GÉNESIS 47
47
José parlan faraonwan
1Jinamanta Joseqa faraonwan parlaj rerqa. Payqa nerqa: Wauqesniy, tatay ima chayamunku Canaanmanta, paykunaqa Gosempiña kashasqanku ovejasninkuwan, wakasninkuwan, imasninkuchá tiyapun chaykunawan ima. 2Joseqa phishqa wauqesninta ajllaspa pusarqa faraonman paykunata rejsichinampaj. 3Jinamanta faraonqa paykunata taporqa: Imapitaj llank'ayta yachankichejri?, nispa. Paykunataj nerqanku: Noqayku kamachisniykeqa ovejasta mirachiyta yachayku ñaupa tatasniyku jina, nispa. 4Kunanqa kayman tiyakoj jamuyku ari, imaraykuchus Canaampeqa manchay yarqhay kashan, pastollapis mana kanchu uywasniykupaj. Chaypaj qan niwayku ari Gosén jallp'api tiyakunaykuta, nispa.
5Chaymanta faraonqa Joseman nerqa: Tatayki wauqesniyki ima qanwan tiyakoj jamunku. 6Egipto jallp'aqa qampa nisqaykipi. Qan qoy paykunaman Egiptopi sumajnin kaj Gosén jallp'ata, paykuna chaypi tiyakunankupaj. Sichus mayqen sumajta uywasta michiyta yachanku chayqa, churay ovejasniyta michipunawampaj.
7Joseqa tatantañataj pusarqa faraonman rejsichimunampaj. Jacobqa may sumajta yapaykorqa faraonta. 8Faraontaj payta taporqa: Mashkha watasniyojñataj kankiri?, nispa.
9Jacobtaj nerqa: Ujnejmantaj ujnejmantaj purisqaypi pachaj kinsa chunka watasniyojña kani. Chayqa pisillaraj, mana allin watastaqa manaraj rikunichu tukuy kausayniypi, ñaupa tatasniy rikusqanku chaytaqa manaraj rikunichu.
10Chaymanta Jacobqa faraonmanta tinkunakama nispa riporqa.
11Josetaj chaymanta rak'irarqa wauqesninman Egiptopi sumajnin kaj jallp'asta chaypi tiyakunankupaj faraompa nisqanman jina. Ajinamanta tatan Jacob wauqesnin ima jallp'asniyoj karqanku Ramsés jallp'asnejpi. 12Chantapis Joseqa mikhunastawan qorqa sapa uj aylluman mashkhachus kasqankuman jina, jinallataj imasninkuchus kasqanman jina.
13Chay tukuynejpi trigoqa manapuni karqachu, yarqhaytaj astawan astawan yapakusharqa. Wakin Egiptomanta kajkuna, Canaanmanta kajkunapiwan wañuraporqanku chay jina yarqhaywan. 14Joseqa tukuy qolqesta tantaykorqa Egiptomanta, jinallataj Canaanmantapis trigomanta pagasqasninkuta; chaytataj waqaycharqa faraompa palaciompi. 15Manaña qolqenku rantikunankupaj kajtintaj, ni Egiptopi, nitaj Canaampipis, chay runas Joseman nej jamorqanku: Qan mikhunata qowayku. Ama qhawakullawaykuchu ari yarqhaywan wañojta, imaraykuchus manaña qolqeykupis tiyapuwaykuchu.
16Josetaj paykunaman nerqa: Manaña qolqeykichej tiyajtenqa uywasniykichejta apamuychej ari, noqataj trigota qosqaykichej.
17Jinata nejtintaj egipcioswan cananeoswanqa apamorqanku caballosninkuta, ovejasninkuta, wakasninkuta, burrosninkuta ima, Joseman. Josetaj trigosta qorqa uywasninkumanta chay wata junt'ata. 18Chay wata tukukojtintaj qhepan wataqa ujtawan rillarqankutaj Joseman nej: Mana qanmanqa imatapis pakayta atiykumanchu wiraqochíy, manaña tiyapuwaykuchu qolqeyku; uywasniykupis qampallataña. Manaña imaykupis kanchu qanman trigomanta qonaykupaj; manachayqa jallp'asniykuwan, noqallaykuwanña. 19Qanllaña ari noqaykuta jallp'asniykutawan trigowan rantikapuwayku. Jinamanta faraompa kamachisnin kasqayku, jallp'asniykuta payllapajña llank'apusqayku. Qan qowayku ari mujuta tarpuspa kausanaykupaj, ajinamanta jallp'asniyku ama usunankupaj. Imaraykutaj qan qhawakullawaykuman jallp'asniykuwan khuska wañojtari?, nispa.
20Chaymanta Joseqa tukuy jallp'asta rantirarqa egipciosmanta faraompaj, imaraykuchus munaspa mana munaspa jallp'asninkuta vendepunanku karqa yarqhaywan ama wañunankupaj. Ajinamanta jallp'asninkoqa faraompa makinman chayarqa. 21Tukuynin Egiptopi kaj chhika kamachisman tukorqanku. 22Joseqa sacerdotespa jallp'asnillanta mana ranterqachu, imaraykuchus paykunamanqa faraón qorqa khuskan trigota. Chayrayku paykunaqa jallp'asninkuta mana venderqankuchu, imaraykuchus faraompa qosqan trigo mikhunankupaj kallarqa.
23Chaymanta Joseqa runasman nerqa: Kunanqa qankuna jallp'asniykichejwan khuska faraompata kankichej, noqa qankunata paypaj rantiykichej. 24Kayqa muju kunanqa tarpumuychej. Chay poqojtataj khuskampa khuskanninta cosechasmanta faraonman qonkichej. Chay wakintaj qankunapaj kanqa, tarpunaykichejpaj, mikhunaykichejpaj, wawasniykichej mikhunankupaj, pikunachá wasiykichejpi tiyakun chaykunapiwan mikhunankupaj.
25Paykunataj nerqanku: Qanqa k'acha runa kanki, noqaykuta khuyakuwayku, salvawaykutaj kausayniykuta; chayrayku kunanqa faraompa kamachisnin kasqayku.
26Ajinata Joseqa chay leyta churarqa Egiptopi, faraonman poqojmanta khuskampa khuskanninta qonata. Chay leyqa kunankama kashanrajpuni. Sacerdotesqa mana imatapis qonankuchu karqa, imaraykuchus paykunaj jallp'asninkoqa mana jayk'ajpis faraompa makinman chayarqachu.
27Israelitasqa Egiptopi tiyakaporqanku Gosén jallp'api, chaymanta qhepata paykunaqa ashkhata mirarqanku. 28Jacob tiyakorqa chunka phishqayoj watasta Egiptopi, jinamanta payqa chayarqa pachaj tawa chunka qanchisniyoj watasniyojman.
29Uj día Israelqa wañupoj jina kaspa, José wawanta wajyachimorqa ninampaj: Sichus qan cheqamanta noqata khuyayta munawanki chayqa, makiykita ukhuyman churaspa juray ari, imatachus nisusqayta ruwanaykipaj. Qanqa wawáy, ama ari kay Egiptopi p'ampawankichu. 30Maypachachus ñaupa tatasniywan samarikoj risaj chayqa, Egiptomanta orqhoway, tatasniypa sepulturanman p'ampamuwanki. Josetaj kuticherqa ajinata ruwasaj tatáy, nispa.
31Tatan Israelqa José wawanta jurachinankama karqa paytaj jurarqa. Chaymantataj Israelqa camampi saunan chaynejman k'umuykorqa.
Currently Selected:
GÉNESIS 47: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
