GÉNESIS 46
46
Jacob Egiptoman ripun
1Jinamanta Jacobqa purirerqa tukuy iman kajwan. Chayarqataj Beersebaman, chaypitaj rikuchikusta jaywarqa Isaac tatampa Diosninman. 2Chay ch'isi Israelman Dios parlarqa mosqoypi jina Jacob sutinmanta wajyaspa. Paytaj kuticherqa kaypi kashani, nispa.
3Chaypi Dios payman nerqa: Noqa Dios kani, tataykej Diosnin. Ama Egiptoman riyta manchachikuychu; chaypi mirachisaj mirayniykita uj jatun nación kanampaj. 4Noqa qanwan Egiptoman uraykusaj; noqallataj qhepaman mirayniykita orqhuspa kutichimusaj kayman. Chantapis wañojtiyki Joseyki qayllaykipi kanqa.
5Chaymanta Jacobqa Beersebamanta rillarqapuni. Israelpa wawasnenqa tatankuta, wawasninkuta, warmisninkuta ima faraompa carrosta ripunankupaj apachimusqampi churaykuspa pusakaporqanku. 6Jacobqa pininchá tiyaporqa chaykunawan riporqa Egiptoman. Chantapis apakaporqanku wakasninkuta, ovejasninkuta, imasninkuchá tiyaporqa Canaán jallp'api kashajtinku chaykunatawan. 7Tukuy qhari wawasnin, warmi wawasnin, qhari kaj allchhisnin, warmi kaj allchhisnin ima riporqanku paywan.
8Kaykuna karqanku israelitaspa sutisninku Egiptoman ripojkunajta; niyta munan Jacobpa mirayninmanta: Jacobpa kuraj kaj wawan Rubén. 9Rubempa wawasnintaj karqanku: Janoc, Falú, Hezrón, Carmi ima.
10Simeompa wawasnintaj karqanku: Jemuel, Jamín, Ohad, Jaquín, Zohar, Saul ima, mayqenchus karqa cananea warmej wawan.
11Levej wawasnintaj karqanku: Gersón, Coat, Merari ima.
12Judaj wawasnin karqanku: Er, Onán, Sela, Fares, Zara ima. Chaypacha Canaán jallp'api wañusqasña karqanku Erwan, Onanwan. Farespa wawasnin karqanku Hezronwan, Hamulwan.
13Isacarpa wawasnin karqanku: Tola, Fúa, Job, Simron ima.
14Zabulompa wawasnin karqanku: Sered, Elón, Jahleel ima.
15Chaykuna karqanku Leaj wawasnin, mayqenkunatachus Jacobpaj rejserqa chay, Padan-arampi kashaspa, Dina warmi wawantawan. Chaykunamanta mirajkunaqa karqanku kinsa chunka kinsayoj qharis, chanta warmis ima.
16Gadpa wawasnintaj karqanku: Zifión, Hagui, Ezbón, Suni, Eri, Arodi, Areli ima.
17Aserpa wawasnintaj karqanku: Imna, Isúa, Isúi, Bería; chaykunaj panankutaj karqa Sera. Beriaj wawasnin karqanku Heberwan, Malquielwan. 18Chaykuna karqanku Zilpaj wawasnin Jacobpaj rejsisqasnin. Payqa karqa warmi kamachin, mayqentachus Labán qoporqa wawan Leaman. Chaykunamanta kajkuna karqanku tukuyninkupi chunka sojtayoj.
19Jacobpa warmin Raquelpa wawasnin karqanku iskay: Josewan, Benjaminwan. 20Josej wawasnintaj Asenatpi rejsisqasnin iskay karqanku: Manaseswan, Efrainwan Egiptopi nacejkuna. Asenat warmenqa karqa On sacerdotej Potifaraj ususin. 21Benjamimpa wawasnintaj karqanku: Bela, Bequer, Asbel, Gera, Naamán, Ehi, Ros, Mupin, Hupin, Ard ima. 22Chaykuna karqanku Raquelpa miraynin Jacobpa warmimpata. Tukuynimpi chunka tawayoj karqanku.
23Dampa wawanqa karqa Husim.
24Neftaléj wawasnin karqanku: Jahseel, Gumi, Jezer, Silen ima. 25Chaykuna karqanku Bilhaj wawasnin Jacobpaj rejsisqasnin. Bilhaqa kamachin karqa, mayqentachus Labán qoporqa wawan Raquelman. Chaypa miraynenqa qanchis karqanku tukuyninkupi.
26Jacobwan Egiptoman chayajkuna, pay kikimpa yawarninmanta kajkuna karqanku sojta chunka sojtayoj, wawasnimpa warmisninta mana yupaspa. 27Josej wawasnenqa karqanku iskay, Egiptopi nacejkuna. Ajinata Jacobpa ayllun chayarqa Egiptoman qanchis chunka runas.
28-29Jacobqa ña chayanayashaspaña, Judá wawanta kacharqa José wawanman willamojta, jamunampaj taripaj Gosén chaynejman. Gosén chaynejman chayajtinkutaj, Joseqa kamacherqa kamachisnin carrosta wakichipunankuta tatanta taripaj rinampaj. Tatanwan tinkukuspataj Joseqa sumajta ujllaykorqa, unaytataj waqarqa tatan ujllarisqa. 30Chaymanta Israelqa nerqa José wawanman: Noqa kikiy, ñawisniywan rikukuyki, kausashajta taripakapuyki. Kunanqa atini wañupuyta!
31Chaymanta Joseqa wauqesninman, tatampa ayllusninman ima nerqa: Faraonman rispa willamusaj: Wauqesniy, tataypa tukuy familiasnin chayamushanku Canaán jallp'amanta noqawan tiyakoj. 32Paykunaqa jamushanku wakasninkuwan, ovejasninkuwan, imankuchá tiyan chaykunawan ima, imaraykuchus paykuna uywasllatapuni mirachiyta yachanku. 33-34Maypachachus faraón wajyasonqachej, tapusonqachejtaj imastachus ruwayta yachasqaykichejta, chaypacha qankunaqa ninkichej: Ovejasllatapuni mirachiyta yachasqaykichejta, ñaupa tatasniyku tatasniykichej jina, nispa. Ajinamanta qankuna Gosén jallp'api tiyakunkichej, imaraykuchus egipciospajqa mana allinchu ovejeroswan khuska tiyakoyqa.
Currently Selected:
GÉNESIS 46: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
Free Reading Plans and Devotionals related to GÉNESIS 46
Jesus in All of Genesis - a Video Devotional
Genesis 37-50 Explained | One Extraordinary Life
Jesus In All Of Genesis - A Video Devotional
