ÉXODO 11
11
Kuraj wawas wañunanmanta willakun
1Señorqa ujtawan Moisesman nillarqataj: Uj jasut'iytawan faraonman, Egipto runasmanwan apamusaj. Chaymantaraj qankunata kaymanta rejta saqesonqachej. Cheqamanta tukuyniykichejta kaymanta qharqosonqachej, pay kikin usqhay usqhayta wijch'usonqachej. 2Kunantaj niy israelitasman, qharisman warmisman; sapa uj qayllankupi kaj egipciosmanta mañanankuta, imaschá qolqemanta, qorimanta ruwasqas kashan chaykunata.
3Señorqa may k'achasman tukucherqa egipciosta israelitaspa ñaupaqempi. Chantapis faraompa kamachisnin Moisesta qhawarqanku may yachayniyoj runapaj, jinallatataj tukuynin Egiptopi kaj runaspis yuyarqanku.
4Moisesqa nerqa: Ajinatamin nin Señorqa: Chaupi tutata jamusaj tukuynin Egiptonta pasaj. 5Chaypacha wañonqanku egipciospa tukuy kuraj qhari wawasninku, qallarispa faraompa kuraj wawanmantapacha, pichus tronopi tiyasqa kashan chaypata; warmi kamachi molinota muyuchejpa kuraj wawampis wañullanqapuni. Chantá wañullanqankutaj tukuy uywaspa phiwi uñasnin. 6Egiptopeqa manchay waqay kanqa tukuynimpi, chaytaj ni jayk'aj karqachu, nitaj jayk'ajpis kanqachu. 7Qankuna yachaykichejpajtaj imaynatachus Señor waj jinamanta egipciosta qhawasqanta israelitastataj waj jinamanta. Israelitastaqa ni alqollapis ayñanqachu, nitaj israelitaspa ima uywallantapis. 8Chaymantaqa tukuy kamachisniyki jamuwanqanku, ñaupaqeyman qonqoriykukuspataj niwanqanku: Ripuychej, qan, chantá pichunachá qanman sayasqa kashanku chaykunawan. Chay qhepantataj noqaqa ripusaj. Jinata niytawantaj Moisesqa may phiñasqa llojsiporqa faraompa ñaupaqenmanta.
9Chaymantataj Señorqa Moisesman nerqa: Faraonqa manapuni kasusonqachejchu; pay jina kasqanrayku t'ukuna ruwanasniy ashkhayanqa chay tukuynin Egipto jallp'api.
10Moiseswan Aaronwan chay t'ukuna imasta ruwarqanku faraompa ñaupaqempi. Señortaj faraompa sonqonta rumiyacherqa, chayrayku israelitasta mana saqerqachu llajtanmanta llojsinankuta.
Currently Selected:
ÉXODO 11: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
