ÉXODO 8
8
K'aylankulas junt'aykunku
1Señorqa Moisesman nillarqataj: Faraonman rispa nimuy: Señorqa ajinata nimusunki: Saqey aylluyta llojsejta yupaychamunawampaj. 2Mana llojsejta saqenki chayri, kayqa, noqa jasut'isaj tukuynin Egiptota k'aylankulaswan. 3Mayoqa k'aylankulasta mirachenqa, chaykuna llojsimuspa tukuynejman junt'anqanku, wasiykiman, maypichus puñunki chayman, kamachisniykej wasisninman, tukuy runasniykejman, hornosniykiman, maypichus mikhunasta ruwachinki chaykunamanwan. 4K'aylankulasqa patasniykiman wicharenqanku, tukuy Egipto runaspa patanman, jinallataj kamachisniykimampis.
5Chaymanta Señorqa Moisesman nerqa: Aaronman niy, tojnunta oqharinanta mayusta qhawarispa, wayq'osman, mayusman, qochasman; chaykunamanta jamp'atus llojsimunankupaj tukuynin Egipto jallp'asman.
6Aarontaj makinta jaywarerqa Egipto yakus pataman, Jinajtinkamataj k'aylankulasqa yakusmanta llojsiykamorqanku tukuynin Egipto jallp'asman junt'aykunankukama. 7Tukuy layqaspis kikillantataj ruwaspa k'aylankulasta junt'aykucherqanku Egipto llajtankuman.
8Jina kajtintaj faraonqa Moisesta Aarontawan wajyachispa nerqa: Señormanta mañaychej ari, k'aylankulasta chinkachinampaj, noqamanta, runasniymantawan karunchachispa, noqataj saqesaj israelitas llojsinankuta Señorman rikuchikusta jaywamunankupaj.
9Moisestaj kuticherqa: Niway, mayk'ajtaj munanki Señormanta mañanayta qanrayku, kamachisniykirayku, runasniykirayku ima; k'aylankulas karunchakunankupaj qanmanta, palacioykimantawan, mayullapiña qhepakunankupajri?
10Faraonqa nerqa q'ayapacha, nispa. Moisestaj nerqa: Qampa munasqaykiman jina mañasaj, ajinamanta qan rejsinaykipaj, Señor Diosniyku jinaqa mana pipis kasqanta. 11K'aylankulasqa riponqanku qanmanta, palacioykimanta, kamachisniykimanta, runasniykimanta ima, mayullapiña qhepakonqanku.
12Moiseswan Aaronwan faraompa ñaupaqenmanta llojserqanku. Chaymanta rispa Moisesqa Señormanta mañakorqa, k'aylankulasta faraonman apachimusqanta karunchachinampaj. 13Señortaj Moisespa nisqanman jina kasorqa. K'aylankulastaj wañurarqanku wasispi, patiospi, tukuy campospi ima. 14Runasqa k'aylankula wañusqasta tantarqanku qotu qotuta. Chantaqa tukuynejpi millayta phututirerqa. 15Faraontaj chay imas manaña kajtin qonqaporqa, sonqontapis astawan rumiyarqa, manaña kasorqachu Moiseswan Aaronwan nisqankuta, imaynatachus Señorpa nisqanman jina.
Tiwla junt'aykunku
16Señorqa ujtawan Moisesman nerqa: Aaronman niy ujtawan tojnunta oqharinanta, chaywantaj ñut'u jallp'ata wajtachun, chay ñut'u jallp'a tiwlaman tukuspa, Egipto jallp'aman junt'anampaj.
17Paykunata ajinata ruwarqanku. Aaronqa tojnunta oqharispa, pampata wajtaspataj jallp'ata oqharicherqa, chaytaj tiwlaman tukuspa Egipto jallp'aman junt'aykorqa. Chay tiwlastaj runasta, uywasta ima tukuykorqa. Tukuynin Egiptopi maynejpipis tiwlallaña karqa. 18Yatirisqa kikillantataj ruwaspa imatachus yachasqankuwan mana ajinata ruwayta aterqankuchu. Tiwlasqa tukuynin runasta tukuykorqa, jinallataj uywastapis. 19Chaymantaqa chay layqas faraonman nerqanku: Kayqa Diospa jasut'iynin, nispa. Faraonqa astawan sonqonta rumiyacherqa; mana imatapis kasorqachu, Señorpa nisqanman jina.
Ch'uspis junt'aykunku
20Señorqa ujtawan nillarqataj Moisesman: Q'aya paqarin faraonqa tutamanta mayuman renqa; qampis tutamanta jatarispa riy paywan parlaj. Ajinata ninki: Señorqa ajinata nimusunki: Saqey aylluyta llojsejta yupaychamunawampaj. 21Manachus saqenki llojsejta chayqa, noqa apachimusaj imaymana khanikoj ch'uspista qampa pataykiman, kamachisniykiman, runasniykiman, wasisniykiman ima junt'aykunampaj. Tukuy egipciospa wasisninman junt'aykonqanku, tukuy pampasnintinman. 22Ajina kashajtintaj, Gosén jallp'apeqa mana kanqachu khanikoj ch'uspisqa, mayqempichus aylluy tiyakushan chaypi; ajinamanta yachanaykichejpaj noqa Señor kay jallp'a patapi kashasqayta. 23Ajinata aylluytawan aylluykitawan t'aqasaj. Kaytaj q'ayapacha kanqa.
24Ajinata Señorqa ruwarqa. Khanikoj ch'uspisqa manchay ashkhas urphurimorqanku, faraompa palacionman, kamachisnimpa wasisninman, tukuynejman junt'aykunankukama. Tukuynin jallp'astapis mana allinta ruwarparerqankuchu.
25Chaymanta faraonqa Moisesta Aarontawan wajyachispa, nerqa: Rispa Diosniykichejman rikuchikusta jaywamuychej mana kay jallp'amanta ripuspalla.
26Moisesqa kuticherqa: Jinata kayllapi ruwanaykoqa mana allinchu, ima uywastachus Señor Diosniykuman jaywasqayku chayqa egipciospaj mana allinchu, paykunapajqa Diosninku jina. Sichus egipcios rikuwasqayku chay uywasta rikuchikusta jaywashajta chayqa, mayqenkunatachus paykuna yupaychanku chaytaqa, cheqamanta rumiswan ch'anqaspa wañurparichiwasqayku. 27Noqaykoqa rinayku tiyan kinsa día puriyta ch'in pampaman, chaypi Señor Diosniykuman rikuchikuta jaywamunaykupaj, Pay kamachiwasqaykuman jina.
28Faraontaj nerqa: Noqa saqesqaykichej ch'in pampaman rispa Señor Diosniykichejman rikuchikuta jaywamojta, ama ancha karuman rinaykichej kajtenqa; chaypi noqapajpis mañapuwaychej.
29Moisestaj kuticherqa: Kaymanta riytawan Señormanta mañapusqayki kay khanikoj ch'upis qanmanta jatarinankupaj, jinallataj kamachisniykimanta, llajtaykimantapis q'ayapacha. Qantaj amallaña ch'aukiyawaykuchu, amañataj jark'aychu israelitas rispa Señorman richuchikusta jaywamojta.
30Moisesqa chaymanta riytawan palacionmanta rispa, Señormanta mañakorqa. 31Señortaj Moisespa imatachus nisqanman jina ruwarqa. Tukuynin khanikoj ch'uspista chinkacherqa faraonmanta, kamachisnimpamanta, runaspa wasisninmanta ima mana ujniyojta. 32Faraontaj chayta rikuytawan sonqonta rumiyachillarqataj, mana saqerqachu israelitasta rejta.
Currently Selected:
ÉXODO 8: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
