ÉXODO 10
10
Langostas junt'aykun
1Ujtawan Señorqa Moisesman nerqa: Ujtawan rispa nimuy faraonman; imaraykuchus noqa paypa sonqonta rumiyachini, jinallataj kamachisnimpa sonqosnintapis. Ajinamanta jatuchaj t'ukuna imasta paykuna ukhupi ruwanaypaj atiyniyta rikuchispa. 2Chayta qan willanaykipaj wawasniykiman, allchhisniykiman ima, noqa egipcio runa ukhuspi, jatuchaj t'ukunasta ruwasqasniyta ima; ajinapi yachankichej noqamin Señorqa kasqayta.
3Chaymantaqa Moiseswan Aaronwan rispa faraonman willamorqanku: Ajinata nimusunki Señorqa, hebreospa Diosnin: Mayk'ajkamataj mana sonqoykita ñaupaqeypi llamp'uyachinkichu? Saqellayña israelitasniy llojsinankuta noqata yupaychanawankupaj. 4Manapuni saqenki llojsejta chayqa, q'ayapacha langostasta kachamusaj llajtaykiman. 5Urphurimuspataj q'osñi jina jallp'ata tapaykonqanku, mikhonqankutaj imaschus qhepakorqa granizoj t'unasqasninmanta chaykunata. Jinallataj mikhonqanku campo sach'asta. 6Chaymantaqa junt'aykamusonqanku wasisniykiman, kamachisniykej wasisninman, tukuy egipciospa wasisninman ima. Manapuni chay jinata rikorqankuchu tatasniyki, ni abuelosniykipis mayk'ajmantachus karqanku chaymanta kaykama. Jinata niytawan Moisesqa, kutirispa chay ratopacha faraompa palacionmanta llojsiporqa. 7Faraonmantaj kamachisnin qayllaykuspa nerqanku: Mayk'ajkamataj kay runaqa tukuy imaymanasta jasut'ichiwasunri? Saqey llojsejta chay runasta, rispa yupaychamuchunku Señor Diosninkuta. Manachu yachanki Egiptoqa kay jina q'ala jasut'isqaña kasqanta?
8Faraonqa Moisesta Aarontawan ujtawan wajyachimuspa nerqa: Riychej Señor Diosniykichejta yupaychaj. Ñaupajtaqa willawaychej pikunachus rinankuta.
9Moisestaj kuticherqa: Noqaykoqa llojsipunayku tiyan tukuy wawasniykuwan, machu runasniykuwan, qhari wawasniykuwan, warmi wawasniykuwan, ovejasniykuwan, wakasniykuwan ima; imaraykuchus noqaykupajqa may jatun p'unchay, chaypi ruwanayku tiyan uj fiestata Señorniykuman.
10Faraontaj paykunaman nerqa: Ajá, qankunawanchu kanqa Señorqa? Qankunaj yuyayniykichejqa sut'illa kashan, imatachá ruwayta yuyashankichej. Imaynatataj noqa saqellasqaykichej tukuy wawasnintin llojsinaykichejtari? 11Chayrayku mana jinachu kanqa. Qankuna qharislla riychej Señorta yupaychaj, anchatapuni chayta ruwayta munasqaykichejrayku. Jinata niytawan Moisesta Aarontawan ñaupaqenmanta qharqorqa.
12Chaymanta Señorqa Moisesman nerqa: Makiykita oqhariy Egipto jallp'anejman, langostas, jamuspa, granizoj puchuchisqanta tukuy ima kajta tukuchinankupaj.
13Moisestaj tojnunta oqharerqa Egipto jallp'anejman. Señortaj inti llojsimuynejmanta wayrachimorqa uj p'unchayta, uj tutatawan Egiptonejman. Sut'iyamuypajtaj chay wayraqa langostasta rikhurichimorqa. 14Langostasqa Egipto jallp'a patapi manchayta urphurispa tukuynejman junt'aykorqa ima qhoraschá kaj chhikata mikhoj. Chay jinapuni langostasqa mana jayk'ajpis karqachu, nitaj jayk'ajpis kanqachu. 15Langostasqa urphurispa Egipto jallp'asta laqhaykorqa; mikhorqankutaj ima qhoraschá kaj chhikata, sach'aspa poqoyninta, imaschá granizoj puchuchisqan chayta. Chay jinamanta tukuynin Egiptopi ni ima q'omer puchorqachu, ni sach'a laqhes, nitaj qhoraspis, t'ojrapachalla karqa.
16Chaymanta faraonqa usqhay usqhayta Moisesta Aarontawan wajyachimuspa nerqa: Noqa juchallini Señor Diosniykichejpa contranta, qankunaj contraykichejtawan. 17Chayrayku kunanqa mañakuykichej juchasniyta perdonanawaykichejta kunan kutillaña. Kunanqa qankuna mañaychej ari Señor Diosniykichejmanta, kay wañuchej jasut'iyllatapis qhechunampaj.
18Moisestaj faraompa palacionmanta llojsiytawan Señormanta mañarqa. 19Señortaj uray wayrata wayrachimorqa, chaytaj langostasta aparparerqa puka mar qochaman. Jinamanta langostasqa ni ujpis qhepakorqankuchu Egipto jallp'api. 20Señortaj ujtawan faraompa sonqonta rumiyacherqa, jinamanta faraonqa manallataj israelitasta kacharerqachu ripunankupaj.
Laqhayaykuy jamun
21Chaymanta Señorqa ujtawan Moisesman nillarqataj: Makiykita oqhariy tukuy Egipto jallp'a patata laqhaykunampaj tukuypis laqhayayta llujchirinampaj jina.
22Moisestaj chayta nejtinkama makinta pataman oqharerqa, laqhayaytaj manchayta laqhayaykorqa tukuynin Egipto jallp'ata kinsa día junt'ata. 23Jinamanta ni pipis rikorqachu, nitaj rikunakorqankuchu, manataj pipis kuyurerqachu maypichus kasharqa chaymanta kinsa día junt'ata. Israelitas kasharqanku chaypeqa mana jinachu karqa, k'anchayqa kallarqapuni wasisninkupi.
24Faraonqa apurata Moisesta wajyachimuspa nerqa: Rispa Señorta yupaychamuychej, wawasniykichejtawan pusariykukuspa. Ovejasniykichejta, wakasnillaykichejtawan ama apaychejchu.
25Moisestaj kuticherqa: Qan kikiyki qonawayku tiyan uywasta rikuchikuta jaywaspa Señor Diosniykuman ruphachimunaykupaj. 26Tukuy uywasniykupis noqaykuwan renqa, ni ima uywallaykupis qhepakonqachu; noqaykoqa chay uywasmanta orqhonayku tiyan Señor Diosniykuta yupaychanaykupaj; manataj yachaykuchu imawanchus Señorta yupaychayta, maymanchus rishayku chayman chayanaykukama.
27Señorqa ujtawan faraompa sonqonta rumiyacherqa, israelitasta ama llojsejta saqenampaj. 28Chantapis faraonqa Moisesman nerqa: Riy kaymanta, kunanmantaqa allinta qhawakunki uyayta ujtawan rikunawaykimanta. Ima diallapis ujtawan kutimuwanki noqawan parlayta munaspa kayman chayqa, wañunki.
29Moisestaj kuticherqa: Allinta chaytaqa ninki, manaña ujtawan uyaykita rikusqaykichu kayman kutimuspa.
Currently Selected:
ÉXODO 10: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
