Wa̍lta̍ Wānāa̍ Chi̍i̍sūa̍a̍ 4
4
Ā kūɛ̄ a̍ Pītɛ̍ nda̍ Chɔ᷄ŋ o̍ wa̍nāā bɛ̄ndūa̍a̍ lo̍
1Pītɛ̍ nda̍ Chɔ᷄ŋ ā lo̍ sūɛ̍i̍ nāa̍ wāŋnda̍ chūā, mi̍ wānāā sōlīāā lāsa̍lāa̍, a̍ bōllē wānāa̍ ma̍ndā chīɛ̍i̍ Mɛ̄lɛ̄ka̍a̍ wo̍, a̍ ku̍ndā Sādūsi̍īya̍, ma̍ hūŋ nāa̍ nda̍ chūā. 2Kāni̍ fo̍ndōle̍, sūɛ̍i̍ wa̍ nda̍ nɛ̄īyo̍ le̍ mɛ̄ɛ̍ wānāā Chi̍i̍sū ve᷅m hɔ̄ltē ndɔ̄ wa̍, ā wa̍ wāŋnda̍ pɛ̄ɛ̄kōo̍ māā Chi̍i̍sū mi̍i̍ŋgu̍ yōōmū yɛ̍. Ndu̍yɛ̍ nyɛ̍ yɔ̍nu̍ŋ ko̍ŋ Chi̍i̍su̍ wo̍ ndu̍ chɔ̍m ni̍ māā wānāā vīlɛ̍i̍ya̍ ā chō mīīŋgū yōōmū. 3O̍ ko̍ŋ kɔ̍ɔ̍lī, ma̍ bīī nda̍. Ma̍ dūāū nda̍ o̍ chīɛ̄ī mānyūmndo̍ ni᷄ŋ le̍ mī pāa̍le̍ŋ lē sɛ̄, kāni̍ fo̍ndōle̍, pāa̍le̍ŋ le̍ le̍e̍ de̍l ni᷅ŋ. 4Kɛ̍, mi̍ wānāā ka̍ ka̍ a̍ tu̍e̍ī nyɛ̄ Pītɛ̍ nda̍ Chɔ᷄ŋ a̍ di̍mi̍ wo̍, ma̍ lāāla᷄ŋ. Pāa̍le̍ le̍ŋ, mi̍ pūa̍a̍ ā pīā wāa̍la̍ŋ lā ŋūɛ̍ɛ̍nu̍ a̍ wa̍ o̍ ku̍ndā wānāā lāāla᷄ŋnda̍ chōo̍ wa̍.
5Dīi̍māndɔ̄ɔ̍, mi̍ Chu̍ūwa̍ wānāā ndāā bɛ̍ndūa̍a̍, a̍ lāŋgba̍ā ndāā ka᷅lla̍, a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā chūūŋgi̍āŋ Chūlu̍sɛ̄lɛ̄m chi̍e̍e̍. 6Māsa̍ wānāā sōlīāā lāsa̍lāa̍ dīōla̍ŋ āā, A̍na̍sī, ō wa̍ lo̍ŋ, a̍ Ka̍ya̍fāā, a̍ Chɔ᷄ŋ, a̍ Ālɛ̄kīsa̍ndā, a̍ A̍na̍sī wānāā ndūa̍a̍, ā wa̍ lo̍ŋ. 7Ma̍ hūŋ a̍ Pītɛ̍ nda̍ Chɔ᷄ŋ nāa̍ nda̍ chūā. O̍ ko̍ŋ kɔ̍ɔ̍lī, ma̍ nyūnā nda̍ āā, “Vɛ̄ɛ̍nɛ̍ nya̍ lōōku̍ yɛ̄ po̍ bɛ̍vɛ̍i̍yo̍ ho̍ō sīŋgī? Nɛ̄ɛ̍nɛ̍ ke̍ yɛ̄ nya̍ kpāāyā ko̍ŋ, kɛ̄lɛ̄ŋgāā a̍ dīōla̍ nɛ̄ɛ̍nɛ̍ nya̍ tōsa̍ yɛ̄ ndi̍?”
8O̍ ko̍ŋ, mi̍ Nyi̍nā Kāsīo̍o̍ tūāl Pītɛ̍ kɔ̄ɔ̄lī o̍ lē pīlɛ̍ ni᷄ŋ kpe̍. Mbo̍ dīmūl nda̍ āā, “Nya̍ cho̍ Chu̍ūwa̍ bōlle̍ŋ nda̍, a̍ lāŋgba̍ā kālāa̍, 9lā nyūna̍ na̍a̍ hāū le̍ mī ŋ̄ chɔ᷄m nya̍ īsɔ̄ɔ̍ a̍ mɛ̄ɛ̍ na̍a̍ ŋ̄ lōōku̍ po̍ bɛ̍vɛ̍i̍yo̍ ho̍ō mālā yɛ̍. Ndu̍yɛ̍, mi̍ lā nyūnā mɛ̄ɛ̍ o̍ lo̍o̍ku̍ sīōŋgɔ̄ɔ̍ sɔ̄la̍ yɛ̍. 10Nya̍ fa̍ū a̍ wānā o̍ wāna̍ cho̍ I̍sɔ̍lūɛ̄ī, lā sīna̍ pɛ̍ŋgu̍ māā Chi̍i̍su̍ Ki̍li̍tī o̍ fu̍la̍ ho̍ō Na̍a̍sa̍lūɛ̄ī yo̍, o̍ kpāāya̍ cho̍ o̍ dīōla̍ ndɔ̄la̍ŋ ni᷄ŋ ndo̍ po̍ si̍m ho̍ō wo̍ ō sēŋgū che̍che̍ŋ ni̍. Chi̍i̍sū ko̍ŋ ndu̍ nya̍ dīī o̍ yɔ̄m sīŋgāfīlāa̍ chōo̍ ni̍. Kɛ̍ ndu̍yɛ̍, mi̍ Mɛ̄lɛ̄ka̍ mīŋgī ndu̍ yōōmū. 11A̍ Chi̍i̍sū o̍kɔ̄ɔ̄ Yāu̍ Mɛ̄lɛ̄ka̍a̍ dīmi̍ ni̍ māā,
pōū nya̍ wānāā tāŋgūlāa̍ kɛ̄ɛ̍ māā ō ni᷄ŋ te̍ wo̍
ndu̍ si̍mnu᷄ŋ ni᷅ŋ po̍ū kpe̍e̍kpe̍i̍ sa̍a̍ tāŋgūllo̍ wo̍ ni̍.”
12Mi̍ Pītɛ̍ hi̍a̍ū lāchī a̍ dīmīo̍o̍ āā, “Ndu̍ pīlɛ̍ kpe̍ nɔ̍lā mbō pīŋi̍ nya̍ ni̍. Kāni̍ fo̍ndōle̍, Mɛ̄lɛ̄ka̍ yɔ̄ŋgu̍ wa᷅ŋndā chīe̍e̍ya̍ dīōlā wānā che᷅le̍ŋ o̍ chi̍e̍ēŋndo̍ chōo̍ kpo̍u̍ le̍ mī ŋ̄ sɔ̄la̍ pīōŋɔ̄ɔ̍ o̍ ndu̍ ni̍ŋ te̍, mɛ̄ɛ̍ Chi̍i̍sū.”
13Mɛ̄ɛ̍ wānāa̍ cha̍l o̍ sūɛ̍i̍ he̍ī chōo̍ wa̍ chē mɛ̄ɛ̍ Pītɛ̍ nda̍ Chɔ᷄ŋ a̍ so̍ō kpe̍nde̍ke̍le̍, sīōōŋīī ve̍ nda̍ le̍ yɛ̍, mi̍ kɔ̄ndɔ̄fi̍llo̍ bīī nda̍ ta̍u̍. Kāni̍ fo̍ndōle̍, ā sīna̍ māā ā ve̍ wa̍nāa̍ pɛ̄lnu᷄ŋ la̍di̍o̍ le̍. Ndu̍yɛ̍, ā ve̍ wa̍nāā sīnāā yāu̍ le̍. Kɛ̄ ndu̍yɛ̍, ma̍ sīnā māā Pītɛ̍ nda̍ Chɔ᷄ŋ nda̍ a̍a̍ wa̍ hɔ̄lāā tūlu̍ nda̍ Chi̍i̍sū wa̍ā. 14Kɛ̍ nda̍ a̍a̍ nɔ̍ nyɛ᷅ o̍ nyɛ̄ dīmīāā le̍. Kāni̍ fo̍ndōle̍, po̍ sɔ̍la̍ sīōŋgɔ̄ɔ̍ wo̍ ō wa̍ īsīsi̍ Pītɛ̍ a̍ Chɔ᷄ŋ i̍kɛ̍i̍. 15Le̍la̍ŋ, ma̍ sōlī nda̍ o̍ bɛ̍ɛ̄. Sōlīo̍o̍ nda̍, ma̍ kāndū sūɛ̍i̍ he̍ī kɛ̄ɛ̄sīa̍a̍ nda̍ pi̍la̍ tɛ̍ɛ̄ŋ. 16Ma̍ nyūūni̍āŋ āā, “Ō yɛ̄ɛ̍nɛ̍ na̍a̍ ŋ̄ tōsa̍ yɛ̍ a̍ pūa̍a̍ ha̍ā? Wāŋnda̍ kpe̍de̍ Chūlu̍sɛ̄lɛ̄m chi̍e̍e̍ na̍nu᷄ŋ ā sīnā māā pūa̍a̍ ha̍ā ā tōsa̍ kɔ̄ndɔ̄fi̍li̍ bɛ̄ndū. Ŋ̄ nɔ̍lā mī ŋ̄ sɛ̄ɛ̄ŋgi̍a̍a̍ nyɛ̍ yɔ̍nu̍ŋndo̍ le̍. 17Kɛ̍ ndu̍yɛ̍, ŋ̄ sīla᷅ŋ nda̍ māā ā di̍mūl lɛ̄ wānā o̍ wānā i̍sɔ̍ɔ̍ a̍ dīōla̍ Chi̍i̍sūla̍ŋ o̍kɔ̄ɔ̄ le̍. Yɔ̍ŋi̍ wāŋnda̍ kpo̍u̍ a̍ tu̍e̍i̍ a̍ ndi̍ o̍kɔ̄ɔ̄.”
18Mɛ̄ɛ̍ nda̍ vēēlu̍ nda̍, ma̍ dōū nda̍ sāwāa̍ āā, “Lā su̍a̍ā lɛ̄ nāa̍ wānā o̍ wānā chu̍a̍ a̍ Chi̍i̍sū o̍kɔ̄ɔ̄ le̍, kɛ̄lɛ̄ŋgāā ni᷅ŋ te̍, mī lā pɛ̄ɛ̄ku̍ wānā a̍ ndu̍ o̍kɔ̄ɔ̄.” 19Mi̍ Pītɛ̍ nda̍ Chɔ᷄ŋ a̍ mu̍lī nda̍ di̍o̍m āā, “Ɔ̍ɔ̄ nyɛ̍ wa᷅ o̍ kɛ̍ndɛ̄ Mɛ̄lɛ̄ka̍ o̍ hɔ̄l lo̍? Hɛ̄na᷄ŋ nyāa̍ tōsāa̍, bāā hɛ̄na᷄ŋ Mɛ̄lɛ̄ka̍a̍ tōsāa̍? Nya̍ pi̍la̍ lā kīōlu̍ ya᷅mɛ̍i̍. 20Kāni̍ fo̍ndōle̍, nyɛ̍ yɔ̍nu̍ŋ mi̍ ŋ̄ chā, ndu̍yɛ̍, mi̍ ŋ̄ tūɛ̄ī yo̍, ŋ̄ nɔ̍lā mī ŋ̄ pɛ̄ŋgi̍ sūɛ̍i̍ a̍ ndu̍ o̍kɔ̄ɔ̄ le̍.” 21Mɛ̄ɛ̍ nda̍ chɔ̄ɔ̄lu̍ nda̍ kɔ̄ŋgɔ̍la̍ŋ, ma̍ māl nda̍. Kāni̍ fo̍ndōle̍, nɛ̄ī o̍ nɛ̄ī ve̍ mɛ̄ɛ̍ nda̍ a̍a̍ lo̍o̍ku̍ nda̍ nyɛ̄ yɔ̍ŋ te̍. Kāni̍ fo̍ndōle̍, wāŋnda̍ wa̍ Mɛ̄lɛ̄ka̍ sāŋgālāa̍ le̍ nyɛ̍ yɔ̍nu̍ŋndo̍. 22Po̍ sɔ̄la̍ sīōŋgɔ̄ɔ̄ kɔ̄ndɔ̄fi̍llo̍ ho̍ō wo̍ ndu̍ o̍o̍ hi̍o̍ū ni᷅ŋ wɔ̄sīla̍ŋ be̍le̍-hi̍ɔ̍ɔ̍lu̍.
Wānāā lāāla᷄ŋnda̍ pīɛ̍i̍ Mɛ̄lɛ̄ka̍
23Mɛ̄ɛ̍ nda̍ ma᷄l nda̍ dɔ̍ɔ̍, mi̍ Pītɛ̍ nda̍ Chɔ᷄ŋ ā mīīŋgū nāa̍ chāāŋāā ndāa̍ chūā. Ma̍ kɔ̍ dōōnu᷄ŋ nda̍ ko̍na̍ a̍ nyɛ̄ wānāā bɛ̄ndūāā sōlīāā lāsa̍lāa̍, a̍ lāŋgba̍ā kālla̍ ā dīmu̍l nda̍ wo̍. 24Mɛ̄ɛ̍ chāāŋāā ndāa̍ tūēī nyɛ̍ yɔ̍nu̍ŋ ndo̍, ma̍ kāndū Mɛ̄lɛ̄ka̍ pīɛ̄īyo̍ dīōm pīlɛ̍ nda̍ kpe̍de̍. Ma̍ dīmī āā, “Māsānɔ̄ɔ̍ Mɛ̄lɛ̄ka̍, nu᷄m to̍o̍si̍a̍a̍ ha̍la̍a̍, a̍ chi̍e̍ēŋndo̍, a̍ pēē mɛ̄ŋmā īhɛ᷄llo̍ ni̍. Ndu̍yɛ̍, nyɛ̄ o̍ nyɛ̍ cho̍ o̍ nyɔ̄ɔ̍ŋ mu᷅ŋ ni᷄ŋ, nu᷄m to̍o̍si̍a̍a̍ ni̍. 25Mi̍ Nyi̍nā nu᷄m Kāsīo̍o̍ dūāū dīōmndā nūmnda̍ŋ bu̍ɛ̍ī nūmndo̍ Dēēve̍, fi̍nyā nāā ma̍mā o̍ sōndō. Mbo̍ dīmī māā,
vɛ᷅ mi̍ kāa̍la̍ che᷅le̍ŋnda̍ŋ lā tūūlū hɔ̄lla̍ nu̍a̍ā?
Ā yīi̍ de̍fo̍o̍ le̍ Māsānɔ̄ɔ̍, kɛ̍ ā nɔ̍lā ndu̍ le̍.
26Wānāā bɛ̄ndūa̍a̍ o̍ chi̍e̍ēŋndo̍ chōo̍ ā bɛ̄ɛ̄ndi̍a̍a̍ nda̍ pi̍la̍ le̍ Māsānɔ̄ɔ̍ Mɛ̄lɛ̄ka̍.
Mi̍ wānāa̍ cho̍ wāŋnda̍ bōlle̍ wa̍ chūūŋgi̍āŋ
le̍ sɔ̍ŋgɔ̄ɔ̍ a̍ Māsānɔ̄ɔ̍ Mɛ̄lɛ̄ka̍ nda̍ Ki̍li̍tī, wāna̍ o̍ chu̍a̍ būŋgɛ̄i̍ māā ō chō vīōmɔ̄ɔ̄ wo̍.”
27Ma̍ hīāū lāchī a̍ pīɛ̄īle̍ŋ āā, “Lē kɛ̍ndɛ̍ī, mi̍ Hɛ̍lɔ̄ɔ̄, nda̍ Pɔ̍ŋti̍ɔ̍ɔ̍ Pa̍i̍lē, nda̍ wānāa̍ cho̍ a̍ Chu̍ū le̍ wa̍ a̍ wāŋnda̍ I̍sɔ̄lūɛ̄ī ma̍ chūūŋgi̍āŋ chi̍e̍e̍ na̍nu᷄ŋ le̍ Chi̍i̍sū, bu̍ɛ̍i̍ nu᷄m ŋ̄ hɛ̄li̍ wo̍ de̍fo̍o̍ yīīyo̍. 28Nyɛ̄ ŋ̄ kɛ̄ɛ̄si̍a̍a̍ sīndɛ̄ māā ō yɔ̄nu̍ŋ ndo̍ ndu̍ kpe̍e̍kpe̍i̍ nda̍ chūūŋgi̍āŋ ho̍ō ma̍ tōsā ni̍. A̍ kɛ̍ɛ̍si̍a̍a̍ nyɛ̄ ndu̍ o̍o̍ nɔ̍ le̍ yɔ̄nɔ᷄ŋndo̍ wo̍. Kāni̍ fo̍ndōle̍, nūm ā nɔ̄ kpāāyā ko̍ŋ. Ndu̍yɛ̍, le̍nde̍ nūm o̍o̍ hɛ̍na̍ŋ māā ī yɔ̄nu̍ŋ ni̍. 29Le̍la̍ŋ, Māsānɔ̄ɔ̍ Mɛ̄lɛ̄ka̍, ya̍ŋ ni᷅la̍ŋ o̍ kɔ̄ŋgɔ̄līa̍ŋnda̍ nda̍ chō na̍a̍ la̍ŋ. To̍sa̍ mī bu̍ɛ̍i̍yāā nūmnda̍ dīmi̍ sūɛ̍i̍ nu̍mnde̍ kpe̍nde̍ke̍le̍ sīōōŋīī bɛ̍ɛ̍ ī ve᷅ nda̍ le̍. 30To̍sa̍ mī wāŋnda̍ sɔ̄la̍ sīōŋgɔ̄ɔ̍, ndu̍yɛ̍ mā to̍sa̍ mī ŋ̄ tōsa̍ ka̍a̍ma̍āla̍ŋ a̍ kɔ̄ndɔ̄fi̍lta̍ŋ a̍ dīōla̍ bu̍ɛ̍ī nūmndo̍ Chi̍i̍sū la̍ŋ.”
31Mɛ̄ɛ̍ nda̍ chīi̍ Mɛ̄lɛ̄ka̍ pīɛ̄ī, mi̍ fo̍ndāŋ nda̍ wa̍ īchāli̍ wo̍ nyīīyā. Mi̍ Nyi̍na̍ Kāsi̍ Mɛ̄lɛ̄ka̍a̍ tūāl nda̍ kɔ̄ɔ̄lī, mɛ̄ɛ̍ nda̍ chō fa̍ū. Ma̍ kāndū sūɛ̍i̍ Mɛ̄lɛ̄kɛ̍i̍ dīmīo̍o̍ kpe̍nde̍ke̍le̍, sīōōŋīī ve̍ nda̍ le̍.
Wānāā lāāla᷄ŋnda̍ pīɔ̄ūvi̍āŋ nyɛ᷅m nda̍ nɔ̄ wo̍ŋ
32Wānāā lāāla᷄ŋnda̍ kpo̍u̍, kɔ̄ltā ndāla̍ŋ a̍ yīya᷄ŋnda̍ ndāla̍ŋ lā wa̍ nāa̍ pi᷅lɛ̍. Ma̍ hīāū lāchī a̍ nyɛ̄ o̍ nyɛ̄ nda̍ nɔ̄ pīɔ̄ūvi̍āŋndo̍. Wānā o̍ wānā di̍mi̍ nu̍a̍ā māā nyɛ̄ o̍ nyɛ̄ o̍ nɔ̍ ō chō le̍ ndu̍ pīlɛ̍ le̍. 33Mi̍ wānāā Chi̍i̍sū ve᷅m hɔ̄ltē ndɔ̄ wa̍, hīāū lāchī a̍ wāŋnda̍ dīmūllo̍ ō kālā ka̍lā, māā Māsānɔ̄ɔ̍ Chi̍i̍sū mi̍i̍ŋgu̍ yōōmū. Mi̍ Mɛ̄lɛ̄ka̍ dūāū nda̍ sa̍lā ndɔ̄ bɛ̍ndōo̍ chōo̍ nda̍ kpo̍u̍. 34Wānā o̍ wānā ve̍ nda̍ tɛ̄ɛ̄ŋ mī fɛ̍li̍ nyɛ̄ o̍ nyɛ̄ wa̍ ndu̍ le̍. Wānāā nda̍ a̍a̍ nɔ̍ chīɛ̄īla̍ŋ kɛ̄lɛ̄ŋgāā kpe̍le̍la̍ŋ nda̍ tɛ̄ɛ̄ŋ nda̍, pīīsūūwo̍. 35Ā pīsi̍ pɛ̍, ā hīŋ a̍ ka̍ni̍ŋ mu̍ŋ nāa̍ wānāā Chi̍i̍sū ve᷅m hɔ̄ltē ndɔ̄ wa̍ chūā, ā pīɔ̍u̍ mu̍ŋ. Mɛ̄ɛ̍ wāŋndo̍ ndu̍ o̍o̍ nɔ᷅ ba̍ hāvɛ̍i̍yo̍ yɛ̍, le̍nde̍ ndu̍ o̍o̍ sɔ̄lā ni̍.
36Wānā pi᷅lɛ̍ wa̍ nda̍ tɛ̄ɛ̄ŋ dīōlā ndɔ̄la̍ŋ āā, Chōo̍sɛ̍. O̍ pūlāle̍ Li̍va̍īle̍ŋ chōo̍ ndu̍ o̍o̍ fu̍la̍ ni̍, chɔ̄nɔ᷄ŋndo̍ o̍ lɛ̄ŋndē Sa̍i̍pūlɔ̄ɔ̄le̍ŋ ni᷄ŋ. Wānāā Chi̍i̍sū ve᷅m hɔ̄ltē ndɔ̄ wa̍ nda̍ a̍a̍ ve̍e̍lū ndu̍ vɛ̄lɛ̄ āā, Ba̍a̍na̍bāā. Ko̍ŋ cho̍ māchūāā ni̍ wāna̍ dɛ̍ɛ̍nīāā wa̍nā kɔ᷅llo̍ wo̍. 37Mbo̍ pīsī kpe̍le̍ ndɔ̄ɔ̍. Mbo̍ hūŋ a̍ ka̍ni̍ŋ mu᷅ŋ nāa̍ wānāā Chi̍i̍sū ve᷅m hɔ̄ltē ndɔ̄ wa̍ chūā.
Currently Selected:
Wa̍lta̍ Wānāa̍ Chi̍i̍sūa̍a̍ 4: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
