Wa̍lta̍ Wānāa̍ Chi̍i̍sūa̍a̍ 3
3
Pītɛ̍ nda̍ Chɔ᷄ŋ ā si̍ŋgi̍ po̍ bɛ̍vɛ̍i̍yo̍
1Pāa̍le̍ pi᷅lɛ̍, Pītɛ̍ nda̍ Chɔ᷄ŋ, ā wa̍ kɔ̄la̍ŋ o̍ chīɛ̍i̍ Mɛ̄lɛ̄ka̍a̍ a̍ pāa̍le̍ cha̍lāāle̍ŋ. Ndu̍yɛ̍, te̍le̍ŋ nda̍ a̍a̍ pi̍ɛ̍ī Mɛ̍lɛ̄ka̍ wo̍ wa̍ ho̍ō ni̍. Mɛ̄ɛ̍ nda̍ kūɛ̄, ma̍ kōma̍l po̍ bɛ̍vɛ̍i̍yo̍. 2Pōo̍ ho̍ō yɛ̍, chɔ̍ŋ a̍ vīōlɔ᷄ŋ ndɔ̄ɔ̍, ō wa̍ ō bɛ̄vɛ̍i̍yo̍. Lēpāa̍ o̍ lēpāa̍, wāŋnda̍ chūa̍a̍ pōo̍ ho̍ō mā kɛ̄si̍ ndu̍ o̍ chīɛ̍i̍ Mɛ̄lɛ̄ka̍a̍ sōndōo̍, le̍ wānāa̍ wa᷅ lu̍ɛ̍i̍yɔ̄ɔ̍ wa̍ nyɔ̄ɔ̍ŋ pīɛ̄īyo̍. Nda̍ a̍a̍ ve̍e̍lū fo̍ndāŋ nda̍ a̍a̍ kɛ̍sī ndu̍ ko̍ŋ ndo̍ āā, Dīō Kɛ̄ndɔ̄ɔ̍. 3Mɛ̄ɛ̍ po̍ bɛ̍vɛ̍i̍yo̍ ho̍ō chē Pītɛ̍ nda̍ Chɔ᷄ŋ lūɛ̄īyɔ̄ɔ̍, mbo̍ nyɔ̄ɔ̄lu̍ nda̍ le̍ mā ke̍ ndu̍ nyɛ̄ pɔ̄mbɔ̄. 4Ma̍ nūā ndu̍ chi̍kɛ̍ŋ. Mi̍ Pītɛ̍ lo᷅ o̍ ko̍ŋ mbo̍ di̍mūl ndu̍ āā, “To̍fa̍ na̍a̍.” 5Mbo̍ tōfa̍ nda̍. Ndu̍yɛ̍, ō wa̍ yīya᷄ŋndo̍ māā ā chō ndu̍ nyɛ̄ kē. 6Mi̍ Pītɛ̍ di̍mūl ndu̍ āā, “I̍ nɔ̍ i̍ka̍ni̍ o̍ īka̍ni̍ le̍. Kɛ̍ I̍ cho̍ nu̍m nyɛ̄ ya̍ nɔ̍ wo̍ kē, I̍ cho̍ dīōmndo̍ ho̍ō dīmī o̍ kpāāya̍ cho̍ o̍ dīōla̍ Chi̍i̍sū Ki̍li̍tīla̍ŋ ni᷄ŋ ndo̍, ho̍ō Na̍a̍sa̍lūɛ̄ī. Chɔ̍ŋ, mā kūɛ̄.” 7Dīmīo̍o̍ le̍nde̍, mbo̍ sāā ndu̍ bā kɛ̄ndɔ̄ɔ̍ mbo̍ sīmī ndu̍. O̍ lē pīlɛ̍ ni᷄ŋ kpe̍, mi̍ pēlūŋ ndɔ᷄ŋ a̍ bōōndo̍ŋ o̍ pēlo᷄ŋ ŋ̄ sɔ̄lā kpāāyāa̍. 8Mbo̍ cha᷄ŋ nya̍ mbo̍ sīm. Mbo̍ kāndū bālɔ᷄ŋndo̍. Mbo̍ lūɛ̄ī o̍ bɛ̍ɛ̄ chīɛ̍i̍ Mɛ̄lɛ̄ka̍a̍ nda̍ nda̍ā. Ō wa̍ bālɔ̄ɔ̍, a̍ hūūlōo̍, a̍ Mɛ̄lɛ̄ka̍ sāŋgālāa̍. 9Mɛ̄ɛ̍ wāŋnda̍ kpo̍u̍ a̍ che᷅ ndu̍ kɔ̄la̍ŋ a̍ Mɛ̄lɛ̄ka̍ sāŋgālāa̍, 10ma̍ lōōnu᷄ŋ ndu̍ māā po̍ ndu̍ o̍o̍ nɔ̍ pāāndū cha᷄lle̍ pīɛ̄īle̍ŋ o̍ chīɛ̍i̍ Mɛ̄lɛ̄ka̍a̍ sōndōo̍ wo̍ ni̍, ō nda̍ a̍a̍ ve̍e̍lū āā, Dīō Kɛ̄ndɔ̄ɔ̍ wo̍. Mi̍ kɔ̄ndɔ̄fi̍llo̍ bīī nda̍. Ma̍ hāndu᷄ŋ ba᷅la̍ŋ o̍ sōndō a̍ nyɛ̍ yɔ̍nu̍ŋ ndu̍ wo̍.
Pītɛ̍ so̍ō nāa̍ wāŋnda̍ chūā o̍ chīɛ̍i̍ Mɛ̄lɛ̄ka̍a̍ ni᷄ŋ
11Bōōndi̍i̍ po̍ lēpīɛ̄ī yo̍ ho̍ō ō wa̍ Pītɛ̍ nda̍ Chɔ᷄ŋ ō bāāla᷄ŋ nde̍, mi̍ kɔ̄ndɔ̄fi̍llo̍ bīī wāŋndā kpe̍de̍. Ma̍ hūŋ a̍ kīlta̍ŋ nda̍ lāchī o̍ tōŋgo̍ chīɛ̍i̍ Mɛ̄lɛ̄ka̍a̍, ō wāŋnda̍ nda̍ a̍a̍ ve̍e̍lū āā, Tōŋgo̍ Sɔ̍lɔ̍mɔ̄ŋndo̍ wo̍. 12Mɛ̄ɛ̍ Pītɛ̍ che᷅ nda̍, mbo̍ dīmūl nda̍ āā, “Chāāŋāā nīāā Chu̍ūwa̍, vɛ᷅ mi̍ he̍ī ī bīī nya̍ kɔ̄ndɔ̄fi̍li̍? Vɛ᷅ mi̍ lā wā na̍a̍ tōfāa̍ nu̍a̍ā chi̍kɛ̍ŋ? Lā yīya̍ŋ ma̍yi̍ya᷄ŋ māā kpāāya̍ na̍a̍ pi̍la̍a̍ to̍sa̍ ni̍, kɛ̄lɛ̄ŋgāā chōo̍ na̍a̍ ŋ̄ chō wānāā kɛ̄ndɛ̄ Mɛ̄lɛ̄ka̍ o̍ hɔ̄l ni̍, māā le̍la̍ŋ pōo̍ ho̍ō kūɛ̄ o̍ pēlūŋ ndɔ̄ɔ̍ŋ chōo̍ ni̍? 13Mɛ̄lɛ̄ka̍ E̍bīlāha᷅m, a̍ Āa̍se̍, a̍ Che̍kɔ̍pū nda̍ a̍a̍ pi̍ɛ̍ī yo̍, ndu̍ cho̍ yɛ̄ Mɛ̄lɛ̄ka̍ fi̍nyāā nāā ma̍māa̍ ni̍, ō ke̍ bu̍ɛ̍ī ndɔ̄ɔ̍ Chi̍i̍su̍ nāŋɔ̄ɔ̄ ndɔ̄ɔ̍. Chi̍i̍sū ko̍ŋ ndu̍ nya̍ yɔ̄ŋgu̍ le̍ mā dīī ndu̍ ni̍. Mɛ̄ɛ̍ Pa̍i̍lē di̍mi̍ le̍ ndu̍ mālɔ̄ɔ̍, mi̍ lā kɛ̄ɛ̄ ndu̍ Pa̍i̍lē o̍ hɔ̄l. 14Mi̍ lā kɛ̄ɛ̄ wānā sa̍kpōo̍, o̍ di̍i̍ku̍ŋ ho̍ō Mɛ̄lɛ̄ka̍ ndu̍ pīlɛ̍ kpe̍ wo̍. Mi̍ lā dīmūl Pa̍i̍lē māā ō me᷄l nya̍ wānā di̍u̍wāa̍. 15Lā dīī wāna̍ ke᷅ wa᷅ŋnda̍ yōōmū kpe̍e̍kpe̍i̍yo̍ wo̍. Kɛ̍ ndu̍yɛ̍, mi̍ Mɛ̄lɛ̄ka̍ mīŋgī ndu̍ yōōmū. Na̍a̍ ŋ̄ chē he̍ī o̍ yɔ̄nɔ᷄ŋndo̍. 16Kpāāya̍ cho̍ o̍ dīōla̍ Chi̍i̍sūla̍ŋ ni᷄ŋ ndo̍, ndu̍ ke̍ po̍ nya̍ chō ho̍ō chɔ̄ɔ̍, ndu̍yɛ̍ mi̍ lā sīnā wa̍la̍ŋ ndo̍ dīāllūŋ kāla᷄ŋ ni̍. Dīōla̍ Chi̍i̍sūla̍ŋ a̍ lāāla᷄ŋ cho̍ chɔ̄nɔ᷄ŋndo̍ o̍ Chi̍i̍sū ni̍ŋ ndo̍, ndu̍ si̍ŋgi̍ pōo̍ ho̍ō che̍che̍ŋ ni̍. Nya̍ pi̍la̍ lā chō ni᷅ŋ chɔ̄ɔ̍.
17“Le̍la̍ŋ chāa̍ŋāā nīa̍a̍, I̍ si̍nā māā nya̍ ni̍, a̍ wānāā nyāā ba̍nāa̍, lā sīna̍ kpe̍e̍kpe̍i̍ sa̍bu̍ cho̍ o̍ nyɛ̄ nya̍ tōsa̍ ho̍ō wo̍ ni᷄ŋ ndo̍ le̍. 18Mi̍ Mɛ̄lɛ̄ka̍ dīmī sīndɛ̄ sa̍na̍a̍ a̍ wānāa̍ su̍a̍ā le̍ Mɛ̄lɛ̄ka̍ kpe̍de̍, māā mɛ̄ɛ̍ mī Ki̍li̍tī wāna̍ o̍ chu̍a̍ bu̍ŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ bīī mɔ̍nɛ̍i̍. Nyɛ̄ nda̍ dīmi̍ ko̍ŋ ndo̍ ndu̍ yɔ̍nu̍ŋ ho̍ō ni̍. 19Le̍la̍ŋ, lā ma᷄l yɔ᷅ŋndā nyāla̍ wɔ̍ɔ̍ŋnda̍ŋ, mī lā mūli̍ŋ nāa̍ Mɛ̄lɛ̄ka̍ chūā, le̍ mī Mɛ̄lɛ̄ka̍ fāŋa̍ yɔ̄ŋndā nyāla̍ wɔ̍ɔ̍ŋnda̍ŋ nya̍ kɔ̄ɔ̄lī, 20o̍ ko̍ŋ kɔ̍ɔ̍lī, mbō ke̍ nya̍ bōōndu̍ŋ pɛ̍ŋgīa̍ŋ o̍ nyi̍nāā nyāa̍ ni᷄ŋ, mbō yɔ᷄ŋ vɛ̄lɛ̄ Ki̍li̍tī wāna̍ Mɛ̄lɛ̄ka̍ chūe̍l nya̍ pāāndū būŋgɛ̄i̍ yo̍. 21Ō chō wā ɛ̄chɛ̍nɛ̄ ha̍a̍a̍ mī bōōndi̍i̍ Mɛ̄lɛ̄ka̍ mīŋgī ni̍ŋ nyɛ᷅ o̍ nyɛ̄ tōōsīāā ō sɛ̄nɛ̄īye̍ ī fūūlu̍u̍. Le̍nde̍ o̍ di̍mi̍ sīndɛ̄ o̍ wānāā ndūa̍a̍ su̍a̍ā le̍ ndu̍ wa̍ ni᷄ŋ ni̍. 22Kāni̍ fo̍ndōle̍, mi̍ Mūu̍sē di̍mī āā, ‘Māsānɔ̄ɔ̍ Mɛ̄lɛ̄ka̍ nyāa̍ chō wāna̍ su̍a̍ā le̍ Mɛ̄lɛ̄ka̍ wo̍ yɔ̄ŋ, mɛ̄ɛ̍ o̍ ve᷅m ya̍ yɛ̍. Ndu̍yɛ̍ nya̍ pi̍la̍ tɛ̄ɛ̄ŋ o̍ cho̍ fūlā ni̍. Lā tōsa̍ nyɛ᷅ o̍ nyɛ̄ o̍ cho̍ nya̍ dīmūl. 23Wānā o̍ wāna̍ to̍sa̍ nyɛ᷅ o̍ di̍mī wo̍ le̍, wānā ko̍ŋ chō sōlīo̍o̍ sɔ̄lā wānāa̍ Mɛ̄lɛ̄ka̍a̍ tɛ̄ɛ̄ŋ, mbō sɔ̄la̍ pīɔ̍mndo̍.’ ” 24Mi̍ Pītɛ̍ di̍mī āā, “Wāna̍ su̍a̍ā le̍ Mɛ̄lɛ̄ka̍ wo̍ Sa̍a̍mi̍ɛ̍ɛ̄, a̍ wānāa̍ su̍a̍ā le̍ Mɛ̄lɛ̄ka̍ wa̍ a̍ hi᷅ŋ ndu̍ kɔ̄ɔ̄lī wa̍, ā Mɛ̄lɛ̄ka̍ tōsa̍ ma̍ dīmī sɔ̄ɔ̍ŋ wa̍ā lāchī wa̍ kpo̍u̍, ā yōnda̍ a̍ pālɛ̍i̍ he̍ī o̍kɔ̄ɔ̄. 25Le̍ nya̍ Mɛ̄lɛ̄ka̍ chu̍a̍ sīndɛ̄ būŋga᷄ŋ ni̍, būŋgāŋ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ a̍ mu̍ŋ o̍kɔ̄ɔ̄ wo̍ŋ. Ndu̍yɛ̍, le̍ nya̍ Mɛ̄lɛ̄ka̍ yīi̍ sīndɛ̄ kpe̍ma̍a̍ lātūlu̍ a̍ fi̍nyāā nyāā ma̍māa̍ ni̍. Mi̍ Mɛ̄lɛ̄ka̍ dīmūl E̍bīlāha᷅m āā, ‘O̍ chūāūwāā nūm a̍ ma̍māa̍ ni᷄ŋ ya̍ I̍ cho̍ wāŋnda̍ kpo̍u̍ o̍ chi̍e̍ēŋndo̍ chōo̍ sa̍lā dɔ̄wɔ̄ɔ̄ ni̍.’ ” 26Mi̍ Pītɛ̍ di̍mī āā, “Le̍la̍ŋ nāa̍ nya̍ chūā fɛ̍lɛ̍ŋ o̍ yɔ̍ŋ bu̍ɛ̍ī ndɔ̍ o̍ hɛ̄li̍ wo̍ le̍ nya̍ sa̍lāa̍ dɔ̄wɔ̄ɔ̍. Sa̍lā kōŋ ndu̍ cho̍ ho̍ō ni̍, māā mbō tōsa̍ nya̍ pi̍lɛ̍ŋ pi̍lɛ̍ŋnda̍ fa̍ū mī lā ma᷄l yɔ̄ŋndā nyāla̍ wɔ̍ɔ̍ŋnda̍ŋ.”
Currently Selected:
Wa̍lta̍ Wānāa̍ Chi̍i̍sūa̍a̍ 3: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
