GÉNESIS 48
48
Jacob bendicin Efrainta Manasestawan
1Pisi tiempomantawan Joseman willarqanku tatan astawan onqoykapusqanta. Josetaj chayta uyarispa iskaynin wawasnin Manasesta Efraintawan pusarikuspa watukoj rerqa. 2Jacobtaj wawayki José jamususqa, nispa willajtinku, mayta kallpakuspa ñak'ayta camanmanta tiyaykamorqa. 3-4Chaymantataj Joseman nerqa: Tukuy atiyniyoj Dios Luz llajtapi rikhuriwarqa, bendiciwarqataj Canaán jallp'api, kay palabraswan: Noqa qanta ashkhata mirachisqayki, chay mirayniykimanta ashkha naciones ruwakonqanku. Chanta mana chayllachu, kay jallp'ata mirayniykiman qopusaj, paykunajta kanqa wiñaynintimpaj. 5Kunanqa qampa iskay wawasniyki Efrainwan Manaseswan kay Egipto jallp'api nacepusorqanku, manaraj qanwan noqa tinkukoj jamushajtiy; paykunapis noqajta kanku, Rubenwan Simeonwan jina. 6Qhepaman wawasniyki kanqankuraj chaykunapis qampa kanqanku, Efraimpata Manasespatawan wauqenku kasqankurayku paykunapis chayaqeta jap'illanqankutaj. 7Padan-aranmanta kutimushajtiy mamayki Raquel wañuporqa Canaán jallp'api, manaraj Efrataman chayamushaspa, chay Efrata ñampi p'ampaykorqani, kunantaj chayqa Belén sutiyoj.
8Jinata nishaspalla Israelqa Josej wawasninta ñak'ayta repararqa, taporqataj: Pistaj kaykunari?, nispa.
9Josetaj kuticherqa: Kaykunaqa wawasniy kanku Dios qowarqa kay Egiptopi. Tatantaj nerqa: Astawan qayllaykamuwaychej wawasníy, bendicionniyta qosqaykichej, nispa.
10Israelqa allin machuña karqa, chayrayku ñawisnenqa manaña imatapis allinta rikuyta aterqachu. Josetaj astawan wawasninta tatanman qayllaykucherqa, paytaj much'araspa ojllaykorqa. 11Chaymantataj Joseman nerqa: Noqaqa manañapuni ujtawan rikusuyta yuyarqanichu. Chaywampis Diosqa wawasniykitapis rejsichiwanraj.
12Joseqa tatampa arphisninmanta wawasninta suchurichispa qonqoriykukorqa ñaupaqempi pampaman umanta chayachinankama. 13Chaymantataj Joseqa iskaynin wawasninta aysariykukuspa Efrainta paña makinwan, Manasestataj lloq'e makinwan qayllaykorqa tatanman. Ajinamanta Efraenqa Israelpa lloq'enman chayarqa, Manasestaj pañanman. 14Israeltaj makisninta jaywarispa simp'aykorqa, paña makinta churarqa Efraimpa umanman, sullk'a kajman; lloq'e makintataj churarqa Manasespa umanman, kuraj kajpaman. 15-16Jinaspataj Joseta bendicerqa kay jinata: Tukuy atiyniyoj Dios, pitachus kasorqanku abuelosniy Abraham, Isaacwan; mayqenchus noqata pusaykachakuwarqa nacesqay ratomantapacha, tukuy sajra kajmanta waqaychawaj, ángel, kay wawasta bendicichun. Paykunanejta sutiy yuyarisqa kanampaj, jinallataj tatasniypa sutisnimpis Abrahampata, Isaacpatawan. Paykuna kachunku ashkha wawasniyoj, ashkhas kachunku kay mundopi.
17Joseman mana allinchu rijch'arqa, ajinata tatan Efraimpa umanman paña makinta churasqan. Chayrayku makinta jap'ispa Manasespa umanman churayta munarqa, jinata nishajtin. 18Kay jinata nispa: Mana jinachu chayqa tatáy. Kay kajraj kuraj kajqa. Paypa umanman makisniykita churay.
19Tatantaj mana munarqachu, nerqataj: Chaytaqa yachallani wawáy. Paypis uj jatun nacionman tukonqa. Chaywampis kay sullk'a kajtaj aswan jatun nación kanqa paymanta nisqaqa.
20Jacobqa chay diapacha bendicerqa paykunata kay jinata nispa: Qankunaj sutiykichejta oqharispa israelitasqa bendicionta qonqanku, nenqankutaj: Dios qanwan ruwachun imaynatachus Efrainwan Manaseswan ruwarqa ajinata, nispa. Ajinata Israelqa Efrainmanraj ñaupajta churarqa Manasesmanta nisqaqa. 21Chaymantataj Joseman nerqa: Qhaway, noqaqa wañupusajña, Dios qankunawan kanqa. Payllataj kutichisonqachej ñaupa tatasniykichejpa jallp'anman. 22Qanman qoyki aswan kurajta wauqesniykimanta nisqaqa Siquem jallp'ata, chaytari mayta maqanakuspa amorreosmanta qhechorqani.
Currently Selected:
GÉNESIS 48: QCHSB
Highlight
Share
Copy
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
