GÉNESIS 19
19
Dios chinkachin Sodomata Gomorratawan
1-2Ña chharpuykushajtinña iskaynin ángeles Sodomaman chayarqanku. Lotqa Sodoma llajtaman yaykuy punkupi tiyakusharqa, maypichus runa tantakojpuni chaypi. Paykunata rikuytawantaj sayarikorqa; ñaupaqenkumantaj qonqoriykukorqa pampaman umanta chayachinankama, nispa: Wiraqochisníy, kunan ch'iseqa wasiypipuni qheparikuychej ari, kamachiykichejpa wasimpi; chakisniykichejtapis mayllarikullankichej, q'ayataj tutamanta ripullankichej. Paykunataj nerqanku: Mana, imaynatapis jawapi kallasqayku.
3Chaywampis Lotqa nillarqapuni qhepakunankuta. Paykunataj yasta nispa paywan wasinman rerqanku. Wasinman chayaspataj Lotqa sumaj mikhunata wayk'uporqa, jinallataj ruwaporqa mana levadurayoj t'antata, paykunataj mikhorqanku.
4Manaraj puñushajtinku, tukuy Sodoma llajtayoj qharis maltun waynas, machu runasnintin Lotpa wasinta muyuykorqanku. 5Lottataj qhaparerqanku: Maytaj kunan ch'isi wasiykiman chayamorqanku chay qharis? Paykunawan puñuyta munayku. Orqhomuy, nispa.
6-7Lotqa llojserqa wasinta sumajta wisq'aykuspa paykunawan parlaj, nerqataj: Wauqesníy, ama chay jina millaytaqa ruwaychejchu ari, mana allinchu chayqa. 8Tiyapuwan iskay ususisniy, paykuna manaraj qhariswan purinkuchu; paykunata orqhomusqaykichej, paykunata munasqaykichejta ruwaychej. Kay runastari amapuni llankhaykullaychejpischu, paykuna wasiyman chayakamusqankurayku, nispa.
9Paykunataj kuticherqanku: Jatariy chaymanta! Qan jina karu llajtayoj runachu noqaykuta kamachiwasqayku? Kunanqa astawan mana allinta qanta ruwasqayku paykunamanta nisqaqa. Paykunataj Lotman maqaj phinkiykorqanku, jinaspataj punkuta khakoj qayllaykorqanku. 10Lotpa wasinman chayakamojkunataj makinkuwan qhechuytawan wasiman Lotta aysaykorqanku, punkutataj wisq'aykamorqanku. 11Runastataj tukuyninta ciegoyarpacherqanku juch'uy jatunta jawapi kajkunata. Jinamanta runasqa sayk'unankukama punkusta mask'arqanku, imaraykuchus ñawisninku mana rikorqachu. 12Lotmantaj chay iskay angelesqa wasin ukhupi nerqanku: Astawan ayllusniyki tiyapusunkichu kaypi? Kunanqa qhari wawasniykita, ususisniykita, tolqasniykita, piniykichá tiyapusunki kay llajtapi chaytawan kaymanta karuman pusakapuy. 13Noqayku kay tukuy llajtata chinkachisqayku. Imaraykuchus ashkhaña quejas tiyan Diospa ñaupaqempi kay llajtayojkunaj contrampi, chayrayku Señorqa kachamuwayku kay llajtata chinkachinaykupaj.
14Lottaj usqhayta rerqa ususisninwan casarananku karqa chay qharisman willaj, nerqataj: Jatariychej usqhayta, kaymanta ayqeychej, kay llajtataqa Señor chinkachenqa kasqa! Tolqasnintaj chayta mana creespa mana kasorqankuchu, chansiyakusqanta yuyaspa. 15Ña sut'iyamushajtintaj, angelesqa Lotman nerqanku may apurasqata: Usqhayta ripuy, pusakapuy warmiykita, iskaynin ususisniykitawan mana wañuyta munanki chayqa, kay llajtata chinkachishajtiyku.
16Lottaj mana usqhayta puririyta aterqachu, chayrayku angelesqa Lotta, warminta, iskaynin ususisninkutawan makisninkumanta llajtamanta jawaman aysarqanku, Señor paykunata khuyakusqanrayku. 17Llajtamanta jawapiña kajtinkutaj ujnin ángel nerqa Lotman: Kunanqa usqhayta ayqekuy ama wañunaykipaj. Ama qhepaykita qhawarikamuspa, sayaykachallankipischu chay valle ñanta risqaykipi. Cheqanta rinki orqosman mana wañuyta munanki chayqa.
18Lottaj nerqa: Mana, uyarillawaychej wiraqochisníy! 19Qankuna anchatapuni khuyakuwankichej, noqawan may k'acha kankichej kausayniyta libranawaykichejpaj. Noqari mana orqosmanqa riymanchu; sajra kaj ñanllapiraj taripawanman, wañupuymantaj. 20Qhawariychej, jaqaypi uj juch'uy llajta kashan, qayllallapitaj. Niwaychej ari chayllaman ayqekunayta, chayqa juch'uyllamin, chaypeqa mana wañusajchu.
21Ujnin kaj angeltaj nerqa: Arí, uyariyki. Imatachus niwasqaykita ruwasaj. Chay nishawanki chay llajtata mana chinkachisajchu. 22Jina kajtenqa usqhayta ayqekuy chay llajtaman, jaqayman chayanaykikama mana imatapis ruwasajrajchu. Chayrayku jaqay llajtaj sutenqa Zoar.
23Lotqa sut'iyamushajtin Zoar llajtaman chayarqa. 24Chantá Señorqa azufre nina parata parachimorqa Sodomaman Gomorra llajtamanwan. 25Jinamanta chinkaporqanku tukuy valle chay llajtas chaypi tukuy kausajkuna tukuynin q'omerkunapiwan; 26Lotpa warmintaj chay ñanta rishaspa qhepata qhawarerqa. Kikimpitaj payqa kachiman tukorqa.
27Q'ayantintaj tutamanta Abrahamqa wicharerqa maypichus Señorwan parlarqa chayman. 28Chaymanta qhawarerqa Sodomata Gomorratawan, chay tukuynin valletawan. Rikorqataj chay tukuyninmanta manchay q'osñilla llojsimushajta hornomanta jina. 29Ajinata Dios chinkacherqa chay vallepi llajtasta, maypichus Lot tiyakorqa chayta. Yuyarikorqataj Abrahampa mañakusqanta, chayrayku Lotta chay chinkachinan llajtamanta orqhorqa.
Moabitaspata amonitaspatawan rikhuriynin
30Chay qhepata Lotqa Zoarllapipuni tiyakuyta manchachikorqa, chayrayku orqosman riporqa tiyakoj iskaynin ususisinwan. Chaypi paykunaqa tiyakorqanku uj cuevapi. 31Uj p'unchay Lotpa kuraj kaj ususin sullk'a kajman nerqa: Tatanchejqa machuña, manataj kay tukuynimpi ima qharipis kanchu noqanchej chaywan casarananchejpaj, yachasqa kasqanman jina. 32Jina kajtenqa tatanchejta vinowan machaykuchina, jinaspataj paywan puñuykuna, jinamanta paynejta wawasniyoj kananchejpaj.
33Chanta chay ch'isi pacha tatankuman vinota ujyachispa machaykucherqanku. Jinamanta kuraj kajqa tatanwan puñorqa. Tatantaj mana reparakorqachu ususin paywan puñusqanta, nitaj jatarisqantapis. 34Q'ayantintaj kuraj kajqa sullk'anman nerqa: Noqa ch'isi tatanchejwan puñuni; kunan ch'isi ujtawan vinowan machaykuchinallataj, jinaspataj qanñataj paywan puñunki, ajinamanta tatanchejpaj wawasniyoj kananchejpaj.
35Chay ch'isi tatankuman vinota ujyachillarqankutaj. Jinaspata sullk'a kajñataj tatanwan puñuykorqa. Tatan Lottaj mana reparakorqachu paywan puñusqanta, nitaj jatarisqantapis. 36Ajinamanta iskayninku wijsayoj rikhurerqanku Lot tatankupaj. 37Kuraj kaj wawayoj karqa suticharqataj Moabta; payqa moabitaspa tatanku karqa kunankama. 38Sullk'a kajpis wawayojllataj karqa, suticharqataj Ben-amita, pichus amonitaspa tatanku karqa kunankama.
Currently Selected:
GÉNESIS 19: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
