ā lātūlu̍ a̍ lāŋgba̍ā kālla̍ ā ti᷄ŋ a̍ wānā pi᷅lɛ̍ dīōla̍ŋ āā Tɛ̍tu̍lɔ̄ɔ̄. Wāna̍ cha̍ā kɔ̍ɔ̍sɔ̍ɔ̍ o̍ sāwa̍ māLu̍o̍ma᷅ŋndo̍ ni᷄ŋ ndo̍ o̍ wa̍ ni̍. Mɛ̄ɛ̍ nda̍ fūūlu̍u̍, ma̍ sīm Māsāa̍ Fi̍lɛ̍sī o̍ hɔ̄l ma̍ chɔ̄m sɔ̄ɔ̍ŋ Pɔ̍ɔ̍l to̍sa̍ wo̍ŋ kpo̍lo̍to̍to̍. 2Mɛ̄ɛ̍ nda̍ vēēlu̍ Pɔ̍ɔ̍l, mbo̍ hūŋ. Mi̍ Tɛ̍tu̍lɔ̄ɔ̄ kāndū sɔ̄ɔ̍ŋ chɔ̄mndo̍ a̍ ndu̍ o̍kɔ̄ɔ̄. Nyɛ̄ o̍ so̍ō wo̍ cho̍ ho̍ō ni̍ āā,
“Māsā bɛ̍ndōo̍, ā chō māsa̍ kɔ̄l kālu̍ bɛ̍ndū. Le̍ he̍ī, ŋ̄ chō a̍ kɔ̄l nyūlū le̍ te̍le̍ŋnda̍ fa̍ŋgā. Ndu̍yɛ̍, tāāsi̍ ŋ̄ nɔ̄ wo̍ tōsa̍ mi̍ sɔ̄ɔ̍ŋ ka̍ ka̍ ŋ̍ mi̍i̍ŋgū sāndɔ̄ɔ̄ nyɛ̄ kɛ̄ndɛ̍ī o̍ lɛ̄ŋndē nāāle̍ŋ ni᷄ŋ. 3Le̍ he̍ī wāŋnda̍ bā o̍ bā fe̍e̍ o̍ lɛ̄ŋnde̍ŋ nde᷅ŋ ni᷄ŋ ā chō a̍ kɔ̄l kɛ̄ndɛ̄ te̍le̍ŋ o̍ te̍le̍ŋ. O̍ ko̍ŋ kɔ̍ɔ̍lī, ŋ̄ yi᷄l nu̍m ba̍li̍ka̍ ta̍u̍ ta̍u̍. 4I̍ hɛ̍na̍ŋ mī yɛ̍i̍ nu̍m īkɔ̄ɔ̄ le̍ māsāa̍. Le̍la̍ŋ, I̍ cho̍ nu̍m nyūnā a̍ yāndi̍i̍ mā ya̍ŋ nīla̍ŋ le̍ te̍le̍ŋ bi̍ŋgī o̍ nyɛ̄ na̍a̍ ŋ̄ cho̍ nu̍m dīmūl lo̍. 5Ŋ̄ sāālu̍ŋ māā pōo̍ ho̍ō chō wāna̍ lākpūndɛ̍. Ndu̍ ki̍lā sɔ̍ŋgɔ̄la̍ŋ Chu̍ūwa̍ tɛ̄ɛ̄ŋ o̍ chi̍e̍ēŋndo̍ chōo̍ kpe̍de̍ ni̍. Ndu̍yɛ̍, ku̍ndā nda̍ vēēlū āā, ku̍ndā Na̍a̍sa̍lūɛ̄ŋ ndo̍ wo̍, nda̍ cho̍ ndu̍ bōlle̍ŋ ni̍. 6O̍ ko̍ŋ kɔ̍ɔ̍lī, mbo̍ kīndī bɛ̍ɛ̍ le̍ mbō tɛ̄ɛ̄mbu̍u̍ chīɛ̍i̍ Mɛ̄lɛ̄ka̍. Mɛ̄ɛ̍ o̍ ko̍ŋ na̍a̍ ŋ̄ bīī ndu̍ ni̍. [Na̍a̍ ŋ̍ hɛ̍na̍ŋ le̍ kɔ̍ɔ̍sɔ̍ɔ̍ a̍ ndu̍ mɛ̄ɛ̍ sāwā na̍a̍ dīmi̍ yɛ̍. 7Kɛ̍, mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍, dīōla̍ŋ Li̍i̍sīāā, mbo̍ hu᷄ŋ de᷅l na̍a̍ chōo̍ a̍ wāŋta̍ndā. Mbo̍ pūū ndu̍ na̍a̍ o̍ bā. 8Mi̍ Li̍i̍sīāā ka̍lāa̍ di̍mī māā wānāa̍ cho̍ Pɔ̍ɔ̍l kɔ̄ɔ̄lī māā ō tōsa̍ sūɛ̍i̍ wɔ̍ɔ̍ŋ nda̍ ā hu᷄ŋ a̍ sūɛ̍i̍ ndɛ̍i̍ nāa̍ nūm chu̍a̍.] Ndu̍yɛ̍, tē a̍ nyu̍u̍ni̍a̍a̍ pōo̍ ho̍ō pɛ̍, nūm pi̍la̍ cho̍ tōnya̍a̍ sāālɔ᷄ŋ a̍ nyɛ̄ o̍ nyɛ̄ na̍a̍ ŋ̄ dīmi̍ a̍ ndu̍ o̍kɔ̄ɔ̄.” 9Chu̍ūwa̍ bɛ̍ɛ̍ ma̍ chɔ̄m nyɛ̄ Pɔ̍ɔ̍l to̍sa̍ wo̍. Ndu̍yɛ̍, ma̍ dīmī māā nyɛ̄ o̍ nyɛ̍ di̍mi̍ŋ a̍ Pɔ̍ɔ̍l o̍kɔ̄ɔ̄ māā ō chō tōnya̍.
Pɔ̍ɔ̍l kɔ̍ɔ̍sa̍ Fi̍lɛ̍sī o̍ hɔ̄l
10Mi̍ māsa̍ ībūŋgāa̍ ō hēēlūl Pɔ̍ɔ̍l bāa̍ le̍ mbō kāndu̍ ni̍ko̍ su̍ɛ̍i̍. Mi̍ Pɔ̍ɔ̍l di̍mī āā,
“Māsāa̍ Fi̍lɛ̍sī, I̍ si̍nā māā lē wɔ̄sīlā fāŋgā ā chō kɔ̍ɔ̍sɔ̍ɔ̍ a̍ wāŋnda̍ o̍ lɛ̄ŋnde̍ŋ nde᷅ŋ ni᷄ŋ. Le̍ he̍ī, I̍ cho̍ a̍ kɔ̄l kɛ̄ndɛ̄ mī kɔ̍ɔ̍sa̍ nu̍m o̍ hɔ̄l. 11Nūm pi̍la̍ ā nɔ̍lā mā chē tōnya̍ cho̍ lēni᷄ŋ ndo̍, māā chɔ̍ŋ a̍ bo̍o̍ndi̍i̍ ya̍ I̍ ku̍ɛ̄ Chūlu̍sɛ̄lɛ̄m le̍ Mɛ̄lɛ̄ka̍ pīɛ̄īyo̍ ve̍ mbo̍ fūūla᷅ŋ a̍ bōōnde̍i̍ he̍ī, ō chu̍a̍ ni᷅ŋ pālɛ̍i̍ tɔ̍ a̍ ī ŋīi̍ŋ ki̍nɛ̍i̍. 12O̍ ko̍ŋ kɔ̍ɔ̍lī, wāŋnda̍ ha̍ā ā kōmāl la̍ mī wa̍ lādīōm hīŋa᷅ŋ, a̍ wānā o̍ wānā o̍ chīɛ̍i̍ Mɛ̄lɛ̄ka̍a̍ ni᷄ŋ te̍. Ndu̍yɛ̍, ā chi̍ mī to̍sa̍ īsɔ̄ɔ̍ o̍ chīɛ̄īlā na̍a̍ ŋ̄ pīɛ̄ī Mɛ̍lɛ̄ka̍ la̍ŋ ni᷄ŋ kɛ̄lɛ̄ŋgāā o̍ fo̍ndāŋ o̍ fo̍ndāŋ chēle̍ŋ Chūlu̍sɛ̄lɛ̄m, I̍ to̍sā mī fāŋgāa̍ tūūlu̍ kɔ̄l te̍. 13Ndu̍yɛ̍, ā nɔ̍lā mā chɔ᷄m nu̍m māā nyɛ̄ nda̍ dīmi̍ a̍ ya̍ o̍kɔ̄ɔ̄ wo̍ chō tōnya̍ le̍. 14Ō ya̍ nɔ̍lā mī sɔ̍lɔ̍la̍ŋ nu̍m o̍ hɔ̄l lo̍ ndu̍ cho̍ ni̍ māā o̍ nɛ̄i̍ Chi̍i̍sū pɛ̍ɛ̍ku̍ wāŋnda̍ wo̍ chōo̍ ya̍ pi̍ɛ̍ī Mɛ̍lɛ̄ka̍ ō fi̍nyāā nāā ma̍māa̍ nda̍ a̍a̍ pi̍ɛ̍ī yo̍ ni̍. Kɛ̍ nda̍ dīmi̍ māā ō cho̍ nɛ̍i̍ tōnya̍ le̍ o̍ cho̍ le̍. O̍ ko̍ŋ kɔ̍ɔ̍lī, I̍ la̍a̍la̍ŋ a̍ nyɛ̄ o̍ nyɛ̍ cho̍ ō pōōnyīāā o̍ sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ ndo̍ ni᷄ŋ, ndo̍ a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ pōōnyi̍a̍a̍ wo̍. 15Wāŋnda̍ ha̍ā chō lēhɔ̄l o̍ nɛ̄ī māā wānā o̍ wāna̍ vi᷅, ā chō vɛ̄lɛ̄ mīīŋgū yōōmū, wānā kɛ̍ndɛ̄ ni̍, wānā wɔ̍ɔ̍ŋ ni̍. Le̍nde̍ ko̍ni̍ ya̍ cho̍ lēhɔ̄l o̍ nɛ̄ī māā wānāa̍ vi᷅ wa̍ ā chō mīīŋgū yōōmū ni̍. 16Ndu̍yɛ̍, I̍ cho̍ kīndīo̍o̍ le̍ lɔ̍ɔ̍ lɔ̍ɔ̍ māā īsɔ̄ɔ̍ o̍ īsɔ̄ɔ̍ wɔ̍ɔ̍ŋ ī wa᷅ ya̍ o̍ kɔ̄l na̍a̍ Mɛ̄lɛ̄ka̍ kɛ̄lɛ̄ŋgāā na̍a̍ wāna̍ chi̍e̍e̍ tɛ̍ɛ̄ŋ te̍.”
17Mi̍ Pɔ̍ɔ̍l hi̍a̍ū lāchī a̍ sūɛ̍i̍ āā, “Mālɔ̄ɔ̄ nūu̍ Chūlu̍sɛ̄lɛ̄m ō chō ni᷅ŋ hāū wɔ̍sīlā fāŋgā, mɛ̄ɛ̍ kɔ̄lā ya̍ ku̍ɛ̄ la᷅ŋ lo̍ŋ le̍ chāāŋāā nīāā Chu̍ūwa̍ nyɛ̄ sɔ̄lāa̍ yōūwo̍ le̍ wānāā tāmbɛ̍i̍ya̍ mālāa̍ la̍ŋ, a̍ le̍ sa̍lāa̍ sōlīo̍o̍ nāa̍ Mɛ̄lɛ̄ka̍ chu̍a̍ wo̍. 18Bōōndi̍i̍ ya̍ I̍ wa̍ sa̍lāa̍ ho̍ō sōlīo̍o̍ ve̍, o̍ ko̍ŋ nda̍ chē ya̍ o̍ chīɛ̍i̍ Mɛ̄lɛ̄ka̍a̍ ni᷄ŋ ni̍. Nyɛ̄ o̍ nyɛ̄ ya̍ i̍i̍ nɔ̍ le̍ tōsāa̍ le̍ dīndīo̍o̍ sɔ̄lāa̍ Mɛ̄lɛ̄ka̍ o̍ hɔ̄l ya̍ i̍i̍ chi̍i̍ ni᷅ŋ tōsā. Fāŋgā o̍ fāŋgā ve̍ ya̍ kɔ̄ɔ̄lī le̍. Ndu̍yɛ̍, sɔ̍ŋgɔ̄ o̍ sɔ̍ŋgɔ̄ yɔ̄nu̍ŋ te̍. 19Chu̍ūwa̍ ā pūm ā wa̍ lo̍ŋ, chɔ̄nɔ᷄ŋndo̍ o̍ būŋgɛ̄ī E̍e̍sīā ve̍ ni᷄ŋ. Wāŋnda̍ ha̍ā, nda̍ nɔ̍ ni̍ mā hu᷄ŋ to̍mbōlā nu̍m o̍ hɔ̄l mā chɔ̄m sūɛ̍i̍ wɔ̍ɔ̍ŋ ya̍ to̍sa̍ ve̍, tē ā sīna̍ dɔ̍ɔ̍ pɛ̍ māā I̍ to̍sa̍ sūɛ̍i̍ wɔ̍ɔ̍ŋ. 20Tē ko̍ŋ te̍, Chu̍ūwa̍ a̍ cho̍ ha̍ā na̍nu᷄ŋ nda̍, ā kɔ̄ɔ̄sa̍ ni᷅ŋ a̍ ya̍ la᷅ŋgba̍ā kālāa̍ ki̍a̍lū ya᷅ma᷅ŋ nda̍ o̍ hɔ̄l. Ā chɔ᷄m ndɔ̍ su̍ɛ̍i̍ wɔ̍ɔ̍ŋ bi̍ī tōnya̍ te̍le̍ŋ ko̍ŋ a̍ ya̍ o̍kɔ̄ɔ̄ ve̍. 21Mɛ̄ɛ̍ ni᷅ŋ dɔ̍ɔ̍ sūɛ̍i̍ ya̍ di̍mi̍ chōo̍ cho̍o̍ lɔ̍ɔ̍ nda̍ wa̍ kɔ̍ɔ̍sɔ̍ɔ̍ a̍ ya̍ wo̍. Mi̍ di̍mī, a̍a̍, ‘Le̍ mɛ̄ɛ̍ ya̍ cho̍ lēhɔ̄l o̍ nɛ̄ī māā wānāa̍ vi̍ wa̍ chō vɛ̄lɛ̄ mīīŋgū yōōmū yɛ̍, le̍la̍ŋ, nya̍ chō kɔ̍ɔ̍sɔ̍ɔ̍ a̍ ya̍ ha̍ū ni̍.’ ”
22Fi̍lɛ̍sī ndu̍ o̍o̍ si̍nā i̍sɔ̍ɔ̍ a̍ nɛ̄i̍ Chi̍i̍sū pɛ̍ɛ̍ku̍ wāŋnda̍ le̍ Mɛ̄lɛ̄ka̍ pīɛ̄īyo̍ lēchōo̍ wo̍. Mbo̍ dīmī āā, “Tē wānā bɛ̄ndū so̍vɛ̄i̍ya̍, Li̍i̍sīāā, o̍ hi᷅ŋ pɛ̍, I̍ ke̍lū sūɛ̍i̍ nyɛ̍i̍ īyāma̍.” O̍ ko̍ŋ kɔ̍ɔ̍lī, mbo̍ kīndā kɔ̍ɔ̍sɔ̍ɔ̍. 23Mi̍ Fi̍lɛ̍sī dīmūl so̍vɛ̄i̍nɔ̍ wa̍ Pɔ̍ɔ̍l mɛ̄ɛ̄nda᷄ŋndo̍ wo̍ māā ō wa̍ Pɔ̍ɔ̍l lēhɔ̄l. Kɛ̍ mbo̍ dīmūl so̍vɛ̄i̍nɔ̍ kōŋ māā ō ke̍ Pɔ̍ɔ̍l fo̍ndāŋndo̍ mbō wa̍ kēlāa̍. Ndu̍yɛ̍, māā mbō ke̍ Pɔ̍ɔ̍l chāāŋāā ndūa̍a̍ fo̍ndāa̍ le̍ mā māla̍ ndu̍ mɛ̄ɛ̍ kpɛ̍ nda̍ a̍a̍ nɔ̄ le̍ ndu̍ mālāa̍ yɛ̍.
Pɔ̍ɔ̍l so̍ō nāa̍ Fi̍lɛ̍sī nda̍ Dūsi̍lā chu̍a̍
24Mɛ̄ɛ̍ pālɛ̍i̍ ti᷄ŋ ī hīōū, mi̍ Fi̍lɛ̍sī hu᷅ŋ nda̍ la̍a̍ ndɔ̄ dīōla̍ŋ āā, Dūsi̍lā. Chu̍ūnɔ̄ɔ̍ chūa̍a̍ ho̍ō wa̍ ni̍. Mi̍ Fi̍lɛ̍sī vi̍ām wānā ma̍ vēēlū Pɔ̍ɔ̍l. Mɛ̄ɛ̍ Pɔ̍ɔ̍l hi᷅ŋ, ma̍ chāl ndu̍ nīla̍ŋ yāŋɔ̄ɔ̍ o̍ sūɛ̍i̍ o̍ wa̍ dīmīo̍o̍ a̍ lāāla᷄ŋndo̍ a̍ Chi̍i̍sū Ki̍li̍tī o̍kɔ̄ɔ̄ ve̍. 25Mi̍ Pɔ̍ɔ̍l hi̍a̍ū lāchī a̍ sūɛ̍i̍. Mbo̍ chɔ̄m a̍ mɛ̄ɛ̍ wānā wa᷅ wa̍nā kɛ̍ndɛ̄ Mɛ̄lɛ̄ka̍ o̍ hɔ̄l lɛ̍. O̍ ko̍ŋ kɔ̍ɔ̍lī, mbo̍ chɔ̄m a̍ mɛ̄ɛ̍ wānā nɔ̍lā kɔ᷅l nūmndo̍ yɛ̍. Mbo̍ sūāā vɛ̄lɛ̄ a̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ o̍kɔ̄ɔ̄. Mi̍ sīōōŋnde̍ bīī Fi̍lɛ̍sī a̍ sɔ̄ɔ̍ŋ Pɔ̍ɔ̍l di̍mi̍ mu᷅ŋ ndo̍ŋ. Mbo̍ dīmūl Pɔ̍ɔ̍l āā, “Kɔ̍ pɔ̍ɔ̍. Lɔ̍ɔ̍ ya̍ I̍ bɛ̍ɛ̍ndīāŋ pɛ̍, I̍ ve̍e̍lu̍ nu̍m.” 26Ndu̍ o̍o̍ wa̍ kɔ̄l māā Pɔ̍ɔ̍l cho̍ ndu̍ lūɛ̄īyɔ̄ɔ̄ ni᷄ŋ a̍ nyɛ̄ sɔ̄lāa̍. Le̍ he̍ī, le̍ te̍le̍ŋnda̍ fa̍ŋgā ō chō Pɔ̍ɔ̍l vēēlōo̍, mā dūāū ba̍lta̍ŋ nda̍ ndu̍.
27Mɛ̄ɛ̍ wɔ̄sīla̍ŋ lā hīōū lā tīɔ̍ɔ̍ŋ, ma̍ sīīŋgūū Pɔ̄kīɔ̄ɔ̄ Fɛ̍si̍tɔ̄ɔ̄ māsa̍ ībūŋgāa̍ o̍ fo̍nda᷄ŋ Fi̍lɛ̍sī wo̍. Mɛ̄ɛ̍ o̍ ko̍ŋ, mi̍ Fi̍lɛ̍sī mɛ̍ī Pɔ̍ɔ̍l o̍ bīyɔ̄ɔ̍ ni᷄ŋ kāni̍ fo̍ndōle̍, ndu̍ o̍o̍ hɛ̍na̍ŋ mī Chu̍ūwa̍ nda̍ a̍a̍ na̍ŋ kɔ̄l a̍ ndu̍.
Currently Selected:
Wa̍lta̍ Wānāa̍ Chi̍i̍sūa̍a̍ 24: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
