GÉNESIS 33
33
Jacobwan Esauwan allinyanakunku
1Jinata rishaspa Jacob qhawarerqa, rikorqataj Esauta tawa pachaj runasninwan jamushajta. Chayrayku wawasninta mamasninkuman pusariracherqa t'aqa-t'aqallata: Leaman, Raquelman, iskaynin kamachisninmanwan. 2Ñaupaj puntamanqa churarqa kamachisnintaraj wawasnintawankama, chaymanta Leata wawasnintawan, qhepa puntamantaj Raquelta wawan Josetawan. 3Jinaytawantaj Jacobqa ñaupaykuspa, qanchis kutita qonqorikuspa, wauqen Esauman qayllarqa. 4Esautaj corrispa Jacobta kunkanmanta ojllaykuspa much'aykorqa. Jinaytawantaj iskayninku waqarikorqanku. 5Chaymanta Esauqa warmista wawastawan qhawarispa, wauqenta taporqa: Kaykuna pistaj kankurí?, nispa. Jacobtaj nerqa: Kaykunaqa kanku kamachiykej wawasnin, mayqenkunatachus Dios qowarqa.
6Jinata nishajtinkutaj iskaynin kamachis sapa uj wawasninkuwan Esauman qayllaykorqanku qonqoriykukuspa, pampakama umankuta chayachispa. 7Qhepantataj Leañataj wawasninwan qayllaykorqa kikinta ruwaspa. Qhepa puntataj Raquelqa Josewan kikillantataj qonqorikuspa. 8Chantá Esaú taporqa Jacobta: Imatataj yuyanki kay chhika t'aqastawan taripasusqaywanrí? Jacobtaj nerqa: Qampa k'acha kayniykita tariyta munaspa jamushani.
9Esautaj nerqa: Mana wauqéy, noqajtaqa tiyapullawan, qampata kajqa, qampata kakullachun.
10Jacobqa nillarqapuni: Sichus noqapaj k'acha kanki chayqa, jap'ikullaway kay qosusqasniyta, qanta rikuspaqa kikin Diostapis rikushayman jina kani, qan may k'acha sonqowan suyawasqaykirayku. 11Jap'ikullayña kay uywasta, mana imaypis pisipuwanchu. Chay jinatapuni Jacob nejtenqa, ñak'aymanta Esauqa jap'erqa chay tukuy ima qosqanta. 12Chaymantataj Jacobman nerqa: Jina kajtenqa jaku ripuna. Noqa ñaupaqeykita risaj.
13Jacobtaj nerqa: Munasqa wauqéy, yachanki jina wawasniy pisisllaraj kanku, chantapis ovejasniy, wakasniy juch'uy uñasniyoj kanku, sayk'uspa uj p'unchayllachari wañurankuman. 14Chaypajqa qanllaraj ñaupaykapushay kay kamachiykimanta. Noqaqa pisimanta pisi jamullasaj uywaspa, wawaspa thaskimusqanman jina. Chantá Seirpi tinkullasunchej.
15Esautaj nerqa: Jina kajtenqa saqesqayki noqawan jamoj wakin runasta. Jacobtaj nerqa: Ama chaymantaqa llakikuychu; imaraykuchus qampi khuyakuyta tariniña.
16Chay kikimpacha Esauqa Seirman kutiporqa. 17Jacobtaj chaymanta riporqa Sucotman. Chaypi wasita ruwakorqa, jinallataj ch'ujllasta ruwarakorqa uywasnimpaj. Chayrayku chay cheqata suticharqa Sucot nisqata.
18Jacobqa Padan-aranmanta allillanta, walejllataj chayarqa Canaanman. Chayman chayaspataj Siquem llajtaj chimpampi jarakorqa. 19Chaypitaj jallp'ata rantikorqa Siquempa tatan Hamorpa wawasninmanta pachaj phisuswan, chaypi jarakorqa. 20Jinaspataj uj altarta ruwarqa, suticharqataj El-Elohe-Israelta.
Currently Selected:
GÉNESIS 33: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
