GÉNESIS 32
32
Jacob Esauwan tinkunampaj wakichikun
1Jacobqa chaymanta ripullarqapuni. Diospa angelesnintaj payta taripaj jamorqanku. 2Jacobtaj paykunata rikuspa nerqa: Kayqa Diospa ejérciton, nispa. Chayrayku chay cheqata suticharqa Mahanainta.
3-4Chaynejmanta Jacob kacharqa kachasta Seirman, Edom chaynejman; willamunankupaj wauqen Esauman pay chayapushasqanta, ajinata nichispa: Niychej wauqey Esauman: Wauqeyki kamachiyki Jacob nichimusunki: Labanwan kamorqayku, chayrayku mana usqhayta jamunichu. 5Kunantaj tiyapuwan wakas, burros, ovejas, warmi kamachis, qhari kamachis ima. Kayta nichimuyki wiraqochíy, qampa ñaupaqeykipi khuyakuyta tariyta munaspa.
6Chay kachastaj kutirimuspa Jacobman willarqanku: Riyku wauqeyki Esauman tinkoj. Kunantaj qanta taripasoj jamushanña tawa pachaj runaswan.
7-8Paytaj chayta uyariytawan mayta mancharikorqa, maytataj unanchakorqa imatachus ruwayta atinampaj. Chay ratopacha iskay t'aqararqa pischus paywan kasharqanku chaykunata. Jinallataj wakasta, ovejasta, camellosta, ima, yuyaspa: Sichus chay Esaú ñaupaj kaj t'aqawan maqanakonqa chayqa, qhepan kaj t'aqaqa ayqekonqa, nispa. 9Chaymantataj Jacobqa Diosmanta mañakuyta qallarerqa: Señor, abueloy Abrahampa Diosnin, tatay Isaacpatawan Diosnin, qan niwarqanki ayllusniypaman, jallp'ayman kutipunayta, niwarqankitaj noqawan kanaykita allin rinawampaj. 10Mana cheqa kayniykiwan khuyanawaykipaj jinachu kani. Noqa Jordán mayuta chimpamorqani ni imawan, tojnuy oqharisqalla; kunanqa tiyapuwan iskay jaras. 11Chayrayku Señorníy, libraway ari wauqey Esaupa makinmanta. Manchachikuni jamuspa wañuchinawanta; warmisniyta, chanta wawasniytapis wañurachinanta. 12Qan niwarqanki allin rinawanta tukuy imapi, mirayniypis mar qocha t'iyu jina kananta mana yupay atina.
13-15Chay ch'isi chaypi Jacob puñorqa, jinaspataj wauqen Esauman qonampaj ajllarqa imachá kapusqanmanta: Iskay pachaj cabrasta, iskay chunka chivostawan; iskay pachaj ovejasta, iskay chunka orqo ovejastawan; juch'uy uñasniyoj kinsa chunka camellosta, tawa chunka wakasta, chunka torostawan; iskay chunka china burrosta, chunka orqo burrostawan. 16Chaykunatataj kamachisninman qhaticherqa waj wajllata sapa t'aqata, ajinata kamachispa: Ñaupaychej kunanqa sapa ujniykichej karukarullata qhatirikuspa sapa uj t'aqata.
17-18Ñaupajta rej kajman nerqa: Wauqey Esauwan tinkuspa tapusojtin: Pitaj patronniyki, maymantaj rishanki, pejpa uywasnintataj qhatishanki, nisojtenqa, ninkipacha: Wiraqochíy, kay uywasqa qampaj, kamachiyki Jacob apachimushasunki. Payqa qhepataraj jamushan.
19Kikillantapuni nerqa iskay kajman, kinsa kajman, tukuynin p'iti p'itillata qhatejkunaman, nispa: Qankunapis kikillantataj ninkichej Esauwan tinkuspa. 20Chanta nillankichejtaj: Kamachiyki Jacobqa qhepaykutaraj jamushan. Jacobqa yuyarqa: Phiñakuyninta thasnusaj kay tukuy imata qorisqayta ñaupajta apachispa, chaymanta uya purakullasqayku. Ichapis ajinamanta manaña phiñakuwanqachu, walejllata tinkukusqayku, nispa. 21Ajinata ñaupajta tukuy ima qorisqanta apacherqa, jinaspataj chay ch'isi jarampi puñorqa.
Jacob maqanakun uj angelwan
22Chay ch'isitaj Jacobqa rijch'ariytawan riporqa pusariykukuspa iskaynin warmisninta, iskaynin kamachisninta, chunka ujniyoj wawasnintawan. Jinata rispa Jacobqa Jaboc wayq'ota chimparqa. 23Ajinata payqa chay wayq'ota tukuy ayllunta chimpacherqa, tukuy imasnintawan khuska. 24Chaypitaj Jacobqa sapallan qhepakorqa. Jinallaman uj qhari rikhurimorqa, chaytaj Jacobwan maqanakorqa sut'iyamunankama. 25Chay qharitaj Jacobta mana atipayta atispa, chakampi sajmaspa k'inkiykachacherqa jinata maqanakushaspa. 26Chay qharitaj nerqa: Kachariway, ñapis sut'iyamushanña. Jacobtaj nerqa: Bendiciway, manachayqa manapuni kacharisqaykichu, nispa. 27Chay qharitaj taporqa: Imataj sutiyki?, nispa. Paytaj nerqa: Jacob kani, nispa.
28Chanta chay qhareqa nerqa: Kunanmanta manaña Jacobchu sutiyki kanqa. Kaymanta qhepaman Israel kanqa sutiykeqa; imaraykuchus Dioswan maqanakunki, runaswan ima, atipankitaj. 29Chaymanta Jacobqa taporqa: Qampa sutiykiri imataj?, nispa. Chay qharitaj nerqa: Imapajtaj qan sutiyta watuwankiri?, nispa. Jinata nispataj chay kikimpi Jacobta bendicerqa. 30Jacobqa chay cheqata suticharqa Penuel, nispa; imaraykuchus Dioswan tinkunakuyku, chay tukuywampis kausashaniraj, nispa.
31Inti llojsimushajtintaj Jacobqa chay Penuelmanta llojserqa, chakan nanasqa kajtin k'inkiykachaspa. 32Chayrayku kunankama Israelpa mirayninkunaqa mana mikhunkuchu uywaspa chakan chaynejpi untusta; imaraykuchus Jacob chaynimpi k'irinchasqa karqa.
Currently Selected:
GÉNESIS 32: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
