ÉXODO 7
7
1Ujtawan Señorqa Moisesman nerqa: Qhawariy, noqa niyki, qan noqaj cuentaymanta faraompa ñaupaqempi ruwanki, jinallataj wauqeyki Aarón profetayki jina qampa cuentaykimanta parlanqa. 2Qan payman willanki noqa imatachá nisqayki chayta; wauqeyki Aarontaj faraonman parlanqa israelitasta jallp'anmanta llojsejta saqenanta. 3Noqataj faraompa sonqonta rumiyachisaj, astawantaj ashkhayachisaj may t'ukunasta ruwayta, milagrostawan ruwayta Egipto jallp'api. 4Faraonqa mana uyarisonqachejchu, noqataj atiyniyta rikuchisaj Egiptopi, soldadosniyta orqhokapusaj, aylluyta, Egipto jallp'amanta ashkha jasut'iykunata rikuchispa. 5Chaymantaraj Egiptopi atiyniyta rikuchejtiy, egipciosqa yachanqanku noqa Señorqa kasqayta, paykunaj chaupinkumanta israelitasta orqhomusqaymanta.
6Moiseswan Aaronwanqa kikinta ruwarqanku, imaynatachus Señor Dios paykunaman kamacherqa, ajinata. 7Chaypacha Moisesqa karqa pusaj chunka watasniyoj; Aarontaj karqa pusaj chunka kinsayoj watasniyoj, faraonwan parlasharqanku chaypacha.
Aarompa tojnun
8Señorqa parlallarqataj Moisesman Aaronmanwan, nispa: 9Sichus faraón nisonqachej milagrosta rikuchiychej nispa chayqa, qan ninki Aaronman: Tojnuykita jap'ispa choqay faraompa ñaupaqenman katariman tukunampaj.
10Moiseswan Aaronwantaj kachaykukorqanku faraonwan parlaj. Paykunaqa ruwarqanku imaynatachus Señor paykunaman kamacherqa chayman jina. Aaronqa tojnunta choqarqa faraompa ñaupaqenman kamachisninwan kashajtin, chay tojnutaj katariman tukorparerqa. 11Faraontaj wajyacherqa yachajkunasninta, yatirisnintawan; paykunapis jamuspa kikillantataj ruwarqanku tukuy atiyninkuwan; 12Sapa ujninku tojnusninkuta choqallarqankutaj, chaykunapis katariman tukorqanku. Aarompa tojnuntaj tukuynin yachajkunajta, yatirispatawan tojnusninkuta mikhurarqa. 13Chay tukuywampis faraompa sonqon astawan rumiyarqa, paykunata mana kasuta ruwarqachu, Señorpa nisqanman jina.
Yaku yawarman tukun
14Chaymanta Señorqa Moisesman nerqa: Faraompa sonqonqa anchatapuni rumiyan, mana munashanchu israelitas llojsinankuta. 15Q'aya tutamanta mayuman uraykushajtin qhawarej rinki. Qantaj chay mayu cantopi suyanki, katariman tukorqa chay tojnuykita. 16Chaypitaj ninki: Señormin, hebreospa Diosnin kachamuwan qanman willajta: Saqey ayllayta jallp'aykimanta llojsejta, ch'innejman rispa yupaychanawampaj. Kunankamataj qanqa mana kasukunkichu. 17Chayrayku Señorqa nimusunki: Kaypi yachawanki noqa Señor kasqayta: Kay tojnuywan kay mayupi kashaj yakuta wajtasaj, yakutaj yawarman tukonqa. 18Tukuy kay yakupi kaj challwas wañonqanku, mayutaj millayta asnanqa, tukuy egipciospis millachikonqanku, kay yakuta ujyayta.
19Chanta Señorqa Moisesman nillarqataj: Niy Aaronman, tojnunwan Egipto mayu yakusta wajtaramuchun, wayq'ospi, tapisnimpi qochasta, yaku jallch'anasninkuta, maypichá yakus kashan chayta yawarman tukunankupaj. Ajinamanta tukuynin Egiptopi yawar kanqa k'ullu bateasninkupi; jinallataj rumi bateasninkupipis.
20Moiseswan Aaronwan kikinta ruwarqanku, Dios imaynatachus paykunaman kamacherqa, ajinata. Tojnunta oqharispa Egipto mayu yakuta wajtarqa faraón qhawashajtin. Tukuy mayu yakustaj yawarman tukorqanku. 21Jinallataj chay mayupi kaj challwas wañurarqanku. Mayutaj millayta asnarqa, egipciospis mana ujyayta aterqankuchu, imaraykuchus Egiptopi maypichá yaku kaj chaykunapi yawarlla tarikorqa.
22Egiptomanta tukuy yatiris kikillantataj ruwarqanku imatachus yachasqankuwan. Faraompa sonqontaj astawan rumiyarqa, chayta rikushaspapis paykunata mana kasorqachu, Señorpa nisqanman jina. 23Faraonqa chaymanta kutispa wasinman riporqa, chaytapis manapuni kasuta ruwaspa. 24Tukuynin Egiptopi yaku wisinasta ruwarakorqanku mayu cantospi yakuta ujyanankupaj, imaraykuchus mayu yakusta mana ujyayta aterqankuchu. 25Chay jinata Señorpa ruwasqanqa junt'akorqa qanchis diapi.
Currently Selected:
ÉXODO 7: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
