GÉNESIS 18
18
Dios nin uj wawata Abrahamman qonanta
1Abrahamman Señor rikhurerqa Mamre encinas sach'ararapi, jaran punkupi tiyachushajtin, khuskan p'unchayta jina. 2-3Abrahamqa qhawarispa rikorqa kinsa qharista ñaupaqempi sayashajta. Sayaykuspataj qayllaykorqa usqhay usqhayta, jinaspataj qonqoriykukorqa umanta pampaman chayachinankama, nerqataj: Wiraqochíy, kamachiykita waturikuwanki, yaykurimuy ari. 4Kunitan yakuta apamonqanku chakisniykichejta mayllakunaykichejpaj, qankunataj uj chhikallantapis kay sach'a llanthupi samarikunkichej. 5Qankuna ñapis chayamunkichejña kamachiykichej maypichus tiyakun chayman. Kunanqa aparimpusqaykichej uj pisi t'antallatapis mikhurikunaykichejpaj, samarikuspa kallpacharikunaykichejpaj, amaraj kaymanta ripushaspa. Paykunataj nerqanku: Yasta, ruwallay imatapis nisqaykita.
6Abrahamtaj jaran ukhuman yaykuytawan Saraman nerqa: Usqhayta orqhomuy tawa chunka libras sumajnin jak'uta, usqhayllata ruwaspa tortillata ninapi chayarqochiy!
7Chaymanta Abrahamqa usqhay usqhayta maypichus wakas kasharqa chayman rispa, ajllaspataj sumajnin kaj torillota, aysamuspa uj kamachinman nerqa ñak'ananta, paytaj chay rato ruwarqa. 8Chaymantaqa ña wakisqaña kajtin, Abrahamqa paykunaman jaywarqa quesota, lecheta, torillomanta wayk'usqatawan. Paykunaqa mikhorqanku chay sach'a llanthupi, Abrahamtaj paykunawan kasharqa.
9Mikhuyta tukuytawantaj watukojkunaqa Abrahamta taporqanku: Maypitaj warmiyki Sara kashanrí?, nispa. Paytaj nerqa: Jaqay toldo ukhupi, nispa. 10Ujnin kaj nerqa: Watapaj kutimuspa watukusqayki, chaypaj warmiyki Sara wawayojña kanqa. Jinata nishajtintaj Saraqa Abrahampa wasanmanta toldo punkumanta uyarimusharqa. 11Abrahamwan Sara warminwanqa machusña karqanku, chantaqa Sarajta killampis manaña jamojchu. 12Chayrayku Saraqa asiywan atipachikorqa, sonqompitaj nerqa: Imaynamantataj chanta chay jina kusiy kanmanri kay jina payapiri, qosaywan noqawanqa machusña kaykoqa?, nispa. 13Señortaj Abrahamman nerqa: Imaraykutaj warmiyki Sara asikunri? Manachu creen jina payayaynimpi wawayoj kayta? 14Señorpajqa kanmanchu imallapis mana ruway atinaqa? Watapaj kunan jinallataj kutimuspa watukusqayki, chaypaj Saraqa wawayojña kanqa.
15Chayta uyariytawan Saraqa nerqa: Mana asinichu, nispa. Chayta nerqa manchariywan. Señortaj nerqa: Mana jinachu, qanqa asisharqankipuni.
Abraham Diosmanta mañakun Sodomapaj
16Chaymanta chay watukojkunaqa sayariytawan Sodomanejman jap'irerqanku. Abrahamtaj kacharpayaj jina uj chhikanta paykunawan rerqa. 17-18Señortaj sonqompi nerqa: Abrahamman willasaj imatachus ruwanay kasqanta, imaraykuchus pay kanan kashan uj jatun atiyniyoj naciompa tatan. Payman niniña benedicinayta paynejta kay mundopi tukuy nacionesta. 19Noqa payta ajllani, wawasninta, miraynintapis kamachinampaj noqaj ñankunasniypi purinankupaj cheqan kajta, allin kajtataj ruwaspa, noqa junt'anaypaj payman tukuy ima nisqasniyta. 20Chaymanta Abrahamman Señor willarqa: Sodomapi Gomorrapiwan tiyakoj runaspa jucha ruwasqankoqa ancha millaypuni uyarikun tukuynejpi, chayqa mana allinchu. 21Chayrayku kunanqa rishani qhawarej, willawasqaykuman jina, cheqachus chay juchasninkoqa ancha millaypuni manachus chayta. Ajinamanta noqaqa yachasaj.
22Chaymantaqa iskay rerqanku Sodomaman. Abrahamtaj qhepakorqa Señorwan. 23Chantaqa uj chhikantawan qayllaykuspa Abrahamqa Señorta taporqa: Señor, mana juchayojtaqa juchayojtawan khusachu chinkachinki? 24Ichapis chay llajtapi mana juchayojkuna phishqa chunka kanqanku. Chay phishqa chunkarayku manapuni chay llajtataqa perdonawajchu? 25Señor, tukuchinaykeqa mana allinchu kanman, mana juchayojta juchasapastawan khuska, iskayninkupis juchallatapuni ruwankuman jina. Ama chayta ruwaychu ari. Qan kanki kay mundontinta cheqanchaj, chayrayku, manachu cheqan kajtapuni ruwanayki tiyan?
26Señortaj kuticherqa: Sichus phishqa chunka mana juchayojkunata tarisaj Sodoma llajtapi chayqa, paykunarayku chay llajtata mana chinkachisajchu.
27Abraham ujtawan nillarqataj Señorman: Perdonaway, noqa ñut'u jallp'a jinalla kashaspa qan Señorniyta tapukususqaymanta. 28Phishqa chunkamanta, phishqa mana kajtinkuri, llajtataqa chinkachillankipunichu, chay phishqa mana kasqankurayku? Señortaj kuticherqa: Sichus tawa chunka phishqayojllata tarisaj chaypis, chay llajtataqa mana chinkachisajchu.
29Abrahamqa nillarqapuni: Tawa chunkalla kajtinkuri? Señortaj nerqa: Chay tawa chunkalla kajtinku manapuni chinkachisajchu chay llajtataqa.
30Abraham nillarqapuni: Mañakuyki, Señor, ama phiñakunawaykita ajinata nejtillaypuni. Kinsa chunkalla kajtinkuri? Paytaj nerqa: Kinsa chunka kajtinkupis, manapuni chay llajtataqa chinkachisajchu.
31Abraham nillarqapuni: Señor, perdonariway ari anchataña tapususqaymanta. Sichus qan tarinki iskay chunka mana juchayojkunallata chayri? Señortaj kuticherqa: Chay iskay chunkarayku chay llajtataqa mana chinkachisajchu.
32Chaywampis Abrahamqa nillarqapuni: Señorníy, ama phiñakuwankichu ari, kayllatawanña tupurisqayki. Imanankitaj Señor, sichus chunkallata tarinki chayri? Señortaj kuticherqa: Chay chunka mana juchayojkunarayku manapuni chay llajtataqa chinkachisajchu.
33Señorqa ajinata Abrahamwan parlaytawan riporqa chaymanta. Abrahamtaj jaranman kutimporqa.
Currently Selected:
GÉNESIS 18: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
