ÉXODO 6
6
1Diostaj Moisesman nerqa: Kunanraj rikunki imatachus faraonman ruwasaj chayta. Imaraykuchus paymantaqa sinch'i kallpawampuni kacharichisqaykichej chaymanta ripunaykichejpaj, jinallataj paypis may phiñasqa kacharisonqachej.
Dios ujtawan Moisesta wajyan
2Diosqa parlallarqapuni Moiseswan, nispa: Noqamin kani Señorqa. 3Noqa tukuy atiyniyoj Dios sutiywan rejsichikorqani Abrahamwan, Isaacwan, Jacobwan ima. Señor nisqa sutiywanri paykunaman mana rejsichikorqanichu. 4Chantapis paykunawan uj tratota ruwarqani, Canaán jallp'ata qonaypaj. Chay jallp'api paykunaqa karu llajtayoj jinalla karikorqanku pisi p'unchaykunata. 5Ña kunanqa rikuniña israelitas sinch'ita ñak'arisqankuta, egipcios sinch'ita llank'achisqankuta, kunanqa yuyarikuni uj tratota ruwasqayta. 6Chayrayku nimuy israelitasman: Noqa Señormin, orqhosqaykichej chay jina ñak'arispa egipciospaj llank'anaykichejmanta, chay jina sinch'i kamachi ruway mana atinamanta. Noqa atiyniyta rikuchisaj. Ashkha muchuy mana atinasta rikuchispa kacharichisqaykichej sumaj cheqanta ruwaspa. 7Noqa orqhokapusqaykichej: Qankunaqa aylluy kankichej; noqataj Diosniykichej kasaj. Chaypi qankunaqa yachankichej noqamin Señorqa, qankunaj Diosniykichej kasqayta, egipcios mayta ñak'arichispa llank'achisusqaykichejmanta, noqa qankunata orqhosqayta. 8Noqa pusasqaykichej, ima jallp'atachus Abrahamman, Isaacman, Jacobman ima, chayaqenkupaj qosqaykichej nerqani chayman. Noqamin kani Señorqa.
9Chay kikinta Moisesqa israelitasman willamorqa, paykunaqa mana payta kasuta ruwarqankuchu; imaraykuchus paykunaqa may ñak'arisqas kasharqanku, llakisqastaj maytapuni llank'asqankumanta. 10Chaymanta Señorqa Moisesman nillarqataj:
11Rispa faraonman nimuy, saqey israelitasta jallp'aykimanta llojsejta, nispa.
12Moisestaj Señorman kuticherqa: Qhaway, israelitasqa mana uyariwankuchu; imaynatataj faraón noqata uyariwanqari? Chantapis noqa mana ch'uyata parlayta atishajtiyri?
13Chaymanta Señorqa Moisestawan Aarontawan kacharqa israelitasman, rey faraonmanwan nimunankupaj, paykuna israelitasta Egipto jallp'amanta orqhonankupaj kamachisqas kasqankuta.
Kaykuna karqanku Aarompata Moisespatawan ñaupa tatasninku
14Kaykuna karqanku sapa ayllumanta kurajkuna churasqas tatasninkumanta. Israelpa kuraj wawan Rubempata wawasnin karqanku: Hanoc, Falú, Hezrón, Carmi ima. Kaykuna karqanku Rubempa ayllusnin.
15Kaykuna Simeompa wawasnin karqanku: Jemuel, Jamín, Ohad, Jaquín, Zohar, Saúl ima. Kay Saulpataqa maman cananea karqa. Kaykuna karqanku Simeompa ayllusnin.
16Kaykuna karqanku Levej wawasnimpa sutisnin kurajmanta sullk'akama: Gersón, Coat, Merari ima. Leveqa pachaj kinsa chunka qanchisniyoj watasta kausarqa. 17Gersompa wawasnenqa karqanku familiasninkuman jina: Libni, Simei ima. 18Coatqa pachaj kinsa chunka iskayniyoj watasta kausarqa. Wawasnintaj karqanku: Amran, Izhar, Hebrón, Uziel ima. 19Merarej wawasnintaj karqanku Mahli, Musiwan. Kaykuna karqanku Levej ayllusnin, mirayninkuman jina, kurajmanta sullk'akama.
20Amramqa casararqa tian Jocabedwan, wawasninkutaj karqanku Aaronwan, Moiseswan. Amramqa kausarqa pachaj kinsa chunka qanchisniyoj watasta.
21Izharpa wawasnintaj karqanku Coré, Nefeg, Zincrewan.
22Uzielpa wawasnintaj karqanku Misael, Elzafán, Sintriwan.
23Aaronqa casararqa Elisabetwan, mayqenchus karqa Aminadabpa ususin, Naasompa panan. Pay wawasta rejserqa Nadabta, Abiuta, Eleazarta, Itamartawan.
24Coréj wawasnintaj karqanku: Asir, Elcana, Abiasafwan. Kaykuna karqanku Coréj familiasnin.
25Aarompa ujnin kaj wawan Eleazar casararqa Futielpa ususinwan, paypa wawantaj karqa Finees. Kaykuna karqanku levitaspa ayllusninmanta kurajkuna layankuman jina.
26Kaykuna karqanku Aaronwan Moiseswan, mayqenkunamanchus Señorqa nerqa israelitasta orqhomunankuta Egipto jallp'amanta, ashkha soldadosta jina. 27Paykunallataj kanku Moiseswan Aaronwan, Egipto rey faraonwan parlamojkuna, israelitasta orqhomunankupaj Egiptomanta.
Dios wajyan Moisesta Aarontawan
28Mayk'ajchus Señorqa Egiptopi Moiseswan Aaronwan parlarqa chaypacha nerqa: 29Noqamin kani Señorqa. Rispa Egipto rey faraonman willamuy, imastachus noqa nisqayki chayta.
30Moisestaj kuticherqa: Señor, noqaqa mana parlayta atinichu, qallullay watakuwan, imaynatataj chay jinata faraonqa uyariwanqari?, nispa.
Currently Selected:
ÉXODO 6: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
