GÉNESIS 45
45
José wauqesninman rejsichikun
1Joseqa manaña astawan waqayninta jark'akuyta atispa, tukuy kamachisninta, qhawarispa nerqa jawaman llojsinankuta. Jinamanta tukuy kamachisnin mana Josewanchu karqanku, pay wauqesninman rejsichikushajtin. 2Chaymanta payqa jatunmanta waqatatarqa; chayta egipcios uyarimorqanku, jinallataj faraompa wasinmanta kajkunapis. 3Joseqa wauqesninman nerqa: Noqa José kani. Tatayqa kausakushanrajchu?, nispa. Wauqesnintaj mana imatapis kutichiyta aterqankuchu, imaraykuchus may mancharisqas mana imanakuyta aterqankuchu ñaupaqempi tukuyninku rikhurispa. 4Josetaj ujtawan paykunaman nillarqataj: Ama mancharikuspa qayllamuwaychej. Paykuna qayllaykojtinkutaj nerqa: Noqa kani José qankunaj wauqeykichej, pitachus qankuna Egiptoman venderqankichej, chay. 5Kunanqa ama chaymanta llakikuychejchu, amataj qankunapura phiñanakuychejchu noqata vendewasqaykichejmanta. Noqataqa Dios kachamuwan qankunaj ñaupaqeykichejta, ashkha runasta kausachinaypaj. 6Iskay wataña kay yarqhay kasqanqa, kaymanta phishqa wataswanraj kanan tiyan, chaypi manapuni ima cosechapis kanqachu, nitaj tarpusqapis poqonqachu. 7Chaypajtaj Dios noqata kachamuwan qankuna ama tukukunaykichejpaj kay jallp'a patapi, mirayniykichej ama tukukunampaj, jinamanta qankuna uj t'ukunata salvakunaykichejpaj. 8Ajinaqa Dios kay llajtaman kachamuwan, mana qankunachu; Pay churawan faraonman yuyaychanaypaj, wasimpi tukuy imanmanta patronta, tukuynin Egiptota kamachinaypaj. 9Kunan qankunaqa usqhayta ripuychej maypichus tatay kashan chayman, niychejtaj: Wawayki José kay jinata nichimusunki: Dios churawan tukuynin Egiptota kamachinaypaj. Jampuy tatáy, usqhayllata ama iskayrayaspa. 10Kaypi tiyakunki Gosén jallp'api tukuy wawasniykiwan, allchhisniykiwan khuska, uywasniykiwan, tukuy imayki kapusojwan ima. Ajinamanta qanqa qayllaypi kakunki. 11Chaypi qankunaman mikhuchisqaykichej qanman, wawasniykiman, pikunachus qanwan kashanku chaykunamanwan, ama yarqhaywan wañunaykichejpaj, imaraykuchus phishqa watastawanraj yarqhayqa kanqa. 12Qankuna noqa kikiy nisqayta uyarishawankichej, jinallataj wauqey Benjamimpis. 13Ajinata qankunaqa tatayman willapuwaychej kay Egipto llajtapi kamachej kasqaymanta, jinallataj imatachá qankuna rikushankichej chaykunata ima. Chayrayku kunanqa apurasqata ripuychej, tataytataj usqhayllata pusampuwaychej kayman.
14Joseqa ujtawan wauqen Benjaminta ujllaykuytawan waqarikorqa. Benjamimpis waqarikullarqataj José ujllarisqa. 15Chaymantataj Joseqa sapa uj wauqesnintañataj waqarikuspa, waqarikuspa ujllaykuytawan much'aykuspataj waqarikorqa. Chaymantaña wauqesnenqa ñak'ayta parlapayarqanku.
16Chaymantaqa Josej wauqesnin chayamusqanku uyarikorqa faraompa palaciompi; faraontaj mayta kusikorqa tukuy kamachisninwan khuska. 17-18Faraonqa Joseman nerqa: Niy wauqesniykiman, usqhayllata burrosninkuman chajnariykukuspa Canaanman kutiripunankuta, chayaspataj pusakampunankuta tataykichejta, familiasniykichejtawan. Noqataj qosqaykichej Egipto jallp'api imachus sumajnin kajta, mikhonqankutaj kaypi sumajta poqon chayta. 19Qan kamachiy, kay Egipto llajtamantapacha carrosta apanankuta, chaypi wawasninkuta, warmisninkuta, tatankuta ima apakampunankupaj, jamuchunkutaj. 20Ama llakikuchunkuchu imasninkumantapis, kaypi kallanqa imaspis, imachá kay Egiptopi tiyan chaymanta sumajnin kaj paykunajta kanqa.
21Israelpa wawasnenqa ajinata ruwarqanku. José paykunaman qorqa carrosta faraompa kamachisqanman jina, jinallataj mikhunastapis qorqa ñampi mikhunankupaj. 22Chaymanta p'achastapis mosojkunata qorqa mudakunankupaj sapa ujninkuman. Benjaminmantaj qorqa kinsa pachaj qolqeta, phishqa mudakuna p'achastawan. 23Tatanman apacherqa chunka burrospi cargasta, imachus Egiptopi sumajta poqoj chayta, waj chunka burrospi cargastataj trigota, t'antata, chanta qoqawistawan tatan ñanta jamuspa mikhunampaj. 24Joseqa wauqesninta kacharpayashaspa nerqa: Pajtataj ñampi phiñanakuspa maqanakushawajchej, nispa. Paykunataj riporqanku. 25Egiptomanta wichariytawan tatanku Jacob kasharqa chay Canaán jallp'aman chayarqanku. 26Jacobman willarqanku José kausakushasqantaraj, pay Egiptopi chay kamachej kasqanta. Paytaj ni ima niyta aterqachu, mana yuyarerqachu ni imata ninanta, nitaj creeytapis, imaraykuchus astawan llakikorqa yuyarispa, jinata willajtinku. 27Maypachachus allinta willajtinku, tukuy imata José nisqanta, carrosta Josej apachisqanta ripunampaj rikuspataj Jacobqa mayta kusikorqa. 28Chaymantaqa nerqa: Walejpacha, chayllata yachayta munarqani, waway Joseqa kausakushasqaraj. Amaraj wañushaspa rispa tinkumusaj, nispa.
Currently Selected:
GÉNESIS 45: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
