GÉNESIS 44
44
Josej ujyanan copa
1Chay qhepatataj Joseqa mayordomonman nerqa: Kay runaspa costalesninman trigota junt'a sirapuy maytachá atisqankuta apakunankupaj, qolqe pagasqasninkutataj sapa ujninkoj costalesninkoj simisninman siraykuranki. 2Qolqe copaytataj sullk'a kajpa costalninman churaykunki, trigomanta qowasqan qolqetawan khuska, nispa.
Mayordomotaj chay nisqanman jina kikinta ruwarqa. 3Tutamanta inti phawarqamuytataj Joseqa wauqesninta kachaporqa burrosninkupi chajnarisqasta. 4-5Llajtamanta manaraj karuta rishajtinkutaj Joseqa mayordomonman yachaykucherqa: Chay runasta qhatiriy, taripaspataj ninki: Imaraykutaj patronniyman kutichinkichej allinmanta mana allintari? Ima nispataj qolqe copanta suwamunkichejri, patronniypa ujyananta, qhawaspataj imatapis yachanantari? Kaytaqa mana allintachu ruwankichej.
6Mayordomoqa paykunata taripaytawan kikin palabraswan nerqa. 7Paykunataj kuticherqanku: Imaraykutaj qan chay imasta nishawaykuri? Noqaykoqa ni jayk'aj chay jinata ruwayta yachaykuchu. 8Qan yachanki jina noqaykoqa qolqetapis kutichimpuyku Canaanmantapacha sapa ujniykojpi rikhurejta. Ima nispataj suwaykumanri patronniykej wasinmanta qorinta qolqentapisri? 9Mayqen kamachiykejpichus rikhurenqa chayqa, wañuchun; noqaykuntin kamachisniyki kasqayku.
10Mayordomotaj paykunaman nerqa: Qankunaj nisqaykichejman jina, ajina kachun; chaywampis pejpapichá rikhurenqa chay kajlla kamachimanta qhepakonqa, wakenqa ripullankichej.
11Sapa ujninku burrosninkumanta usqhayllata cargasta chajnaraytawan, costalesninkuta phaskaraspa qhawaykorqanku. 12Mayordomotaj cantollamanta qhawararqa kuraj kajmanta qallarispa sullk'a kajpakama, jinaspataj tarerqa Benjamimpapi qolqe copata. 13Paykunataj tukuyninku p'achasninkuta llakiywan llik'irakorqanku. Jinaytawantaj sapa ujninku burrosninkuman chajnaykuytawan llajtaman kutirerqanku. 14Judá, wauqesninwan Josej wasinman chayanankupaj chayllapiraj kasharqa Joseqa. Paykunataj qayllaykuytawan qonqoriykukorqanku pampaman umankuta chayachinankukama. 15Josetaj paykunaman nerqa: Imatataj kayta ruwawankichejri? Manachu yachankichej noqa jina runaqa chayta qhawaspa imatapis yachasqanta?
16Judataj kuticherqa: Wiraqochi, imatataj astawan qanman nisqaykuri? Imaynamantataj kunan noqayku willasqayku mana suwaschu kasqaykutari? Dios taripawayku juchayku patapi. Kunanqa makiykipi kayku; kamachisniyki kayku, pejpapichus copayki rikhurin chaywan khuska.
17Josetaj nerqa: Qankunaqa mana ima kashajtimpis kamachisniy kayta atinkichejchu? Mayqenniykichejpapichá copay rikhurin, chay kajlla kamachiy kanqa. Wakenqa kutipullaychej ama imamantapis llakikuspa tataykichejpa wasinman. Manataj pipis ima nisonqachejchu.
Judá mañakun Benjaminrayku
18Judaqa Joseman qayllaykuspa nerqa: Wiraqochíy, ujta mañarikuyki, saqeriway ari sapallaykipi qanwan parlarejta. Ama ari phiñakuwaychu, qanqa kanki kikin faraompis kawaj jina. 19Qan tapuwarqayku tatayku tiyanchus manachus chayta, jinallataj wauqeykupis tiyanchus manachus chayta. 20Noqaykutaj willarqayku tatayku kasqanta, machuñataj kasqanta, jinallataj wauqeykupis kasqantaraj uj wayna, mayqenchus nacesqanta tatayku machuña kashajtin. Chantá nillarqaykutaj tataykoqa maytapuni chay wawanta munakusqanta, pay k'atataj kausashasqanta uj mamayojmanta, ujnin kajtaj wañupusqanta. 21Chaymantaqa qantaj niwarqayku pusamusunaykuta qan rejsiyta munasqaykirayku. 22Noqaykutaj nerqayku waynaqa tatanta manaña saqerpayayta atisqanta, sapanta saqenman chayqa wañupunman. 23Noqaykutaj payta mana pusamuspaqa manaña jamunaykuchu karqa qanwan tinkoj.
24Noqaykutaj chayta tataykuman willarqayku imachus kasqanta, kaymanta kutiytawan imastachus qan niwarqayku chayta. 25Chaymantataj tataykoqa niwarqayku: Ujtawan kutispa trigota rantej jamunaykuta. 26Noqaykutaj nerqayku: Noqaykoqa manapuni riykumanchu, manachus sullk'a wauqeykuta pusasqayku chayqa. Imaraykuchus jaqaypi wiraqocheqa niwayku pay pusarisqapuni chayanaykuta, mana jina kajtenqa mana chayanaykuchu. 27-28Tataykutaj nillawarqayku: Qankuna yachankichej, warmeyqa iskay wawasllata saqewasqanta; ujnin kaj ñaupaqeymanta rispa chinkan, chaymantapacha manaña rikunichu. Cheqamanta ima sajra animaleschus mithaykunkupis. 29Sichus kay uj wawaytawan pusankichej, imanakonqataj chayqa, qankuna juchayoj kankichej kay achachi llakiywan wañunampaj.
30-31Ajina ari, tataykoqa maytapuni munakun kay waynata. Manapuni paymanta kacharikuyta munanchu. Chayrayku sichus kay wayna mana noqaykuwan kutenqa chayqa, achachi tatayku wañuponqa llakiywan mana payta rikuspa. Ajinamanta noqayku juchayoj kasqayku, achachi tatayku llakiywan wañupunampaj. 32Noqa tatayman nerqani: Noqa cuentayoj kanayta kay waynamanta, chanta nillarqanitaj: Noqa mana kutichipusqayki chayqa, noqa juchayoj kasaj qampa ñaupaqeykipi wiñaypaj, nispa. 33Chayrayku wiraqochíy, niway ari noqa kamachiykimanta qhepakunayta, kay waynaj cuentanmanta. Payta saqellay ari ripunanta wauqesniywan. 34Imaynatataj kunan noqaqa mana paywan chayasajri? Mana pay noqaykuwan kutipojtenqa, mana rikuyta munanichu tatay llakiywan, t'ukuwan ima jap'ichikunanta.
Currently Selected:
GÉNESIS 44: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
